Gà Piyer nda Yuhana ika miɗ mayahaba gər mburma
4
1 Aləka i təv ana gà Piyer nda Yuhana tar ihər ta fèfil a a mburma mba ya ka,
gà ɓəzla mandəva kuɗa a Mbulum nda gà Əbay gà ɓəzla makaslà ga Mbulum batsah ŋa ata nda gà *Saduki,
tə daha a təv tar.
2 Tə daha ka,
ta ge arəv hinne nda təv gà ɓəzla meslire Mbulum ata sula ya,
aɗaba ana tar riŋ ti tsik a bazlam a mburma ya,
ta gwaɗa a tar ka,
Yesuw aka mbəlara i məməta ya a mesife ya,
kərga megweɗe a tar a ka,
gà məməta ti sle aà məmbə̀lara a mesife ya fit mbaŋa.
3 Ama gà mburma ata ta hə̀ndə̀k aà tar a ga,
ta hinne a iɗəm,
aɗaba həvəɗ aka mbər mege.
4 Aɗaba kəla ka,
gà mburma hinne i magər gà mburma ata i fata ya,
ta waya bazlam tar ata gà mburma ata ti tsik a tar a.
I dəba ŋa ya,
gà ɓəzla magəsa Yesuw nda gəzləŋ tə sə̀kàhəha à mburma fit dze ka,
ti sle dəbuw ə̀zləm.
5 I mèkwède ŋa na ka,
gà Əbay gà Yahuda nda gà bàba ŋa ana i liwiŋ tar ta kwere a mburma ya,
dite nda gà ɓəzla medzeŋge məpala ahəm Musa ti yahaba gər a Yeruzalem.
6 Gà masak gà mburma ana tar riŋ pam i liwiŋ tar a ka,
gà Hanas,
*batsah mala mandəva kuɗa a Mbulum,
dite nda gà Əbay ŋgiɗ,
gà Kayafas nda Yuhana,
nda gà Aleksandire,
dite nda gà asiŋ gà gwala tar gà bàba gà ɓəzla mandəva kuɗa a Mbulum fit dze.
7 Tə zal a gà ɓəzla meslire Mbulum ata,
tə ndzəkaha tar aka miɗ tar,
dite ta gwaɗar:
«Ka ŋgatumara ndzəɗa ata dze ana,
i ŋga ya?
Kige tsa,
nda zləm weke na kà mbəlum à wele aaha ya?»
8 Piyer ana maràhà ŋa nda Mezite Mesife Mbulum a,
a gwaɗa a tar:
«Kurum gà Əbay nda gà bàba ŋa na i liwiŋ kurum ki kwerwim a mburma ya.
9 Mər ɗa kinehe ka,
i seriye na ika miɗ kurum a,
na naha ki wizwim aà mə̀r a bazlam aaha agəra ana mì ge ŋgwal ŋa a mala magàha a bəɗ aaha,
mì mbəl à ŋgat a.
10 Araha kinehe ka,
sərum dər,
kurum tserdze nda gà asiŋ gà mburma Isərayel ana ɗa ya:
Wele aaha a hitse aka miɗ kurum nda zay lele ka,
nda ndzəɗa zləm Yesuw Kiristi ana a dara i Nazaret a.
Ŋgat ana kà ndwandwayum ŋgat aà dizl magə̀làwà ŋa ya.
Ama ka,
Mbulum a mbəl à ŋgat i məməta ya a mesife.
11 *Ŋgat ka,
wur ana Mbulum a live dər aba ya,
a tsik ahər i wakita ŋgar a,
a gwa:
“Na a ne madəŋ kur ka,
kur ana kurum gà ɓəzla mazlazla ga kà zlum,
kà ywim iɗəm a dala ya ivaɗ.”
12 Ki slekwe a à mimbile ka,
say nda təv ŋgar ilik.
Aɗaba mege i ŋga ika gər ahəɗ tserdze,
Mbulum aka vəl zləm ŋgar a wur a ilik,
na dite ki slekwe a aà mimbile nda təv ŋgar a asa tsa.»
13 Ama mayahaba gər gà mburma ata tə tsaraka bazlam gà Piyer ata ka,
a ge a tar kamala sunwa ya,
aɗaba ana ta ŋgat a tar,
ta fèfil a parakka,
ta ge magəɗa tsidze ya ya.
A ge a tar kamala sunwa ya ndeyndey ka,
aɗaba ana tàa sinikeba à gà duwa tsidze ya.
Tə sər,
tar ka,
gà ɓəzla mazazama Yesuw piŋŋe.
14 Ama ta fə̀raha ka,
wele ana ta mbəl dər a,
a riŋ mehitse ŋa i təv tar mbaŋa.
I dəba ŋa ya,
ta gəs a taraha ahəm aà are,
tə sər dukw ana ti tsik a tar aakaha ya asa tsa.
15 Ama ka,
ta gwaɗa a tar aakaha:
«Dum i ga mə̀r ana mì yahawaba aɗəm gər a tə̀ma.»
Dite tar ŋa,
tə dza akaba bazlam ika magər tar.
16 Ta gwaɗaba:
«Ki gekwe a dze ana,
meme,
na à gà mburma aaha ya?
Aɗaba gà mburma aaha i Yeruzalem a fit,
tə sər ka,
dukw mene à mburma aaha ta ŋgatar a ka,
tar na ta ge ya.
Ama ki slekwe aà megweɗe a ka,
pàrsa tsa.
17 Ama kəla ka,
palakwa a tar ahəm nda mandza aà tar magəɗa nda bazlam kitè,
aà ti ti tsik bazlam a mburma nda zləm Yesuw Kiristi tsa,
dite ka,
gà mburma ŋgiɗ tə tsaraka maɗə̀và zləm dukw mene aà mburma aaha ta ge a ya asa tsa.»
18 I dəba ŋa ya,
tə zal a tar,
ta mbəɗaha gər.
Tə daha,
ta kwirike akaba tar hinne.
Ta gwaɗa a tar:
«Ama ka ti tsikwim duwa a wura nda zləm Yesuw asa tsa,
kige tsa,
ka ti dzeŋgwim bazlam ŋgar a mburma asa tsidze.»
19 Ama gà Piyer nda Yuhana ta gwaɗa a tar aaka:
«Kurum ŋa dzalum dukw ana a ne ndzer ŋa ika miɗ Mbulum a dzekwiŋ.
Wànà ŋgwal ŋa mì gəs ana,
bazlam kurum a,
tsəna,
biy Mbulum a?
20 Ama mə̀r ka,
mìi sle aà mimiyeke à dukw ana maa ŋgatar a,
ndəna maa tsaraka ya tsa,
say mìi tsik a pəra.»
21 I dəba ŋa ya,
mayahaba gər gà mburma ata ti yaha vatwa,
waytsa aà mandza aà tar magəɗa hinne asa,
dite ta pəl à tar,
tə da ba.
Ta ŋgat vatwa dukw ana tì sèwèr a ter a dər are ya tsa,
aɗaba gà asiŋ gà mburma tserdze tar riŋ tì zèmbeɗe a à Mbulum,
agəra dukw mene à mburma ata a ge ba ya.
22 Wele ata ta mbəl à ŋgat nda dukw mene à mburma ata ya ka,
a za mive dzik faɗ.
Meheme gà ɓəzla magəsa Mbulum
23 Ta pəl à gà Piyer nda Yuhana tsara ka,
ta mbəɗ gər a təv mayahaba gər gà mburma Mbulum asa.
Tə daha,
tə ɗama a tar dukw ana gà Əbay gà ɓəzla mandəva kuɗa a Mbulum nda gà bàba ŋa ana ta kwere a mburma ti tsik a.
24 Tə tsaraka bazlam ata tsara ka,
tar ata tserdze ya,
tə dza ba aà meheme a Mbulum.
Ta gwa i huɗ meheme tar a ka:
«Mbulum BATSAH kwa ŋa,
kər na kì ge gəza mbulum nda gər ahəɗ,
nda duluv,
dite nda gà dukw ana tserdze iɗəm a.
25 Kər na kà fàfəl nda Mezite Mesife yak nda bazlam Dawda batsah tsir mə̀r ana mala megemir yak a.
Kù gwa ka:
“Aàmala na gà mburma ta ge a swalwa nda magala,
nda zlapa ya?
Aàmala na tə dza akaba bazlam
məpapəɗa aà mburma ya məfara ŋa ya?
26 Gà bàba gà Əbay gər ahəɗ tə duwayaba à guvəl.
Dite gà Əbay tə yahaba gər a təv ilik ŋa,
aà magàwà aà gà batsah tar ŋa,
Mbulum nda mala məmbala a mburma ana a gwa,
i slir a kurumehe a ya.”»
27 I huɗ meheme tar ata ya hiywe,
ta gwa asa:
«Kaɗəŋ,
ar ka,
kamala Mezite Mesife yak ana ka tsik ahər akahər ata ya.
Aɗaba gà *Hiridus nda Puntiyus Pilatus ta gaw ba i kwite aaha nda gà slele,
dite nda gà Yahuda,
aà magàwà aà Kəla yak Yesuw ana kà slərra kamala mala məmbala à mə̀r a.
28 Ama dukw ana tə ləm dər akaba aà mege ya ka,
kamala biy yak ana kà lah metsike,
a sàsak aà mege daga piŋŋe ya.
29 Ama kinehe ka,
Batsah mə̀r ŋa,
zlak mə̀r i təv dukw ana ta ge a mə̀r a ŋgwal ŋa tsiye.
Dite ka vəl a mə̀r,
a mə̀r gà ɓəzla meslire yak,
aà metsìkè bazlam yak a mburma nda ndzer ŋa.
30 Zlak mə̀r,
dite mi mbəl à gà mburma,
nda mege gà dukw mene à mburma ata pampam a,
nda zləm mala megemir yak Yesuw.»
31 Tə ndəv à meheme tar ata tsara ka,
təv ata tar iɗəm a,
a ɓazla hinne.
Mezite Mesife Mbulum a rah a ba tar ilik ilik tserdze.
Ti tsikewa bazlam Mbulum a mburma parakka,
hwarwa aà are tar asa tsa.
Gà mburma Mbulum tə dzaya ba dukw ana ta ŋgat a tserdze
32 Gà mburma Mbulum ka,
tar mandza ŋa i təv ilik ŋa lele.
Mawàyà ba tar ibam,
nda gəzləŋ ilik ŋa asa.
Wura ilik ika magər tar,
aka fə̀r aà duwa ŋgar ka,
kamala na biy ŋgar à gər ŋgar a tsa.
Ama dukw ana tàa ŋgat a ka,
ti dzèye ba a ika magər tar tserdze.
33 Gà ɓəzla meslire Mbulum ta màwa à bazlam mimbile Yesuw BATSAH kwa ŋana a mbəlara i məməta ya,
a mesife ya ka,
ta gwaɗawa:
«Maa ŋgatar,
a mbəlara i məməta ya,»
dite Mbulum a pisewa a tar ahəm hinne,
a tar ata tserdze ya.
34 Matawak duwa a gewa a wura ika magər tar a tsidze.
Aɗaba gà mburma ata tə dzawuwa à gà guvah tar,
kige tsa à gà ga,
dite ta yahawa gər a siŋgwe ŋa a təv ilik ŋa.
35 Tə dzawa ahər a gà ɓəzla meslire Mbulum.
I dəba ŋa ya,
tə dzawa ikaba siŋgwe ata ya,
a gà mburma ya tserdze.
Ku weke kəla hitwis ŋgar ide.