Gà Ananiyas nda Safira
5
1 Ama gà wele duwa tə zalar Ananiyas nda məkəs ŋgar Safira,
ta kal à guvah tar ika himmè ahəm a.
2 A ndzək mezehe siŋgwe ŋa a ba ŋgar.
Məkəs ŋgar tekeɗe,
a sər mbaŋa,
na a ndzək a.
Ama ka,
asiŋ ŋana a da dərraha a gà ɓəzla meslire Mbulum.
3 A da dərraha tsara ka,
Piyer a gwaɗar:
«Aàmala na kà zazam pàrsa *Sadan a?
Aàmala na kà sàs pàrsa a Mezite Mesife Mbulum a,
aɗaba ana kà ndzək mezehe siŋgwe guvah aaha a biy yak pam a?
4 Guvah ŋa dze ana,
biy yak tsiye,
na aka na kàa kal dər zukw tsiye?
Dite aka ana kàa kal dər dze ana,
siŋgwe ŋa na biy yak tsiye?
Meme na kà dzala i gər yak,
aà mege gà dukw ata ya?
Kà sàs pàrsa ka,
a mburma tsa.
Ama kà sàs pàrsa ka,
a Mbulum.»
5 Ananiyas a tsaraka bazlam ata tsara ka,
a dəɗ aà mbulum a,
a mət tsara.
Gà mburma ana tserdze tə sər ahər a ka,
ta ge magəɗa hinne.
6 I dəba ŋa ya,
gà ɓəza gawla tə daha,
ta mbe məməta ŋa,
tə zlara ŋgat a bəra ya,
ti le ŋgat.
7 Zàkwayiya i dəba ŋa ya,
a ge a ka,
ndzemde makər ka,
Safira a daha,
a pəts a ga ata mbaŋa.
Ŋgat ka,
aka sər aà dukw tar ata ta ge riŋ a tsa.
8 A daha ka,
a gwaɗar:
«Tsikiŋ,
wànà siŋgwe guvah ana kà kalum dər ana,
naha pəra ya?»
A gwaɗar,
«Haya,
siŋgwe ŋa ka,
kataya.»
9 Piyer a gwaɗar:
«Meme na kurum nda zal yak ki mwime akaba à ahəm sula məma ka,
aà məbàzà za a Mezite Mesife Mbulum a?
Tsaraka,
taraka,
gà mburma ana ti le a zal yak a,
ti deriŋa,
ti zle a kər mbaŋa.»
10 A tsikar kataya ka,
a dəɗ aà sik mala meslire Mbulum ata tsara mbaŋa.
Gà ɓəza gawla tə daha a ga ata ka,
aka mbər mimìte.
Tə zla,
tə daha,
ti le ŋgat a tsaka zal ŋgar a fata asa.
11 Gà mburma Mbulum tserdze nda gà asiŋ gà mburma ana i fata ya,
tə tsaraka labara ata kataya ka,
ta ge magəɗa hinne.
Gà ɓəzla meslire Mbulum ta gewa gà dukw mene à mburma
pampam hinne
12 Gà ɓəzla meslire Mbulum tàa ge gà dukw mene à mburma nda gà dukw ŋgiɗ pampam ika magər gà mburma hinne.
Gà mburma Mbulum ti yahaba gər aà huɗ màsàpàr ana tə zalar Màsàpàr Salumun a,
nda gəzləŋ ilik.
13 Gà na tàa gəs Mbulum zukw tsiye,
ta ge magəɗa aà madaha a təv tar.
Ku mege ta ge magəɗa aà madaha a təv tar tekeɗe ka,
tə zlə̀b à tar hinne.
14 Gà asləka nda gà məkəs ta gəs BATSAH kwa ŋa nda gəzləŋ tar lele,
tə sə̀kàhawa aà gà mburma Mbulum ata hinne.
15 Aləka i dəba ŋa ya,
gà asiŋ ŋa tə ndzəkawaha gà ɓəzla dukw məməta a fata.
Tə dzayawa tar aà guva vatwa.
Ta hənawa à tar aka slə̀làh,
kige tsa aka bwitse.
Aɗaba a təv ana Piyer a de a nda ta ya ka,
sìsiye ŋgar aka dza aka tar ka,
ta mbalawa.
16 Gà mburma hinne tə dayawara i gà kwite ana ta mbeha a Yeruzalem a mbaŋa.
Tə ndzəkawaha gà ɓəzla dukw məməta nda gà mburma ana gà sitene ti slewa a tar za ya,
dite tar ata tserdze ya,
ta mbəlawa i dukw məməta tar a.
Ti sèwèr are a gà ɓəzla meslire Mbulum
17 Ama *batsah mala mandəva kuɗa a Mbulum ata nda gà *Saduki ana ta gəs bazlam ŋgar a,
ti ne are a gà ɓəzla meslire Mbulum hinne.
Ta ge metsehe,
ta gwa:
«Gasakwa tar.»
18 Ta gasa tar,
tə dza tar a ga daŋgay.
19 Aləka ndaavəɗ ka,
gawla Mbulum ilik a daha,
a handakaya i gà biye hərmaga ya fit,
a pə̀lara iɗəm à gà ɓəzla meslire Mbulum ata ya.
A gwaɗa a tar:
20 «Dum a ga Mbulum batsah ŋana,
dite ka tsikwim bazlam mesife awiya ŋa ana Yesuw a da dərra i təv Mbulum a,
a mburma.»
21 Gà ɓəzla meslire Mbulum ata ta gəs mifefile gawla Mbulum ata tsara.
I mèkwède hedwe ka,
tə da a ga Mbulum batsah ŋa ata.
Tə daha,
tə dza ba aà metsìkè bazlam ata a gà mburma.
Zàkwayiya ka,
gà mala mandəva kuɗa a Mbulum ata nda gà mburma ana ta gəs bazlam ŋgar a,
tə zal a gà asiŋ gà bàba gà Yahuda ana ta kwere a mburma ya.
Ti yahaba gər.
Ta fàfəl ika magər tar.
Aləka i dəba ŋa ya,
tə slər gà mburma aka gà ɓəzla meslire Mbulum ata i ga daŋgay a.
22 Aləka gà mburma ata tə daha,
ta hə̀ndə̀k i ga daŋgay a ka,
tàa le aɗəm aà wura tsa.
Ta mbəɗ gər a təv mayahaba gər gà mburma ata.
Tə daha,
ta gwa:
23 «Mì daha ka,
ga daŋgay mahə̀ndə̀kà ŋa iɗəm a lele dukw ŋgar,
gà ɓəzla makaslà ga ŋa ibam,
tar riŋ ika biye hərmaga ŋa.
Ama mì hə̀ndə̀k i ga ya ka,
maa ŋgat a wura ilik tsidze.»
24 Əbay gà ɓəzla makaslà ga Mbulum batsah ŋa ata nda gà Əbay gà ɓəzla mandəva kuɗa a Mbulum tə tsaraka gà bazlam ata tsara ka,
tə sər dukw ana ti dzele a nda təv gà ɓəzla meslire Mbulum ata ya asa tsa.
Ta gwaɗaba ika magər tar:
«Dite meme na dukuməŋa a ge ba ya?»
25 I dəba ŋa ya,
misle ŋgiɗ ilik a dara a təv tar a,
a gwaɗa a tar:
«Gà mburma ana kà dzum tar a daŋgay a ka,
tar ɗa i ga Mbulum batsah ŋana i faha,
ti tsik a bazlam Mbulum a mburma.»
26 Tə tsaraka kataya tsara ka,
Əbay gà ɓəzla makaslà ga Mbulum batsah ŋa ata tə da nda gà mburma ŋgar.
Tə daha,
ta gasara gà ɓəzla meslire Mbulum ata ya.
Ama ta gasa tar ka,
nda maàga tsa,
aɗaba gà mburma ta kelewa a tar nda kur.
27 Tə ndzəkaha tar aka miɗ seriye a təv mayahaba gər tar ata.
Dite batsah mala mandəva kuɗa a Mbulum ata a wiz aà tar bazlam a.
28 A gwaɗa a tar:
«Maa pala a kurum ahəm hinne,
aà metsìkè bazlam nda zləm wele ata.
Kurum dze ana,
kà tsarakum zləm beye,
na dite ki dwim a à bazlam ŋa aka miɗ aka miɗ,
i Yeruzalem asa ya?
Ama a sàs a kurum megweɗe ka,
mə̀r na a kəɗ wele ata ya.»
29 Gà Piyer nda gà asiŋ gà ɓəzla meslire Mbulum ata ta gwaɗar aakaha:
«Say megìse ka,
bazlam Mbulum ivaɗ,
tsəka,
biy mburma tsa.
30 Kà ndwandwayum Yesuw aà dizl,
a mət,
ama Mbulum gà batsah tsir kwa a mbəlara à ŋgat i məməta ya.
31 Mbulum a hitse à ŋgat aka tseke ahər mezime ŋgar,
a tike ŋgat a Əbay.
A ne à ŋgat mala məmbala à mburma asa.
A ge dər kamala taŋa ya ka,
dite gà mburma Isərayel tə ta ŋgat vatwa aà məmbə̀ɗà à gà gəzləŋ tar nda məpəla à bakal tar tserdze.
32 Mər ka,
gà ɓəzla sida gà dukw ata ta ge ba ya,
mə̀r nda gà Mezite Mesife Mbulum ana a vəl a gà na tàa gəs bazlam ŋgar a.»
33 Gà ɓəzla mayahaba gər ata tə tsaraka taŋa ka,
ta ge arəv hinne.
Tə dza akaba ahəm,
aà mibetse iɗəm gà ɓəzla meslire Mbulum ata ya fit.
34 Ama *Farisa duwa a riŋ ika magər tar,
zləm ŋgar Gamaliyel.
Ŋgat ka,
mala medzeŋge məpala ahəm Musa ana gà mburma ta gəsawa mifefile ŋgar lele ya.
A hitse aka magər mayahaba gər ata,
a gwaɗa a tar:
«Gà ɓəzla meslire Mbulum tə da a bəra zaakwa dzekwiŋ.»
35 Aləka i dəba ŋa ya,
a gwaɗa a gà mburma ana mayahaba gər ŋa ya asa:
«A kurum gà Isərayel,
gwim metsehe nda təv dukw ana ki ta gwim a à gà mburma aaha ya.
36 Akahər ata ka,
wele duwa a riŋ tə zalar Tudas.
A pə̀r aàba ka,
a gwa:
“Iye ka,
ŋgwal mburma hinne.”
Ama ka,
gà mburma ti sle a dərməka faɗ na ta gəs bazlam ŋgar a.
I dəba ŋa ya,
tàa kəɗ dər akaba ŋgat pəra,
gà mburma ana tə zazam ŋgat a,
tə təz ihər a fit,
ku ilik wura aka zeha tsidze.
37 I dəba ŋgat a ka,
wele ŋgiɗ a riŋ ilik,
a tike aɗəm ba i təv ana tar riŋ ta wetse a mburma ya.
Tə zalar Yudas gà Galile.
A ndzək mburma hinne aà mendzwil.
Ama tàa kəɗ ŋgat asa mbaŋa.
Gà mburma ana tə zazam ŋgat a,
tə təz ihər a asa.
38 Ama ka,
iye ihər i gweɗe a kurum a kinehe ya:
Kàa yehwim duwa à gà wele aaha ya asa tsa,
miyekwim à tar,
tə da ba.
Aɗaba na megemir tar aaha ta ge a ya,
gà mburma na ti tsik a ter a ya ka,
a ndze a tsa.
39 Ama na megemir tar a dere a i təv Mbulum a ka,
ki slwim aà mimbete a dər tsidze.
Gwim metsehe lele.
Biy tsa ki gwim a guvəl ka,
nda gà Mbulum.
Ki sirwim a iɗəm aba ya tsa.»
Ama gà mayahaba gər gà mburma ata ta gəs bazlam Gamaliyel ata.
40 Tə zalaha a gà ɓəzla meslire Mbulum ata,
ta gazla tar,
ta gwaɗa a tar:
«Ka ta fàfəlum nda zləm Yesuw asa tsidze.»
I dəba ŋa ya,
ta pəl à tar kuɗa.
41 Gà ɓəzla meslire Mbulum ata tə dara i təv mayahaba gər tar ata ya,
nda gà maŋgayaba,
aɗaba ana Mbulum a gəs tar lele,
a vəl a tar vatwa aà mesewere are agəra zləm Yesuw a.
42 I dəba ŋa ya,
ti tsikewa bazlam ŋgwal ŋa aaha agəra Yesuw ana Mbulum a gwa,
i slir a kurumehe a ya,
i ga Mbulum batsah ŋana kəla pat kuɗa.