Ruma 15

Gekwa dukw ana a ge a ŋgulum a gà misle ŋgiɗ a

1 Kwa ana ndzəɗa aà kwa ika vatwa Mbulum a ka, say ki zlèkikwe a dər gà na ndzəɗa aà tar zukw tsiye. Ka ta gekwa dukw ana a tsahən aà ba kwa ɗekɗek a tsa. 2 Ku weke i liwiŋ kwa ma ge ka, dukw ana a ge a ŋgulum a gà asiŋ kwa ya ivaɗ. Ki zlèkikwe a dər tar, na dite ta ŋget a ndzəɗa i təv megìse ana ta gəs Mbulum a ya. 3 Aɗaba Yesuw Kiristi tekeɗe ka, a sasar mawàyà ba ŋgar tsa. Seyiŋ tsa ivaɗ, a ndza ka, kamala ana ta wetse i wakita Mbulum ka, ta gwa ahər: «Tàa tsik dukw ana ŋgwala tsiye aà kər Mbulum. Ama bazlam tar ata ka, ta wala dər aà iye ya.» 4 Kinehe kà sərakwa, dukw ana ta wetse i wakita Mbulum akahər ata ya, ta wetse ka, aà meɗìfè a kwa à dukw ana a da ndaka vatwa ŋa ya. Dite ka, Mbulum a sasar na ki mirekwe a dər aba dzəŋdzəŋ, à mèkwe a dərraha à arəv lele ya. Kamala taŋa ya na tsavəvvà ki dzelekwe a dukw ana Mbulum a tsik i sida ya, a gwa, i ta ge a ya. 5 I heme a Mbulum, mala məmàha à arəv a mburma, nda məvəla tar ndzəɗa, na dite ta mir aba a dzəŋdzəŋ a. I hemer a ka, i waya mə vəl a kurum madzala gà gər ilik ndəɓəts a təv ilik ŋa, ki zezemwim a dukw Yesuw Kiristi ana a ge akahər ata ya, 6 na dite kurum tserdze ki zèmbeɗwim a à Mbulum Tsir Yesuw Kiristi BATSAH kwa ŋa ya tits, bazlam kurum a ge a ilik a.

Gà mburma tserdze tì zèmbeɗe a à Mbulum

7 Kamala taŋa ya, ki giswim a ba ika magər kurum ilik ilik tserdze, kamala ana Yesuw Kiristi a gəs kurum a mbaŋa. Na kàa gwim kataya ka, dite na mburma tekeɗe, tì zèmbeɗe a à Mbulum a. 8 Kurum kà sərum, Yesuw Kiristi a dara ka, aà mazlàkà gà Yahuda aà mege dukw ata Mbulum a tsik i sida ya, a gà bàba gà tsir tar ana akahər ata ya, a gwa, i ta ge a nda ahər ŋgar a. Kamala taŋa ya, a ɗif a tar à dukw ana Mbulum a tsik i sida ya, ndzer kaɗəŋ, pàrsa iɗəm tsiye. 9 Ama mede ŋgar ana a dara ya mbaŋa ka, na dite gà na tar gà Yahuda tsiye, tì zèmbeɗe a à Mbulum a, agəra ŋgwal ŋgar ana a vəl a tar dùnùkw a. Ar ka, kamala ana a riŋ mewetse ŋa i wakita Mbulum ka, ta gwa:

«Aɗaba taŋa, i zèmbeɗe a à kər i liwiŋ gà mburma

ana gà Yahuda tsiye, i lèhek a dimis.»

10 Dite a riŋ mewetse ŋa asa ka, ta gwa:

«Kurum ana gà Yahuda tsiye ka, ŋgeywim ba

nda gà mburma Mbulum ana ɗa piŋŋe ya.»

11 Ar riŋ mewetse ŋa i tseke ŋgiɗ asa ka, ta gwa:

«Kurum ana gà Yahuda tsiye ka,

zàmbaɗum à BATSAH kwa ŋa. Zlə̀bum dər tserdze,

wura ilik ma zeha tsa.»

12 Ama Ezaya, mala məmà à bazlam Mbulum ana akahər ata ya, a tsik mbaŋa asa ka, a gwa:

«Wura a riŋ ilik i gwala Yasa a dere a,

à pèt a aba mba. A dere a ka,

aà makwàrà gà na gà Yahuda tsiye mbaŋa.

Tar tekeɗe, ti dzele a dukw ana Mbulum a tsik

i sida ya, a gwa, i ge a nda ahər ŋgar a.»

13 Kinehe ka, iye riŋ i heme a a Mbulum, mala metsìkè dukw ana a tsik a ka, dite gà mburma ti dzele a ya, mə vəl a kurum maŋgayaba, mà rah a gəzləŋ kurum tsìsl lele, nda matasla yam zayya, agəra megìse kurum ana kàa gəsum ŋgat nda gəzləŋ a. Kamala taŋa ya, madzala gà gər kurum tekeɗe, fit a de a a təv Mbulum, nda ndzəɗa Mezite Mesife ŋgar.

Aɗaba la na Pul a wetse a taraha wakita parakka lele ya?

14 Gà damər gà, iye nda gər gà ka, i sər ndzer, kurum riŋ ki gwim a dukw ana ŋgwal ŋa ya, ku mege Yàa tsik a kurum tsa tekeɗe ya. Kà sərum dukw ana Mbulum a waya ya lele. Ki slwim aà meɗebe a à metsehe ika magər kurum mbaŋa. 15 Ama wakita aaha i wetse a kurumaha ya ka, gà asiŋ gà bazlam ŋgiɗ iɗəm ka, Yàa ndaha a kurum dərraha aà are parakka, i waya ka, mə̀ mà a kurumara a gər a. I sle a aà mewetse a kurumaha kamala taŋa ya ka, aɗaba ŋgwal Mbulum ana a giŋ a. 16 A giŋ ŋgwal ŋa ka, na a zla iye aà meɗè à zləm Yesuw Kiristi ika magər gà na tar gà Yahuda tsiye. Yàa vəl ba gà a ahər a Mbulum fit, aà meɗìfè à bazlam ŋgwal ŋa ana a dara i təv ŋgar a. I tsik a ka, a gà na gà Yahuda tsiye, na dite ta gis a ŋgat a. A sèsiŋ ti ne a kamala dukw taf ana ta vəlar, a tsahən ahər, dite Mezite Mesife ŋgar a palara iɗəm tar a. 17 Kamala taŋa ya, megemir Mbulum ata i ge a ya ka, i sle a aà mege zlapa ŋgarra lele ika miɗ ŋgar, agəra ana mə̀r riŋ mandza ŋa i təv ilik ŋa nda Yesuw Kiristi ya. 18 A sèsiŋ mesèse ahər bazlam ŋgiɗ tsa. Say i me a ka, à dukw ana Yesuw Kiristi a ge nda ahər gà ya. A viliŋ ndzəɗa aà metsike bazlam ŋgar a gà na gà Yahuda tsiye, dite ka, tə dara a təv ŋgar a, ta gəs ahəm ŋgar. Na tàa dara ka, agəra dukw ana i ge ya, nda bazlam ana i tsik a, 19 dite agəra dukw mene aà mburma ata pampam a ge nda ndzəɗa Mezite Mesife Mbulum nda ahər gà ata ya mbaŋa. Kamala taŋa ya, Yàa ŋgat vatwa aà meɗife à bazlam ŋgwal ŋa ana aɗaba Yesuw Kiristi ya, a gà mburma tserdze, ika tseke Yeruzalem a, tsikw Yàa ndze dər aka ahəɗ Iliriya. 20 I huɗ megemir gà ata i ge ya ka, a sèsiŋ i tsikewa bazlam ŋgwal ŋana i kwite ana tàa tsaraka maɗə̀và zləm Yesuw Kiristi zukw tsiye ɗekɗek pəra, tsəka, zləməŋa fit dze tsa. Aɗaba a sèsiŋ məmbə̀ɗàba aka madzàha ga misle ŋgiɗ tsa, dite ka, ta gwa, araha aka mbəɗ akaba ya tsa. 21 I waya ivaɗ mege ka, kamala ana a riŋ mewetse ŋa i wakita Mbulum ka, ta gwa:

«Gà na tàa tsik a tar duwa aka gər ŋgar tsiye ka,

tar na ti tsereke a ya.

Gà na tàa tsaraka duwa ilik aka gər ŋgar tsiye ka,

tar na ti sir a ya.»

Pul a yaha vatwa aà mada a Ruma

22 Yàa dzala sik diŋ, i waya aà madaha a təv kurum zləmana. Ama ka, Yàa ŋgat vatwa tsa, aɗaba megemir gà ata i ge ya. 23 I huɗ mive ya hinne ka, kàa kìvwimiŋ, a sèsiŋ aà maŋgata a kurum. Ama kinehe ka, Yàa ndəv à megemir gà ata i faha ya. 24 Taŋa i gwa ka, i dehe a a təv kurum kuɗa. Aɗaba i waya i de a aka ahəɗ Aspaniya. I dehe a ka, nda təv kurum, ki ndzekwe a zaakwa, dite na ki mwimiŋ a ba a à ndzəɗa ya. A sèsiŋ ki zlèkwim a iye nda dukw mada ika vatwa ya asa. 25 Ama kəla ka, i mbìɗ a gər a Yeruzalem aà mazlàkà gà mburma Mbulum ana i fata ya dzekwiŋ. 26 Aɗaba gà ɓəzla magəsa Mbulum ana ɗa ika ahəɗ Akaya, i Kurintiya ya, nda gà na i Makaduniya ya, ta mà akaba à bazlam, ta gwa: «Yahakwa gər a siŋgwe, kà slərakwaha a gà ɓəzla matawak ana ika magər gà mburma Mbulum ana i Yeruzalem a.» I de a dər. 27 Tə dzala taŋa ka, ika magər tar. Ama ndzer kaɗəŋ, mazlàkà gà mburma ata ka, ŋgwal ŋa. Aɗaba tar tekeɗe, kamala megweɗe ya ka, ta mà akaba à dukw ŋgwal ŋa ana Mbulum a tsik a tar i sida ya, a gwa, i ta vile a kurum a ya, nda gà na gà Yahuda tsiye. Aɗaba taŋa, lele na gà na tar gà Yahuda tsiye, tì zlèk a gà Yahuda ata i təv dukw ana a sle aà ter a ya ya. 28 Kamala taŋa ya, i təv ana Yàa ndəv à meslire gà, kamala megweɗe ya asa, Yàa dza a tar aba siŋgwe ata, tə slər dər iye ya ka, i dehe a a təv kurum i təv ana i de a aka ahəɗ Aspaniya ata ya. 29 Na Yàa daha a təv kurum ka, i sər, Yesuw Kiristi a pise a kwe a ahəm hinne, agəra ana kwa mandza ŋa i təv ilik ŋa ya.

30 Gà damər ga, i ge a kurum a kamkam nda zləm Yesuw Kiristi BATSAH kwa ŋa, dite nda mawàyà ba Mezite Mesife ŋgar ana a vəl a kwa ika magər kwa ya asa: Zlakum iye, hamum a Mbulum aɗaba iye. Hamumar ka, nda gəzləŋ ilik, 31 na dite Yàa da aka ahəɗ Yuda ka, gà mburma ana iɗəm, tə sər Yesuw Kiristi tsiye, a zlèk a iye i ahər tar a. Hamumar mbaŋa ka, na dite dukw ana i ahər gà ya, mà tsahən aà gà mburma ŋgar ana a riŋ i Yeruzalem i fata ya. 32 Kamala taŋa ya, na Mbulum aka waya ka, i dehe a a təv kurum ata ka, nda maŋgayaba lele. Na Yàa ndzeha ka, ki ndzekwe a i təv ilik ŋa nda gà iye, ki mwimiŋ a ba à ndzəɗa.

33 Mbulum, mala məvəla zayzay a mburma, ma ndza i təv kurum ilik ilik tserdze. *Amin.