Wele duwa magàha a bəɗ ŋa a mbəl
3
1 A pat duwa ndaàwa ka,
gà Piyer nda Yuhana tə da a ga Mbulum batsah ŋa ata,
aà meheme ana ta hamawa iɗəm pat meyèhè kwizir ide ya.
2 Wele duwa a riŋ magàha a bəɗ ŋa,
mandza ŋa a riŋ à guva biye hərmaga ana tə zalar Matsahəna ŋa ya.
Wele ata ka,
magàha a bəɗ ŋa,
daga ana ta wa ŋgat a.
Tə zlawaha a fata kəla pat,
dite ma wiz dukw meŋgèle aà gà mburma ana ti de a a ga Mbulum batsah ŋa ata ya.
3 A ŋgat a gà Piyer nda Yuhana ti de a a ga ata ya ka,
a wiz aà tar duwa.
4 Gà Piyer nda Yuhana ta mbəɗ aba aà ŋgat,
ta fə̀r ahər.
Piyer a gwaɗar:
«Fə̀r aà mə̀r.»
5 Wele ata a fə̀r aà tar hèlèwrèw,
a dzala i gər ŋgar ka,
ta viliŋ a duwa zaakwa.
6 Piyer a gwaɗar asa:
«Siŋgwe aà mə̀r tsa.
Ama dukw ana aà mə̀r,
mì ŋgat a ka,
mìi vilekiŋa.
Hitse aà mbulum nda zləm Yesuw Kiristi ana a dara i Nazaret a,
ka da nda sik yak.»
7 I dəba ŋa ya,
a gəs ahər mezime ŋgar,
a hitse dər aà mbulum.
Sik ŋgar ata a tàtə̀ɗ lele tsara.
8 A ndàb a mbulum,
a hitse dzeŋ tsara.
A dza ba aà mede nda sik ŋgar lele kuɗa.
A zazam gà mburma ata a ga Mbulum batsah ŋa ata.
A daha,
a suwaya i ga ata nda gà mandàbàyà a mbulum.
A zàmbaɗa à Mbulum hinne asa.
9 Gà mburma ata a riŋ i ga ata ya tserdze,
tə dza ahər are,
na ŋgat riŋ à sìweye a i magər tar nda mazàmbàɗà à Mbulum a hinne.
10 I dəba ŋa ya,
tə sər ŋgat,
naha ka,
wele ana a ndzawa ika biye hərmaga aaha tə zalar a tsahən hinne,
aà mewize duwa ya ka,
ta ge magəɗa hinne,
a ge a tar kamala sunwa ya,
aɗaba dukw ana a ge ba nda wele ata ya.
Mifefile Piyer i ga Mbulum batsah ŋa na
11 Gà mburma ata ta fə̀r ka,
wele ata a zezem a gà Piyer nda Yuhana hiywe,
tə samata dukw ana ta ger a ka,
a ge a tar kamala dukw mene à mburma ya.
Tə daha a təv tar aà huɗ màsàpàr ga ata tə zalar Màsàpàr Salumun a.
12 Piyer a ŋgat a gà mburma ata ka,
a gwaɗa a tar:
«Kurum gà mburma Isərayel,
aàmala na mimbile wele aaha ana a mbəl a ka,
a ge a aà kurum kamala sunwa ya?
Aàmala na kà fə̀rum aà mə̀r kamala na mì lə̀mbaɗa à sik wele aaha ka,
nda ndzəɗa mə̀r a,
kige tsa agəra ana mìi ndze a tsəɗaŋŋa ika miɗ Mbulum a ya.
13 Mbulum gà batsah gà tsir kwa Abəraham nda gà Izak,
nda gà Zakup na a vəl ndzəɗa a mala meslire ŋgar Yesuw,
na dite tì zlibe a à ŋgat a.
Ama kurum kàa gəsum ŋgat a gà bàba ŋa ana ta kwere a mburma ya.
Kàa gwim ahər seriye ika miɗ Pilatus,
ku mege i təv ana a sasar à məpəla dər a.
14 Kàa kalum à wele ana mala ndzer ŋa,
bakal ŋgar riŋ tsiye ivaɗ.
Kàa wayum mewize ahər məpəla a kurum ka,
à mala makə̀ɗà mburma ya seyiŋ ivaɗ.
15 Kərga taŋa ya,
kə̀ kəɗum wele ana a vile a kwe a mesife ya.
Ama Mbulum aka mbəlara à ŋgat i məməta ya,
a mesife,
dite mə̀r kinehe tekeɗe,
gà ɓəzla sida ŋa.
16 Megìse ana a gəs Yesuw nda gəzləŋ a na a mbəl à wele aaha ki ŋgetwimer a,
kà sərum ŋgat kinehe ya.
Zləm Yesuw a vəlar ndzəɗa,
a làmbaɗar à megìse ana a gəs ŋgat a,
dite ka,
a vəlar mandza zayzay asa,
kamala ana kurum riŋ ki ŋgetwimer a kinehe ya.
17 Ama i sər gà damər gà,
dukw ana kàa gwim nda gà Əbay kurum aà Yesuw a ka,
kàa gwim ndzer,
pàrsa iɗəm tsa,
aɗaba kà sərum tsa pəra.
18 Ama Mbulum aka tə̀kər ka,
kamala ana a tsik piŋŋe nda ahər gà ɓəzla məma à guma ŋgar ana fit dze ya,
a gwa:
“Mala məmbə̀là à mburma ana i ti slir a kurumehe a ya ka,
à sèwèr a are dzekwiŋ.”
19 Aɗaba taŋa kinehe ka,
mbəɗum à madzala gà gər kurum,
kà mbəɗum gər a təv Mbulum.
Dite mə̀ pəl a kurum à bakal kurum tserdze.
20 Dite i dəba ŋa ya,
BATSAH kwa ŋa ata a slir a kurumere a pat awiya ŋa ana à mbìɗ a aba ya,
ki vevwim a kinehe ya.
A pat ana aka ndzera ya ka,
a slir a kurumere a mala məmbala à kurum ata a zla daga piŋŋe agəra kurum a,
kamala megweɗe ya,
Yesuw Kiristi.
21 Ama kinehe ka,
a ndze a i gər ŋa tə̀ma,
haa a pat ana gà dukw tserdze tàa ne awiya ŋa ya.
Kamala na Mbulum a ɗif dər nda ahər gà ɓəzla məma à guma ŋgar ata a ndzək tar daga piŋŋe ya.
22 Musa a tsik ahər,
a gwa ka:
“Mbulum BATSAH kwa ŋa a ti slir a kurumere a mala məma à guma ŋgar kamala iye ya.
A ti ndze a ka,
i magər gà mburma kurum.
Ki ti dzwìm a zləm,
ki geswim a dukw ana tserdze a ti tsik a kurum a ya.
23 Wur ana aka gəs,
aka tə dzar zləm a bazlam mala məmà à bazlam Mbulum ata ya tsəka,
ti delewere ŋgat i liwiŋ gà mburma Mbulum a,
dite a dzeyiŋa*.”»
24 Piyer a gwaɗa a tar asa:
«Aɗaba daga à gà Samiyel a,
nda gà asiŋ gà ɓəzla məma à guma Mbulum tàa ɗif à gà pat ŋa aaha a ge ba ya mbaŋa asa.
25 *Aɗaba dukw ana Mbulum a tsik aba i sida ya,
a gwa nda ahər tar,
i ta vile a ya ka,
agəra kurum.
Dite kurum tekeɗe,
i masə̀ràba Mbulum ana a waya ɗa gà batsah tsir kurum a.
Aɗaba a gwaɗa a Abəraham ka:
“I ta pise a ahəm a gà mburma ana ika gər ahəɗ tserdze ya,
nda ahər gà ɓəza yak.”
26 Kərga taŋa ya,
Mbulum a lah meslirra Kəla ŋgar a ka,
a təv kurum a dzekwiŋ.
A slərra ŋgat a ka,
aà mipise a kurum ahəm nda məmbə̀ɗà à gər i təv dukw ana ŋgwal ŋa tsiye tserdze.»