Pul ika ahəɗ Malta ana malàwàrà ŋa nda yam a
28
1 Aləka mì beyera i yam ata ya,
mì tsala aka gìgìze ka,
mì tsaraka zləm ahəɗ ata malàwàrà ŋa nda yam a ka,
Malta.
2 Gà mburma ana a riŋ i fata ya,
ta gwaɗa a mə̀r:
«Tàkwa a ma mə̀r.»
Mì da akaba.
Mì daha ka,
ta ge a mə̀r gər hinne.
I dəba ŋa ya,
yam a dza.
Mə̀tasl a ge a mə̀r a hinne.
Tə daha,
ta vàt a mə̀r akwa.
3 Pul a daha,
a kurəs tsèɓtsèɓ tsalaka,
a ndà aà akwa.
Tsaatsa mesiwiɗ iɗəm.
Aləka i təv ana huzzwa akwa à vìɗer a ya ka,
a dara iɗəm a,
ə̀ndəts a gəs ahər à Pul a.
4 Gà mburma ata i fata ya,
ta ŋgat a mesiwiɗ ata ndzàkwàlàkka aà Pul kataya ka,
ta gwa:
«Wele aaha ka,
a ge a ka,
mala məbatsa mburma.
Ku aka bera i yam a tekeɗe,
aka be i seriye Mbulum a ɓav tsa.»
5 Ama Pul a gwatsaka aba à mesiwiɗ ata ya,
gwàtsak a akwa ata ya.
Duwa aka wur ahər tsidze.
6 I madzala gà gər tar ka,
ta gwa,
ahər a slesle aakiŋa,
à dìɗ a dər aà mbulum a zlùts mba,
à mite a dər tsara.
Ta vava ahər a fata hinne.
Ta fə̀r ka,
duwa aka ger tsidze.
Tsam ka,
kə̀rə̀zl ta mbəɗ à madzala gà gər ŋgiɗ tsara,
ta gwa:
«Wele aaha ka,
maàfəla wur ŋa,
a ge a ka,
Mbulum.»
7 Ama wele duwa a riŋ ika ahəɗ ata,
batsah tar ŋa.
Zləm ŋgar Pubiliyus.
Ga ŋgar a riŋ,
nda gà guvah ŋgar hinne bise nda təv ata mə̀r iɗəm a.
Wele ata a gəs mə̀r nda maŋgayaba lele.
Mì ndza i ma ŋgar mehinne makər.
8 Aka ana mì daha ya ka,
tsir Pubiliyus ata a riŋ mahə̀nà ŋa ika slə̀làh,
màràɓàraɓ ihər,
za a heleriŋa məmbəz məmbəz.
Pul a daha a təv ŋgar a ga.
A daha,
a hama a Mbulum agəra ŋgat,
a tike ahər aka gər ŋgar,
dite a mbəl i dukw məməta ŋgar ata ya tsara.
9 Ama gà asiŋ gà ɓəzla dukw məməta ana i kwite ata ya,
tə tsaraka kataya tsara ka,
tə dayaha a təv Pul,
dite ta mbala mbaŋa.
10 I dəba ŋa ya,
gà mburma ata i kwite ata ya tserdze,
tə zlə̀b à mə̀r hinne.
Tə dzaya a mə̀r gà duwa.
I təv ana mìi meh a ba ya ka,
tə dzaya a mə̀r gà dukw ana a ge a mə̀r a ŋgulum ika vatwa ya ya hinne.
Pul a ndze a kwite Ruma
11 Mì ge i fata kiye makər.
I dəba ŋa ya,
mì da i fata ya nda slə̀làh yam ana a dara i Aleksandiriya ya.
Slə̀làh yam ata aka ndza ika ahəɗ ata malàwàrà ŋa nda yam a ka,
kiye diŋ,
aɗaba himbiɗ aaha ndeɗiŋa a ge a hinne ya.
Aka ndze a kiye ŋa pəra ka,
tə dànayawa aba ya kataya.
Zləm slə̀làh yam ata ka,
mawusa mbulum.
12 Mì ndze a kwite Sirakus ka,
mì həna i fata mehinne makər.
13 Mì hitse i fata ya ka,
mì da nda guva duluv,
mì ndze a kwite Regiyum.
Ndidwe ŋana ka,
mì mah ba,
mì ndze a kwite Putiyuli.
I huɗ mede mə̀r ata ya ka,
mì ge mehinne sula aà vatwa pəra,
aɗaba himbiɗ ana a màwara ika tseke gular a.
A zlak mə̀r,
a tah a mə̀rra i dəba ya.
14 I fata ka,
mì le riŋ aà gà ɓəzla magəsa Yesuw ana ti ne gà damər mə̀r i fata ya.
Ta gwaɗa a mə̀r:
«Kamkam,
ndzum ɗa i təv mə̀r kwaskwa ilik te.»
Dite i dəba ŋa ya,
mì tsìmìɗ aba a Ruma kuɗa.
15 Aka ana mə̀r riŋ aà vatwa mìi de a mba ya ka,
tsaatsa gà ɓəzla magəsa Yesuw ana ti ne gà damər mə̀r i fata ya,
tàa tsaraka,
mə̀r riŋ mìi dehiŋa.
Ta ŋgəzlaha aka mə̀r tsikw a tə̀vəməŋa na a riŋ,
tə zalar gà ga mbəlakw makər.
Gà asiŋ ŋa erre a kwaskwa Apiyus asa,
aà melime nda gà mə̀r.
Pul a ŋgat a tar ka,
a ge kəkaaha a Mbulum,
dite arəv a màraha kuɗa.
16 I Ruma i fata ka,
ta vəl vatwa a Pul,
a ziwe a gər ŋgar.
Tə ndzawa ka,
nda sliwdze ana a kesle a ŋgat a ilik pəra.
Pul a tsik bazlam Mbulum i Ruma
17 I dəba mehinne makər a ka,
Pul a zal a gà bàba gà Yahuda ana i kwite Ruma ya.
Gà mburma ata ti yahaba gər,
tə daha a təv ŋgar.
A gwaɗa a tar:
«Gà damər gà,
tàa gəs iye i Yeruzalem,
ta vəl iye a ahər a gà Ruma.
Ama ka,
Yàa ge a tar dukw ana ŋgwal ŋa tsiye,
nda təv məpala ahəm gà tsir kwa ya tsa tekeɗe,
ta gəs dər akaba iye pəra.
18 Gà Ruma ata ta giŋ seriye.
Tə samata ka,
tàa le aɗəm aà bakal ana biy mekìɗè dər iye ya tsa.
I dəba ŋa ya,
ta waya məpəla à iye kuɗa.
19 Ama a sàs a gà Yahuda tsidze.
Aɗaba taŋa na i gwa,
bàlaarì,
i de a a təv batsah Əbay gà Ruma,
ma ti sèsiŋ iba seriye ga ya ya.
Ama i de a ka,
i ta me a à bakal a gà gwala gà ɓav tsa.
Aɗaba ma ti sèsiŋ iba ndzer ŋana ya pəra.
20 Taŋa na i wiz kurum aà metsìkè a kurum a zləm kurum te ya.
Iye ihər i zle a tsitsirɓe aaha ka,
aɗaba iye ihər i ge a meslire wele ana gà mburma Isərayel tə dzalawa a təv ŋgar a.»
21 Gà mburma ata tə tsaraka kataya ka,
ta gwaɗar:
«Maa ŋgat a wakita ana tə slərra ika ahəɗ Yuda agəra kər a tsa.
Dite tàa slərra wura ilik i liwiŋ gà damər kwa ya ɓav tsa asa.
Wura aka ɗama a mə̀r bakal yak ana kì ge ya tsa.
22 Ama a sàs a mə̀r metsereke dukw ana kà dzala ya dzekwiŋ.
Aɗaba mì sər,
ku i ŋga tserdze,
gà mburma ta fèfil a ka,
ŋgwal ŋa tsa aka dukw kurum ana ki zezemwim a kinehe ya.»
23 Ti tike məpaslà ahər a Pul,
ta gwaɗar:
«Say pat ŋgiɗ na ki ɗif a mə̀r a dər a.»
Aləka pat məpaslà ahər tar ata a ndze aɗəm ka,
gà mburma hinne tə daha a təv ŋgar ana a hənawa iɗəm a.
Tə daha ka,
a ɗif a tar à *mekwere Mbulum ana a kwere a aka miɗ mba ya.
A dza ahər ba daga à gər mèkwède ya,
tsikw a hawa.
A ɗif a tar ka,
à dukw ana i huɗ wakita məpala ahəm Musa ya,
dite nda biy gà ɓəzla məma à guma Mbulum ana akahər ata ya tserdze mbaŋa.
A ɗe a tar à ndzer ŋa ana agəra Yesuw a,
dite ka,
ta gəs ŋgat.
24 I huɗ bazlam ŋgar ata ya ya ka,
gà misle ŋgiɗ əŋgal tàa gəs.
Ama gà asiŋ gà misle ŋgiɗ tàa gəs tsa.
25 I təv ana aləka ti deye a ikaba ya ka,
ahəm a da a tar aàba tsa,
ta mbetseba a ahəm hinne,
agəra bazlam ata Pul a tsik a tar a.
I dəba ŋa ya,
Pul a gwaɗa a tar asa:
«I samata ka,
dukw ana Mezite Mesife Mbulum a tsik a gà tsir kurum ana akahər ata ya ka,
kaɗəŋ ndzer,
kamala ana a tsik a Ezaya,
mala məmà à bazlam Mbulum a.
26 A gwaɗar:
“Daha,
gwaɗa a gà mburma aaha:
Nda zləm ka,
ki tserekwimiŋa,
ama ki sirwim a tsa.
Ki ŋgetwimeriŋa,
ama ki sirwim a tsa asa mbaŋa.
27 *Aɗaba gà mburma aaha ka,
tàa ne aàba gà mandàkugùrum.
Tàa raraɗa ahər a gà zləm tar.
Tàa handakaya aka gà are tar,
tsəka,
ana ka,
ti tserekiŋa,
kige tsa ta ŋgeteriŋa,
dite ti sir a kuɗa.
Ta mbiɗere a ahəm
a təv ga ya,
i mbele a tar.”»
28 Pul a tsik aba taŋa ya ka,
a səkah aaka à bazlam ŋgiɗ asa.
A gwaɗa a tar:
«Sərum dər ka,
Mbulum a slərra bazlam mendìwìɗè gər mesife ya kinehe ka,
a gà mburma ana tar gà Yahuda tsiye.
Aɗaba tar ka,
ta gis a bazlam ata.»
29 Pul a tsik a tar aba bazlam ata ya ka,
gà Yahuda tə daya a gà ma nda gà bazlam ika magər tar huwwa.
30 I dəba ŋa ya,
Pul a ndza i fata mive sula.
A hənawa i ga ana ta pə̀lawa siŋgwe ŋa ya.
I fata ka,
a ziwe a gər ŋgar.
Gà mburma ana tə dawaha a təv ŋgar a ka,
à gis a tar,
a fàfəlawa a tar himmè lele.
31 A tsikewa bazlam mekwere Mbulum ana a ta kwere a aka miɗ mba ya.
A dzeŋgewa a tar,
a gwaɗawa a tar ka,
weke na Yesuw Kiristi ya,
nda dukw ana Yesuw a gewa ya tserdze,
parakka lele.
Wura a peler a ahəm tsa,
a ziwe a gər ŋgar.