Mata 25

Bazlam minew gà dəm duwa kurwa

Luka 12:35-38; 13:25-28

1 I dəba ŋa ya, Yesuw a gwaɗa a tar asa: «A pat ŋgiɗ i mère a aka mekwere gà ya ka, à ndzikiɗ a ba bazlam minew gà dəm duwa kurwa, ta waya melime nda gà zal daala ana a zlere a ya. I təv ana ta meh a ba, ti de a ya ka, tə ndzək dər gà lalampa tar aà ahər. 2 Ama gà dəm ata kurwa ŋa ya ka, gà ə̀zləm ŋana ka, ta ge metsehe lele na ti de a ya. Gà biy ŋgiɗ aaha, tàa ge metsehe tsa. 3 Aɗaba gà na metsehe tar a riŋ tsiye ka, tə ndzaka gà lalampa tar nda miviye mal ana iɗəm a ɗekɗek pəra. Tàa tafa dər mal a kwalaba tsa. 4 Ama gà na metsehe tar a riŋ lele ya, tar ta mah ba ka, tàa tafa dər mal aà ahər asa.

5 I dəba ŋa ya, zal daala ata a zlere a ya, aka dara bise tsa. Tar ata tserdze ya ka, tə dza aka mendze are, aɗaba meèrìzle a ge a teriŋa.

6 Aləka magər həvəɗ a ge ka, Mewideye a ɗe tsara. Ta gwaɗa a tar: “Araha, zal daala aaha aka slala, aka dara kuɗa. Hitswim aà mbulum tsəma tsəma, dumaha, ki lìmwimiŋa.” 7 Gà dəm ata tserdze ya, hùrùm ta hitse aà mbulum. Tə ndzək gà lalampa tar a ahər. Tə sakaha aɗəm à mal. Ama gà asiŋ ŋa aaha ndeɗiŋa metsehe tar a riŋ tsiye, ndezwizzwè lalampa tar a mbetiŋa, mal aà tar tsa. 8 I fata ya ka, tə dza ba aà mewize mal aà gà na metsehe tar a riŋ lele ya. Ta gwaɗa a tar: “Kamkam, mbəɗum a mə̀r mal a gà lalampa mə̀r zaakwa te, aɗaba gà lalampa mə̀r ka, ta mbetiŋa.” 9 Ama gà ɓəzla metsehe aaha ta gwaɗa a tar: “Awaŋ, biy tsa, a slekwe a tsəka, ŋgulum dumaha, tə sakamumara i təv gà ɓəzla madzàwà dər ŋa ya.”

10 Aləka i təv ana ti de a a masàkàmà ŋa tsara ya ka, pəzlàŋ zal daala ata aka slala dər. Gà na ndeɗiŋa metsehe tar a riŋ lele ya, tar riŋ ta veve a ŋgat, tsùndzur tə dəɗ akaba a ga a ma ŋgar, aà megirive nda mazəma dukw mezime. Ta hə̀ndə̀k dər aàba a ga. 11 Aləka i dəba ŋa ya ka, gà dəm aaha ndeɗiŋa tə da a masàkàmà mal a, ta màra. Tə dara ka, wura a riŋ asa tsa, tàa da a ga. Tə dza ba aà mezeleha a mala ga a ga. Ta gwaɗaraha: “Kamkam Əbay, hə̀ndə̀k a mə̀r i ga ya te.” 12 Ama wele ata a gwaɗa a tarəra: “Iye ka, i sər kurum tsa.”»

13 Aɗaba taŋa, Yesuw a gwaɗa a tar kuɗa: «Ama kurum ka, ndzum nda metsehe lele, tsəka, ki sirwim a pat ŋa tsa, kige tsa ler ŋa ka, ki sirwim a tsidze.»

Bazlam minew gà ɓəzla megemir wele duwa tar makər

Luka 19:11-27

14 Yesuw a gwaɗa a tar asa: «Aɗaba dukuməŋa a ne a pat ŋgiɗ ka, kamala wur ana a de a a mesìweye a təv a diriŋ a. I təv ana à meh a ba ya ka, a zal a gà ɓəzla mege megemir ŋgar, a dzàɗ limana ga ŋgar fit a ahər tar dzekwiŋ. 15 A vəl a misle ŋgiɗ kur siŋgwe dəbuw ə̀zləm, i misle ŋgiɗ dəbuw sula, i misle ŋgiɗ aaha ibam, dəbuw ilik. Siŋgwe ata kur ŋa ilik ka, lufùw, a ɗeme a ba tsa. A dzaya a tar dər aba kataya ka, a samata dər metsehe tar, ku weke a sle a aà magəsa ŋa lele na taŋa ya, a ge a dər megemir. Dite i dəba ŋa ya ka, wele ata a mah ba, a daba kuɗa. 16 Zàmma tsəka, wele ana ta vəlar dəbuw ə̀zləm a, a dza dər ba aà metsèkèle. Aləka a ŋgat aaka nuba ŋgar dəbuw ə̀zləm. 17 Wele ana ta vəlar dəbuw sula ya tekeɗe, a tsakàl dər asa. A ŋgat aaka nuba ŋgar dəbuw sula mbaŋa. 18 Ama wele aaha ta vəlar dəbuw ilik a ka, a daha, vìrèh vìrèh a le siŋgwe mala ga ŋgar ata a biye, a kaha aɗəm a fata.

19 Aləka i dəba mive zaakwa ya ka, mala ga tar aaha ndeɗiŋa ya, a màra a ma ya tsara ka, a waya maɗàmà gà siŋgwe ana akahər ata a dzaya a tar a. A zal a tar. 20 Aləka tə daha ka, wele ana a vəlar siŋgwe dəbuw ə̀zləm a, a ndzəkara biy ŋgar a. A daha, a gwaɗar: “Mala ga mə̀r, siŋgwe yak aaha kà viliŋ a ka, araha, aɗaba i tsakàl dər ka, Yàa ŋgat aaka nuba dəbuw ə̀zləm asa.” 21 Mala ga ŋgar a gwaɗar: “Lele ndzer na taŋa ya. Kər ka, mala ndzer ŋa, kàa ge megemir ŋgwal ŋa, aɗaba ana i vəlak siŋgwe zaakwa pəra ka, swalwa i ba yak tsa, araha kinehe kàa ŋgetiŋ aaka nuba hinne ya. Ama iye tekeɗe ka, i miyekik a à gà megemir pampam a ahər, a ze a siŋgwe ata mbeete. Kinehe ka, ŋgaya ba nda iye lele.” 22 I dəba ŋa ya ka, wele ana a vəlar siŋgwe dəbuw sula ya, a ndzəkara biy ŋgar a, a da dərraha, a gwaɗar: “Mala ga mə̀r, siŋgwe yak aaha kà viliŋ a ka, araha, Yàa ŋgat aaka nuba dəbuw sula.” 23 Mala ga ŋgar aaha a gwaɗar: “Kər ka, lele ndzer, mala ndzer ŋa, aɗaba kàa ge megemir ana ŋgwal ŋa ya mbaŋa, aɗaba ana i vəlak siŋgwe zaakwa pəra ka, swalwa i ba yak tsa, araha, kàa sìkèhiŋ dər aaka hinne ya. Ama iye tekeɗe, i miyekik a à gà megemir pampam a ahər, a ze a siŋgwe ata hinne mbeete. Kinehe ka, ŋgaya ba nda iye lele.”

24 Aləka wele ana a vəlar siŋgwe dəbuw ilik a, a daraha à biy ŋgar ka, a gwaɗa a mala siŋgwe aaha: “Mala ga mə̀r, siŋgwe yak aaha ka, araha, Yàa màk dərra. Aɗaba i sər, kər ka, ŋgwal mburma tsa. Kàa slige duwa nda ahər yak tsa tekeɗe ka, ki sèsebe a pəra. Kàa ge megemir duwa tsa ibam ka, ki yehebere a gər kataya. 25 Aɗaba taŋa, iye ka, magəɗa a giŋ, i gwa ka, a dzeyiŋ a a ahər, Yàa tsakàl dər tsa. I daha a ma ka, i le aba a biye ya. Araha siŋgwe yak naha, ndzə̀kaba dukw yak.”

26 Mala siŋgwe aaha a gwaɗar aaka: “Kər ka, màsar, mala gə̀rlàkà. Kàa sər tsiye ka, Yàa slige duwa tsa tekeɗe ka, i sèsiŋa, Yàa ge megemir duwa tsa ibam ka, i yeheber a gər a. 27 Na kà sər ndeɗiŋa kataya dze ana, aàla na kà dza siŋgwe ga a ga ana ti tikiŋ a aba ya ka, dite tì sìkèhiŋ a dər aaka ya tsiye. Ana i mère a ka, nuba gà aka səkah aaka zaakwa ya. 28 Aɗaba taŋa, dumaha, zlum ihər dəbuw ilik ŋa ata ya, vəlum aaka a wele ana ndeɗiŋa siŋgwe ŋgar dəbuw kurwa ya. 29 Aɗaba ku weke na aka ge megemir lele, aka ŋgat dukw maya ba ŋgar hinne ka, tì sikehe a dər aaka hinne asa mbaŋa, dite na a ndze a dər barbarərra ya. Ama wur ana a ge a megemir nda swalwa ŋa ndaka vatwa ŋa tsiye ka, ti zle a ihər dukw ana i ahər ŋgar a fit mbaŋa.” 30 I dəba ŋa ya, mala ga tar aaha, a gwaɗa a tar: “Gəsum mala gə̀rlàkà aaha a ge a ŋgulum tsiye, yùmaha ŋgat a luvuŋ a bəra. I fata ka, tuwa hinne nda məpapəɗa zlir.”»

Bazlam seriye ana a pat mandəva gər ahəɗ a

31 I dəba ŋa ya, Yesuw a gwaɗa a tar asa: «Aka təv ana iye, *wur ana a dara i təv Mbulum a, i mère a ya ka, i mère a nda ndzəɗa Mbulum ana a viliŋ a hinne, mə̀r nda gà gawla Mbulum a tserdze. Dite ka, i ndze a aka təv mendze Əbay gà kuɗa. 32 Gà mburma ana ika gər ahəɗ tserdze ya, ti yehebere a gər aka miɗ gà ya. Dite i ndzeke a iba mburma ya, kamala mala makəva gà dukw ana a ndzakawa ikaba gà təmaŋ nda gà awak a. 33 I dze a gà təmaŋ ka, aka tseke ahər mezime gà. Ama gà awak ka, i dze a tar aka tseke ahər gula. 34 I dəba ŋa ya ka, iye Əbay, i gweɗe a a gà na ika tseke ahər mezime gà ya: “Dumara, a kurum ana Mbulum Tsir gà a pise a kurum ahəm a. Ki ti ndzwim a a təv mekwere ŋgar ana a làmbaɗa a kurum daga piŋŋe akahər ana aka ge gər ahəɗ zukw tsiye. 35 Aɗaba akahər ana may a wir aà iye a ya ka, kàa vilwimiŋ dukw mezime, yam a kəɗ iye tekeɗe ka, kàa tìfwimiŋ, Yàa sa. Akahər ana iye mbəlakw ŋa mba ya ka, kàa gwimiŋ gər lele. 36 Petek ika iye tsa ibam ka, kàa tikwim aka iye. Iye i dukw məməta ka, kàa dumara, kàa fə̀rum aka iye. Iye i daŋgay tekeɗe ka, kàa dumaha a təv ga, kàa fə̀rum aka iye.”

37 Dite i dəba ŋa ya ka, gà ɓəzla mazazama Mbulum ana nda ndzer ŋa ya, ta gweɗiŋ a ka: “Əbay mə̀r, ndeɗime na mì ŋgatak, may a wir aà kər a ka, mì vəlak dukw mezime, kige tsa yam aka kəɗ kər ka, mì tə̀fak a? 38 Dite ndeɗime asa ya na mì ŋgatak ka, kər mbəlakw ŋa ka, mì gek gər lele, kige tsa, petek aà kər tsəka, mì vəlak, kà tike akaba ya? 39 Dite asa ka, ndeɗime na mì ŋgatak, kər i dukw məməta ka, mì daha, mì fə̀r aka kər, kige tsa, kər ka ndzawa i ga daŋgay ka, mì daha a təv yak a?” 40 I dəba ŋa ya ka, iye Əbay, i gweɗe a ter aakiŋa: “Sərum dər ndzer, na kàa gwim gər a wura ilik i liwiŋ gà damər gà ya, ku mege ŋgat mala dəba i liwiŋ gà duwa ya tekeɗe ka, ki gwim gər taŋa ka, a iye.”

41 Dite i dəba ŋa ya asa ka, i gweɗe a a gà na ika tseke ahər gula gà ya: “Kurum ka, dum i təv ga ya. Kurum gà mburma ana Mbulum a vəl a kurum mezelme ya, dum a akwa ana a mbete a tsa aà biybiy a. Aɗaba Mbulum a ge təv akwa ata ka, a gà Əbay sitene, nda gà gawla ŋgar. 42 Aɗaba akahər ana may a wir aà iye a ya ka, kàa vilwimiŋ dukw mezime tsa, nda gà i təv ana yam a kəɗ iye ya tekeɗe, kàa tìfwimiŋ yam, Yàa sa ɓav tsa asa. 43 Aka na iye mbəlakw ŋa ya ka, kàa gwimiŋ gər tsa, dite asa ka, aka na petek aà iye tsiye tekeɗe ka, kàa vilwimiŋ petek, Yàa tike akaba tsa asa. Iye i dukw məməta, kige tsa iye i ga daŋgay ka, kàa dumaha, kàa gwimiŋ wusa ɓav tsa asa mbaŋa.”

44 I dəba ŋa ya, tar tekeɗe, ta gweɗiŋ a mbaŋa: “Əbay mə̀r, ndeɗime na mì ŋgatak ka, may a wir aà kəriŋa, kige tsa yam a kiɗ a kər, nda gà kər mbəlakw ŋa, kige tsa, petek aà kər tsiye? Dite asa mì ŋgatak ka, kər i dukw məməta, nda gà kər i ga daŋgay ka, maa daha, maa gek gər tsa asa ya?” 45 I dəba ŋa ya asa, iye i gweɗe a ter a: “Sərum dər ndzer, na kàa gwim gər a wura ilik i liwiŋ gà damər ga ya, ku mege ŋgat mala dəba i liwiŋ gà duwa ya tekeɗe tsəka, taŋa ka, kàa gwimiŋ gər a iye ɓav tsa asa mbaŋa.”»

46 I dəba ŋa ya, Yesuw a gwaɗa a tar asa mbaŋa: «Ama tar ata ti ta ŋget a mesewere are ana à ndìv a tsa aà biybiy a. Ama gà mburma ana tàa zazam Mbulum nda ndzer a ka, ti ndze a i tar ka, i təv mesife ana à ndìv a tsa aà biybiy a.»