Ruma 9

Gà Mbulum nda gà mburma ana a pala tar a

1 Bazlam aaha i tsik a ya ka, ndzer kaɗəŋ, aɗaba ana iye, mala magəsa Yesuw Kiristi, dite na i ses a pàrsa tsiye. Mezite Mesife Mbulum na a ɗifiŋ à dukw ana i tsik a ya ka, ndzer kaɗəŋ, pàrsa iɗəm tsiye. I madzala gà gər gà tekeɗe, kataya mbaŋa. 2 Kinehe ka, gəzləŋ a riŋ a wir aà iye a hinne, a misek a à mewire tsa, 3 aɗaba gà asiŋ ŋa ana i gwala gà, ta gəs Yesuw Kiristi tsiye. Iye nda gà tar ka, mə̀r nda gà damər. Na mege a ge a ba ka, ŋgulum Mbulum mi viliŋ mezelme, mə̀ və̀rə̀zl ikaba à mə̀r nda Yesuw Kiristi ya, aà məmbala à tar, avukw ana i mbil a zləmana ya. 4 Tar ka, gà Isərayel ana Mbulum a pala tar a. A pala tar ka, aà mene à tar gà ɓəza ŋgar. A pàt a tar à ndzəɗa ŋgar, na dite tì zlibe a à ŋgat a. A ɗif a tar à masəra ba ŋgar, nda məpala ahəm ŋgar mbaŋa. A ɗe a tar à vatwa ana, dite ta heme a aà ŋgat a. A tsikewa a tar gà asiŋ gà bazlam ŋgiɗ pampam i sida ya, aka gər dukw ana a vile a ter a ya mbaŋa. Ama ka, ta gəs tsa. 5 Tar ka, i gwala gà bàba gà ɓəza Abəraham batsah tsir tar ana akahər ata ya. Yesuw Kiristi ibam, a ɗe aba kamala mburma ya ka, i gwala tar a mbaŋa. Ŋgat na Mbulum a. A ndze a ika gər gà dukw tserdze. Zàmbaɗakwa à ŋgat aà biybiy. *Amin.

6 Ki gweɗekwe a ka, dukw ana Mbulum a tsik i sida ya, a gwa, i ta ge a a gà mburma gà ya ka, a ne a dukw taf masakəŋa tsa. Ama kəla ka, gà Isərayel fit tsa na ti ne gà mburma ŋgar a. 7 Gà ɓəza hinne na tə dara i ba Abəraham a. Ama ka, fit tsa na Mbulum a pala tar a asa mbaŋa. A tsik a Abəraham akahər ata, a gwaɗar: «Hwife yak ndzer ŋana a dere a ka, i ba Izak a.» 8 Kamala megweɗe ya, i liwiŋ gà ɓəza ana Abəraham a wa tar a fit tsa, na ti ne a gà ɓəza Mbulum a. Aɗaba Mbulum a gwa: «Say gà na ta wa tar aɗaba dukw ana i tsik i sida ya, na i ɗeme a i liwiŋ gà ɓəza ŋgar a ya.» 9 Araha na dukw ana Mbulum a tsiker i sida ya, a gwaɗar: «Pat məpaslà ahər ŋa aka ndze aɗəm ka, i mèriŋa. I lere a aà Sara ya ka, aka wa kəla asləka ŋa.»

10 Ama ka, taŋa ɗekɗek tsa. Samatakwa Rebeka ana məkəs batsah tsir mə̀r Izak ana akahər ata ya mbaŋa. A wa gà mawusa. 11-12 I təv ana aka wa tar zukw tsiye ka, Mbulum a tsik aɗaba gà ɓəza ata a ta we a ya, a gwaɗa a Rebeka: «Malahalah ŋana a ne a mala meslire a mala dəba.» Mbulum a tsiker kamala taŋa ya ka, aka na tàa wa tar zukw tsiye, dite ka, tàa mbər mege dukw ana ŋgwal ŋa ya, kige tsa na ŋgwal ŋa tsiye zukw tsa. A ge dər kataya ka, aà masəra dər, a gewa duwa ka, kamala ana ŋgat a waya ya. A pele a gà mburma ŋgar kataya, tits kamala ana a waya i gər ŋgar a, tsəka, aɗaba ŋgwal tar ana ta ge a ya tsa. 13 Kamala taŋa ya, mewetse ŋa a riŋ i wakita mbaŋa, Mbulum a tsik aka gər gà ɓəza ata a gwa: «I waya Zakup, ama Isuwa ka, i waya tsa.»

14 Na kataya ana, ki gweɗekwe a dukùla asa ya? Ki gweɗekwe a ana, Mbulum a ge a dukw ana ndaka vatwa ŋa tsiye ya? Awaŋ, kataya tsa. 15 Aɗaba ki sirekwe a dər, a gwaɗa a Musa akahər ata: «Na i waya mege ŋgwal a wura ka, i ger a ŋgwal ŋa. Kige tsa, na bəla i waya wura ma ndziŋ are tsehe ka, a ndziŋ a dukw ŋgar.» 16 Kamala megweɗe ya, Mbulum a zle a mburma ka, aɗaba ana a waya mege a tar ŋgwal a pəra, tsəka, agəra ana mburma ta waya ti ne a à ba tar ŋgwal ŋa nda ndzəɗa i təv ŋgar a tsa. 17 A riŋ mewetse ŋa i wakita mbaŋa ka, Mbulum a gwaɗa a *Faruna, Əbay gà Ezipt: «I tike kər a Əbay, dite ka, aà məpàtà à ndzəɗa gà nda təv yak pəra. Aɗaba i waya ka, zləm gà ma ɗe, ku mege a ŋga ika gər ahəɗ tserdze.» 18 Kamala taŋa ya, Mbulum a ge a duwa ka, kamala ana a sasar a. Na aka waya mege ŋgwal a wura ka, a ger a ŋgwal dukw ŋgar. Kige tsa bəla wur ana Mbulum aka waya ma ndza nda gà segeme i gər a ka, a ndze a dukw ŋgar.

Mbulum a ziwe a gər ŋgar kamala ana a sasar a

19 Bəla ki gweɗwimiŋa: «Na Mbulum a pele a mburma kataya ana, aàmala na a mà a tar à bakal asa ya? Aɗaba weke na a sle aà mehitse a à dukw ana ŋgat a ge a ya ya?» 20 Ama kinehe, kwa mburma dze ana, gà weke, na ki mbetsekwebe a ahəm nda gà Mbulum a? Wànà gərwa a gweɗe a a mala maŋgara ŋa: «Aàmala na kə̀ ŋgar iye kataya ya?» Awaŋ, a riŋ tsa. 21 Aɗaba mala maŋgara duwa a ziwe a gər ŋgar aà maŋgara ŋa ya, kamala ana a sasar a tsiye? A zle a duɗwa, à ses a ikaba ya, a ŋger a dər mesigire ŋa sìsèlèŋŋe, a ger a mbìrmbir ŋgwissè lele. Biy ŋgiɗ ibam, a ŋger a dər kèyiɗ ŋa pə̀lhàyàmma masakəŋa pəra.

22 Na Mbulum a ge a duwa kamala taŋa ya ana, ki slekwe aà metsiker a dukùla asa ya? A sasar ka, a pèt a à ndzəɗa ŋgar, gà ɓəzla bakal ti sir a dər ka, meme na a ge a matsəɓatsəɓ aka gər tar a. Ama ku mege tàa ger matsəɓatsəɓ a gəzləŋ, dite a sər, medzeye à tar ide tekeɗe ka, mbə̀rə̀ts mbə̀rə̀ts a veve a tar pəra. 23 Dite a gà asiŋ ŋa ibam, a sasar à pèt a ter a à ndzəɗa ŋgar ana a za duwa tserdze, tì zlibe a dər a. A waya mege a tar ŋgwal ŋa, a zal a tar dər ka, daga piŋŋe na aà ta ŋgat ndzəɗa ŋgar ata ya. 24 Kwa kinehe tekeɗe ka, i liwiŋ tar mbaŋa. A pala ka, gà mburma ana ika magər gà Yahuda ya ɗekɗek tsa. A zal a kwa dər ka, i liwiŋ gà asiŋ gà mburma ŋgiɗ a mbaŋa. 25 Ar ka, kamala ana mewetse ŋa a riŋ i wakita Husiya, mala məmà à bazlam Mbulum ana akahər ata ya ka, Mbulum a gwa:

«Gà mburma ana piŋŋe gà biy gà tsiye ka,

i ne à ter a gà mburma gà kuɗa.

Dite gà na i waya tar tsiye ka,

kinehe ka, i waya tar kuɗa.

26 I kwite ana ta gweɗe a à ter a,

kurum gà mburma ŋgar tsiye ka,

iye Mbulum, mala məvəla mesife a mburma,

i gweɗe a ter a, kurum ka, gà ɓəza gà asa mbaŋa.»

27 Ama Ezaya, mala məmà à bazlam Mbulum ana akahər ata ya, a fàfəl aka gər gà Isərayel ka, a gwa: «Ku mege gà Isərayel hinne kamala hewiyeŋ ana i dula ya tekeɗe ka, sərum dər, gà na Mbulum a mbele à ter a ika magər tar a ka, ndaw ɓav tsa.» 28 Aɗaba Mbulum a ge a mèhìnèkw tsa. A dere a, a ge a seriye a gà mburma ata tserdze ya ka, tsəma gərmelik tsara. 29 Ar ka, kamala ana Ezaya ata a tsik akahər ata ya mbaŋa, a gwa:

«Na bəla Mbulum BATSAH kwa ŋana

ŋgat mandza ŋa ika gər gà duwa tserdze ya,

mə̀ məsak à gà asiŋ ŋa ana i gwala kwa ya

zaakwa tsəka, ki dzeyekwe a sleɗik

kamala gà Suduma nda Gumura ana ti dzeye ya.»

Yesuw Kiristi a ne kur ana ti ndif ahər sik a

30 Kamala taŋa ya, ki gweɗekwe a ana, dukùla kinehe ya? Ki gweɗekwe a ka, gà mburma ana gà Yahuda tsiye, tàa yaha vatwa aà mene ŋgwal ŋa i təv Mbulum tsa. Ama kinehe, tə tsahən ahər ka, agəra ana tàa gəs ŋgat nda gəzləŋ a. 31 Gà Yahuda ka, tàa ya ba aà mazazama məpala ahəm ŋgar, ta gwa, waytsa mìi ne a ŋgwal ŋa ika miɗ ŋgar. Ama ka, də̀fàlàm ti ye ihər ba ya, ti sle tsa. 32 Aàla na ti sle tsiye? Aɗaba tə dzala i gər tar agəra dukw ana ta gwa, mìi ne a aba ŋgwal ŋa ika miɗ ŋgar nda ndzəɗa mə̀r, tàa gəs ŋgat nda gəzləŋ tar tsiye. Aɗaba taŋa na ti ndif sik aà kur a, kamala megweɗe ya, kur ata ka, Yesuw Kiristi. 33 A riŋ mewetse ŋa i wakita, Mbulum a gwa ka:

«Araha, i tike a kur i kwite Siyuna,

kamala kuvəl a,

mburma ti ndif ahər a sik, tì dzèwe aakiŋa.

Ama wele ana aka gəs ba aà kur ata ya ka,

birek birek duwa a ger a tsa.»