Gà Yesuw nda Zakayus
19
1 Aləka i dəba ŋa ya,
Yesuw a ndze a Yeriko.
A de a ndaka magər kwite.
I təv ana a riŋ a de a ya ka,
2 wele duwa a riŋ i fata,
zləm ŋgar Zakayus.
Ŋgat ka,
Əbay gà ɓəzla dùwan.
Ŋgat mala limana hinne.
3 A yaha vatwa aà maŋgata a Yesuw,
ama a sle aà meŋgeter tsa,
aɗaba gà mburma ana a riŋ ti ler tits a.
Ŋgat ka,
derderer mburma asa.
4 A daha,
a val aka miɗ.
A daha,
a tsəl a ɗaf kàvə̀ra duwa.
A sasar ka,
a məfə̀rà aà Yesuw ana a dehe a nda taŋa ya.
5 Aləka Yesuw a ndzeha aà huɗ kàvə̀ra ata,
a fə̀raha aɗəm tsara.
A ŋgataha a Zakayus.
A gwaɗaraha:
«Tarra i ɗaf aka ya tsəma,
Zakayus,
aɗaba iye ka,
mbəlakw yak na mbakum a.»
6 Zakayus a tsaraka kataya ka,
a tarəra i ɗaf ata ya tsara,
tə da a ma ŋgar.
Aləka tə daha ka,
a gəs Yesuw nda maŋgayaba lele.
7 Ama gà mburma ana i fata ya,
ta ŋgatar kataya tsara ka,
a tsəɓ a tar hinne.
Aɗaba ta gwa:
«Wànà wele aaha a de a a bəra mala bakal ana,
meme?»
8 Ama i təv ana tar riŋ i ma ya ka,
Zakayus a daha,
a hitse aka miɗ Əbay Yesuw,
a gwaɗar:
«Araha,
i tsik a i sida ya,
Əbay gà:
I dzèye a mezehe dukw gà a gà ɓəzla matawak.
Na bəla Yàa zla duwa aà wura ya ilik ka,
i sikehe a dər aaka faɗ.»
9 Yesuw a tsaraka bazlam ŋgar ata ka,
a gwaɗar:
«Və̀ɗəna ka,
mipise ahəm i ma yak,
Mbulum aka mbəl à kər,
aɗaba kər tekeɗe ka,
gwala Abəraham mbaŋa.
10 Kərga taŋa ya,
iye,
*wur ana a dara i təv Mbulum a,
i dara ka,
aà mayaha gà mburma ana tàa dzeye ya,
dite aà məmbala à tar.»
Bazlam minew kur siŋgwe ana tə tsakàl dər a
11 I dəba ŋa ya,
Yesuw a fàfəl ndaka bazlam minew agəra gà mburma ana tə tsaraka bazlam ata ya.
A tsik bazlam ata ka,
aɗaba ana aka à mendze a Yeruzalem ka,
gà mburma ata i fata ya tserdze tə dzala,
ta gwa:
A ge a ka,
*Mekwere Mbulum aka à mendzera a faha ya kuɗa.
12 I huɗ bazlam ŋgar ata ya ka,
a gwaɗa a tar:
«Wele duwa a riŋ,
Əbay ŋa,
limana ŋgar a riŋ hinne.
A da a təv Əbay aka ahəɗ ŋgiɗ diriŋ,
dite ma tikera ŋgat a Əbay a,
a dere a,
a kwere a dər gà mburma ŋgar aaha i ma ya.
13 I təv ana à meh a ba,
a de a mba ya ka,
a zalawa a gà ɓəzla meslire ŋgar kurwa.
A daha,
a dzaya a tar kur siŋgwe ilik ilik tserdze.
Ilik ŋa ata ka,
siŋgwe iɗəm ka,
hinne.
A gwaɗa a tar:
“Araha,
dumaha,
tsakàlum nda siŋgwe aaha,
haa a pat ana Yàa màra a ma ya.”
Ŋgat ŋa a mah ba,
a da tsara.
14 Aləka gà mburma ata tserdze ya,
tə tsaraka,
aka da a mewize Əbay ka,
a tsəɓ a tar hinne,
aɗaba ta waya ŋgat tsa.
I dəba ŋa ya,
tə slər mburma a təv gà mburma ana ti tikere aɗəm a ŋgat a,
aà megweɗe a taraha ka:
“A sàs a mə̀r wele aka,
ma ne Əbay mə̀r tsa.”
15 Ama bàlaarì ti tikera aɗəm ŋgat a.
Aləka a màra a ma ya ka,
a daha,
a zal a gà ɓəzla meslire ŋgar aaha ndeɗiŋa,
a dzaya a tar siŋgwe aà metsèkèle ya.
A sasar a sir a dər ka,
meme na ta ge nda siŋgwe aaha ya.
16 Wele ana a làhəha a təv ŋgar a,
a daha,
a gwaɗar:
“Əbay,
siŋgwe yak ata kà viliŋ a ka,
Yàa ŋgat aaka,
nuba kurwa.”
17 Əbay ata a gwaɗar:
“Lele ndzer,
na taŋa ya.
Kər ka,
ŋgwal mala meslire kaɗəŋ.
Kinehe ka,
ki kwere a ga kwite kurwa mbaŋa,
aɗaba ana ki ge megemir dukw ana hinne tsiye ka,
ndaka vatwa ŋa ya.”
18 Masula ŋana a daha,
a gwaɗar:
“Əbay,
siŋgwe yak ata ka viliŋ a ka,
Yàa ŋgat aaka,
nuba ə̀zləm.”
19 Əbay ata a gwaɗar:
“Taŋa ka,
lele.
Kər tekeɗe,
ki kwere a kwite ə̀zləm mbaŋa.”
20 I dəba ŋa ya,
misle ŋgiɗ pam asa a daha,
a gwaɗar:
“Əbay,
kur siŋgwe yak aaha kà viliŋ ilik a ka,
araha,
i kaha,
Yàa paɗak aka ahəm petek lele.
21 Magəɗa yak a giŋ ka,
hinne,
aɗaba kər ka,
ŋgwal mburma tsa.
Dukw ana biy yak tsiye tekeɗe ibam ka,
ki zlebiŋa.
Dukw ana kər kà slige tsiye tekeɗe ibam ka,
ki sèsebiŋa mbaŋa.”
22 Ama Əbay ata a gwaɗar aaka:
“Kər ka,
ŋgwal mala meslire tsidze.
Seriye yak aaha i ge a ya ka,
kər ŋa na a dzew a ba yak a.
Na kàa sər,
iye ka,
ŋgwal mburma tsa,
dukw ana biy ga tsiye tekeɗe,
i zlebiŋa,
dukw ana Yàa slige tsiye tekeɗe ibam ka,
i ses a ba dze ana,
23 aàmala na kə̀ gəs metikiŋ siŋgwe ga aaha a ga ana ti tikiŋ a aba ya ka,
dite tì sìkèhiŋ a dər aaka ya tsiye?
Ana ka,
bəla mimè ana i mère a ya ka,
siŋgwe ga aka səkah aaka ya.”
24 I dəba ŋa ya,
a gwaɗa a gà mburma ana ta riŋ i fata ya:
“Zlum ihər siŋgwe aka ya,
ka vəlum aaka a wele aaha gà biy ŋgar kurwa ya.”
25 Ta gwaɗar aaka:
“Əbay,
ta viler aaka a ana,
gà biy ŋgar ka,
kurwa ana,
meme?”
26 Ama Əbay ata a gwaɗa a tar aaka asa:
“Iye ihər i tsik a kurum ŋa:
Wur ana aka ge megemir lele,
aka ŋgat dukw maya ba ŋgar hinne ka,
tì sikehe a dər aaka hinne asa mbaŋa.
Ama wur ana a ge a megemir nda swalwa ŋa ndaka vatwa ŋa tsiye ka,
ti zle a ihər dukw ana i ahər ŋgar a fit mbaŋa.
27 Ama gà ɓəzla mene are ana a sàs a tar,
i ne Əbay tar tsiye ka,
geswimiŋara tar a faha ya,
ka batsum tar aka miɗ gà a faha.”»
Yesuw a da a Yeruzalem
28 I dəba ŋa ya,
Yesuw a ndəv à mifefile ŋgar i fata ya tsara ka,
a mah ba,
a da aka miɗ,
a de a a Yeruzalem.
29 Tàa à mendze a gà kə̀sà Betfedze nda Betaniya bise nda Yeruzalem,
aà sik kwite duwa,
tə zalar dìyes dizl ɗaf uliviye.
I fata ya ka,
Yesuw a slər gà ɓəzla mazazama ŋgat sula aka miɗ.
30 A gwaɗa a tar:
«Dum a kə̀sà aaka ika miɗ kurum a kwaŋ.
Kàa ndzwimaha aà guva kə̀sà ata ka,
ki lwimehe a aà kəla hezweŋe a riŋ madànà ŋa aà dizl,
na wura aka tsəl aaka ilik zukw tsiye.
Kà pə̀lumara,
ka dum dərra a faha ya.
31 Na wura aka gwaɗa a kurum:
“Aàmala na ki pìlwim a ya” ka,
gwaɗumar:
“Əbay na a wiz a.”»
32 Gà ɓəzla meslire ata sula ya ta mah ba,
tə da.
Tə daha ka,
a ge kamala ana Yesuw a tsik a tar a kaɗəŋ.
Tàa le aà kəla hezweŋe ata.
33 I təv ana tar riŋ ta pìl a ya ka,
gà ɓəzla hezweŋe ŋa a riŋ i fata,
ta gwaɗa a tar:
«Aàmala na ki pìlwim a kəla hezweŋe ŋa ya?»
34 Ta gwaɗa a tar aaka:
«Əbay na a wiz a.»
35 I dəba ŋa ya,
ta pə̀laraha kuɗa.
Tə daha,
tə dzaya aaka gà petek tar,
tə zla aaka Yesuw kuɗa,
dite ta mah ba,
tə da.
36 I təv ana tar riŋ ti de a ya ka,
gà mburma ta fatala gà petek tar aka bàrama ana Yesuw a de a dər a,
aà mazlə̀bà à ŋgat.
37 Aləka tàa à mendze a Yeruzalem,
ti de a ndaka vatwa ana a tarəra i dìyes kwite uliviye ata ya.
I fata ya ka,
gà ɓəzla mazazama ŋgat ata tserdze ya,
tə dza ba aà mazàmbàɗà à Mbulum nda maŋgayaba i gəzləŋ nda magala,
aɗaba gà dukw mene aà mburma ana ta ŋgatawar,
Yesuw a geyewa tserdze ya.
38 *Ta gwaɗawa:
«Mipise ahəm ika gər Əbay ana
Mbulum a slərra ŋgat a faha ya.
Gà na i mbulum tserdze ya ka,
tə ndza zayya nda gà matasla yam i gəzləŋ.
Mezembeɗe ma ge ka,
biy Mbulum Batsah ŋa ana
i gər ŋa ya mbaŋa.»
39 Gà *Farisa duwa ika magər gà mburma ata,
tə tsaraka taŋa ka,
ta gwaɗa a Yesuw:
«Əbay,
gwaɗa a gà ɓəzla mazazama kər aaha ka,
tə ndza ɗikɗik.»
40 Ama Yesuw a gwaɗa a tar aaka:
«Iye ihər i gweɗe a kurum ŋa:
Na tàa ndza ɗikɗik ka,
ku mege gà kur tekeɗe,
ta mbìɗ a ba aà mifefile nda ndzəɗa asa.»
Yesuw a tuwa kwite Yeruzalem
41 Yesuw a ŋgat a kwite Yeruzalem ka,
a tuwa kwite ata hinne.
42 A gwa:
«Na mege və̀ɗəna kà gəsum meslire dukw ana a vile a kurum a mandza zayzay pəra ya,
asla ka,
ana ka,
ŋgulum.
Ama kinehe ka,
makàhà ŋa aà kurum a,
ki ŋgetwimer a tsa,
kàa nwim kamala gà ɓəzla guluf a.
43 I tiwe a kurum,
aɗaba a pat ŋgiɗ ka,
gà ɓəzla guvəl kurum tì dze a à kurum a màŋgwàɓà,
ti lewer a kurum tits.
Dite ti ta ŋgiɗits a akaba kurum,
ku mege ara ndawara ya tekeɗe ya.
44 Ta bets a kurum,
ti dwif a kurum a zlagam a bəɗ nda ga ŋa dze fit,
leheɗ leheɗ.
Ti ta miyek a à kur ika gər biy ŋgiɗ tsidze.
Aɗaba kàa sərum pat ana Mbulum a dere a aà mazlàkà kurum zləmana ya tsa.»
Yesuw i ga Mbulum batsah ŋana
45 I dəba ŋa ya,
Yesuw a da a ga Mbulum batsah ŋana.
A ta medeha ka,
a leha aɗəm aà gà ɓəzla madzàwà à duwa.
A ŋgat a tar kamala taŋa ya ka,
a dza ba aà madalawara iɗəm tar a bəra ya.
46 *A gwaɗa a tar aaka:
«Aɗaba a riŋ mewetse ŋa i wakita Mbulum,
a gwa ka:
“Ga gà ka,
biy gà mburma ana ta hemiŋ a iɗəm a.”
Ama kurum kà nwim dər i kurum ka,
sləlak mandza aɗəm dukw gà ɓəzla akəl.»
47 Aləka i dəba ŋa ya,
Yesuw a dzeŋgewa i ga Mbulum batsah ŋa ata kəla pat.
Gà Əbay gà ɓəzla mandəva kuɗa a Mbulum nda gà ɓəzla medzeŋge məpala ahəm Mbulum nda gà bàba gà Yahuda ana i fata tserdze ya,
ti yaha vatwa aà makə̀ɗà Yesuw.
48 Ama tə sər meme na mìi ŋget a vatwa aà magəsa ŋa ya tsa,
aɗaba ana gà mburma a riŋ hinne i təv ŋgar,
ti dze a zləm a bazlam ŋgar ana a tsik a ter a ika arah a,
lele nda metsehe ya.