Mariya a dza à wirdè aka sik Yesuw
12
1 A zeha mehinne ndilik na ta ge a *megirive Paska ya.
Yesuw a mbəɗ gər a kwite Betaniya,
a təv ana Lazar a ndzawa iɗəm a.
Ŋgat ka,
wele ana Yesuw a mbəlara à ŋgat i məməta ya.
2 Aləka hawa a ge ka,
ti der dukw mezime i fata.
Marta a ndzək a taraha.
Tə zəm akaba ɗaf ka,
nda Lazar,
dite nda gà asiŋ gà misle ŋgiɗ ana tə zal a taraha ya mbaŋa.
3 I fata ya ka,
Mariya a zla wirdè ana a ze hwaŋŋa lele,
tsakala ŋa hinne,
à sìkim a ba tsiye.
Wirdè ata ka,
zlile dukuməŋa a riŋ tə zalar *nardin,
tsìsl maràhà ŋa i kwalaba.
A daha,
a dzaya aka sik Yesuw.
I dəba ŋa ya,
a tàpàɗ ihər nda ambəz ŋgar a.
Ga ata ka,
hwaŋŋa a rah nda meze wirdè ata fit.
4 Ama misle ŋgiɗ ilik ika magər gà ɓəzla mazazama ŋgat a,
zləm ŋgar Yudas Iskariyut,
wele ana a ta ge a ɗaf aà Yesuw a,
a gwa:
5 «Assàh,
wirdè aaha ka,
a sle kur siŋgwe dərməka makər dze ana,
aàla na ta kal dər tsiye,
ana ka,
tì dzèye a siŋgwe ŋa a gà ɓəzla matawak a?»
6 Tsaatsa a tsik bazlam ata kataya ka,
aɗaba ana gà ɓəzla matawak ti ndzer are tsehe ya tsa.
Ama aɗaba ana ŋgat mala akəl,
a gəsawa kìywa ana tə dzawa aɗəm siŋgwe ya ka,
a ndzəkawa ihər a zaakwa zaakwa ya.
7 Ama Yesuw a gwaɗar:
«Miyak à məkəs aka sifik.
Aɗaba ŋgat ka,
aka ge aà iye dukw ana ti ti zle a dər akaba iye a biye ya.
8 *Gà ɓəzla matawak ka,
tar riŋ i təv kurum kəla pat,
ama iye ka,
i ndze a i təv kurum kəla pat tsa.»
Ti yaha vatwa aà makə̀ɗà Lazar
9 Gà mburma hinne tə tsaraka Yesuw a riŋ i kwite Betaniya ka,
ta mah ba,
tə da a fata.
Tə daha a fata ka,
a təv ŋgar ɗekɗek tsa,
aɗaba a sàs a tar məfə̀rà aà Lazar ana Yesuw a mbəlara à ŋgat i məməta ya mbaŋa.
10 Aɗaba taŋa na gà Əbay gà ɓəzla mandəva kuɗa a Mbulum ta mà akaba à bazlam aà makə̀ɗà Lazar mbaŋa ya.
11 Aɗaba ŋgat na gà asiŋ gà mburma ana i fata ya hinne,
ta miyak à tar,
ta gəs Yesuw nda gəzləŋ a.
Yesuw a da a Yeruzalem
12 Ndidwe ŋana ka,
gà mburma ana tə daha a *megirive Paska ata ya,
tə tsaraka ka,
Yesuw a riŋ a dehe a a Yeruzalem.
13 *Tə daha,
tə sasara gà ahər dizl ɗaf duwa kamala təɓah a,
tə da dər aà vatwa aà melime dər nda gà ŋgat.
I təv ana ti ndze aà vatwa,
ti de a dər a ka,
ta wideye nda ndzəɗa hinne,
ta gwa:
«Zlə̀bakwa à Mbulum.
Mbulum BATSAH kwa ŋa mi pise ahəm a wele ana a slərra ya.
Mbulum mi pise ahəm a Batsah Əbay gà Isərayel.»
14 Ama Yesuw ka,
a le aà hezweŋe duwa,
a ndza aaka,
a de a dərraha a fata kamala ana wakita Mbulum a tsik a,
a gwa ka:
15 *«Gà mburma ana i kwite Siyuna ya,
ki gwim magəɗa tsa.
Araha,
Əbay kurum naha a deriŋa,
mandza ŋa ika kəla hezweŋe.»
16 Ama akahər ata ka,
gà ɓəzla mazazama ŋgat tə sər bazlam ata a sasar aà megweɗe ana,
là ka,
tə sər zukw tsa.
Say i təv ana aləka Yesuw a ta meŋgete a mezlibe ana tì zlibe a à ŋgat i təv Mbulum a dzekwiŋ,
na dite a ma a tarəra a gər a kuɗa ya.
Ama ka,
tàa ge aà ŋgat kalkal kamala ana wakita Mbulum a tsik,
a ta ge a ba ya kaɗəŋ.
17 Akahər ata,
i təv ana Yesuw a zalaha a Lazar a dive,
a mbəlara à ŋgat i məməta ya ka,
gà mburma riŋ hinne i fata.
Gà mburma ata ibam,
tə ɗama dukw ana ta ŋgatar a tserdze,
a gà misle ŋgiɗ.
18 Aɗaba taŋa na gà mburma hinne tə da aà melime nda gà ŋgat aka vatwa ya.
Aɗaba tàa tsaraka,
ŋgat na a ge dukw mene aà mburma ata ya.
19 Gà *Farisa ta ŋgatar kamala taŋa ya ka,
ta gwaɗaba ika magər tar:
«Ki gekwe a dze ana,
meme na dukw ana ka dzalakwa aà mege tserdze ya ka,
a ge a ŋgùlum tsiye?
Araha,
gà mburma tserdze tekeɗe,
ti zezem a ŋgat ka,
hinne asa ana,
meme kuɗa ya?»
Gà asiŋ gà Girek əŋgal ti yaha Yesuw
20 Ika magər gà mburma ana tə daha a megirive ata a Yeruzalem,
aà medzè gurmits a bəɗ a Mbulum akahər ata ya ka,
gà asiŋ gà Girek iɗəm mbaŋa.
21 Tə da a təv Filip ana a dara i kwite Betsayida ika ahəɗ Galile ya,
tə daha,
ta gwaɗar:
«A sàs a mə̀r maŋgata a Yesuw te ana,
meme,
wele aaha.»
22 Filip a tsaraka kataya ka,
a da,
a tsikeha a Andire.
Dite tə da a təv Yesuw sula məma.
Tə daha,
ti tsiker.
23 Yesuw a gwaɗa a tar aaka:
«Məpaslà ahər ŋa aka sle kuɗa.
I huɗ mendze zaakwa ya ka,
i ŋget a mezlibe ana tì zlibe a à iye,
iye,
wur ana i dara i təv Mbulum a ya.
24 Iye ihər i gweɗe a kurum a nda ndzer,
pàrsa iɗəm tsa:
Na tàa tike hwife daw ilik a biye tsəka,
a ndze a kataya,
à sìkèh a tsa.
Ama na tàa slige ka,
a sliliŋa.
Say wur ŋa ata a gwinekiŋa,
dite naha a ge a ba,
a ge a wur hinne.
25 Wur ana aka waya ɗa mesife ŋgar ika gər ahəɗ aaha ya ka,
aka miɗ mba ka,
a dzeye a dər ivaɗ.
Ama wur ana aka ge kəra i gər a mesife ŋgar a ka,
wura a zle a ihər a tsa,
a ne a biy ŋgar aà biybiy.
26 Na aka sàs a wura aà megiŋ meslire ka,
say ma zezem iye.
Ŋgat ka,
a ti ndze a i təv ana i ti ndze aɗəm a ya.
Aɗaba wur ana a giŋ a meslire ya ka,
Tsir gà a ti zlibe a à ŋgat mbaŋa.»
Yesuw a tsik bazlam məməta ŋgar ana à mite a ya
27 Yesuw a gwaɗa a tar asa:
«Kinehe ka,
arəv a de a aà iye ya ka,
hinne.
Dite i gweɗe a ana,
meme ɓav a?
Wànà i gweɗe a a tsir gà ana,
zla ika iye mesewere are ana a ti le a aà iye aka miɗ mba ya ya?
Awaŋ,
ama ka,
i gweɗe a kataya tsa.
Aɗaba i dara ka,
agəra mesewere are ata ya seyiŋ.
28 Ama i gweɗere a ivaɗ ka,
Tsir gà,
ge dukw ana,
dite ka,
mburma tì zlibe a à kər a.»
I dəba bazlam ŋgar ata ya tsara ka,
mifefile a ɗera i gər ŋa ya,
Mbulum a gwa:
«Yàa mbər meɗife à ndzəɗa gà ana tì zlibe a dər à iye ya,
a mburma,
dite i ɗif a ter a dər asa.»
29 Gà mburma ana i fata ya tserdze,
tə tsaraka mifefile ata.
Gà asiŋ ŋa ta gwa:
«A ge a ka,
malaka mbulum.»
Gà asiŋ ŋa ibam,
ta gwa:
«A ge a ka,
gawla Mbulum a fàfəlar.»
30 Ama Yesuw a gwaɗa a tar:
«Mifefile ata ta fàfəlara ya ka,
agəra iye tsa,
ama ka,
aɗaba kurum.
31 Kinehe ka,
Mbulum a ge a seriye agəra gər ahəɗ aaha kuɗa.
Kamala taŋa ya,
a zle a Əbay aà Əbay gà mburma gər ahəɗ a,
a delewe a ŋgat ŋa.
32 Iye ka,
ta gis a iye,
ti tike a iye aà dizl,
ta hitse a dər akaba à iye aà mbulum.
I dəba ŋa ya,
i zelere a a gà mburma ya tserdze,
tə dara a təv ga ya.»
33 A tsik bazlam ata ka,
a ɗif dər meme na à mite a ya.
34 Gà mburma ata ta gwaɗar:
«Mì tsaraka i wakita məpala ahəm kwa ya ka,
*Kiristi,
mala məmbala à mburma ana Mbulum a gwa,
i ti slir a kurumehe a ya ka,
a ti ndzewe a aà bəra ka,
aà biybiy ana,
dite meme ana,
ki gweɗe a ka,
say ti tike a *wur ana a dara i təv Mbulum a ka,
aà dizl,
dite ta hitse a dər aà mbulum asa ya?
Weke na a ne wur ana a dara i təv Mbulum a dze ya?»
35 Yesuw a gwaɗa a tar aaka:
«Kinehe ka,
dzaydzay a riŋ i təv kurum.
Ama a ndze a kə̀la ka,
zaakwa pəra.
I təv ana dzaydzay ŋa ata a riŋ i təv kurum mba ya ka,
dum aka miɗ tə̀ma,
luvuŋ mà gəs kurum tsa.
Aɗaba wur ana a de a i luvuŋ a ka,
a sir a təv ana a de a aɗəm a ya tsa.
Tìtìktìkka luvuŋ aka ndàr aka are.
36 Gəsum təv dzaydzay ŋa ata,
ka zazamum i təv ana a riŋ i təv kurum mba ya,
dite ka nwim gà mburma dzaydzay ŋa.»
Gà Yahuda ta gəs Yesuw nda gəzləŋ tar tsa
Yesuw a tsik aba bazlam ata ya tsara ka,
a da,
a kaha ba aà tar a.
37 Ku mege aka ge gà dukw mene aà mburma i təv are tar hinne tekeɗe ka,
ta gəs ŋgat nda gəzləŋ tar tsidze.
38 *Dukw ata a ge ba ka,
kamala ana Ezaya,
mala məmà à bazlam Mbulum a tsik akahər ata ya,
a gwa:
«Batsah mə̀r ŋa,
weke na a gəs bazlam mə̀r a?
Dite weke na a sər ndzəɗa yak a?»
39 Ama gà mburma ata ti sle aà magəsa Yesuw nda gəzləŋ tsəka,
kamala ana Ezaya a tsik a asa mbaŋa kaɗəŋ.
40 *A gwa:
«Mbulum aka ge aà tar guluf.
Aka ne à tar mandàkugùrum aka ndəv.
Kamala taŋa ya,
ta ŋgat a vatwa asa tsa,
tə sər gà dukw ata i metsehe tar asa tsa mbaŋa.
Dite kwets tàa mbəɗara ahəm
a təv ga ya ɓav tsa asa mbaŋa,
na dite i ta mbele à ter a ya.»
41 Ezaya a tsik kataya ka,
aɗaba ana a sər mezlibe ana tì zlibe a à Yesuw a,
dite na a fàfəl aka gər ŋgar a.
42 Tsaatsa ku mege kataya tekeɗe ka,
gà mburma hinne tàa gəs Yesuw nda gəzləŋ,
ku mege ika magər gà Əbay gà Yahuda tekeɗe ibam a.
Ama ta gəs meɗife dər a bəra tsəka,
aɗaba ana gà *Farisa ti ti delewe a tar i ga mahàmà a Mbulum a ya.
43 A sàs a tar ka,
tə da a gər a mburma,
mà za biy Mbulum.
Dukw ana Yesuw a tsik a ya ka, à gis a mburma a seriye
44 Aləka i dəba ŋa ya ka,
Yesuw a wideye ŋgəlakəkka.
I huɗ Mewideye ŋgar ata ya ka,
a gwa:
«Wur ana aka gis iye nda gəzləŋ a ka,
a gəs taŋa ka,
iye ɗekɗek tsa,
a gəs ka,
wele ana a slərra iye ya mbaŋa.
45 Wur ana a riŋ ihər a ŋgetiŋ a ya ka,
a ŋget a taŋa ka,
a wele ana a slərra iye ya mbaŋa asa.
46 I dara aka gər ahəɗ a ka,
aà məpàtà à dzaydzay ŋa a mburma,
dite ka,
gà mburma ana tàa gəs iye nda gəzləŋ tar a ka,
tə ndza i luvuŋ asa tsa.
47 Na wura aka tsaraka bazlam gà ana i tsik a ya,
aka gəs tsəka,
iye tsa na a ge ahər a seriye ya.
Aɗaba i dara ka,
aà məmbə̀là à mburma ya,
tsəka,
aà mege aà tar seriye tsa.
48 Wur ana aka niw iye,
aka gəs bazlam gà tsəka,
seriye à gis a ŋgat a pat mandəvandəv gər ahəɗ ana Mbulum a ta ge a seriye aà mburma ya.
Bazlam gà ana i tsik a ya pəra na à gis a ŋgat i seriye a pat ata ya.
49 Aɗaba i fàfəl ka,
nda gər gà tsa,
ama Tsir gà ana a slərra iye ya,
na a gweɗiŋ,
fàfəl,
tsik naha,
kige tsa tsik naaka ya.
50 I sər,
dukw ana a tsikiŋ a ka,
a vile a kurum a mesife ana à ndìv a tsa aà biybiy a.
Agəra taŋa na dukw ana i tsik a ya ka,
kalkal,
kamala biy ana Tsir gà a gweɗiŋ,
tsik a.»