Ga Ɓəzla Meslire 2

Mezite Mesife Mbulum ana a dara ya

1 A pat Pantakwasta *megirive gà Yahuda ana a ndzera ya ka, gà ɓəzla magəsa Yesuw nda gəzləŋ mayahaba gər ŋa i təv ilik ŋa asa mbaŋa. 2 Zàmma tsəka, meɗè zləm duwa a ɗera i gəza mbulum a. Dukuməŋa a ɗe ka, kamala himbiɗ ana a ge a nda ndzəɗa ya. A daha, a rah à miɓizle ŋgar a ga ana gà mburma ata iɗəm a hinne. 3 Ta ŋgat a dukuməŋa i fata kamala arah akwa ya. Gà dukw ata tə da ikaba ya, tə daha, tə ndzaya aka gà mburma ilik ilik tserdze. 4 Gà mburma ata tserdze ya, Mezite Mesife Mbulum a rah a tar a gəzləŋ. Tə dza ba aà mifefile, ku weke ndaka ahəm ŋgiɗ pampam, kərga na Mezite Mesife Mbulum ata a gwaɗa a tar, tsikwim a.

5 Ama gà Yahuda a riŋ, tə ndzawa i Yeruzalem. Tə zazamawa fəla gà Yahuda ka, nda ndzer. Tə dayara ika gà ahəɗ ana tserdze ika gər ahəɗ fit a. 6 Tə tsaraka miɓizle dukw ata ka, ti yaha ba gər hinne. A ge aà tar ata tserdze ya ka, kamala sunwa ya, aɗaba na tə tsaraka mifefile gà ɓəzla magəsa Yesuw ata ndaka ahəm ŋgiɗ pampam, ku weke a tsarakara iɗəm i ŋgar a. 7 I dəba ŋa ya, ta gwa: «Yweh, yweh, naha ana, meme na tar gà Galile ka, 8 ku weke, ta fèfil a i magər tar ka, ndaka ahəm kwite kwa ya? 9 Aɗaba araha, gà asiŋ ŋa ɗa i liwiŋ kwa ka, tə dayara ka, ika gà ahəɗ Partiya ya, nda Mediya ya, nda gà Ilam a, dite ika ahəɗ Mezapitamiya, ika gà ahəɗ Yuda nda Kapadukiya ya, ika gà ahəɗ Pwantus nda gà ika ahəɗ gà Ruma ana i Asiya ya, 10 ika gà ahəɗ Firigiya nda Pamfiliya, ika gà ahəɗ Ezipt nda biy Libiya ana bise nda Kirene. Gà mburma ana tə dara i Ruma ya, tar ɗa i faha mbaŋa. 11 Dite gà na ika ahəɗ Kereta, nda Arabiya ya tekeɗe, tar ɗa iɗəm i faha mbaŋa asa. Ama gà asiŋ ŋa ɗa i liwiŋ kwa ka, gà na gà wur gà Yahuda ndzer a, gà asiŋ ŋa ibam, gà slele ana ti ne gà Yahuda ya. Magwàɗà ŋa tar ka, gà Galile, tsaatsa kà tsarakwa mezlibe tar ana tì zlibe a à Mbulum ndaka ahəm kwa pampam agəra ŋgwal ŋgar ana a ge a ya.» 12 A ge a tar tserdze kamala sunwa ya, tə sər dukw ana ti dzele a ya tsa. Ta gwaɗaba ika magər tar: «Taŋa dze ana, dukùla na kamala megweɗe ya?» 13 Ama gà misle ŋgiɗ pam ka, tə dza ba aà masàwlà aà gà ɓəzla magəsa Yesuw ata. Ta gwa: «Tar ka, gà ɓəzla mekweye.»

Bazlam Piyer a pat Pantakwasta

14 I dəba ŋa ya, gà Piyer nda gà asiŋ gà ɓəzla meslire Mbulum ata kurwa gəra ilik a, ta hitse aà mbulum, dite Piyer a dza ba aà mifefile a gà mburma ana i fata ya, ŋgəlakəkka nda ndzəɗa. A gwaɗa a tar: «A kurum gà Yahuda nda gà mburma ana ɗa mandza ŋa i Yeruzalem tserdze ya. Tsarakum, dite kà dzum zləm a dukw ana i tsik a kurum a ya lele: 15 Gà mburma aaha ka, gà makwàyà ŋa kamala ana kà dzalum a tsa, aɗaba ar ka, ndzemde tswiɗ biy mèkwède pəra, a sle mekweye ɓav tsa asa. 16 Ama kinehe ka, dukw ana Mbulum a tsik piŋŋe nda ahər mala məma à guma ŋgar Ziwel a ka, aka sle kuɗa. 17 Aɗaba Mbulum a gwa ka:

“A pat mandəvandəv gər ahəɗ ka,

i dzèye a Mezite Mesife gà a gà mburma tserdze.

Gà ɓəza kurum nda gà dəm kurum

ti ta me a à gùma gà.

Gà ɓəza kurum gà gawla ŋana ti ta ŋget a vatwa

i sunwa ya, tar riŋ nda are lele, tàa ndze are tsa.

Dite sunwa a ta ge a a gà mburma kurum ana

gà màndawal ŋa ya.

18 I ti dzeye a Mezite Mesife gà

a gà ɓəzla megemir gà, ku mege

a gà asləka ŋana nda gà dəm ŋana tserdze.

Dite ti ta me a à guma gà.

19 I ta ge a gà dukw gà bàba ŋa na hinne

i gər ŋa i mbulum.

Dite i ta ge a gà dukw mene à mburma i bəɗ

ika gər ahəɗ asa: Gà məmbəz nda gà akwa,

nda gà hədzək ti ta ge a riŋ ziŋziŋ.

20 Pat tekeɗe, à div a asa tsa. Dite

kiye à mbìɗ a aba nduzzwa, kamala məmbəz a.

Gà dukw ata ta ge a ba fit dzekwiŋ,

na dite pat Batsah kwa ŋana a dere a ya.

Pat ata ka, ŋgwal ŋa ndzer, pat maŋgayaba.

Mezlibe ŋgar hinne.

21 Kuɗa kəla ka, wur ana aka ɗə̀v zləm

a BATSAH kwa ŋa ya ka, a mbiliŋa.”»

22 Piyer a gwaɗa a tar asa: «A kurum gà mburma Isərayel, iye ihər i gweɗe a kurum ŋa, dzum zləm a dukw ana i tsik a kurum a ya lele: Yesuw gà Nazaret ka, Mbulum na a slərra ŋgat a. Kamala taŋa ya, aka ge gà dukw mene à mburma ŋgiɗ pampam hinne nda ahər ŋgar, kamala meɗìfè à duwa a mburma ya tserdze mbaŋa. Kàa ŋgatum a gà dukw ata tserdze ya, ika magər kurum. 23 Ama ta vəl a kurum vatwa aà makə̀ɗà ŋgat ka, kamala na Mbulum a tsik daga piŋŋe, a ta ge a ba ya dukw ŋgar. Ka vəlum ŋgat a ahər gà na tə sər Mbulum tsiye, tə ndwandway ŋgat aà dizl magə̀làwà ŋa. 24 Ama Mbulum aka hitse à ŋgat i məməta ya, a mesife. Dite aka be à ŋgat i ahər mesewere are məməta ya asa. Aɗaba a ge a ba tsa, na à mìts a i məməta hiywe ya. 25 Aɗaba taŋa na Dawda a tsik ahər piŋŋe ka, a gwa:

“I ŋgatawa a Batsah ga ŋa kəla pat ika miɗ gà.

Ŋgat ka, ahər mezime gà, dite ka, i təv

dukw ana tserdze ya ka, i dzedzer a asa tsiye.

26 Aɗaba taŋa na gəzləŋ gà tekeɗe,

maràhà ŋa nda maŋgayaba fit a.

Dite nda bazlam gà tserdze ya,

i ndze a ka, barbarərra.

Ku mege i mite a tekeɗe ka, i dzele a tsa.

27 Aɗaba ki ta miyek a à iye i biye a məməta tsa.

Dite ki ta vile a vatwa a wur ana i təv yak a

aà meze tsa asa.

28 Kàa ɗifiŋ à vatwa ana a de a a təv mesife ya.

Ki ta viliŋ a maŋgayaba hinne,

aɗaba ana i sle aà mendze i təv yak a.”»

29 Piyer a gwaɗa a tar asa, «Gà damər gà, Yàa ŋgat vatwa aà mifefile a kurum ndərzakka nda təv batsah tsir kwa Əbay Dawda. Ama ŋgat ka, aka mət, tàa le ŋgat a biye. Dive ŋgar ɗa kinehe tekeɗe ka, kà sərakwa. 30 Ama ŋgat akahər ata ka, mala məmà à bazlam Mbulum, dite a sər ka, Mbulum aka tsikiŋ lele i sida ya ka, i ta vile a batsah Əbay gà a misle ŋgiɗ ilik ika magər gà ɓəza yak. 31 Dawda aka sər dukw ana a ta ge a ba ika miɗ daga piŋŋe ya, ama a tsik bazlam ŋgar ata ka, aà mala məmbala à mburma ana Mbulum a gwa ka, i slir a kurumehe a, a mbilere a i məməta ya, i təv ana a gwa ka, tàa miyak à iye i məməta tsiye, dite slu ba gà tekeɗe, a ze a tsa asa ya.

32 Mbulum aka mbəlara à Yesuw ana a tsik aà ŋgat a, a mesife ya, dite mə̀r tserdze na gà ɓəzla sida ŋa ya. 33 Mbulum Tsir ŋgar a zla ŋgat, a tike ŋgat aka tseke ahər mezime ŋgar. Aka vəlar Mezite Mesife ŋgar ana a gwaɗar, i vilek a i sida ya. I dəba ŋa ya, ŋgat tekeɗe, a zazəɗ dərra a təv kwa ya. Aɗaba dukw ana kinehe kurum riŋ ihər ki tserekwim a, dite ndəna ki ŋgetwimer a ya ka, taŋa ka, megemir Mezite Mesife Mbulum ata a ge a ya. 34 Aɗaba Dawda ka, aka tsəl a mbulum tsa. Ama ŋgat a gwa:

“Mbulum a gwaɗa a Batsah ga ŋa:

Ndza aka tseke ahər mezime gà,

35 haa a pat ana Yàa dzak gà ɓəzla mene are

aà huɗ sik yak, kamala bwitse ya dzekwiŋ.”

36 Aɗaba taŋa kinehe tekeɗe ka, gà mburma Isərayel tə sər fit nda ndzer, Yesuw aaha kà ndwandwayum aà dizl magə̀làwà ŋa ya ka, ŋgat na Mbulum a ne dər BATSAH kwa ŋa, dite ka, mala məmbala à mburma ana Mbulum a gwa, i slir a kurumaha a asa ya.»

37 Gà mburma ata tə tsaraka bazlam ata tsara ka, arəv a da aà tar a, ta ge magəɗa hinne. Ta gwaɗa a gà Piyer nda gà asiŋ gà ɓəzla meslire Mbulum ŋgiɗ: «Gà damər mə̀r, dite mìi ge a dze ana, meme?» 38 Piyer a gwaɗa a tar aakaha: «Mbəɗum à madzala gà gər kurum, dite ti tsilwiɓ à kurum a yam, nda zləm Yesuw Kiristi. I dəba ŋa ya, Mbulum à pìl a kurum a à bakal kurum, dite ka, ki ŋgetwime a Mezite Mesife Mbulum ana a vile a kurum a ya. 39 Aɗaba Mbulum a vəl Mezite Mesife ŋgar ata i sida ya ka, agəra kurum aaha nda gà ɓəza kurum a, dite agəra gà mburma ana tserdze, ti ndze a ku mege i təv diriŋ a ya asa mbaŋa. Ama a vile a ka, ku mege i ŋga, a gà na Mbulum BATSAH kwa ŋa a zel a ter a ya tserdze.»

40 Ama Piyer a tsik a tar bazlam ŋgiɗ pampam hinne asa, a mà a taraha à arəv, a waya na ta gəs bazlam ŋgar ata nda ndzer a, ti ya ba tsidze. A gwaɗa a tar: «Gəsum bazlam Mbulum ata a ta mbil a à mburma ya, dite ka, ka tə ndzum i təv gà mburma aaha ti ti dzeye ya tsa.» 41 Gà mburma hinne ta gəs bazlam Piyer ata, ti tsilwiɓ à tar a yam. A pat ata ka, gà mburma ti sle a dəbuw makər, na tə sə̀kàhəha a təv gà ɓəzla magəsa Yesuw nda gəzləŋ ata ya. 42 Tar ata tserdze ya, tə dzawa zləm a guma ana gà ɓəzla meslire Mbulum ata ti ɗifewa a tar dər a ka, lele nda metsehe. Tə ndzawa ba ka, say i təv ilik ŋa. Tə zəmawa ɗaf tekeɗe, i təv ilik ŋa asa. Dite ta hamawa aà Mbulum tekeɗe ka, i təv ilik ŋa asa mbaŋa.

Masəra ba ana ika magər gà ɓəzla magəsa Yesuw

nda gəzləŋ a

43 Mbulum a gewa gà dukw mene à mburma ŋgiɗ pampam hinne nda ahər gà ɓəzla meslire ŋgar. Agəra taŋa gà mburma ana i fata ya tserdze, arəv a da dər aà tar a, tə ndzawa ka, nda gà magəɗa. 44 Gà ɓəzla magəsa Yesuw nda gəzləŋ, tə ndzawa ba i təv ilik ŋa, tar tserdze, tə dzayawa à ba gà dukw tar a fit, a təv ilik ŋa ya mbaŋa. 45 Tə dzawa à gà guvah, nda gà dukw tar tserdze, dite tə dzàyawaba siŋgwe ŋa ika magər tar tits na duwa aka sle aà wura ya. 46 Kəla pat ti yahawaba gər a təv ilik ŋa i ga Mbulum batsah ŋa na. Ti yahawaba gər aà mazəma ɗaf i gà ma tar ilik ilik tserdze. Tə zəmawa ka, nda gà maŋgayaba nda gəzləŋ ilik. 47 Tə zàmbaɗawa dər aà Mbulum hinne, gà mburma tserdze ta waya tar. Kəla pat BATSAH kwa ŋa a sə̀kàhawaha à gà mburma ana a mbala à tar a, aka gà ɓəzla magəsa ŋgat ata nda gəzləŋ ilik a.