Yuhana 15

Bazlam minew dizl ɗaf duwa a ndzikiɗ ba hàndaza,

a we a hinne

1 Aləka Yesuw a gwaɗa a tar asa: «Iye ka, kamala ŋgwal dizl ɗaf ana a we a lele ya. Dite Tsir gà ka, a ne mala guvah, à fìtiŋa. 2 Ahər ana a we a lele tsiye ka, a ses a ihər a. Ama ahər ana a we a ya ka, a tìrìtser a ahəm pəra, dite ka, ma zlala ahər, ma wa lele. 3 Kurum kà nwim ka, tsəɗaŋŋa, aɗaba guma aaha i tsik a kurum a. 4 Ndzum i təv gà, kamala ahər dizl ɗaf ana mandza ŋa aà dizl ŋa ya, dite ka, iye tekeɗe, i ndze a i təv kurum. Ahər dizl ɗaf a sle aà mewe a à gər ŋgar tsa na ahəm dizl ŋa ihər tsiye. Kərga taŋa ya mbaŋa, ki slwim a aà mege duwa ilik tsa na kàa ndzum i təv ilik ŋa nda gà iye tsiye.

5 Iye i ne ka, kamala dizl ɗaf ata ya, dite kurum kà nwim ka, gà ɓəza ahər ŋana. Wur ana a ndze a i təv ga, iye tekeɗe, i ndze a i təv ŋgar a ka, ŋgat a ne ka, kamala ahər dizl ɗaf ata a we a hinne ya. Ama wur ana a ndze a i təv gà tsiye ka, a sle a aà mege duwa ilik tsidze. 6 Wele ana ŋgat i təv ga tsiye ka, Mbulum a niw a ŋgat. A ne a kamala ahər dizl ɗaf ana tə sàs ihər a, tì yè a a dala, dite a kwile a ya. Na aka kula ka, ti yeher a gər, dite tì dzer a akwa, a weniŋa. 7 Na bəla kurum riŋ ki ndzwim a i təv gà, ki giswim a bazlam ga, ki zezemwim a lele ka, wizwim dukw ana a sàs a kurum a, ki ŋgetwimiŋa. 8 Na kàa nwim kamala dizl ɗaf ata a wa hinne ya ka, gà mburma ti sir a dər ka, kurum gà ɓəzla mezezeme iye ndzer kaɗəŋ. Kamala taŋa ya, mezlibe ana tì zlibe a à Mbulum Tsir gà ya, à pèt a aba parakka lele.

9 I waya kurum ka, kamala Tsir gà ana a waya iye ya mbaŋa. Ndzum i təv meweye gà ana i waya kurum a kəla pat aka miɗ aka miɗ. 10 Na kàa dzum gurmits a bəɗ a məpala ahəm gà kamala biy ana iye ihər i dze a a bəɗ a biy Tsir gà ya ka, ki ndzwim a i təv meweye gà ana i waya kurum a kəla pat, kamala iye ana mandza ŋa i təv meweye ŋgar ana a waya iye ya mbaŋa te. 11 I tsik a kurum gà dukw ata ka, dite maŋgayaba ana i ŋgeye a ba ya ka, ma ge i təv kurum, dite mà rah a gəzləŋ kurum tsìsl lele.

12 Məpala ahəm gà ana i tsik a kurum a ka, araha: Wayum ba ilik ilik tserdze kamala iye ana i waya kurum a. 13 Na wura a dzeye a à mesife ŋgar nda mezìwè gər ŋgar, aɗaba gà masla ŋgar ka, mawàyà ba a riŋ a zè a taŋa tsa. 14 Kurum ka, gà masla gà, na kàa gwim dukw ana i gwaɗa a kurum, gwim a. 15 I sle aà mezele a kurum a ka, gà ɓəzla meslire gà asa tsa, aɗaba gà ɓəzla meslire ka, tə sər dukw ana mala ga tar a ge a ya tsa. I zel a kurum a ka, gà masla gà ivaɗ. Kà sərum taŋa ka, aɗaba ana Yàa mbər meɗife a kurum à guma ana i tsarakara i təv Tsir gà ya fit. 16 Kurum tsa na kà zlum iye kamala Batsah kurum ŋa ya. Ama iye na a pala kurum a, dite kà nwim gà ɓəzla mezezeme iye ivaɗ. I pala kurum ka, aà mege meslire gà, dite ka nwim kamala dizl ɗaf ata a we a hinne ya. Mege megemir kurum a de a aka miɗ aka miɗ, a ndze a aà biybiy. Kərga taŋa ya na, dukw ana ki wizwim a aà Tsir gà nda zləm gà ya ka, a vile a kurum ŋa. 17 Aɗaba taŋa na kinehe iye ihər i gweɗe a kurum a ka, wayum ba kurum ilik ilik tserdze ya.»

Gà mburma gər ahəɗ ka, ti ne a are a gà Yesuw

nda gà mburma ŋgar

18 Yesuw a gwaɗa a tar asa: «Na gà mburma ana ti zezem a gər ahəɗ a, tàa ne a kurum are ka, sərum dər ka, tàa mbər meniŋ are mbaŋa. 19 Na mege kurum gà mburma ana ti zezem a gər ahəɗ a ka, ana ka, ta weye a kurum, aɗaba ana kà nwim gà mburma tar a. Ama kinehe ka, Yàa palara kurum i liwiŋ tar a, dite na kà nwim gà mburma tar asa tsiye. Aɗaba taŋa na gà mburma ana ti zezem a gər ahəɗ ti ne a kurum are ya. 20 Bazlam ana ndeɗiŋa i tsik a kurum a ka, mə̀ məts a kurum gər tsa, na i gwa ka, mala meslire a zè a mala ga ŋgar tsiye ya. Na tàa sèwèriŋ are ka, ti ti sèwèr a kurum a are mbaŋa. Na tàa dza gurmits a bəɗ a guma gà ka, ti ti dze a a bəɗ a biy kurum mbaŋa.

21 Ama ti sèwèreye a kurum a are ata tserdze ya ka, agəra iye, aɗaba ana tàa sər wele ana a slərra iye ya tsiye. 22 Na mege i dara ndeɗiŋa, dite i tsik a tar gà bazlam tsəka, ana ka, Mbulum à gis a tar nda seriye ŋgar tsa. Ama kinehe ka, tàa tsaraka dukw ana i tsik a ya tserdze, dite ta ge a dər akaba bakal ka, bakal tar ata à pìl a asa tsa. 23 Wur ana aka niŋ are ya ka, a ne are ka, a Tsir gà mbaŋa. 24 Na mege ndeɗiŋa Yàa mbər mege gà megemir ana wura ilik ika magər tar a, aka ge tsiye tsəka, ana ka, Mbulum à gis a tar nda seriye ŋgar tsa. Ama kinehe, ku mege tàa ŋgat a gà megemir gà ana i ge ya tekeɗe ka, tar riŋ ti ne a mə̀r a dər akaba are nda Tsir gà hiywe pəra. 25 Gà dukw ata ta ge a ba kataya ka, dite bazlam ana mewetse ŋa i wakita məpala ahəm tar a, mə̀ pàt aba lele, a gwa: “Ti niŋ are ka, taf masakəŋa.”

26 Ama wele ana à zlèk a kurum a ka, a deriŋa, kamala megweɗe ya, Mezite Mesife ana a ɗif a à ndzer ŋa a mburma ya. A dere a ka, i təv Tsir gà ya. Na Yàa da a təv ŋgar ka, i slir a kurumeriŋa. A tsik a a mburma tserdze, iye ana weke ka, a ne a mala sida gà. 27 Dite kurum tekeɗe, ki nwim a gà ɓəzla sida gà mbaŋa, aɗaba ana kurum riŋ mandza ŋa i təv ga daga piŋŋe ya.