Ruma 13

Gəsum ahəm aà gà na ta kwere a mburma ya

1 Kinehe ka, ku mege weke mà gəs ahəm aà gà bàba ŋa ana ta kwere a mburma ya, aɗaba Mbulum na a dza aɗəm tar a. Ŋgat na a vəl a tar ndzəɗa ya mbaŋa, tsəka, ta wal aaka tsa. 2 Aɗaba taŋa, na bəla wura səfəl i gər ŋgar, a pese a aka gà bàba ŋa ata ta kwere a mburma ya ka, a waya dukw ana Mbulum a tsik a tsa. Gà na tàa ge der kataya ka, ta waya mada à ba tar a seriye nda ahər tar ŋa. 3 Wur ana aka ge dukw ana ŋgwal ŋa ya ka, a ge a magəɗa a gà Əbay ata asa tsa. Say gà na tàa ge a dukw ata ŋgwal ŋa tsiye dzekwiŋ, na hìriɓ hìriɓ ta ge a ter a magəɗa ya. Aɗaba taŋa, na aka sàs a kurum mandza zay, ze magəɗa ŋgumna ka, gwim dukw ata ŋgwal ŋa ya, dite na ki ndzwim a barbarərra nda gà tar lele ya. 4 Aɗaba tar ata ka, tar riŋ ta ge a megemir Mbulum, tì zlèk a kurum aà mege dukw ana ŋgwal ŋa ya mbaŋa. Ama na bəla kàa gwim dukw ana ŋgwal ŋa tsiye ka, say ki gwim a ter a magəɗa, tsəka, aɗaba ndzəɗa ata Mbulum a vəl a tar a ka, taf masakəŋa tsa. Tar ka, gà ɓəzla megemir Mbulum aà meɗìfè dər ka, a tike a matsəɓatsəɓ aka gà na tàa ge dukw ana ŋgwal ŋa tsiye, à tètìk a ter a ya. 5 Aɗaba taŋa na, say ki giswim a ahəm aà gà na ta kwere a mburma ya. Ki giswim a ka, agəra mesewere are ana ki ŋgetwime a ya ɗekɗek tsa. Ama ki giswim a ka, aɗaba kà sərum i madzala gà gər kurum, mege dukw ata na ŋgwal ŋa ya mbaŋa.

6 Agəra taŋa, na ki dzwìm a hadam mbaŋa ya. Aɗaba Mbulum na a dza aɗəm gà taŋa ta ger a megemir lele, ti dzik a hadam a, na dite ta ge a dukw ana ndaka vatwa ŋa, a tsahən aà Mbulum a. 7 Ki dzwìm a ter a tserdze, na dukw ana a da ndaka vatwa ŋa, ta wiz aà kurum a. Kamala megweɗe ya, na tàa wiz aà kurum hadam ka, ki dzwìm a kamala ana ta wiz a. Na bəla ta wiz aà kurum dukw dùwan ka, ki dzwìm a kamala taŋa ya mbaŋa. Zàmbaɗum à gà bàba ŋa ana ta kwere a kurum a, gəsum aà tar bazlam lele.

Mendze gà mburma ana i təv dzaydzay ŋa ya

8 Na wura aka vəl a kurum gwèdèrè, bəla biy dukùla tserdze ka, pə̀lumar dukw ŋgar, ma zeha a təv kurum kwizikw tsidze. Say duwa ilik kə̀la ka, mawàyà ba na ma zeha a təv kurum a. Wayum gà asiŋ gà mburma ilik ilik tserdze aka miɗ aka miɗ. Aɗaba wur ana aka waya mburma ya ka, aka zazam məpala ahəm Mbulum terwihhwe lele. 9 Kà sərum məpala ahəm ŋgar ana a gwa ka, ki ge muva tsa, ki ge akəl tsa, ki ge are aka dukw mburma tsiye. Ama gà asiŋ ŋa a riŋ pampam hinne asa. Gər məpala ahəm ata tserdze ya, a sasar aà megweɗe ka: «Waya mburma kamala ana kà waya ba yak a.» 10 Ku weke na aka waya mburma kamala taŋa ya ka, a ge a dukw bakal a mburma tsa. Aɗaba taŋa, na kàa waya mburma kataya ka, kàa zazam məpala ahəm ata ka, terwihhwe lele ndzer.

11 Gwim kataya nda ndzer, aɗaba kà sərum, tə̀vəməŋa aka ndze aɗəm, mimèhe ba ide kuɗa, bèzlgèrek pìɗekwim ika mendze are ya. Pat ana Mbulum a ta mbil a à kwa ya ka, aka à mendze aɗəm bise, aɗaba mendze ŋa a riŋ diriŋ kamala ana kà lah megìsekwa Yesuw Kiristi nda gəzləŋ a asa tsa. 12 Aɗaba ar ka, kamala həvəɗ ana wetititittè a de a iɗəm a, dzaydzay ŋa a dere a ya. Kinehe ka, məsakukwa à megemir luvuŋ. Ki ndzìkikwe a dukw ahər ana i təv dzaydzay ŋa ya, aà mege dər guvəl aà luvuŋ, dite ka, ki mbèkwe ahəriŋa. 13 Mede kwa ma ge ka, ndaka vatwa ŋa lele, kamala gà mburma ana i təv dzaydzay ŋa ya. Ku kwayakwa aà guzum tsa, ka ti yahakwa dukw meeweke nda màŋgùlùhuɗ tsilikw tsilikw tsa. Ka ta gekwa dukw mezelme nda gà məkəs, kige tsa, nda gà asləka tsilikw tsilikw tsa asa. Ki gekwa maàga nda mege are aka dukw mburma tsa asa mbaŋa. 14 Ama Yesuw Kiristi BATSAH kwa ŋa, ma ne ka, kamala dukw ahər kurum a. Ki ndzwim a ka, slìppè i ba ŋgar. Ka wiswim ba à gər nda dukw ana ŋgwala tsa, ba kurum a waya aà mege ya asa tsa.