Yesuw ka, vatwa ana a da a təv Mbulum a
14
1 I dəba bazlam ata ya ka,
Yesuw a gwaɗa a tar asa:
«Arəv ma da aà kurum a tsa.
Gəsum Mbulum nda gəzləŋ kurum,
dite ka,
gəsum iye mbaŋa.
2 Gà ga a riŋ i bəra Tsir gà pampam hinne.
Na mege təv riŋ tsəka,
ana ka,
i tsik a kurum a tsa.
Kinehe ka,
iye ihər i de a,
i ti lèmbeɗe a kurum a aba təv mendze ata ya.
3 Na Yàa da,
Yàa làmbaɗa a kurumara aba təv mendze ata ya ka,
i mbiɗere a gər a təv kurum a,
dite i dzik a kurum a təv gà,
kurum tekeɗe,
ki ndzwim a i təv ana iye iɗəm a mbaŋa.
4 Kurum ka,
kà sərum vatwa təv ana iye ihər i de aɗəm a ya.»
5 Tumas a gwaɗar:
«Batsah mə̀r ŋa,
mì sər təv ana ki de aɗəm a ya tsa.
Dite meme na mìi sle aà mesire a vatwa ŋa dze ya?»
6 Yesuw a gwaɗar aaka:
«Iye na a ne vatwa ata ya.
Ki ŋgetwime a ndzer nda mesife ka,
i təv ga ya mbaŋa.
Wura a sle a aà mede a təv Tsir gà tsa,
say na nda təv ga ilik tsiye.
7 Na kàa sərum iye ka,
ki sirwim a Tsir gà mbaŋa.
Daga aà kinehe ya,
kà sərum ŋgat,
dite kàa ŋgatumar.»
8 Filip a gwaɗar:
«Batsah mə̀r ŋa,
ɗif a mə̀r à Tsir yak ŋa,
tsam ka,
aka ndəv.»
9 Yesuw a gwaɗar aaka:
«Yàa ndza hinne na i təv kurum dze ana,
kà sər iye tsa hiywe ya,
Filip?
Na wura aka ŋgetiŋ ka,
a ŋgat taŋa ka,
a Tsir gà mbaŋa.
Aàmala na ki gweɗe a ka,
say ɗif a mə̀r à Tsir yak ŋa asa dzekwiŋ a?
10 Wànà kàa gəs iye,
kà sər tsiye ka,
mə̀r nda Tsir gà mandza ŋa i təv ilik ŋa ya?
Gà bazlam ana i tsik a kurum a tserdze ya ka,
nda meweye gà tsa.
I mà ka,
à biy Tsir gà ana mə̀r mandza ŋa i təv ilik ŋa,
a ge a megemir nda ahər gà ya.
11 Gəsum bazlam gà ana i gwaɗa a kurum ka,
mə̀r ilik nda Tsir gà,
iye i təv ŋgar,
ŋgat tekeɗe,
i təv ga ya.
Na kàa gəsum taŋa i tsik a kurum a tsəka,
gəsum bazlam megemir aaha i gewa ya,
asla pəra ka,
ide.
12 Iye ihər i gweɗe a kurum a nda ndzer,
pàrsa iɗəm tsa:
Wele ana aka gəs iye nda gəzləŋ a ka,
a ge a gà mege megemir ana iye ihər i ge a ya mbaŋa.
A ta ge a ka,
gà bàba gà megemir ana à ze a taŋa ya,
aɗaba iye ihər i de a a təv Tsir gà.
13 Dukw ana tserdze kàa wizwim nda zləm gà ya ka,
i vile a kurum ŋa,
na dite mburma ti zlibe a à Tsir gà,
aɗaba iye ana Kəla ŋgar a.
14 Na kàa wizwim duwa tserdze nda zləm gà ka,
i vile a kurum ŋa.»
Mezite Mesife ana Yesuw a gwa ka, i ti slir a kurumere a ya
15 Yesuw a gwaɗa a tar asa:
«Na kàa wayum iye ka,
ki giswim a məpala ahəm gà ana i tsik a ya mbaŋa.
16-17 I ta heme a a Tsir gà,
ma slər a kurumara misle ŋgiɗ a,
aà mazlàkà kurum,
kamala megweɗe ya ka,
Mezite Mesife ana a ɗif a kurum a à ndzer,
a ndze a i təv kurum kəla pat aà biybiy a.
Gà mburma ana ti zezem a gər ahəɗ ka,
ti sle aà meŋgete a tsa,
aɗaba ana tə sər tsa,
dite ka,
ta ŋgeter a tsa asa ya.
Ama kurum ka,
ki sirwim a ŋgat,
aɗaba ana a dere a ka,
a ndze a i gəzləŋ kurum,
ki ndzwim a tserdze i təv ilik ŋa ya.
18 Aɗaba taŋa,
sərum dər ka,
i ta miyek à kurum a à gər kurum kamala gà ɓəza kəla megile ya tsa.
I mbiɗere a gər a təv kurum a.
19 I huɗ mendze zaakwa ya ka,
i de a ika gər ahəɗ a.
Ama kə̀la ka,
i ndze a i təv kurum hiywe.
Aɗaba ana iye riŋ nda gà mesife ya,
kurum tekeɗe,
ki ti ndzwim a nda gà mesife ata mbaŋa.
20 Na pat ana Mezìtè Mesife Mbulum a dere a a təv kurum a,
aka ndzera ka,
ki ti sirwim a dər,
mə̀r ilik nda Tsir gà,
iye riŋ i təv ŋgar,
kurum tekeɗe,
mandza ŋa i təv i ilik ŋa nda gà iye.
Iye tekeɗe,
iye riŋ mandza ŋa i gəzləŋ kurum.
21 Wur ana aka gəs məpala ahəm gà,
a dzar gurmits a bəɗ a ka,
ŋgat na a waya iye ndzer a.
Ama wele ana a waya iye ya ka,
Tsir gà tekeɗe,
a weye a ŋgat mbaŋa.
Dite iye ibam,
i weye a ŋgat asa mbaŋa.
I ta pèter a à ndzəɗa gà.»
22 Wele ŋgiɗ pam,
zləm ŋgar Yudas asa,
tsəka,
kəla Iskariyut tsa,
a gwaɗa a Yesuw:
«Batsah mə̀r ŋa,
meme na a sàsak ki pèt a mə̀r a à ndzəɗa yak ka,
a mə̀r ɗekɗek a?
Dite ki pèt a dər a gà mburma ana ti zezem a gər ahəɗ a tsiye?»
23 Yesuw a gwaɗar aaka:
«Wur ana a weye a iye ya ka,
a ti dze a gurmits a bəɗ a dukw ana i tsik a ya mbaŋa.
Tsir gà a ta weye a ŋgat,
dite ka,
mə̀r məma mìi dere a,
mìi ndze a nda gà ŋgat.
24 Wele ana a waya iye tsiye ka,
a dze a gurmits a bəɗ a mifefile gà ɓav tsa.
Dukw ana kà tsarakum a ka,
a dara ka,
i madzala gà gər gà ya tsa.
Ama a dara ka,
i təv Tsir gà ana a slərra iye ya.
25 I tsik a kurum aba bazlam aaha ya ka,
aɗaba ana iye ɗa i təv kurum mba ya.
26 Wele ana a ti zlèk a kurum a,
kamala megweɗe ya,
Mezite Mesife ana Tsir gà a ti slir a kurumere a avukw iye ya,
a ti ɗif a kurum a à dukw tserdze,
dite gà dukw ata i tsik a kurum a tserdze,
ta mèye a kurumere a a gər a.
27 Ama kinehe i de a aà kurum a ka,
i vile a kurum a aba matasla yam gà a gəzləŋ kurum a.
Ki ndzwim a dər ɗa barbarərra lele.
I vile a kurum a ka,
kamala biy ana gər ahəɗ a vile a kurum a ya tsa.
Ki gwim magəɗa,
arəv ma da aà kurum a tsa.
28 Kàa tsarakum dukw ana i gwaɗa a kurum ka:
“I de a aà kurum a,
dite i mère a a təv kurum a” ya.
Na kàa wayum iye ka,
ŋgeywim ba hinne,
aɗaba ana kàa sərum dər,
i de a a təv Tsir gà,
ŋgat ka,
batsah ŋa,
a za iye ya.
29 Yàa tsik a kurum aba məpaslà ahər ŋa a gà dukw ata ti ta ge a ba aka miɗ mba i təv ana tàa ndzera zukw tsiye ya,
dite i təv ana aka ndzera ya ka,
ki giswim a nda gəzləŋ kuɗa.
30 Kinehe ka,
i tsik a kurum a duwa hinne asa tsa,
aɗaba Əbay gər ahəɗ aaha aka à mendzera.
Ama kə̀la ka,
ndzəɗa ŋgar a riŋ aà mekwere iye tətsa.
31 Ama i ge a ka,
kamala ana Tsir gà a gweɗiŋ,
ge ya,
na dite ku weke ma sər dər ka,
i waya ŋgat a.
Kinehe ka,
hitswim aà mbulum,
tàkwa i faha ya.»