Ruma 14

Màkwa à bakal a gà misle ŋgiɗ tsa

1 Na bəla wura ndzəɗa ŋgar a riŋ zukw tsa ika vatwa Mbulum ka, gəsum aàba ŋgat lele mbaŋa. Ka ta mbetswimar ahəm aka dukw ana aka dzala pam aà biy kurum a tsa. 2 I tsik taŋa ndeyndey ka, aɗaba mazəma dukw mezime. Gà misle ŋgiɗ ti dzele a ka, dukw mezime tserdze ka, dukw mewisle iɗəm tsa, ti zimiŋa. Ama gà biy ŋgiɗ ibam, gà na ndzəɗa tar a riŋ tsa ika vatwa Mbulum a ka, ta gweɗe a, slu ka, awisl, mìi pèpìɗ a tsa. Ti zim a ka, ala bagwar pəra. 3 Ama kər ana ki zim a duwa tserdze ya ka, ka ta fə̀r aà wele ana a sasar tsiye, kamala za ya ɓav tsa. Dite kər ana a sàsak tsiye, ka ta mà à bakal a wele ana a pèpìɗ a ya ɓav tsa asa. Aɗaba Mbulum ka, a wele a ikaba kurum a tsa, à gis a biy ŋgiɗ aaha mbaŋa. 4 Kər dze ana, weke na ki me a à bakal a mala meslire misle ŋgiɗ a? Na bəla dukw ana aka ge ndaka vatwa ŋa tsəka, mala ga ŋgar na a tsiker ahər a ya, nda gà aka ge lele ka, hiywe ŋgat na a tsiker a ya. Ama i təv kurum kinehe tekeɗe, kamala taŋa ya mbaŋa. Mala meslire a ge a lele hiywe, aɗaba Mbulum Batsah ŋgar ŋa a riŋ, ŋgat mala ndzəɗa, à zlèk a ŋgat, na dite a sle a aà medìɗè a ika vatwa ŋgar a tsiye.

5 Gà misle ŋgiɗ ta ndeɗiŋa: «Gà pat miveke ŋgiɗ ka, ti zè a biy ŋgiɗ nda batsah ŋa na ika miɗ Mbulum a.» Gà biy ŋgiɗ ibam, ta gweɗe a: «Gà pat miveke ka, ta geye akaba fit kalkal dze.» Say ku weke ma ge ka, kamala ana a dzala i gər ŋgar a, ma zazam taŋa. 6 Wur ana a dzele a kamala taŋa ya, a gweɗe a, pat ŋgiɗ a za biy ŋgiɗ a ka, a ge a dukw ata ka, a sasar aà mazàmbàɗà à BATSAH kwa ŋa. Ar ka, kalkal wele ŋgiɗ aaha a wele a ikaba gà pat a tsiye mbaŋa. Wur ana a zim a duwa zləməŋa pəra ya tekeɗe, a sasar aà mazàmbàɗà à BATSAH kwa ŋa mbaŋa, aɗaba a ge a dərraha kəkaaha a Mbulum nda dukw ana a zim a ya. Dite bəla wur ana a wele a ikaba dukw mezime ya, a gweɗe a, naha ka, awisl a ka, a sasar mazàmbàɗà à BATSAH kwa ŋa asa. Ŋgat tekeɗe, a ge a dərraha kəkaaha a Mbulum mbaŋa.

7 Wura a riŋ ilik ika magər kwa gà mburma Mbulum, a ndze a aà bəra ka, nda mezìwè gər ŋgar tsa. Dite bəla i təv ana à mite a ya tekeɗe, nda ahər ŋgar tsa asa mbaŋa. 8 Na i təv ana kinehe kwa riŋ ki ndzekwe a aà bəra ka, aà mazàmbàɗà à BATSAH kwa ŋa. Dite i təv ana ki metekwe a asa ya ka, ki zèmbeɗekwe a dər hiywe. Kamala taŋa ya, ku mege kwa riŋ nda are, kige tsa bəla kàa matakwa tekeɗe ibam a ka, kwa tserdze biy Yesuw Kiristi BATSAH kwa ŋa. 9 Aɗaba ŋgat a mət, a mbəlara iɗəm a ka, na dite a ne Batsah ŋa ika gər gà na tar riŋ nda are ya, nda gà na tàa mata ya tserdze. 10 Na kataya dze ana, aàla na ki me a à bakal a misle ŋgiɗ a? Kige tsa aàmala dze ya na ki fir ahər a kamala za ya? Aɗaba kà sər tsiye, kwa tserdze ki tèkwe a a təv seriye aka miɗ Mbulum a. Ŋgat na a ses a ikaba bazlam ŋa ya. 11 Aɗaba ar ka, kamala ana a riŋ mewetse ŋa i wakita ka, ta gwa:

«BATSAH kwa ŋa a gwa ka: I tsik ka, nda ndzer,

ku weke a dere a,

à dze a gurmits a bəɗ aka miɗ gà.

Ku weke a tsik aà iye a parakka,

iye na Mbulum a.»

12 Kamala taŋa ya, ku weke hə̀ndə̀sl bakal ŋgar à dèn a ŋgat, a tsik a parakka ika miɗ Mbulum, na dukw ana a ge ya.

Ka ɗifekwa à mege bakal a gà misle ŋgiɗ tsa

13 Aɗaba taŋa, kà màkwaba à bakal asa tsa. Ama kurum kinehe ka, ki zlwim a metseke i vatwa gà damər kurum a ivaɗ. Ŋgulum ki dzelwim a ka, aka vatwa ana a da fehhè lele, duwa ikəka tsa, dite ka, gà damər kurum ata ti ndif ahər a sik, tì dìɗ a dər a bakal tsiye. 14 Iye kəla ka, i sər ndzer, agəra ana iye riŋ mandza ŋa nda Yesuw BATSAH kwa ŋa ya, dukw mezime ka, awisl ilik tsa. Ama na wura a gweɗe a, dukw aaha, kige tsa naaka awisl ka, ma zəm tsa, aɗaba i təv ŋgar ka, a ne aaka a ŋgwala tsa kaɗəŋ. 15 Kamala taŋa ya, na bəla kər kàa zəm ka, kà wiser ka, à gər. Dukw ata kì ger ka, kamala ana kà waya ŋgat asa tsiye. Tsaatsa Yesuw Kiristi a mət ka, aɗaba ŋgat mbaŋa. Agəra taŋa, dukw ana ki zim a ya ka, mà dəɗ à ŋgat a bakal tsa. 16 Kər ki gweɗe a, dukw ana ki ge a ya ka, ŋgwal ŋa lele na i təv yak a. Ama na kàa sər, dukw ata ki ge a ka, a tsahən aà tar tsa, ta meke a à bakal ka, ŋgùlum sifek miyak dər. 17 I təv kwa ana kà hənakwa à gər a bəɗ a Mbulum BATSAH kwa ŋa ya ka, bazlam dukw ana ti zim a ya, ndəna ti zim a tsiye, kige tsa, masà dukw mese ka, a ge a ŋgulum tsa. Dukw ana ŋgwal ŋa i *mekwere Mbulum ivaɗ ka, Mezite Mesife ŋgar ana a ge a megemir i təv kwa ya. A zlèk a kwa aà mege dukw ana ŋgwal ŋa ya ika magər kwa, a vile a kwe a zayya, nda maŋgayaba lele asa. 18 Na wura a ge a meslire a Yesuw Kiristi kataya ka, à tsehin a aà Mbulum, dite gà mburma tserdze tì zlibe a à ŋgat mbaŋa.

19 Aɗaba taŋa, mə̀rakwa aàba aà mege dukw ana ki ndzekwe a dər zayya ika magər kwa, à zlèk a gà asiŋ ŋa aà məvə̀làba ndzəɗa ika vatwa Mbulum a sah lele. 20 Ka tə nəs à megemir Mbulum nda dukw ana ki zim a ya tsa. Dukw mezime fit dze ka, awisl tsa kaɗəŋ. Ama na bəla ki zimiŋa, dite gà misle ŋgiɗ tì dìɗ a dər a bakal aɗaba ana kà zəm a ka, ka zəm tsa. Ŋgwal ŋa tsa na kàa zəm a. 21 Aɗaba taŋa, dukw ana ta gwa ahər, ŋgwal ŋa tsa, à dìɗ a à damər yak ika vatwa Mbulum a ka, ŋgulum ki ge tsa. Bəla məpapəɗa slu ata, kige tsa masà guzum nda gà ku mege dukùla tserdze tekeɗe ya. 22 Dukw ana kàa dzala, kàa waya bəla awara ya ka, ndza dər i gər yak ɗekɗek, ka ti tsik a wura tsa. Ma ndza ka, ika magər kurum nda Mbulum ilik. Wur ana a ge a gà dukw ata ka, nda madzala gà gər ŋgar ilik sah lele, a gweɗe a, naha ka, awisl, taŋa ka, ndzer kaɗəŋ, kige tsa awisl tsiye ka, ŋgat na maŋgayaba ika gər ŋgar a. 23 Ama wur ana madzala gà gər ŋgar wakit wakit, a gweɗe a, naha ka, awisl, aləka i dəba ŋa ya, aka zəm ka, seriye à gis a ŋgat, aɗaba aka tike madzala gà gər ŋgar terwihhwe a dukw ana a ge a nda ndzer a tsa. Aɗaba kà sərakwa, dukw ana ka sər ndzer, naha ka, awisl, dite kàa ge ka, kàa ge bakal.