Madakwa məkəs duwa matawak ŋa, a ndəv aba à dukw
məfara ŋana aɗaba Mbulum a
21
1 Aləka Yesuw a fə̀r ikaba ya ka,
aka ŋgat a gà ɓəzla limana duwa a riŋ,
ti dzèye a siŋgwe məfara ŋa,
a sahər ana i batsah ga Mbulum ata ya.
2 Ama a ŋgat a madakwa məkəs duwa a riŋ matawak ŋa mbaŋa.
A dza aɗəm i ŋgar ka,
kur siŋgwe sula.
Ama siŋgwe ata ka,
kalkal siysiy ilik a pəra.
3 Yesuw a ŋgatar kataya ka,
a gwaɗa a tar:
«Iye ihər i tsik a kurum a nda ndzer,
madakwa məkəs aaha matawak ŋa ya,
aka dza aɗəm dukw məfara ŋa aaha aɗaba Mbulum a ka,
a za biy gà misle ŋgiɗ fit.
4 Aɗaba gà misle ŋgiɗ tə dzaya aɗəm ka,
asiŋ ŋa a riŋ aà tar hinne,
à ndìv a tsa.
Ama madakwa məkəs aaha a dza aɗəm i ŋgar ka,
dukw ana a riŋ ihər a ndze a dər dze ya.»
Yesuw a ɗif à ga Mbulum batsah ŋa ana
ti ta mbezle a dər mba ya
5 Gà asiŋ gà mburma a riŋ əŋgal ti tsik aà ga Mbulum batsah ŋa ata,
ta gwa:
«Ga aaha a tsahən ka,
hinne nda gà kur ana tə zlazl dər a tekeɗe,
tìtiw tìtiw lele,
dite nda gà dukw ana tə dzaya a Mbulum məfara ŋa aà megemir ga ata ya.»
6 Ama Yesuw a gwaɗa a tar:
«A pat ŋgiɗ ka,
ki ŋgetwime a a kur ika gər biy ŋgiɗ asa tsa.
Ti ta mbezle a dər mba ka,
leheɗ leheɗ kweleŋ fetite.»
Mandəva gər ahəɗ ana à ndìv a ya
7 Gà mburma ana tar riŋ i təv ŋgar ata ya,
tə tsam ahər,
ta gwaɗar:
«Əbay,
ndeɗime na bazlam yak ata kà tsik a,
a ta ge a ba dze ya?
Dite meme na mìi sir a dər ka,
gà dukw ata tàa à mege ba ya?»
8 Yesuw a gwaɗa a tar aaka:
«Gwim metsehe lele,
wura ma ta baza a kurum za tsa.
Aɗaba gà mburma hinne ti dere a a təv kurum a,
ti zle akaba a zləm gà,
dite ta gweɗe a kurum a,
ku weke:
“Iye ka,
ŋgat ŋa,
araha pat ŋa aka sle kuɗa.”
Ama ka,
ka tə zazamum tar tsa.
9 Aləka na kàa tsarakum gà guvəl nda gà mburma ana ti neyeba a are ya,
aka ndzera ka,
ka ta gwim magəɗa ɓav tsa asa.
Aɗaba gà dukw ata,
say ta ge a ba fit dzekwiŋ.
Ama mandəvandəv gər ahəɗ ka,
aka sle zukw tsa na taŋa ya.»
10 I dəba ŋa ya,
a gwaɗa a tar asa:
«Gà kwite ŋgiɗ pampam ta ge a guvəl nda gà biy ŋgiɗ.
Gà gawla Əbay ŋgiɗ ta ge a guvəl nda gà biy ŋgiɗ pam asa.
11 I gà kwite ŋgiɗ pampam,
wakit wakit ahəɗ a ɓezle a nda medzedzere hinne.
Gà may nda gà dukw məməta ŋgiɗ hinne ti ta geye a ba i gà kwite ŋgiɗ pampam,
ku mege i ŋga tserdze.
Ta ŋget a a gà dukw mene aà mburma ana gà bàba ŋa ya,
aà gəza mbulum,
ta ge a magəɗa hinne ya.
12 Ama ələk gà dukw ata ti ti ndzere a ka,
say gà mburma ta gese a kurum,
tì sèwèr a kurum a are hinne məfara ŋa dzekwiŋ.
Ti ti de à kurum a a ga mahàmà a Mbulum a,
ta ge a kurum a seriye.
I dəba ŋa ya,
ti dze a kurum a daŋgay kuɗa,
agəra iye.
Ti de à kurum a aka miɗ gà ɓəzla makwàrà mburma,
nda gà aka miɗ gà Əbay gà bàba ŋana mbaŋa.
13 Dite i fata ya ka,
kurum tekeɗe,
ki ŋgetwime a vatwa aà mege sida gà lele ika miɗ tar kuɗa.
14 Ama mum aàba à arəv lele daga aà kinehe ya,
ka tə dzalum duwa agəra bazlam ana ki ti tsikwim a ikaba ya tsa.
15 Aɗaba iye ŋana i ti ɗif a kurum a à bazlam,
nda metsehe ana ki ta bwim a dər aà gà ɓəzla guvəl kurum a,
dite ka,
ti sle aà meŋgete a vatwa aà metsìkè kurum bazlam ŋgiɗ asa tsiye.
16 Ku mege gà tsir kurum,
nda gà damər dìnde kurum,
nda gà gwala kurum,
nda gà masla kurum tserdze tekeɗe,
ti ta ge à kurum a ɗaf a gà ɓəzla guvəl kurum.
Ti ta bets a gà asiŋ ŋa ika magər kurum a.
17 Gà mburma tserdze,
ku weke tekeɗe,
ti ne a kurum a are,
aɗaba ana kurum gà mburma gà ya.
18 Ama kəla ka,
ambəz gər kurum ilik a dzeye a tsidze.
19 Mərum aba lele,
kərga taŋa ya na ki ta mbilwim a à ba kurum a.»
Yesuw a ɗif à kwite Yeruzalem, meme na a ta mbezle a ya
20 «Na kàa ŋgatum a gà ɓəzla guvəl,
tàa lawara Yeruzalem ka,
ki sirwim a dər ka,
tàa à mimbezle dər kuɗa.
21 A pat ata ka,
say gà mburma ana i Yuda ya tserdze,
tə̀ təz ndàra aà kwite.
Ama gà mburma ana i magər kwite Yeruzalem a tekeɗe,
tə dara iɗəm a,
tə da diriŋ.
Dite gà na i dala ŋana ya tekeɗe ibam,
tə tə da a magər kwite ata tsa mbaŋa asa.
22 *Aɗaba pat ata ka,
pat ana Mbulum a ge a ter a seriye ya,
dite dukw ana gà ɓəzla məma à guma ŋgar ti tsik akahər ata i wakita ŋgar a,
ma ne ndzer kuɗa.
23 Mesewere are ndeyndey ŋana ka,
biy gà məkəs ana nda gà huɗ i gər a,
kige tsa,
nda gà na ika ahər a.
Mesewere are ata a ta ge a riŋ hinne ika ahəɗ aaha,
aɗaba Mbulum a ta pèt a à mege arəv ŋgar a təv gà mburma ana i faha ya.
24 Gà mburma ata tə sər Mbulum tsiye,
ti ta bets a gà asiŋ ŋa nda masalama,
dite gà misle ŋgiɗ ta gese a tar,
ti de à ter a ku mege aka ahəɗ awara tserdze.
I dəba ŋa ya,
ta mbìɗehe a ba a Yeruzalem,
ti nis a à təv ata.
Ti ndze a i fata,
haa a təv ana pat tar aka ndəv a.»
Meme na *wur ana a dara i təv Mbulum a, a dere a ya
25 Yesuw a gwaɗa a tar asa:
«A pat ana gà dukw ata tàa dza ahər ba ya ka,
gà duwa pampam ta pèt a aba i təv gà pat nda kiye,
nda gà mawusawus a.
Dite a ge a ka,
huwwa kamala himbiɗ ana a ta ɓezle a à yam i duluv,
a tsele akaba a ya.
Magəɗa ŋa à slìɓe a za iba gà mburma ana ika gər ahəɗ tserdze ya,
agəra gà dukw ata.
26 Gà mburma ti ta mete a arəv fit agəra magəɗa gà dukw ata ti ta geye a ba ika gər ahəɗ a.
Aɗaba gà dukw ana a riŋ madzàvà ŋa aà gəza mbulum a,
ti lekeye à ba a gà gər ŋgwir ŋgwir ŋgwir ŋgwir.
27 *I dəba ŋa ya kuɗa ka,
gà mburma ta ŋgetiŋŋa,
a iye,
wur ana a dara i təv Mbulum a.
I dere a ka,
nda hulɓukw a,
nda ndzəɗa Mbulum a hinne,
dite nda mezlibe gà ana tì zlibe a à iye ya.
28 Aləka na kàa ŋgatum a gà dukw ata tàa dza ba aà madàra ka,
hitswim,
kà ndzəkum gər aà mbulum,
kà mùm aàba aà arəv lele,
aɗaba Mbulum aka à mimbile à kurum kuɗa na taŋa ya.»
Bazlam minew guruv ana a wiɗe a ya
29 I dəba ŋa ya,
Yesuw a tsik a tar bazlam ŋgiɗ ndaka bazlam minew pam asa.
A gwaɗa a tar:
«Samatum dizl ɗaf guruv aaha nda gà asiŋ gà dizl ɗaf ŋgiɗ pampam a kwaŋ.
30 Aɗaba na kàa ŋgatum a tar,
ta gègìriŋa,
dite tì dze a ba aà mibìzè nda mewiɗe ka,
ki sirwim a dər ndzer,
taŋa ka,
viye aka à mege.
31 Kamala taŋa ya mbaŋa,
na kàa ŋgatum a gà mesewere are nda gà dukw ata pampam tàa ndzera ka,
ki sirwim a dər ndzer,
mekwere Əbay Mbulum ana a kwere ya,
aka à meslele mbaŋa.
32 Iye ihər i tsik a kurum a nda ndzer:
Gà mburma ana kinehe ya ka,
ta mete a zukw tsa,
say gà dukw ata tàa ndzera dzekwiŋ,
dite ta metiŋa.
33 Gà kuvəl mbulum nda gər ahəɗ ka,
tì ndìviŋa.
Ama bazlam gà ka,
à ndìv a tsa,
a ndze a aà biybiy.»
Ndzum nda metsehe
34 «Gwim metsehe,
kaslum ba kurum,
ka ta kwayum tsa.
Ka ta gwim məburnun tsa,
dite ka tə dzalum gà gər aka dukw gər ahəɗ tsa asa.
Aɗaba gà dukw ata na ta ge a madzək a metsehe kurum a.
Na kàa kaslum ba tsa,
dite kurum tekeɗe,
aà gà dukw ata mbaŋa ka,
pat ana a dere a ya ka,
gər melek,
ki sirwim a aà pat ŋa tsa.
35 Aɗaba pat ata a lere a à mburma ana ika gər ahəɗ tserdze ya ka,
kamala ɓele ana a mbezle a aka kwàhum a.
36 Ka ndzwim are tsa,
hamum kəla pat,
dite ka,
ka ŋgatum ndzəɗa aà mibe dər i təv gà dukw ata tserdze ti dere a ya.
I dəba ŋa ya,
ki ta hitswim a aka miɗ gà lele,
iye,
*wur ana a dara i təv Mbulum a kuɗa.»
37 I huɗ mendze Yesuw ana a ndzawa i fata ya ka,
ndaapat ŋana ka,
a dzeŋgewa guma ŋgar a mburma i ga Mbulum batsah ŋana.
Aləka hawa aka ge ka,
a debe a a dìyes dizl ɗaf uliviye ata,
aà mehinne i fata.
38 Dite i mèkwède hedwe asa ka,
gà mburma tserdze tə dawaha a ga Mbulum batsah ŋa ata,
aà mandza zləm a dukw ana a tsik a ya.