Yesuw a bara sik gà ɓəzla mazazama ŋgat
13
1 Akahər ata ka,
a zeha mehinne ilik na *megirive Paska gà Yahuda a ndze aɗəm a ya.
Yesuw a sər dər tits mede a təv Tsir ŋgar ika gər ahəɗ a ide ka,
aka sle kuɗa.
Daga piŋŋe na a waya gà mburma ana ɗa ika gər ahəɗ,
ti ne gà biy ŋgar a,
dite na kinehe tekeɗe,
a pat a tar dər parakka à meweye ŋgar ana a waya tar hinne ya.
2 A pat ata i hawa ka,
tar riŋ ti zim a akaba a ɗaf nda gà ɓəzla mazazama ŋgat.
Taŋa Əbay sitene aka mbər mivile madzala gà gər a gəzləŋ a Yudas,
kəla Simun Iskariyut,
dite ka,
ma ge ɗaf aà Yesuw.
3 Yesuw a sər ka,
Tsir ŋgar aka mbər miviler a ba ndzəɗa aà makwàrà gà dukw ana tserdze ya.
Ŋgat nda gər ŋgar a sər mbaŋa ka,
a dara ka,
i təv Mbulum a,
dite a ta mbìɗ a gər tekeɗe ka,
a təv ŋgar asa mbaŋa.
4 I təv ana tar riŋ mayahaba gər ŋa i təv mazəma dukw mezime tar ata ya ka,
a hitse aà mbulum,
a suɗara ikaba petek a,
a daha,
a zla petek magà aba yam a,
a dàn dər ba ŋgə̀rəɗ ika dəmkul a.
5 A daha,
a tə̀f yam a tasà,
a dza dər ba aà məbara sik gà ɓəzla mazazama ŋgat ata,
dite a tèpèɗ a dər aà tar yam ata ya.
A dza ahər ba i təv wele ana a mbereha ya tsara.
6 Aləka a ndze dər a təv Simun Piyer ka,
a gwaɗa a Yesuw:
«Gaa,
Batsah ga ŋa,
na a beriŋ a sik ana,
kər ivaɗ a?»
7 Yesuw a gwaɗar aaka:
«Kà sər dukw ana i ge a ya tsa,
na kinehe ya,
ama ki sir a ka,
aka miɗ mba.»
8 Piyer a gwaɗar:
«Awaŋ,
kər ka,
Batsah ga ŋa,
ki beriŋ a sik ivaɗ tsa.»
Yesuw a gwaɗar aaka:
«Na Yàa barak sik tsəka,
ki sleme a aà mendze i təv ilik ŋa asa tsa.»
9 Simun Piyer a gwaɗar:
«Batsah ga ŋa,
na kataya ka,
ka beriŋ ka,
sik ɗekɗek tsa,
beriŋ gà ahər nda gər mbaŋa.»
10 Yesuw a gwaɗar:
«Wur ana aka bara ba ya ka,
a ndze a ka,
tsəɗaŋŋa,
a sasar məbara ba masula ŋa asa tsa.
A bere a ka,
say gà sik ɗekɗek pəra.
Kinehe kurum tserdze ka,
məbara ŋa.
Ama kə̀la ka,
wura ilik ika magər kurum ka,
məbara ŋa tsa.»
11 Yesuw a sər wele ana a ta ge aà ŋgat a ɗaf a.
Aɗaba taŋa na a gwaɗa a tar ka,
kurum tserdze tsa na gà məbara ŋa ya ya.
12 Aləka Yesuw a bara tar aba sik a lele ka,
a mà akaba à gà petek ŋgar asa.
A daha,
a ndza a bəɗ a təv mazəma ɗaf tar ata.
I dəba ŋa ya,
a gwaɗa a tar:
«Kà sərum dukw ana i ge a kurum a ya?
13 Kurum ihər ki zelwimiŋ a mala medzeŋge a mə̀r,
kige tsa Batsah mə̀r ŋa ka,
ndzer kaɗəŋ,
pàrsa iɗəm tsa.
Aɗaba iye ka,
kataya dukw ŋgar.
14 Na iye mala medzeŋge a kurum,
dite Batsah kurum ŋa asa,
Yàa bara kurum sik seyiŋ ivaɗ ka,
say kurum tekeɗe,
ki bereywim a ba a sik kurum ika magər kurum ilik ilik tserdze kamala taŋa ya mbaŋa.
15 Yàa ɗif a kurum dər,
meme na ki gwim a ya,
dite ka,
ki geywim a ba dukw ana ŋgwal ŋa kamala biy na iye i ge a kurum a.
16 Iye ihər i gweɗe a kurum a nda ndzer,
pàrsa iɗəm tsa:
Ɓele ka,
à zè a mala ga ŋgar tsa,
dite mala meslire à zè a wur ana a slər ŋgat a ɓav tsa asa.
17 Kinehe ka,
kà sərum taŋa.
Maŋgayaba ika magər kurum ka,
hinne,
na kàa tikwim gər a guma aaha ya.
18 *I fàfəl taŋa ka,
aka gər kurum ana tserdze ya tsa.
Iye ŋa i sər gà mburma ana i pala tar a.
Ama dukw ana mewetse ŋa i wakita Mbulum akahər ata ya ka,
a ge a ba kalkal kamala taŋa ya kaɗəŋ.
Aɗaba ta gwa ka:
“Wele ana maa zəm akaba ɗaf a ka,
a ti niŋ a are.”
19 I tsik a kurum a aba ya daga kinehe,
aka na dukuməŋa aka ndzera zukw tsiye,
dite aka təv ana aləka aka ndzera ya ka,
ki giswim a iye nda gəzləŋ,
ki sirwim a dər,
iye ka,
Wele ana ŋgat ŋa ya ndzer kaɗəŋ.
20 Iye ihər i tsik a kurum a nda ndzer,
pàrsa iɗəm tsa:
Wele ana aka gəs mala meslire ana i slir a ya ka,
a gəs taŋa ka,
iye mbaŋa.
Dite wele ana aka gəs iye ya ka,
a gəs ka,
wele ana a slərra iye ya mbaŋa asa.»
Yesuw a ɗif à Yudas ana a ta ge aà ŋgat a ɗaf a
21 Yesuw a tsik a tar aba bazlam ata ya tsara ka,
dùwaɗ arəv a da ihər a.
A gwaɗa a tar:
«Iye ihər i tsik a kurum a nda ndzer,
pàrsa iɗəm tsa:
Wura ilik ika magər kurum aaha kinehe ya,
a ta ge aà iye a ɗaf.»
22 Gà ɓəzla mazazama ŋgat ata,
tə tsaraka kataya ka,
ta maya akaba à are ika magər tar ba bà ba ba tserdze.
Ama tə sər bazlam ata a tsik ana,
aà weke ka,
tə sər tsa.
23 Wele ŋgiɗ ilik ika magər gà ɓəzla mazazama Yesuw ata ya,
ŋgat ka,
mandərkwasla ŋgar.
A riŋ mandza ŋa i təv ŋgar bise.
24 Simun Piyer a zekweraha ahər,
kamala megweɗe ya,
mà tsam bazlam ata aà Yesuw ka,
weke na a tsik ahər kataya ya?
25 Aɗaba taŋa,
mandərkwasla Yesuw ata a dzadzakaha à gər ndàra a təv Yesuw.
A gwaɗar:
«Batsah mə̀r ŋa,
weke na kà tsik ahər kataya dze ya?»
26 Yesuw a gwaɗar aaka:
«Yàa sàs ɗaf,
Yàa ge ahər ala bùnùt,
Yàa vəlar ka,
wele ata na a ta ge aà iye a ɗaf a.»
Aləka Yesuw a sàs ɗaf ata,
a ge ahər ala,
a vəl a Yudas,
kəla Simun Iskariyut.
27 Yudas a gəs ɗaf ata tsara ka,
Əbay sitene a dar a gəzləŋ.
Yesuw a gwaɗar:
«Dukw ana a sàsak aà mege ya ka,
ge aba ya kinehe tsəma.»
28 Wura ilik ika magər gà mburma ana tar riŋ ti zim a ɗaf tserdze ya,
aka sər,
aàmala na Yesuw a tsiker taŋa ya ka,
a sər tsa.
29 Aɗaba ana Yudas ŋgat ka,
mala makaslà siŋgwe ya,
na gà asiŋ ŋa i liwiŋ tar tə dzala,
ta gwa:
«A ge a ka,
Yesuw a gwaɗar:
“Da,
tə sə̀kəmara gà dukw mezime aà *megirive Paska ya.”»
Gà misle ŋgiɗ ta gwa:
«A ge a ka,
a gwaɗar:
“Vəl duwa a gà ɓəzla matawak zaakwa.”»
30 Yudas a zəm ɗaf ata tsara ka,
a dara a bəra ya ndaavəɗ ata,
aɗaba həvəɗ aka ge.
Məpala ahəm awiya ŋana
31 Aləka i dəba Yudas ana a dara iɗəm a bəra ya ka,
Yesuw a gwaɗa a tar:
«Kinehe ka,
mburma ta ŋget a a mezlibe ana tì zlibe a à iye,
wur ana i dara i təv Mbulum a,
dite ta ŋget a a mezlibe ana ti zlibe a à Mbulum nda təv ga ya mbaŋa.
32 Na mburma ta ŋget a a mezlibe ana tì zlibe a à Mbulum nda təv ga,
iye,
wur ana i dara i təv ŋgar a ka,
Mbulum tekeɗe,
a ɗif a ter a à mezlibe ana tì zlibe a à iye ya mbaŋa.
Kinehe bise na a zle a ŋgat a təv mezlibe ŋgar ata tì zlibe a dər a.
33 Gà ɓəza gà,
kinehe ka,
iye ɗa i təv kurum tə̀ma.
Ama kə̀la ka,
i ndze a hinne asa tsa.
Na Yàa da aà kurum a ka,
ki ti yehwim a iye.
Taŋa kinehe ka,
i tsik a kurum aba dukw ana i tsik a gà bàba gà Yahuda ya:
Ki slwim a aà mede a təv ana i de aɗəm ya tsa.
34 Araha,
i tsik a kurum a məpala ahəm awiya ŋa.
Dukw ana i tsik a ya ka,
wayum ba kurum ilik ilik tserdze.
Ki weywim a ba ka,
kamala ana i waya kurum a mbaŋa.
35 Na kàa gwim dər kataya ka,
gà mburma tserdze ti sir a dər,
kurum ka,
gà ɓəzla mazazama iye nda ndzer kaɗəŋ.»
Yesuw a ɗif à Piyer ana a ta gweɗe aà ŋgat a, i sər ŋgat tsiye
36 I fata ya ka,
Simun Piyer a gwaɗa a Yesuw:
«Batsah ga ŋa,
kà tsik kataya ana,
ki de a ana,
a ŋga?»
Yesuw a gwaɗar aaka:
«I de a ka,
a təv ana ki sle a aà mezezeme iye tsiye.
Say aka miɗ mba dzekwiŋ na ki ti zezem a iye ya.»
37 Piyer a gwaɗar:
«Batsah ga ŋa,
i sle aà mezezeme a kər tsəna,
aàla?
Aɗaba iye ka,
Yàa hadzal ba aà medzeye à mesife gà aɗaba kər.»
38 Yesuw a gwaɗar aaka:
«Kàa hadzal ba aà medzeye à mesife yak aɗaba iye ndzer a?
Iye ihər i gweɗek a nda ndzer,
pàrsa iɗəm tsa:
Ələk guŋgwazl a ti tiwe a ka,
kàa mbər megweɗe medzige makər,
i sər ŋgat tsa.»