Yuhana 11

Məməta Lazar

1-2 Wele duwa a riŋ, zləm ŋgar Lazar. Ŋgat a ndzawa ka, i Betaniya, i kwite ana gà damər ŋgar gà Mariya nda Marta tə ndzawa iɗəm a. Mariya ka, məkəs ana a ti dze a wirdè aka sik Yesuw, dite à bèh a ihər a nda ambəz ŋgar a. A pat duwa ka, Lazar ata a dəɗ a dukw məməta. 3 Aɗaba taŋa na gà damər ŋgar ata gà dəm ŋa sula ya, tə slər mburma a təv Yesuw. Tə daha, ta gwaɗar: «Batsah mə̀r ŋa, masla yak ŋgwala tsa, dukw məməta a geriŋa.» 4 Yesuw a tsaraka kataya ka, a gwaɗa a tar: «Dukw məməta ŋgar ata ka, à mite a dər a biye tsa. A ger a ka, aà meɗìfè à ndzəɗa Mbulum a mburma, dite tə sər mezlibe ana tì zlibe a à iye Kəla ŋgar a mbaŋa.»

5 Ama Yesuw ka, a waya gà Marta ata nda gà damər ŋgar gà Lazar a ka, lele. 6 Ku mege aka tsaraka Lazar a riŋ i dukw məməta ata kataya tekeɗe, a ndzaba riŋ i təv ana ŋgat riŋ iɗəm a pat sula asa. 7 I dəba ŋa ya, a gwaɗa a gà ɓəzla mazazama ŋgat: «Mbə̀ɗakwa gər aka ahəɗ Yuda a təv Lazar a fata.» 8 Gà ɓəzla mazazama ŋgat ata ta gwaɗar aaka: «Ee mala medzeŋge mə̀r, aka ndza ka, hinne tsa na gà mburma ana i fata ya, ta waya makàlàwà kər nda kur a ka, dite ki mbìɗekwehe a gər a fata asa ana, meme kuɗa ya?» 9 Yesuw a gwaɗa a tar aaka: «Daga aà gər mèkwède ya, haa a hawa ana ki ŋgetekewe a a pat tsiye? Na wura à sìweye a ndaapat ka, a ndif a sik tsa, aɗaba ŋgat a riŋ a ŋget a a vatwa dzaydzay i bəɗ lele. 10 Ama wur ana à sìweye a ndaavəɗ a ka, ŋgat na a ndif a sik a, aɗaba ziŋziŋ hinne, dzaydzay i təv ŋgar tsa.»

11 Yesuw a tsik a tar bazlam ata ka, a gwaɗa a tar asa: «Masla kwa Lazar ka, a riŋ ika mendze are. Ama ka, i ta piɗeke a dər.» 12 Gà ɓəzla mazazama ŋgat ta gwaɗar aaka: «Na Lazar ka, mendze are ŋa pəra ka, a mbiliŋa, Batsah mə̀r ŋa.» 13 Tsaatsa a sàs a Yesuw aà megweɗe ka, Lazar ka, aka mət, ama gà ɓəzla mazazama ŋgat ta gwa i tar ka, ar ka, ika mendze are kaɗəŋ. 14 I dəba ŋa ya, Yesuw a tsik a tar parakka, a gwaɗa a tar: «Lazar ka, aka mət. 15 I ŋgeye a ba aɗaba kurum, agəra ana a mət ka, iye riŋ i fata tsiye. Kamala taŋa ya, a ti zlèk a kurum i təv megìse ana ki giswim a iye nda gəzləŋ, ki sinikwim a dər ba ya. Ama kinehe ka, tàkwa a təv ŋgar, ta fə̀rakwa ŋgat.» 16 Tumas, wele ana gà mawusa ya, a gwaɗa a gà asiŋ gà ɓəzla mazazama Yesuw: «Haya, tàkwa, ka matakwa akaba nda gà BATSAH kwa ŋa.»

Yesuw ŋgat mala məmbala à mburma i məməta ya

17 Yesuw a ndzeha a Betaniya ka, Lazar aka ge i biye mehinne faɗ. 18 Ama kwite Betaniya ata ka, bise nda Yeruzalem, a sle kiliwmeter makər tsa na ki de a i Yeruzalem a a fata ya. 19 Kamala taŋa ya, gà mburma hinne tə daha a təv gà Marta nda damər ŋgar Mariya, aà mege a tar wuɗàh, ta me a terehe a à arəv, agəra damər tar ana a mət a.

20 Marta a tsaraka Yesuw ana a riŋ a dehe a ya ka, a valaha a təv ŋgar, aà melime nda gà ŋgat. Ama Mariya ka, ŋgat a riŋ mandza ŋa i ma. 21 Aləka Marta a ndzeha a təv Yesuw tsara ka, a gwaɗar: «Batsah ga ŋa, ki ge ɗa i faha piŋŋe ka, ana ka, damər gà aaha à mite a tsa ti ibam. 22 Ama i sər, ku mege kinehe tekeɗe, Mbulum a vilek a dukw ana kàa wiz ahər a.» 23 Yesuw a gwaɗar: «damər yak ata a mbilere a i məməta ya.» 24 Marta a gwaɗar aaka: «I sər ka, a ta mbilere a i məməta ya, i təv ana gà məməta tserdze ta mbele a a pat mandəvandəv gər ahəɗ a.»

25 Yesuw a gwaɗar aaka asa: «Iye na mala məmbala à mburma i məməta ya ya, dite iye asa na mala məvəla a tar mesife ya. Wur ana à gis a iye nda gəzləŋ a ka, ku mege aka mət tekeɗe, a mbiliŋa, a ndze a aà biybiy. 26 Wele ana aka gis iye, aka ŋgat mesife gà ata ya ka, mesife ŋgar à mite a tsa, a ndze a aà biybiy. Wànà kàa gəs taŋa ya?» 27 Marta a gwaɗar aaka: «Haya, Yàa gəs, Batsah ga ŋa. I sər, kər ka, mala məmbala à mburma ana Mbulum a gwa ka, i ti slir a kurumehe a ya. Kər ka, Kəla Mbulum ana a gwa, a dere a aka gər ahəɗ a ya.»

Yesuw a tuwa

28 Marta a tsik aba bazlam ata ya ka, a mbəɗ gər a ma, a daha, a gəs damər ŋgar Mariya a zlawak, kətsah aà mburma ya. A tsiker nda akəl, a gwaɗar: «Əbay kwa aka dara, a zelekiŋa, a gwaɗak, dara.» 29 Mariya a tsaraka bazlam ata tsara ka, pewtsek a mba aba aà mede a təv ŋgar. 30 Ama Yesuw ka, a riŋ i təv ŋgar ana Marta a le ahər a mba hiywe. Aka ndze a kwite ata zukw tsa. 31 Gà mburma ata ndeɗiŋa tə daha, ta màha à arəv a Mariya, tar riŋ mandza ŋa i ga. Ta ŋgat a Mariya ana a mbàra aba a bəra ya tsara ka, tə zazamara ŋgat a. Tə dzala i gər tar ka, ta gwa: A de a ka, aka dive, a ti tiwe a a fata.

32 Tsaatsa Mariya a de a ka, a təv ana Yesuw iɗəm a. A daha, a ŋgatar tsara ka, a dza gurmits a bəɗ aka miɗ ŋgar. A gwaɗar: «Batsah ga ŋa, ki ge ɗa i faha piŋŋe ka, ana ka, damər gà aaha à mite a tsa ti ibam.» 33 Yesuw a fə̀r aà Mariya ka, a tiwiŋa, dite gà mburma ana tə dəɗ aakaha ya mbaŋa, tə dza akaba tuwa, a tsahən ahər tsa, a wir ahər a i gəzləŋ hinne, aka tsəɓar. 34 Dite a gwaɗa a tar: «Kà lwim kinehe ana, a ŋga?» Ta gwaɗar aaka: «Batsah mə̀r ŋa, dara, mìi ɗek a dər.» 35 I təv ana ti de a ya ka, a dza ba aà tuwa kwàyìya hinne. 36 Gà mburma ana i təv ŋgar i fata ya ka, ta gwa: «Fə̀rum na a tiwe a, a waya ŋgat hinne ya kwaŋ.» 37 Ama gà asiŋ ŋa ta gwa ika magər tar: «Ŋgat ana à hìndìk a ika are a mala guluf ana, dite aàla na a mbəl à Lazar i dukw məməta ŋgar aaha a mət dər a te tsiye?»

Yesuw a mbəlara à Lazar i məməta ya

38 Ama Yesuw ka, gəzləŋ a riŋ ihər a wir ahər a turturtur hinne asa. I dəba ŋa ya ka, a ndze aka dive kuɗa. Dive ata ka, melè ŋa i təv ana gìrdzìdzìhhe ya. Tə tàpàsl ahəraha beliŋ. Ta hə̀ndə̀k dər ahəraha. 39 A daha, a gwaɗa a tar: «Hə̀ndə̀kum ihər beliŋ a.» Marta, damər wele ana a mət a, a gwaɗar: «Batsah mə̀r ŋa, kinehe ana, a ze a ana, hinne tsiye, aɗaba aka ge i biye ka, mehinne faɗ dze ana, taŋa ana, meme gwedziye?» 40 Yesuw a gwaɗar aaka: «Yàa gwaɗak ka, na kàa gəs iye nda gəzləŋ ka, ki ta ŋget a ndzəɗa Mbulum ana, Yàa tsikik tsiye?» 41 Tə daha, ta hə̀ndə̀k ihər beliŋ ata ya. Yesuw a fə̀r a gəza mbulum, dite a gwa: «Tsir ga, iye ihər i gik a kəkaaha, aɗaba ana kàa dza zləm a dukw ana i wiz aà kər a. 42 I sər ka, ki tserekiŋ a dər hiywe. Ama i tsik taŋa ka, agəra gà mburma aaha i təv ga ya, dite tar tekeɗe, tə sər dər ka, kər na kà slərra iye ya kaɗəŋ ndzer.» 43 A tsik aba bazlam ata ya lele ka, a fàfəl nda ndzəɗa ŋgəlakəkka. A gwaɗa a Lazar: «Dara i biye ya, Lazar.» 44 Tsam ka, pakw məməta aaha a dara i dive ya kaɗəŋ, gà sik ŋgar nda are ŋgar fit mendìwìɗè ŋa nda petek. Are ŋgar tekeɗe, simbikw makùmbuhwa ŋa. Yesuw a gwaɗa a tar: «Pə̀lum à ŋgat, ka məsakum dər, ma da ba.»

Gà bàba gà Yahuda ti yaha vatwa aà magəsa Yesuw

Mata 26:1-5; Markus 14:1-2; Luka 22:1-2

45 Gà mburma aaha ndeɗiŋa tə zazamaha Mariya ya ka, ta ŋgat a dukw mene aà mburma ata Yesuw a ge ya tserdze. I fata ya tsara ka, gà mburma hinne ika magər tar a, ta gəs ŋgat nda gəzləŋ. 46 Ama gà asiŋ ŋa ika magər tar ibam, tə da təv gà *Farisa, tə daha, tə ɗama a tar dukw ana Yesuw a ge tserdze ya. 47 Ama gà Farisa ata nda gà Əbay gà ɓəzla mandəva kuɗa a Mbulum a, tə tsaraka kataya ka, ti yaha gər a gà asiŋ gà bàba ŋa ana ta kwere a mburma ya, ta gwaɗa a tar: «Ki gekwe a dze ana, meme na wele aaha a riŋ a geye a gà dukw mene aà mburma hinne ya? 48 Na kàa miyakukwa dər, ma ge ba dukw ŋgar ka, gà mburma fit ta gis a ŋgat nda gəzləŋ. I dəba ŋa ya, gà ɓəzla makwàrà mburma ana i Ruma ya, ti dere a, ta mbezle a à batsah ga Mbulum kwa leheɗ leheɗ, ti dzeye a à gwala kwa fit asa.» 49 Wele duwa a riŋ ilik ika magər tar, zləm ŋa Kayafas. Ŋgat na *batsah mala mandəva kuɗa a Mbulum ana a ndə̀vawar akahər ata ya. A hitse aà mbulum ika magər tar a, a gwaɗa a tar: «Kurum ka, kà sərum duwa tsa. 50 Kà sərum ana, ŋgulum mburma ilik mə̀ mət tsiye, ndəna, gà mburma kwa tserdze ti dzeye a ya?» 51 A tsik bazlam ata ka, nda meweye ŋgar tsa. Agəra ana ŋgat batsah mala mandəva kuɗa a Mbulum akahər ata ya, a mà ka, à dukw ana Mbulum a waya, a ta ge a ba ika miɗ mba ya, kamala megweɗe ya: Yesuw à mite a agəra gà gwala gà Yahuda tserdze. 52 Ama kə̀la ka, agəra tar ɗekɗek tsa, agəra gà mburma ana tar gà ɓəza Mbulum, tə dzaya ba vatwa sweyèh sweyèh ika gər ahəɗ tserdze ya mbaŋa. Dite ti yahaba gər a təv ilik ŋa, ti ne ba ilik.

53 Agəra bazlam Kayafas ata a tsik a ka, gà bàba gà Yahuda ti yaha vatwa aà makə̀ɗà Yesuw, daga aà pat ata tsara. 54 Aɗaba taŋa na a sàs a Yesuw aà mesìweye ndərzakka i təv are gà mburma ata i fata ya asa tsiye. A mah ba i fata ya, a da a kwite ana tə zalar Efərayim a. Kwite ata ka, aà guva kusak. Tə ndzaba i fata nda gà ɓəzla mazazama ŋgat.

55 Akahər ata ka, megirive gà Yahuda ana tə zalar Paska ya, aka à mendze aɗəm. Ama gà mburma ana i gà kwite ŋgiɗ a pampam hinne, tə da a Yeruzalem, i təv ana megirive ata aka ndzera zukw tsiye. Ti ta bere a ba kamala ana fəla tar a tsik a. 56 Ama i təv ana tar riŋ i fata ya ka, ti yaha Yesuw. Aləka i təv mendze tar ana i batsah ga Mbulum a ka, ta gwaɗaba ika magər tar: «Kà dzalum dze ana, a dere a a megirive aaha ya ya, na kù gwaɗum a?» 57 Aɗaba gà Əbay gà ɓəzla mandəva kuɗa a Mbulum, nda gà Farisa ta gwa: «Na wura aka sər təv ana Yesuw iɗəm a ka, ma ɗif dər,» ta gis a ŋgat.