Yesuw a mbəlara i məməta ya
28
1 Aləka i dəba mesifikaba gà Yahuda a da iɗəm a,
a ndze a pat ladà i mèkwède hedwe ka,
gà Mariya ana a dara i Magədala ya,
nda Mariya i ŋgiɗ duwa tə da aka məfə̀rà aka dive ŋa.
2 Ti ta medeha tsara ka,
wìwik wìwik ahəɗ a riŋ ihər a ɓezle a hinne,
agəra gawla Mbulum ana a tarəra i mbulum i gər ŋa ya.
Gawla Mbulum ata a daha,
a tàpàsl batsah beliŋ ata aà dive ŋa ya.
A daha,
tuŋ a ndza aaka.
3 Ama gawla Mbulum ata a ndza ka,
twiy twiy twiy,
kamala mewìtìɗè mbulum a.
Petek ŋgar ibam,
herrè tizlzlè kamala slewize ya.
4 Aləka gà sliwdze aaha ndeɗiŋa ta kesle a dive ŋa ya,
ta ŋgat a gawla Mbulum ata tsam ka,
ta ge magəɗa hinne,
nda medzedzere,
ta mata a arəv,
ti ne kamala ana tar gà məməta ŋa ya.
5 Ama gawla Mbulum ata a gwaɗa a gà məkəs aaha ndeɗiŋa,
tə daha aka dive ya:
«Ki gwim magəɗa,
arəv ma da aà kurum a tsa.
Aɗaba i sər,
ki yehwim a ka,
Yesuw aaha tə ndwandway ŋgat aà dizl magə̀làwà ŋa ya.
6 Ama ka,
ar ɗa i faha tsa,
Mbulum aka mbəl à ŋgat i məməta ya,
kamala ana a tsikewa ya.
Dumara,
fə̀rum aà təv ana ti tike aɗəm a kwaŋ.
7 Ama dum tsəma,
ta gwaɗum a gà ɓəzla mazazama ŋgat ka:
“Aka mbəlara i məməta ya.
A lèh a kurum a aka miɗ aka ahəɗ Galile.
Ki ta ŋgetwimer a ka,
a fata.”
Iye na a tsik a kurum a.»
8 Tə tsaraka bazlam gawla Mbulum ata tsara ka,
tə tə̀zara i dive ata ya,
nda gà medzedzere,
dite nda gà maŋgayaba hinne asa mbaŋa.
Tə tə̀zara i fata ya tsara,
aà mede tsikeye bazlam ata a gà ɓəzla mazazama ŋgat.
9 Metìze tar ata tə təz a ka,
pəzlàŋ Yesuw a dara i təv a ya tsara,
tə lə̀ma aà vatwa.
A gwaɗa a tar:
«Wusa kurum,
ndzum zayzay lele.»
Gà məkəs aaha ti sìrìkaha a təv ŋgar.
Tə daha,
tə dza gurmits a biye aka miɗ ŋgar a fata.
Ta gəs ŋgat i sik a.
10 I dəba ŋa ya,
Yesuw a gwaɗa a tar:
«Ki gwim magəɗa tsa,
dum,
ta gwaɗum a gà na ti ne gà damər gà ya ka,
tə da aka miɗ a Galile,
ti ta ŋgetiŋ a ka,
i fata.»
Dukw ana gà ɓəzla makaslà dive Yesuw ti tsik a
11 I təv ana gà məkəs ata tar riŋ ihər ti de a ya ka,
gà asiŋ gà sliwdze aaha ta kesle a dive ya,
tə dara i fata ya tsara,
tə da a huɗ kwite.
Tə daha,
ti tsikeye dukw ana a ge ba nda gà tar a,
a gà Əbay gà ɓəzla mandəva kuɗa a Mbulum fit dze.
12 Aləka gà mburma ata tə tsaraka kataya ka,
ti yaha ba gər nda gà bàba gà mburma ana i fata,
ta kwere a gà Yahuda,
tə dzawa akaba ahəm tserdze ya.
Tə daha,
tə dza akaba ahəm ika magər tar.
I təv mandza akaba ahəm tar ata ya ka,
tə ruɓa gà sliwdze aaha ndeɗiŋa ta kasla dive Yesuw a,
tə dzàɗa a tar siŋgwe hinne.
13 Ta gwaɗa a tar:
«Ki gweɗwim a ka:
“Gà ɓəzla mazazama ŋgat tàa dara ndaavəɗ,
tàa zlara i biye ya nda akəl,
i təv ana mə̀r ika mendze are ya.”
14 Na Əbay mala sik gà Ruma aaha aka tsaraka kataya ka,
a tsik a kurum a duwa tsa.
Mər mìi sir a bazlam ana mìi tsiker a ya.
Mìi beye a à kurum a i mesewere are ana a vile a kurum a ya.»
15 I dəba ŋa ya,
gà sliwdze ata ta ndzək siŋgwe ata tə dzàɗa a tar a.
Tə daha,
ə̀ndats ə̀ndats tə sasa pàrsa,
ta mà à bazlam gà bàba ŋa ata ti tsik a tar a kaɗəŋ.
Dite haa kinehe,
bazlam pàrsa ata à ndìv a tsa,
rih rih rih ika magər gà Yahuda ya.
Yesuw a slər gà ɓəzla mazazama ŋgat
16 I dəba ŋa ya,
gà ɓəzla mazazama Yesuw a kurwa gəra ilik ŋa aaha,
tə da a Galile.
Tə daha,
tə tsəl a gər kwite ana Yesuw a gwaɗa a tar,
ki ti lìmekwe aɗəm a ya.
17 Aləka,
ti ndzeha a fata ka,
tàa ŋgat a Yesuw kuɗa.
Tə daha,
tə dza gurmits a biye ika miɗ ŋgar.
Ama gà misle ŋgiɗ ika magər tar tsavəvvà ti ndze a ka,
ta gəs nda gəzləŋ tar kalkal tsa.
18 Dite Yesuw a sìrìkaha a təv tar kuɗa.
A daha,
a gwaɗa a tar:
«Mbulum aka viliŋ mekwere ŋgar ana i gər ŋa ya,
ndəna ɗa ika gər ahəɗ a tserdze ka,
a ahər gà.
19 Aɗaba taŋa,
dum à bazlam gà a təv gà mburma ana ika gər ahəɗ a tserdze,
ka nwim à tar gà ɓəzla mazazama iye.
Tsilwiɓwim à tar a yam nda zləm Tsir gà Mbulum,
dite nda zləm gà,
Kəla ŋgar ŋa,
dite nda zləm Mezite Mesife Mbulum asa mbaŋa.
20 Dite ka dzeŋgwim a tar,
ta gəs bazlam ana i tsik a kurum tserdze ya mbaŋa.
Sərum dər lele,
mə̀ məts a kurum gər tsa:
Iye ŋa tekeɗe ka,
i ndze a i təv kurum kəla pat,
i zlèk a kurum haa aka təv gər ahəɗ ana à ndìv a ya.»