Ruma 11

Gà Isərayel ti ndze are tsehe a Mbulum

1 Kamala taŋa ya, Kinehe ka, i wiziŋa. Na kataya ana, wànà Mbulum aka məsak à gà mburma ŋgar ata ya? Awaŋ, aka məsak à tar tsa. Iye nda gər gà tekeɗe ka, kəla gà Isərayel ana i gwala Abəraham a. I dara ka, i hwife Benyamin a. 2 Mbulum aka məsak à gà mburma ŋgar ana a pala tar daga aà gər malahalah ŋa ata ya tsa. Kurum kà sərum tsiye, na dukw ana i wakita Mbulum ka, Iliya a ge seriye aà gà Isərayel ika miɗ Mbulum a. A gwaɗa a Mbulum ka: 3 «Batsah ga ŋa, gà mburma aaha tàa bats gà ɓəzla məma à guma yak. Dite tàa mbazla à təv məbatsa dukw yak ana mì batsawak a mbaŋa. Iye ilik na i zeha, i zezem a kər a. Dite araha ka, ta waya mekìɗe iye asa mbaŋa ana, meme?» 4 Yaw, aləka i dəba ŋa ya, Mbulum a gwaɗar aaka dze ana, dukùla? A gwaɗar aaka ka: «Awaŋ, kər ilik tsa, na a zeha ya. Yàa zeha à gà mburma gà ka, dəbuw təsəla na ti zezem a iye ya. Aɗaba tar tekeɗe, tàa dza gurmits a bəɗ a dukw ana gà asiŋ ŋa ti ne dər mbulum, tə zalar Ba/?al a tsa.» 5 Kamala taŋa ya, i təv kwa kinehe tekeɗe ka, kataya mbaŋa. Mbulum aka pala gà asiŋ gà misle ŋgiɗ əŋgal ika magər gà Isərayel a, aɗaba ana ti ndzer are tsehe ya. 6 Mipele ata a pala tar, a ge a tar ŋgwal ŋa ya ka, agəra megemir tar ana ta ger a ŋgwal ŋa ya tsa. Na mege a pala tar ka, aɗaba megemir tar ana ta ger a ŋgwal ŋa ya ka, ana ka, dukw taf a ge a iɗəm asa tsa. A pəl a tar taŋa ka, dukw maya ba tar pəra.

7 Dite kinehe ana, ki gweɗekwe a ana, meme? Ki gweɗekwe a ka, dukw ana gà Isərayel ti yaha ka, ta ŋgat tsa. Ama kəla ka, mburma ndaw tsa na i liwiŋ tar Mbulum a pala tar, ta ŋgat a. Gà asiŋ aaha dze ya ka, tar gà ɓəzla segeme. A sàs a tar mezele Mbulum ana a zal a tar a tsa. 8 Ar ka, kamala ana a riŋ mewetse ŋa i wakita Mbulum ka, ta gwa: «Mbulum a ge a à madzala gà gər tar ka, daɗəkɗəkka. Kamala taŋa ya, bazùɓ aka mət aka tar zirìm zirìm, dite ndə̀kə̀zlə̀zlə̀mma ti sle aà metsereke a zləm ɓav tsa asa. Haa kinehe tekeɗe, ti ndze a ka, kamala taŋa ya.» 9 Dawda ibam, a tsik mbaŋa ka, a gwa:

«Dukw mezime ana ti zim a ya ka,

ə̀ŋgəts mà dàn a tar aka biye ɗa,

kamala ɓele ana a mbezle a aka duwa ya,

kige tsa bəla ŋgiziw

kamala ziwiɗ ana à gis a duwa ya asa,

dite ka, tə̀ dəɗ ika vatwa ya.

Mbulum tekeɗe, mə vəl a tar mesewere are.

10 Mə bats aà tar are ya,

na dite ta ŋget a a vatwa asa tsiye.

Mesewere are ma ge a tar ba a gər hinne,

dzaŋguvŋguv ta ŋguvaya dər ba.»

11 Aɗaba taŋa, kinehe ka, i wiziŋa: Na kataya dze ana, wànà gà Yahuda ata tə dza ika vatwa ya ana, tàa dzeye kweleŋ a? Awaŋ, tàa dzeye tsa. Ama ka, agəra ana ta ge bakal a, na gà asiŋ gà mburma ŋgiɗ ta ŋgat vatwa ana Mbulum a mbil a dər à tar a ya. A ge dər kataya ka, na dite gà Yahuda ta ge aaka are nda təv tar a. 12 Akahər bakal tar ata ta ge ya ka, Mbulum a ge ŋgwal ŋa ka, a gà asiŋ gà mburma ana ika gər ahəɗ tserdze ya. Agəra medìɗè tar ata tə dəɗ ika vatwa ŋgar a ka, a pise ahəm a gà asiŋ gà misle ŋgiɗ hinne kuɗa. Dite na gà Yahuda tserdze ta mbəɗ gər a təv ŋgar ana, a pisakwe a ahəm ana, à zè a taŋa tsiye.

Meme na Mbulum a mbala à gà na gà Yahuda tsiye?

13 Kinehe ka, i fèfil a kurum a, a kurum ana iɗəm gà Yahuda tsiye: Iye ka, mala meslire Mbulum. A slərra iye ya ka, a təv kurum ana gà Yahuda tsiye. Aɗaba taŋa iye ihər i ŋgeye a ba hinne, agəra megemir ŋgar ana a viliŋ ahər a. 14 A sèsiŋ ka, bəla gà asiŋ ga ta ŋget a megemir ata i ge a ya ka, dite ŋgwilwim ŋgwilwim ta ge a are aka mege megemir ata i ge a ya, dite ka, tə dara, ta ge kataya, dite na Mbulum a mbil a à tar a. 15 I təv ana Mbulum a miyak à gà Yahuda tə̀ma ya ka, a gəs masla nda gà asiŋ gà mburma ana ika gər ahəɗ a. Ama a pat ana ta me akaba a asa ya ana, dukùla na a ta ge a ba ya? Dukw ana a ge a ba ya ana, à zè a taŋa tsiye? A pat ata ka, gà na ti ne gà məməta ya, ta ŋget a mesife kuɗa.

16 Na bəla ti de ɗaf, tə sàs ihər a, ta vəl a Mbulum ana, naha a zeha ya ana, ar ana pam a? Na bəla zlile dizl ɗaf ka, a ne biy ŋgar ana, ahər ŋana ana, biy ŋgar mbaŋa tsiye? 17 Kamala taŋa ya, dizl duwa a riŋ, ŋgwal ŋa biy mezime, tə sàsara iɗəm tseke ahər ŋgiɗ a. Tə daha, tə sàsara aɗəm ahər dizl ɗaf ŋgiɗ i dala ya taf masakəŋa, tə dzavaya aaka. Aɗaba taŋa, kurum gà mburma ana gà Yahuda tsa, kà nwim ka, kamala ahər dizl ɗaf ata, tə sasara i dala ya taf masakəŋa, tə dzava aaka ya. Dukw ŋgwal ŋa ana gà Yahuda ta ŋgat a ka, kurum kinehe tekeɗe, kàa ŋgatum mbaŋa, kamala ahər dizl ɗaf ana dzəŋdzəŋ a ŋgat ndzəɗa, a sara yam i ba batsah ŋana ya ya. 18 Aɗaba taŋa, ka ta fə̀rum aà gà na ti ne kamala ahər dizl ɗaf ata tə sasara iɗəm piŋŋe kamala za ya tsa. Aàmala na ki gwim aba a zlapa dze ya? Kurum ka, kà nwim gà ɓəza ahər ŋa pəra. Aɗaba ndzəɗa ahər ŋa a dere a ka, i ba zlile ŋana ya, tsəka, ahər ŋa tsa na a vile a ndzəɗa a zlile ŋa ya.

19 Bəla misle ŋgiɗ i liwiŋ kurum a, a gweɗe a: «Kinehe ka, ndzer, Mbulum a sàsara iɗəm ahər ŋa ata ya ka, a dzəv aaka ka, iye.» 20 Kaɗəŋ, pàrsa tsa, kà tsik ka, ndzer. Mbulum a sàsara iɗəm a ka, agəra ana tàa gəs ŋgat tsiye. Kər kinehe ka, kàa ŋgat təv mendze yak, aɗaba ana kàa gəs a. Ama kəla ka, ka tə səkah à gər yak tsa, ki ger a magəɗa ivaɗ. 21 Aɗaba ana Mbulum aka məsak à gà Yahuda ana ti ne gà ɓəza ahər ana ika dizl a tsəna, kà dzala ana, a misek a à kər ɓav a, na kàa gəs ŋgat tsiye, na kər ana tə dzəv aaka kər medzìve ya?

22 Fə̀rum kwaŋ, meme na Mbulum a ge ŋgwal ŋa a mburma ya, dite ka, meme asa ya na a tike matsəɓatsəɓ aka gà asiŋ ŋa ya? A tike matsəɓatsəɓ ka, aka gà na ta məsak à vatwa ŋgar a. A ge ŋgwal ka, a kurum. Ama kəla ka, say na ki dwim a aka miɗ aka miɗ nda mendze i təv ŋgar a. Na kataya tsəka, kurum tekeɗe ka, ŋgwìɗik a ta misek a à kurum a mbaŋa. 23 Na gà Yahuda ata ta mbəɗara gər a təv ŋgar a, tàa gəs Yesuw ka, à me à ter a a təv mendze tar ata asa tsara, aɗaba ŋgat ka, tits a sle a aà mimèra à tar a, dukw ŋgar. 24 Aɗaba taŋa, kurum gà mburma ana gà Yahuda tsiye, kà nwim ka, kamala ahər dizl ɗaf ata taf masakəŋa i dala, tə sàsara, tə dara, tə dzava aka na ŋgwal ŋa lele ya ya. Na Mbulum a sər mege dukw ana kuɗa ihər a kataya ya ana, kà dzalum ana, a sle a aà məma à gà Yahuda a təv mendze tar ata dukw tar tsiye, na tar ana ti ne gà ahər ŋa ana ndzer ŋa ya seyiŋ a?

Mimbele gà Isərayel ana ta mbele a ya

25 A kurum gà damər gà ana gà Yahuda tsiye. A sèsiŋ i tsik a kurum a ka, dukw ana makàhà ŋa i təv Mbulum, aka pàtakwa dər akahər ata zukw tsiye. I tsik a ka, dukw ana, dite ki slwim a aà mesikehe à ba kurum ika miɗ ŋgar tsik asa tsiye. Araha na dukw ana i tsik a ya: Ama gà asiŋ ŋa i liwiŋ gà Isərayel ka, tàa ne aba gà mandàkugùrum kaɗəŋ. Kəla ka, gà dukw ata ta ge aaka aba kataya ya ka, à ndìviŋa. Ama say gà na gà Yahuda tsa, Mbulum a pala tar, testes tàa yahabaha gər a təv Mbulum ŋa ya dzekwiŋ. I fata ya ka, ta mbìɗ a aba a təv ŋgar, ta gis a kuɗa. 26 A pat ata ka, Mbulum a mbele a à gà gwala gà Isərayel tserdze, kamala ana a riŋ mewetse ŋa i wakita Mbulum ka, ta gwa:

«Mala məmbala à mburma a dere a ka,

i kwite Siyuna ya. A zle a bakal

ika magər gà gwala Zakup ya tserdze.

27 Araha na dukw ana Mbulum a tsik a tar i sida ya,

a gwa ka: I ta pìl a ter a à bakal tar.»

28 Ama tar ka, ti niw bazlam ŋgwal ŋana, ti ne gà ɓəzla guvəl Mbulum. Kamala taŋa ya, kurum ana gà Yahuda tsiye, ki ŋgetwime a dukw ŋgwal ŋa ata avukw tar. Ama Mbulum a pala tar, dite ka, ti ne gà mandərkwasla ŋgar asa ka, agəra ana a tsik akahər ata a gà bàba gà tsir tar i sida ya ya. 29 Aɗaba ana aka zal a mburma, aka vəlar duwa ka, aka ndəv pəra, tsəka, wetsèkèlek à mbìɗ a à madzala gà gər ŋgiɗ tsa. 30 Kurum ana gà Yahuda tsiye, akahər ata ka, kàa gəsum ahəm aà Mbulum tsa. Ama kinehe ka, kàa ndzum are tsehe a Mbulum, a zal a kurum aɗəm avukw ŋa, agəra ana tar ta gəs ahər ahəm tsiye. 31 Kamala taŋa ya, i təv tar kinehe tekeɗe, kataya mbaŋa. Tar ihər ta gis a ahəm aà Mbulum tsa, dite na a ge a kurum aɗəm ŋgwal ŋa avukw ŋa ya. Dukw ata a ge ba kataya ka, na dite tar tekeɗe, ta mbìɗ a aba a təv Mbulum, tì ndzer a are tsehe ya. 32 Kamala taŋa ya, sifek a pə̀lakwa à metsehe aà gər, ku mege weke tserdze, a ziwe a gər ŋgar, na dite kə̀ gə̀sakwa ahər ahəm tsiye. A ge dər kataya ka, aɗaba a waya na kwa tserdze ki ndzekwer are tsehe ya.

Zàmbaɗakwa à Mbulum ana a za duwa tserdze ya

33 Hey, dukw ana Mbulum a ge a kwa ya ka, ŋgwal ŋa kaɗəŋ. Metsehe ŋgar nda masəra dukw ŋgar ka, hinne, a za duwa tserdze. Dukw ana a dzele a, a gweɗe a, i ge a ya ka, wura ilik a sle a aà matəkəra ŋa tsa. Dite wura ilik a sle a aà masə̀ràha aka dukw ana i gər ŋgar a tsa asa. 34 Ar ka, kamala ana a riŋ mewetse ŋa i wakita Mbulum ka, ta gwa:

«Weke na a sər madzala gà gər BATSAH kwa ŋa ya?

Dite weke na a sle aà megweɗer a ka: “Ge naha”,

kige tsa “ge naaka” ya?

35 Wura a riŋ na aka vəl duwa a Mbulum, dite ka,

mə vəlar aɗəm mbaŋa ya ya? Awaŋ, a riŋ tsa.»

36 A ge riŋ tsəka, aɗaba ŋgat na a ge duwa tserdze ya. A kesliŋa, a ger a gər asa mbaŋa. A ge dukw ata ka, a ba ŋgar. Zàmbaɗakwa à ŋgat aà biybiy. *Amin.