Bazlam minew gà ɓəzla makaslà gà dizl ɗaf duwa hinne
12
1 I dəba ŋa ya,
Yesuw a dza ba aà metsìkè guma ŋgar ndaka bazlam minew a gà mburma ata.
A gwaɗa a tar:
«Wele duwa a sàs guvah.
A dzava aɗəm dizl ɗaf hinne.
A zlazl ahər tits lele.
A làmbaɗa aɗəm tùgùɗ a magər ŋa,
aà meɗwitsewa aɗəm mawà dukw ata.
A ndwaŋ aɗəm dzègwèle i magər ŋa ata,
aà makaslà ŋa.
I dəba ŋa ya ka,
wele ata a da a təv ŋa diriŋ aka ahəɗ ŋgiɗ.
Guvah dizl ɗaf ŋgar ata à mitehiŋa.
A dza aɗəm gà mburma aà məfə̀rà ahər,
dite aləka ta vəlar dukw guvah ŋgar əŋgal,
na aka màra ya.
2 Aləka mawà dizl ɗaf ata a nah ka,
wur ana a dzava ya,
a sləraha mburma ŋgar ilik a təv gà ɓəzla megemir dizl ɗaf ŋgar ata,
dite ta vəlaraha dukw guvah ŋgar ata kuɗa.
3 Ama gà mburma ata ta ŋgat a wele ata a ndzeha a təv tar tsara ka,
ta gəs ŋgat,
ta gə̀zl lehhè.
Wele ata a mbəɗ gər a ma,
ze ahər sìkwèɗ,
duwa ihər tsa.
4 I dəba ŋa ya,
mala dizl ɗaf ata a sləraha misle ŋgiɗ asa.
Ta ŋgat a wele ata ka,
tə ndavayar pìslìɗìɗe,
tə lakayar aà gər asa.
Gər a slesle aaka ambul ambul.
5 Mala dizl ɗaf ata a sləraha misle ŋgiɗ məmakər ŋa pam asa a təv tar.
Ta ŋgat a wele ata i ŋgar ka,
ta kəɗ a biye.
Kamala taŋa ya,
tàa sèwèr are a gà mburma ana mala dizl ɗaf ata a slərawaha tar pampam hinne ya asa mbaŋa.
Ku weke tekeɗe,
na aka sləraha ŋgat a ka,
tàa sèwèrer are,
dite tàa bats gà asiŋ ŋa a biye.
6 I dəba ŋa ya,
a zeha a mala dizl ɗaf aaha ka,
kəla ŋgar ana mandərkwasla ŋgar,
a waya ŋgat hinne ya.
A sləraha kəla ata a təv gà ɓəzla megemir ŋgar ata asa.
A gwa i ŋgar ka:
“Kəla gà aaha ka,
ta gìser a zìrìwe te.”
7 Ama gà wele ata ta ŋgat a kəla ŋgar ata a daha a təv tar a tsara ka,
ta gwaɗaba:
“Naha ka,
kəla ŋgar ana dizl ɗaf aaha a ta mìtser a mba ya,
dumara,
kə̀ɗakwa iɗəm a,
dite dizl ɗaf aaha ma ne biy kwa.”
8 Tə ndabaya aka kəla ata tsara,
ta kəɗ ŋgat,
dite fakw ti yàra iɗəm a bəra ya.»
9 I dəba ŋa ya,
Yesuw a ndəv à bazlam ŋgar ata ka,
a tsam aà tar,
a gwaɗa a tar:
«Mala dizl ɗaf aaha dze ana,
a ge a ana,
meme na aləka aka təv ana aka màra ya?»
Ama a gwaɗa a tar:
«A dehe a ka,
a bets a iɗəm gà ɓəzla mege megemir dizl ɗaf ŋgar ata ya fit,
dite à dze aɗəm a gà misle ŋgiɗ awiya ŋa asa.»
10 Yesuw a gwaɗa a tar asa:
«Kàa dzeŋgwim bazlam ana i wakita Mbulum a te tsiye?
A gwa ka:
“Kur ata gà ɓəzla mazlazla ga tə zla,
ti yà iɗəm a dala ya ka,
tsaatsa ŋgwal kur te ibam.
Na a ne madəŋ kur ivaɗ ka,
taŋa.
11 *Dukw ata a ne à kwa
kamala dukw mene aà mburma ya ka,
Əbay BATSAH kwa ŋa na a ge taŋa ya.”»
12 Yesuw a ndəv à bazlam ŋgar ata tsara ka,
a tsəɓ a gà Əbay gà ɓəzla mandəva kuɗa a Mbulum nda gà bàba gà mburma ana ta kwere a gà Yahuda ya,
hinne.
Ti yaha vatwa aà magəsa ŋgat,
aɗaba tə sər ndzer,
a tsik bazlam minew ata ka,
agəra tar.
Ama ta ge magəɗa agəra gà mburma ana tar riŋ hinne ya asa mbaŋa.
Ta məsak à ŋgat,
tə daba dukw tar.
Mandza hadam a batsah Əbay gà Ruma
13 I dəba ŋa ya,
gà mburma ata tə sləraha gà *Farisa duwa nda gà mburma *Hiridus əŋgal a təv Yesuw,
aɗaba a sàs a tar maslàlà à ŋgat i yam a.
14 Tə daha ka,
ta gwaɗar:
«Əbay,
mì sər,
kər ka,
mala ndzer ŋa,
ki ge a magəɗa a dukw ana gà mburma ti dzele a ya tsa,
aɗaba ki ge a gər a gà mburma ana ti ne gà ŋgwal ŋa ika miɗ mburma ya tsa.
Ama kər ihər ki ɗif a à vatwa Mbulum ka,
nda ndzer ŋa.
Aɗaba taŋa,
tsik a mə̀r məpala ahəm kwa kwaŋ,
dze ana,
wànà aka vəl vatwa aà mandza hadam a batsah Əbay gà Ruma ana a kwere a kwa ya ya?
Tsəna,
aka vəl tsiye?
Mì dzar a,
wànà mì dzar tsiye?»
15 Ama Yesuw a sər a taraha aka dukw ana tə dzala i gər tar a tsara.
I dəba ŋa ya,
a gwaɗa a tar:
«Aàmala na ki dzwìm a ba aà iye kataya ya?
A za vilwimiŋara kur siŋgwe ŋa ya ilik,
i sèmete a kwaŋ.»
16 Ta vəlaraha ilik.
Yesuw a samata ka,
a gwaɗa a tar:
«Gà foto aaha nda zləm ŋgar ikəka ana,
biy weke?»
Ta gwaɗar aaka:
«Biy batsah Əbay gà Ruma ata ndeɗiŋa ya.»
17 Yesuw a gwaɗa a tar:
«Yawwa,
dukw ana biy batsah Əbay gà Ruma ya ka,
vəlumar dukw ŋgar.
Ama dukw ana biy Mbulum a ka,
vəlum taŋa a Mbulum mbaŋa.»
Bazlam Yesuw ata a tsik a tar a ka,
a za i gər a biy tar ana tə dzala i gər tar a.
A ne aka tar ka,
kamala dukw mene aà mburma ya asa.
Mewize bazlam i təv gà məməta ana ta mbilere a i biye ya
18 I dəba ŋa ya,
gà asiŋ gà *Saduki,
tə dara a təv Yesuw a.
Tar ka,
gà mburma ana ta gwa ka,
wura a sle aà mimbilere a i biye ya asa tsiye.
Gà mburma ata tə tsam aà Yesuw,
19 *ta gwaɗar:
«Əbay mə̀r,
Musa a gwa i təv məpala ahəm Mbulum a ka:
“Na wur ana a riŋ nda gà daala ihər,
aka mət ze mawà ahər kəla ka,
damər ŋgar ma zla daala ata madakwa ŋa,
dite ta wa kəla.
Kəla ata mə̀ mà à gwala tsir ŋgar a bəra.”
20 Aɗaba gà wele duwa a riŋ nda gà damər ŋgar təsəla ka,
maləkwara ŋana a zla daala.
Aləka wele ata a mət ka,
ze mawà ahər kəla.
21 Mimbe gər ŋgar a zazəɗ à məkəs ata madakwa ŋa ya.
Aləka wele ata ibam,
a mət ka,
ze mewe ahər kəla mbaŋa.
Məmakər ŋana a zazəɗ dər tekeɗe,
a mət ka,
kataya mbaŋa asa.
22 Kamala taŋa ya,
tar ata təsəla ya,
tə zazaɗa à madakwa məkəs ata tserdze ka,
ta mata fit,
ze maŋgata ahər kəla.
I dəba ŋa ya,
məkəs ata tekeɗe,
a mət asa mbaŋa.
23 Taŋa dze ana,
aləka i təv ana gà məməta ta mbilere a i biye ya ana,
məkəs ata a ne a ana,
biy weke ilik a?
Aɗaba gà mburma ata nda gà damər təsəla ya ka,
tàa lama ahər fit a?»
24 Ama Yesuw a gwaɗa a tar aaka:
«Kurum ka,
kà sərum duwa tsa.
Aɗaba la,
wànà kà sərum dukw ana i wakita Mbulum a tsiye,
dite kà sərum ndzəɗa Mbulum tsa asa ya?
25 Aɗaba aka təv ana gà məməta ta mbilere a i biye ya ka,
gà asləka nda məkəs ti zle a ba asa tsa.
Ama ti ndze a ka,
sùlàɗə̀ɗa kamala gà gawla Mbulum ana i mbulum a.»
26 *Yesuw a gwaɗa a tar asa:
«Dite aàla na ki wizwim a aà iye bazlam gà məməta ana ta mbilere a i biye ya ya?
Wànà kàa dzeŋgwim təv ana i wakita Musa,
Mbulum a fàfəlar agəra gà məməta ana ta mbilere a i biye ya te tsiye?
Aɗaba mewetse ŋa iɗəm i fata ka,
Mbulum a gwaɗarra i huɗ bagwar adak ana dzaydzay ŋa ya:
“Iye ka,
Mbulum Abəraham,
Mbulum Izak,
Mbulum Zakup.”
27 A tsik taŋa ka,
a gà mburma ana tar riŋ ti ndze a aà bəra hiywe ya,
ku mege na tàa mata tekeɗe ya.
Aɗaba Mbulum ka,
biy gà mburma ana tar riŋ ti ndze a aà bəra hiywe ya,
tsəka,
biy gà məməta tsa.
Kərga taŋa ya,
kurum ka,
kàa sərum bazlam gà məməta tsidze.»
Məpala ahəm Mbulum ana ŋgwal ŋa ya
28 Ama mala medzeŋge məpala ahəm duwa a riŋ i fata mbaŋa.
Aka tsaraka mifefile gà *Saduki ata nda gà Yesuw a.
A fə̀r ka,
bazlam Yesuw na lele ŋa ika biy gà Saduki ya ka,
a sìrìkeha a təv Yesuw bise.
A gwaɗar:
«Məpala ahəm Mbulum ana ŋgwal ŋa dze ana,
awara na i liwiŋ ŋa nda ndzer a?»
29 Yesuw a gwaɗar aaka:
«Məpala ahəm ana ŋgwal ŋa ya ka,
araha:
“Kurum gà Isərayel ana gà mburma Mbulum a,
tsarakum:
Mbulum BATSAH kwa ŋa ka,
ilik,
i ŋgiɗ a riŋ tsa.
30 *Wayum nda gəzləŋ kurum ilik,
nda ndzəɗa ba kurum fit,
dite nda madzala gà gər kurum dze mbaŋa.”
31 *Dite masula ŋa ana a mbeha a taŋa ya ka:
“Wayum mburma kamala ana kà wayum ba kurum a asa.”
Məpala ahəm ŋgiɗ a riŋ ŋgwal ŋa,
a za gà taŋa sula ya tsa.»
32 *Mala medzeŋge məpala ahəm Mbulum ata a gwaɗa a Yesuw:
«Lele ndzer,
Əbay,
na bazlam yak ata kà tsik a kaɗəŋ.
BATSAH kwa ŋa ka,
Mbulum ilik,
tsəka,
biy ŋgiɗ a riŋ a tsa.
33 *Aɗaba taŋa,
say mburma ta waya Mbulum ka,
nda gəzləŋ tar ilik,
nda madzala gà gər tar asa mbaŋa.
I dəba ŋa ya,
ta waya mburma kalkal ba tar ŋa ya.
Taŋa ka,
a za dər gà dukw ana ta bets a a Mbulum masakəŋa ya,
nda gà dukw ŋgiɗ pampam ta viler a ka,
dite ta waya mada a təv ŋgar a.»
34 Yesuw a fə̀r ka,
bazlam ŋgar ata a tsik a wele ata ya ka,
a sər mifèfiler aakaha lele.
A gwaɗar:
«Kər kinehe ka,
bise nda Mbulum kuɗa.»
I dəba bazlam ŋgar ata ya ka,
wura a gəs metsème ahər bazlam asa tsa,
ta ge magəɗa.
*Kiristi a pàt aba ana, i gwala weke ya?
35 I təv ana Yesuw a riŋ a tsik a guma ŋgar a mburma i ga Mbulum batsah ŋana ya ka,
a tsam aà tar bazlam.
A gwaɗa a gà mburma ata:
«Meme na gà ɓəzla medzeŋge məpala ahəm Mbulum ta gwa,
Kiristi ka,
mala məmbala à mburma ana Mbulum a gwa,
i slir a kurumehe a ya ka,
gwala Dawda asa ya?
36 *Aɗaba Dawda nda gər ŋgar a mà ka,
à bazlam Mezite Mesife Mbulum,
a gwa ivaɗ ka:
“Mbulum a gwaɗa a Batsah ga ŋa:
Ndza aka tseke ahər mezime gà,
haa a təv ana Yàa dza gà ɓəzla guvəl yak
aà huɗ sik yak a dzekwiŋ a.”
37 Ama Dawda nda gər ŋgar ka,
a zalar Batsah ga ŋa seyiŋ ka,
dite meme na ta gweɗe a ka,
kəla ŋgar asa ya?»
Gà mburma ana i təv ŋgar a ka,
tə dza zləm a guma ŋgar ata lele,
aɗaba a da a tar a gər hinne.
Mege metsehe agəra gà ɓəzla medzeŋge məpala ahəm
Mbulum ana nda pàrsa ya
38 I dəba ŋa ya,
Yesuw a gwaɗa a gà mburma ata tì dze a zləm a guma ŋgar a:
«Gwim metsehe nda təv gà ɓəzla medzeŋge məpala ahəm Mbulum.
Aɗaba gà misle ŋgiɗ iɗəm,
ti sìweye a nda gà andiw zubul ŋa ka,
ta waya məpàtà dər à ba tar aka miɗ mburma ɗekɗek.
Gwim metsehe nda təv gà taŋa a sàs a tar ka,
ta ge a tar wusa i liwiŋ mburma ka,
say nda mazàmbàɗà à tar ɗekɗek a.
39 Tàa da a gà ga mahàmà a Mbulum ka,
ti yahawa i tar ka,
say təv mendze ana ŋgwal ŋa ya,
aà mendze dər aka miɗ mburma,
dite ka,
mburma ta fə̀r dər aà tar lele kuɗa.
Tàa ndze a təv mazəma ɗaf a liwiŋ mburma tekeɗe,
say ti yehe a ka,
təv mendze ana ŋgwal ŋa ya asa mbaŋa.
40 Tì dzik a gà duwa aà gà madakwa gà məkəs a nda haram a.
Dite ta heme a a Mbulum ika miɗ mburma ka,
vìrìɗìɗɗe,
kərga tar ka,
gà ŋgwal ŋa,
tsaatsa pàrsa.
Gà taŋa ka,
seriye tar a ta ge a ka,
mawùràba ŋa ndeyndey na i təv Mbulum a.»
Madakwa məkəs duwa matawak ŋa, a ndəv aba à dukw
məfara ŋana aɗaba Mbulum a
41 I dəba ŋa ya ka,
Yesuw a daha,
a ndza a bəɗ bise nda təv sahər ana gà mburma ata tə dzawa aɗəm siŋgwe i batsah ga Mbulum ata i fata ya.
A fə̀r aà tar,
meme na tì dzèye aɗəm a ya.
A samata ka,
gà Əbay gà bàba ŋa ana i fata ya,
tar riŋ ihər tì dzèye aɗəm a siŋgwe zùw zùw hinne hinne.
42 Ama madakwa məkəs duwa a riŋ i fata,
matawak ŋa.
A daha,
a dza aɗəm i ŋgar ka,
siŋgwe duwa mesèse ŋa sula,
kalkal siŋgwe ilik a pəra.
43 Yesuw a ŋgat a məkəs ata tsara ka,
a zal a gà ɓəzla mazazama ŋgat.
A gwaɗa a tar:
«Iye ihər i tsik a kurum a nda ndzer:
Madakwa məkəs aaha matawak ŋa ya,
aka dza aɗəm dukw məfara ŋa aaha aɗaba Mbulum a ka,
a za biy gà mburma aaha tserdze tə dzaya aɗəm a.
44 Aɗaba gà misle ŋgiɗ tə dzaya aɗəm ka,
asiŋ ŋa a riŋ aà tar hinne asa,
à ndìv a tsa.
Ama madakwa məkəs aaha a dza aɗəm i ŋgar ka,
dukw ana a ŋgat nda matawak ŋgar a.
A dza aɗəm ka,
dukw ana a riŋ ihər a ndze a dər dze ya.»