Ruma 12

Mede gà mburma ana tàa gəs ahəm aà Mbulum a

1 Aɗaba taŋa, gà damər gà, i ge a kurum a kamkam: Kinehe ka, vəlum ba kurum ədəts a ahər a Mbulum, agəra ana kà ndzekwar are tsehe kataya ya. Ki vilwimer a ba ka, daga kinehe, kamala dukw ana ta kə̀ɗar taf masakəŋa ya, ku mege kinehe kurum riŋ nda are tekeɗe ya. Dukw ata ta kə̀ɗar a ka, ma ne biy ŋgar fit, dite ka, mà tsahən ahər kuɗa. Taŋa ka, vatwa ndzer ŋa ana biy mahàmà a Mbulum a. 2 Ka tə zazamum mede gà mburma ana ta ge a dukw gər ahəɗ a tsa. Vəlum vatwa a Mbulum ivaɗ, ma da a gəzləŋ kurum, mə̀ mbəɗ dər, na dite ŋgiletittè ki nwim a gà awiya ŋa ya. Kamala taŋa ya na ki sirwim a dukw ana Mbulum a waya ya. Kamala megweɗe ya, ki sirwim a dər ka, dukw ana ŋgwal ŋa, a tsahən ahər, a de a ndaka vatwa ŋa kalkal a.

3 Mbulum aka giŋ ŋgwal ŋa, aka tike iye aà megemir ŋgar. Aɗaba taŋa, iye ihər i gweɗe a kurum a ilik ilik tserdze ka: Kà ɗwim à gər kurum, waytsa mə̀r ŋa mà za biy na a tsahən aà mburma tsa. Ki dzelwim a ivaɗ ka, ku weke à fir aà ba ŋgar ka, meme na i ge a ya, dite i de a ndaka vatwa ana ŋgwal ŋa ya. Ki zezemwim a ka, dukw ana Mbulum a vəl a kurum i təv megìse ana kə̀ gəsum ŋgat a, na dite ki livwime a à gər kurum ka, dàyday a. 4 Samatum ba kurum kwaŋ. Ar ka, ilik. Ama a riŋ nda gà təv medzìve pampam. Təv ata tekeɗe ka, a riŋ nda gà megemir ŋgar pampam asa mbaŋa. 5 Kamala taŋa ya, kwa tekeɗe ka, kataya mbaŋa asa. Kwa tserdze ka, pampam hinne. Ama kà nekwa ka, ba ilik na i ahər Yesuw Kiristi ya, madzə̀và ŋa aàba kamala təv medzìve ba kwa mburma ya. 6 Mbulum a vəl a kwa ndzəɗa pampam, kamala ana ŋgat a waya məvəla a kwa nda ŋgwal ŋgar a. Aɗaba taŋa, ku weke tekeɗe, ma ge megemir nda ŋgwal ndzəɗa ata a vəlar a. Na Mbulum aka vəlak ndzəɗa aà məma à bazlam ŋgar a gà mburma ka, mà a tar dər kamala ana a da ndaka vatwa ŋa ya, ki himbir a tsa, ki sìkèh a dər aaka tsa asa. 7 Na bəla aka vəlak ndzəɗa aà mazlàkà gà mburma ŋgar ata ka, zlak dər tar. Na bəla aka vəlak ndzəɗa aà metsìkè a tar guma ŋgar bìleme ka, tsik a tar mbaŋa. 8 Dite bəla na aka vəlak ndzəɗa aà mimè a taraha à arəv ka, mà a tar dərraha asa. Na bəla misle ŋgiɗ aka ŋgat ndzəɗa aà məvəla duwa a gà na duwa a sle aà ter a ya ka, mə vəl a tar gər sah nda gəzləŋ ilik. Na bəla biy ŋgiɗ, aka ŋgat ndzəɗa aà mene batsah ŋa ika gər tar ka, mà gəs aàba tar lele. Kige tsa bəla biy ŋgiɗ asa aka ŋgat ndzəɗa aà mege a tar ŋgwal ŋa ka, ma ge nda maŋgayaba lele mbaŋa.

9 Mawàyà ba kurum ma ge ka, nda gəzləŋ ilik, wirwir ma ge iɗəm tsa. Tə̀zum aà dukw bakal a. Zazamum ka, dukw ana ŋgwal ŋa ya kəla pat, ku mege ndeɗime ivaɗ. 10 Wayum ba ika magər kurum, aɗaba ana kurum ka, nda gà damər ika vatwa Mbulum a. Ku weke mə̀ fə̀r aà damər ŋgar ka, hə̀zkə̀kə̀mma batsah ŋa kamala ana a za ŋgat ŋa ya. 11 Ka ta gwim màsar tsa. Vəlum ba kurum a ahər a mege megemir Yesuw Kiristi BATSAH kwa ŋa lele. Mezite Mesife Mbulum mà zlak kurum, na dite ki gwimer meslire terwihhwe nda ndzer ŋa lele ya. 12 Ŋgayawum ba aɗaba madzala gà gər aka dukw ana Mbulum a gwa, i ta vile a kurum a i sida ya ya. I təv ana ki sèwèrwim a are ya ka, mə̀rum aba sah lele, bàsumaraha. Hamum a Mbulum kəla pat, kà yum ba tsa. 13 Na duwa aka sle aà gà damər kurum ana ika vatwa Mbulum a ka, zlakum tar. Gə̀sawum gà mbəlakw lele.

14 Hamum a Mbulum, na dite a pise a ahəm a gà na ta ge a kurum a matawak a. Ka vəlum a tar mezelme tsa. 15 I təv ana gà mburma ta ŋgeye a ba ka, kurum tekeɗe, ŋgayum ba akaba tserdze mbeete. Na bəla ti tiwe a ka, kurum ibam, ki tiwim akaba a nda gà tar mbaŋa asa. 16 Gəsum aàba ahəm ka, terwihhwe a təv ilik ŋa. Kà sə̀ŋgə̀rum à ba kurum aka gər gà misle ŋgiɗ nda mawàlà ika megemir a tsa. Ki giswim aàba a gà na zləm tar a riŋ tsiye mbaŋa. Ka tə samatum ba kurum ka, waytsa kamala ana kurum ka, gà ɓəzla masəra duwa hinne ya tsa.

17 Na bəla wura aka ge a kurum dukw ana ŋgwal ŋa tsiye ka, ka ta mumar dər aɗəm tsa, Ki gwim a metsehe nda təv dukw ana ŋgwal ŋa ya hiywe, na dite gà mburma tserdze, ta gweɗe a aà kurum a, gà ŋgwal ŋa ya ivaɗ. 18 Kurum ka, mə̀rum aba sah aà mege dukw ata ŋgwal ŋa ya, na dite ki ndzwim a barbarərra ika magər kurum nda gà mburma tserdze ya, na mege a ge a ba ya. 19 Gà masla gà, i tsik ka, ndzer. Ka ta mùm aɗəm à bakal a mburma tsa. Məsakum à matsəɓatsəɓ ŋa a ahər a Mbulum, à tètiker a mba. Aɗaba a riŋ mewetse ŋa i wakita ŋgar ka, ta gwa: «BATSAH kwa ŋa a gwa ka: Dukw ana tàa gek ŋgwal ŋa tsiye ka, iye na i pìl a kər a, tsəka, kər ŋa tsa. Iye na i ge a seriye ŋa ya.» 20 Ama kurum kinehe, gwim ka, kamala ana a riŋ mewetse ŋa i wakita mbaŋa ka, ta gwa: «Na may a riŋ a wir a aà mala mene are yak ka, vəlar dukw mezime, ma zəm. Kige tsa bəla yam aka kəɗ ka, vəlar yam, ma sa. Na kàa ge dər kataya ka, kàa ndaɗa aaka hwarwa.» 21 Aɗaba taŋa, kər ka, ge metsehe lele, na dite dukw bakal ana ta gek a ka, mə̀ mba aà kər tsiye. Ge dukw ana ŋgwal ŋa ya seyiŋ ivaɗ, na dite ki sewle a aà dukw bakal ata ya.