Ruma 10

1 Gà damər gà, a sèsiŋ i gəzləŋ gà hinne, i waya na gà mburma ana i gwala gà ya, ta mbele a ya. I misek a à mahàmà a Mbulum tsa, aɗaba tar. 2 I sər dukw ana ta ge a ya, ta waya matsahəna aà ba tar nda gəzləŋ ilik i təv Mbulum. Ama tə sər vatwa dukw ana ta ge a ya tsa. Ti ye a ba bə̀ram bə̀ram taf masakəŋa. 3 Aɗaba tàa tsaraka vatwa ana Mbulum a ne a dər à mburma ŋgwal ŋa ika miɗ ŋgar a tsa. Tar riŋ ti yehe a vatwa ivaɗ ka, aà mene à ba tar ŋgwal ŋa i təv ŋgar nda ahər tar. Kamala taŋa ya, ŋgùɗak ta məsak aba à vatwa ana Mbulum a ne a dər à tar ŋgwal ŋa ika miɗ ŋgar a. 4 I tsik taŋa ka, aɗaba à gər ana Yesuw Kiristi a dara ya ka, məpala ahəm Musa ka, vatwa ana mburma ti de a dər a təv Mbulum a asa tsa. Ama kinehe, wele ana aka gəs ŋgat nda gəzləŋ a ka, ŋgat na a ne a ŋgwal ŋa ika miɗ Mbulum a.

Mbulum a mbele a à gà na ta gəs Yesuw a tserdze

5 Araha na dukw ana Musa a wetse piŋŋe aka gər məpala ahəm Mbulum ata ya, dite ka, meme na ti ne a ŋgwal ŋa i təv mazazama ŋa ya. A gwa ka: «Ku weke na aka zazam məpala ahəm aaha ka, a ŋget a dər mesife. Ama kəla ka, say na a zezem a kalkal lele ya dzekwiŋ.» 6 Ama vatwa ana mburma a ne a ŋgwal ŋa ika miɗ Mbulum agəra ana a gəs ŋgat nda gəzləŋ a ka, pampam. Mewetse ŋa a riŋ i wakita Mbulum aka gər vatwa ata ka, ta gwa: «Aàmala na ki dzele a i gər yak, ki gweɗe a ka, weke na a sle a aà matsəla a gəza mbulum a ya?» Kamala megweɗe ya, aà mazàlàra a mala məmbala à mburma ana Mbulum a gwa, i ti slir a kurumehe a ya, ma tarra a bəɗ a asa ya ya, aɗaba aka mbər medera. 7 Dite aàmala asa ya na ki dzele a i gər yak, ki gweɗe a ka: «Weke na a de a a biye a təv ana gà məməta iɗəm a ya?» Kamala megweɗe ya, aà mezelera iɗəm a mala məmbə̀là à mburma ata, aà ma dara ya. Aɗaba aka mbər məmbə̀lara iɗəm a. 8 Na kataya ana, wakita Mbulum a gwa ana, meme? A gwa ka: «Bazlam Mbulum a ndze a ka, slìpèhhe bise nda kər, ika arah yak, dite i gəzləŋ yak mbaŋa.» Bazlam ŋa ka, taŋa kà tsikikwa a mburma ya, kù gwaɗakwa a tar ka, gəsum Mbulum nda gəzləŋ kurum. 9 Na kàa gə̀sakwa nda gəzləŋ, kàa tsikikwa ika miɗ mburma parakka, Mbulum na a mbəlara à Yesuw i məməta ya, dite na a ne BATSAH kwa ŋa ya ka, Mbulum a ta mbil a à kwa mbaŋa. 10 Aɗaba a mbil a, a ne a dər ŋgwal ŋa ika miɗ ŋgar ka, say à wur ana aka gəs Yesuw nda gəzləŋ, aka tsikara ika arah a, ŋgat na Batsah ga ŋa ya, parakka lele ya. 11 Aɗaba mewetse ŋa a riŋ i wakita Mbulum ka, ta gwa: «Ku weke tekeɗe, wur ana aka gəs a ka, birek birek duwa a ger a tsa.» 12 Mbulum a tsik bazlam ata ka, aɗaba gà mburma tserdze. Gà Yahuda nda gà na tar gà Yahuda tsiye, tar ika miɗ ŋgar ka, pampam tsa. Batsah ŋana ika gər tar ka, ilik. A pise a ahəm a gà na ta hemer a ya lele. 13 Ar ka, kamala ana a riŋ mewetse ŋa i wakita Mbulum asa ka, ta gwa: «Ku weke na aka hama a BATSAH kwa ŋa ka, a mbiliŋa.»

Gà mburma gà Isərayel ti sle a aà mibeye aà Mbulum a tsa

14 Kaɗəŋ. Ama na tàa gəs BATSAH kwa ŋa nda gəzləŋ tar tsəna, dite meme na ta hemer a ya? Na tàa tsaraka maɗə̀và zləm ŋgar tsəna, meme na ta gis a ŋgat nda gəzləŋ tar a? Na wura aka tsik a tar bazlam ŋgar tsəna, meme na ti tsereke a ya? 15 Dite dze ana, na gà mburma Yesuw tàa slər mburma a təv tar tsəna, dite meme na gà ɓəzla meslire ata ta wile a aka mede aà metsike a tar a? Ama ka, tàa slər tar dukw ŋgar. Aka ge ba kamala ana a riŋ mewetse ŋa i wakita Mbulum ka, ta gwa: «Samata kwaŋ, na gà ɓəzla meslire na tə dara a təv tar, ti tsik a ter a bazlam ŋgwal ŋana ka, dite zayya a ŋgeye a ter a ba i gəzləŋ a.» 16 Ama ku mege tàa tsaraka bazlam ata tekeɗe ka, gà mburma ndaw tsa na ta gəs nda gəzləŋ tar a. Ezaya, mala məmà à bazlam Mbulum ana akahər ata ya tekeɗe ka, aka mbər metsike, a gwa: «Batsah mə̀r ŋa, kù gwa ana, bazlam ana mì tsik a ana, ndaw a na ta gəs a?» 17 Kamala taŋa ya, wur ana à gis a bazlam ata ka, say na aka tsaraka ya. Aka tsaraka tekeɗe ka, say na ti tsiker aka gər Yesuw Kiristi ya dzekwiŋ.

18 Yaw taŋa ka, i wiziŋa. Wànà gà Yahuda dze ana, tàa tsik a tar bazlam ŋgwal ŋa ata ti tsiye? Haya, tàa tsik a tar ndzer dukw ŋgar. Ar ka, kamala ana a riŋ mewetse ŋa i wakita Mbulum ka, ta gwa:

«Gà mburma tàa da aà metsìkè bazlam ata,

ku mege a ŋga aka gər ahəɗ tserdze.

Mifefile tar aka lə̀ma aka gər ahəɗ fit.»

19 Taŋa ka, i wiz a biy ŋgiɗ asa: Wànà gà Yahuda dze ana, tə tsaraka ti tsiye? Ama ka, tàa tsaraka dukw ŋgar. Ta gəs tsa pəra. Musa tekeɗe, aka mbər metsike aka gər bazlam ata. A gwa, Mbulum a gwa ka:

«I ge a dukw ana, dite kurum gà mburma gà

ki gwim aaka a are

nda təv gà asiŋ gà mburma ana taf masakəŋa ya,

nda gà ki gwim a arəv

nda təv gà asiŋ gà misle ŋgiɗ ana

tə sər duwa tsiye mbaŋa.»

20 I dəba ŋa ya, Ezaya, mala məmà à bazlam Mbulum tekeɗe, a tsik parakka lele. A gwa, Mbulum a gwa ka:

«Gà mburma ana tàa yaha iye tsəka,

aləka tar na ta ŋgat iye ya.

I pàt à ba gà ka, a gà na tàa hemiŋ a tsiye.»

21 Ama aka gər gà Isərayel, Ezaya ata a tsik ka, a gwa: «Mbulum a gwa ka: Iye ihər i ge a wiyèw a gà mburma gà, aà gər mèkwède ya, wurwas tsikw a hawa, dite ka, tə dara. Ama ka, kùrtìtìk ti niwara, ta gəs tsa.»