Weke na a vəl vatwa a Yesuw aà mege duwa pampam a?
20
1 A pat duwa ka,
Yesuw a riŋ a dzeŋge a guma ŋgar i ga Mbulum batsah ŋana.
A tsik a ter a bazlam ŋgwal ŋana.
I təv ana a riŋ a tsik a ya ka,
gà Əbay gà ɓəzla mandəva kuɗa a Mbulum nda gà ɓəzla medzeŋge məpala ahəm Mbulum nda gà bàba gà mburma ana ta kwere a gà Yahuda ya,
tə daha a təv ŋgar,
2 tə tsam ahər,
ta gwaɗar:
«Tsik a mə̀r kwaŋ.
Ki ge a duwa kamala taŋa ya ana,
nda ndzəɗa weke?
Weke na a slərra kər,
a vəlak ndzəɗa ŋa dze ya?»
3 Yesuw a gwaɗa a tar aaka:
«Iye tekeɗe,
i wiz aà kurum a duwa ilik mbaŋa te.
Tsikwimiŋ dukw ilik.
4 Weke na a slərra Yuhana aà metsìlwìɓè à mburma a yam a?
Wànà Mbulum a,
na a slər ahər ŋgat a,
tsəna,
mburma ya?»
5 I dəba ŋa ya,
gà mburma ata tə dza akaba bazlam ika magər tar,
ta gwaɗaba:
«Na kù gwaɗakwar kinehe ka:
“Mbulum na a slər ahər ŋgat a” ka,
a gweɗekwe a:
“Dite aàla na kə̀ gəsum bazlam ŋgar tsiye?”
6 Ama na kù gwaɗakwar asa:
“Gà mburma na tə slər ahər ŋgat a” ka,
a ge a ba tsa asa.
Aɗaba gà asiŋ gà mburma ɗa i magər kwa hinne tə dzala Yuhana ka,
mala məmà à bazlam Mbulum ndzer,
ta kelewa a kwa nda kur.»
7 Gərəŋ gərəŋ a mà a tar dər.
I dəba ŋa ya,
ta gwaɗar aaka:
«Mì sər tsa.»
8 Yesuw a gwaɗa a tar:
«Yawwa,
iye tekeɗe ka,
i tsik a kurum a wur ana a slərra iye,
a viliŋ ndzəɗa aà megeye gà dukw aaha tserdze ya ɓav tsa mbeete.»
Bazlam minew gà ɓəzla makaslà gà dizl ɗaf duwa hinne
9 I dəba ŋa ya,
Yesuw a dza ba aà metsìkè guma ŋgar ndaka bazlam minew a gà mburma ata.
A gwaɗa a tar:
«Wele duwa a sàs guvah.
A dzava aɗəm dizl ɗaf hinne.
I dəba ŋa ya,
wele ata a da a kwite ŋa a təv ŋa,
a ndze a riŋ hinne.
Guvah dizl ɗaf ŋgar ata à mitehiŋa.
A dza aɗəm gà mburma aà məfə̀rà ahər,
dite aləka ta vəlar dukw guvah ŋgar əŋgal na aka màra ya.
10 Tits a təv ana dizl ɗaf ata a nah a ka,
wele ata a sləraha mburma a təv gà ɓəzla megemir ŋa,
dite ka,
tə̀ dzàraha dukw guvah ŋgar ata kuɗa.
Aləka wele ata a daha,
ta ŋgatar tsara ka,
ta gə̀zl lehhè lele.
Tə dalawa ŋgat,
a mbəɗ gər a ma,
ze ahər sìkwèɗ,
duwa ihər tsa.
11 I dəba ŋa ya asa,
mala dizl ɗaf ata a sləraha misle ŋgiɗ.
Aləka wele ata a daha,
ta ŋgatar kataya asa ka,
ta ger matawak,
ta gə̀zl ŋgat,
tə dalawa ŋgat mbaŋa.
12 Ama mala dizl ɗaf ata a sləraha misle ŋgiɗ məmakər ŋa asa.
Wele ata a daha i ŋgar ka,
ta gayar mbəlak hinne,
dite tə dalawa sarra mbaŋa asa.
13 Aləka i dəba ŋa ya,
mala dizl ɗaf ata a dzala,
a gwa:
“Dite i ge a ana,
meme na kinehe ya?
Ŋgulum i slirehe a kəla gà aaha mandərkwasla ŋa ya asa dzekwiŋ.
Bəla ŋgat ka,
ta gìser a zìrìwe te ya.”
14 Aləka kəla ata a daha a təv gà mburma ata,
ta ŋgatar tsara ka,
ta gwaɗaba ika magər tar:
“Naha ka,
kəla ana dizl ɗaf aaha a ta mitser a mba ya.
Kə̀ɗakwa iɗəm a,
dite dizl ɗaf aaha ma ne biy kwa.”
15 Tə daha,
tə lamayarra i fata ya tsihtsih,
dite tə daha,
ta kəɗ ŋgat fit a biye.»
I dəba ŋa ya kuɗa,
Yesuw a gwaɗa a tar aaka asa:
«Dite na kataya dze ana,
mala dizl ɗaf aaha a ge a ana,
meme na nda gà mburma ata ya,
na aləka aka təv ana aka daha ya?»
16 Ama a gwaɗa a tar:
«A dehe a ka,
a bets a iɗəm gà ɓəzla megemir dizl ɗaf ŋgar ata ya fit,
dite à dze aɗəm a gà misle ŋgiɗ awiya ŋa asa.»
Ama gà mburma ata tə tsaraka bazlam ŋgar ata kataya ka,
ta gwaɗar aaka:
«Gà dukw ata tserdze ya ka,
a ge a ba diydiy tsidze.»
17 *Yesuw a tsaraka bazlam tar ata kataya ka,
a fə̀r aà tar,
a gwaɗa a tar:
«Dzalum aka dukw ana mewetse ŋa a riŋ i wakita ya,
a gwa dze ana,
meme?
Aɗaba a gwa ka:
“Kur ata gà ɓəzla mazlazla ga tə zla,
ti yà iɗəm a dala ya ka,
tsaatsa ŋgwal kur te ibam.
Na a ne madəŋ kur ivaɗ ka,
taŋa.”
18 Wur ana aka dəɗ aka kur ata ya ka,
ŋgə̀slàf à ses a ikaba ŋgat a fit.
Ama na kur ata aka dəɗ aka wura ka,
a ŋgesl a ŋgat slìrets slìrets asa mbaŋa.»
Mandza hadam a batsah Əbay gà Ruma
19 I fata ya tsara ka,
gà ɓəzla medzeŋge məpala ahəm Mbulum,
nda gà Əbay gà ɓəzla mandəva kuɗa a Mbulum duwa,
tə daha,
ti yaha vatwa aà magəsa Yesuw,
aɗaba tə sər ka,
a fàfəl ndaka bazlam minew ata ka,
agəra tar.
Ama magəɗa gà mburma ana mayahaba gər ŋa i təv Yesuw a,
a ge a tar.
20 I dəba ŋa ya,
tə dza ba aà mayaha manəsa bazlam i təv Yesuw a.
Tə slər gà ɓəzla məbànàra bazlam aà mburma i gər a,
a təv ŋgar.
Gà mburma ata ka,
ta ge aba kamala ana tar ka,
gà ɓəzla ndzer ŋa ya.
Dite ka,
ta gə̀saraha ahəm aà are,
nda mewize ahər duwa.
A sàs a tar məvəla ŋgat ahər mala sik Əbay ana a kwere a ahəɗ gà Ruma ya.
21 Tə daha,
ta wiz ahər bazlam,
ta gwaɗar:
«Əbay,
mì sər kər ka,
mala ndzer ŋa.
Ki ge a magəɗa a dukw ana gà mburma ti dzele a ya tsa.
Ku mege tar gà ŋgwal ŋa ika miɗ mburma tekeɗe,
ama kər ihər ki ɗif a à vatwa Mbulum ka,
nda ndzer ŋa.
22 Aɗaba taŋa,
tsik a mə̀r məpala ahəm Mbulum kwa kwaŋ,
dze ana,
wànà aka vəl vatwa aà mandza hadam a batsah Əbay gà Ruma ana a kwere a kwa ya,
tsəna,
aka vəl tsiye?»
23 Ama Yesuw a sər a taraha aka dukw ana tə dzala i gər tar a tsara.
A gwaɗa a tar:
24 «Pètwimiŋ à kur siŋgwe kwaŋ.»
Gà mburma ata tə daha,
ta patar dər.
A gwaɗa a tar:
«Naha dze ana,
foto weke,
na ika siŋgwe aaha nda gà zləm ŋgar a?»
Ta gwaɗar aaka:
«Biy batsah Əbay gà Ruma ata ndeɗiŋa ya.»
25 Yesuw a gwaɗa a tar:
«Yawwa,
dukw ana biy batsah Əbay gà Ruma ya ka,
vəlumar dukw ŋgar.
Ama dukw ana biy Mbulum a ka,
vəlum taŋa a Mbulum mbaŋa.»
26 Tə samata ka,
ti sle aà meŋgete a bakal i təv ŋgar a tsa,
agəra bazlam ata a tsik a tar ika miɗ mburma tserdze ya.
Aɗaba bazlam ana a tsik a tar a ka,
a za biy tar ana tə dzala i gər tar a fit.
Ta gəs mifèfiler aaka asa tsa.
Mewize bazlam gà məməta ana ta mbilere a i biye ya
27 I dəba ŋa ya,
gà asiŋ gà *Saduki duwa tə dara a təv Yesuw a,
aà mewize ihər bazlam a.
Ama tar ka,
gà mburma ana ta gwa ka,
gà məməta ti sle aà mimbilere a i biye ya asa tsiye.
Tə daha,
28 ta gwaɗar:
«Əbay mə̀r,
Musa a gwa i təv məpala ahəm Mbulum a ka:
“Na wur ana a riŋ nda gà daala ihər,
aka mət ze mewe ahər kəla ka,
damər ŋgar ma zla daala ata madakwa ŋa.
Dite ta wa kəla.
Kəla ata mə̀ mà à gwala tsir ŋgar a bəra.”
29 Aɗaba gà wele duwa a riŋ nda gà damər ŋgar təsəla ka,
maləkwara ŋana a zla daala.
Aləka wele ata a mət ka,
ze mewe ahər kəla.
30 Mimbe gər ŋgar a zazəɗ à məkəs ata madakwa ŋa ya.
Aləka wele ata ibam,
a mət ka,
ze mewe ahər kəla mbaŋa.
31 Məmakər ŋana a zazəɗ dər asa.
Aləka a mət mbaŋa asa ka,
ze mewe ahər kəla asa.
Kamala taŋa ya,
tar ata təsəla ya,
tə zazaɗa à madakwa məkəs ata tserdze ka,
ta mata fit ze maŋgata ahər kəla.
32 I dəba ŋa ya,
məkəs ata tekeɗe,
a mət asa mbaŋa.
33 Taŋa dze ana,
aləka i təv ana gà məməta ata ta mbilere a i biye ya ana,
məkəs ata a ne a ana,
biy weke ilik a?
Aɗaba gà mburma ata nda gà damər təsəla ya ka,
tàa lama ahər fit a?»
34 Ama Yesuw a gwaɗa a tar aaka:
«Bazlam mazla məkəs ka,
biy gà mburma ana kinehe ika gər ahəɗ a.
35 Ama gà mburma ana Mbulum a pala tar,
ti ta mbilere a i biye ya,
dite ti ti ndze a ika gər ahəɗ ana awiya ŋa a dere a ika miɗ a ka,
ti dzele a bazlam mazla ba nda gà məkəs tsa.
36 Aɗaba tar ka,
ta mete a asa tsa.
Ti ndze a ka,
kamala gà gawla Mbulum a.
Tàa ne gà ɓəza Mbulum,
aɗaba tàa mbəlara i məməta ya aka ndəv.
37 *Ama kà sərakwa dər,
gà məməta ta mbilere a i biye ya ka,
aà bazlam Musa ana a tsik akahər ata ya.
I huɗ bazlam ana a mà dər,
meme na Mbulum a fàfəlarra i huɗ bagwar adak ana dzaydzay ŋa ya.
A ɗe dər,
a gwa:
Mbulum Abəraham,
Mbulum Izak,
Mbulum Zakup.
38 A tsik taŋa ka,
a gà mburma ana tar riŋ ti ndze a aà bəra hiywe ya,
ku mege tàa mata tekeɗe ya.
Aɗaba Mbulum ka,
biy gà mburma ana tar riŋ ti ndze a aà bəra hiywe ya,
tsəka,
biy gà məməta tsa.
Aɗaba gà mburma ŋgar tserdze ti ndze a aà bəra hiywe ika miɗ ŋgar ka,
agəra ŋgat.»
39 Gà asiŋ gà ɓəzla medzeŋge məpala ahəm Mbulum ana a riŋ i fata ya,
tə tsaraka kataya ka,
ta gwaɗar aaka:
«Kataya,
kàa tsik ka,
lele ndzer Əbay.»
40 I dəba ŋa ya,
ku weke aka wiz ahər duwa ilik asa tsa,
ta ge magəɗa.
*Kiristi a pat aba ana, i gwala weke ya?
41 Yesuw a gwaɗa a tar i dəba bazlam ŋgar ata ya asa:
«Meme na ta gweɗe a,
Kiristi ka,
mala məmbala à mburma ana Mbulum a gwa,
i slir a kurumaha a ya ka,
gwala Dawda asa ya?
42 Aɗaba Dawda nda gər ŋgar a gwa i wakita dimis mazàmbàɗà à Mbulum a ivaɗ ka:
“Mbulum a gwaɗa a Batsah ga ŋa:
Ndza aka tseke ahər mezime gà,
43 *haa a təv ana Yàa dza gà ɓəzla guvəl yak
aà huɗ sik yak dzekwiŋ a.”
44 Ama Dawda ka,
a zalar “Batsah ga ŋa” seyiŋ ka,
dite meme na ta gweɗe a ka,
kəla ŋgar asa ya?»
Mege metsehe nda təv gà ɓəzla medzeŋge
məpala ahəm Mbulum ana nda pàrsa ya
45 I təv ana gà mburma ata tserdze ya,
tar riŋ i təv Yesuw,
tì dze a zləm a guma ŋgar a ka,
a gwaɗa a gà ɓəzla mazazama ŋgat:
46 «Gwim metsehe nda təv gà ɓəzla medzeŋge məpala ahəm Mbulum.
Aɗaba gà misle ŋgiɗ iɗəm,
tì sìweye a nda gà andiw zubul ŋa ka,
ta waya məpàtà dər à ba tar aka miɗ mburma ɗekɗek.
Gwim metsehe nda təv gà taŋa a sàs a tar ka,
ta ge a tar wusa i liwiŋ mburma ka,
say nda mazàmbàɗà à tar ɗekɗek a.
Tàa da a gà ga mahàmà a Mbulum ka,
ti yahawa i tar ka,
say təv mendze ana ŋgwal ŋa ya,
aà mendze dər aka miɗ mburma,
dite ka,
mburma ta fə̀r aà tar lele.
Tàa ndze a təv mazəma ɗaf a liwiŋ mburma tekeɗe,
say ti yehe a ka,
təv mendze ana ŋgwal ŋa ya asa mbaŋa.
47 Tì dzik a gà duwa aà gà madakwa gà məkəs a,
nda haram.
Dite ta heme a a Mbulum ika miɗ mburma kuɗa ka,
vìrìɗìɗɗe,
kərga tar ka,
gà ŋgwal ŋa,
tsaatsa pàrsa.
Gà taŋa ka,
seriye tar a ta ge a ka,
mawùràba ŋa ndeyndey na i təv Mbulum a.»