Yesuw a mbəl à mala sitene
5
1 I dəba ŋa ya,
gà Yesuw nda gà mburma ata ti ndze a aka lìdè duluv Galile ata aka ahəɗ gà Gadara.
Ti ndzeha a fata ka,
tə tarəra i slə̀làh yam a.
2 I təv ana Yesuw a tarəra iɗəm a tsara ka,
wele duwa a riŋ diriŋ nda təv ata,
duwa a gasawa ŋgat.
A ŋgatara a Yesuw a.
Ŋgat a ndzawa ka,
i təv ana ti lewa aɗəm mburma ya.
3 A hənawa ka,
ika magər gà dive.
Wura a mba ahər ilik tsa.
Ti dzew a ŋgat nda tsitsirɓe tekeɗe,
a ŋgezlehe a dər aba ya.
4 Tə dzawuwa ŋgat nda tsarlàw,
pat ŋgiɗ i sik a nda ahər a tekeɗe ka,
ndìrìtsìtse a ŋgazlahawa dər aba ya.
Wura a riŋ ilik a sle a aà magəsa ŋa tsa,
aɗaba ndzəɗa ŋgar a za biy mburma tserdze.
5 Kəla pat,
ndaavəɗ ndaapat,
ku mege ndeɗime tekeɗe,
a ndzawa ka,
ika magər gà dive nda gər kwite.
A wideyewa nda mataya ba nda kur.
6 Wele ata a ŋgataha a Yesuw diriŋ ka,
a valaha a təv ŋgar.
A daha,
a kal aba aka miɗ ŋgar.
7 A gwaɗar nda gà Mewideye:
«Əla a ləm akaba à ma ya,
Yesuw,
Kəla Mbulum ana i gər ŋa ya?
Kamkam nda zləm Mbulum,
kà sèwèriŋ are tsa te.»
8 A tsikar kataya ka,
aɗaba ana Yesuw aka mbər megweɗeha a sitene ata i ba ŋgar a:
«Dara i ba wele aka ya» ya.
9 Dite Yesuw a gwaɗa a wele ata:
«Zləm yak weke?»
Wele ata a gwaɗar aaka:
«Zləm gà ka,
Twìɗèkìkke,
aɗaba mə̀r ka,
hinne.»
10 I dəba ŋa ya,
a ger kamkam hinne asa.
A gwaɗar:
«Ka dalawa mə̀r aka ahəɗ ŋgiɗ a təv a diriŋ tsa te.»
11 Ta pə̀r ikaba ya ka,
palam gà wèdèlìŋ duwa a riŋ aà sik kwite ata duluv ihər a,
ta kiv a tar.
12 Gà sitene ata ta hama a Yesuw hinne,
ta gwaɗar:
«Kamkam,
slər mə̀r aba a gà wèdèlìŋ aaha,
mìi petse aɗəm a te.»
13 Yesuw a gwaɗa a tar:
«Haya.»
A vəl a tar aɗəm vatwa.
Dite gà sitene ata tə dara i ba wele ata ya,
tə da a ba gà wèdèlìŋ ata kuɗa.
Palam gà wèdèlìŋ ata aà sik kwite ata,
ti sle a dəbuw sula ya ka,
ta wiyera ba i fata ya,
bìrìm tə dza a yam a duluv ata,
ta mata aɗəm fit.
14 Gà ɓəzla makəva gà wèdèlìŋ ata,
swiyèh tə təz.
Tə daha,
ti tsikeye labara ana a ge ba,
ta ŋgatar a,
i huɗ kwite nda gà i kə̀sà ana i dala ŋana ya mbaŋa.
Gà mburma ata tə tsaraka kataya ya tsara ka,
tə dara aà masamata dukw ana a ge ba i təv Yesuw a.
15 Ti ndzeha a təv ŋgar ka,
ta ŋgat a wele ana ndeɗiŋa gà sitene i ba ŋgar a.
A riŋ mandza ŋa,
petek ikəka nda gà ba ŋgar tiywìm tiywìm lele.
Madzala gà gər ŋgar ibam,
lele kuɗa.
Gà mburma ata ta ŋgatar ka,
ta ge magəɗa hinne.
16 Gà mburma ana tar riŋ i fata ya,
tə ɗama a tar bazlam ata,
meme na Yesuw a mbəl à wele ata sitene i ba ŋgar a.
Dite tə ɗama a tar labara ana a ge ba nda gà wèdèlìŋ aaha ya asa.
17 I fata ya tsara ka,
tə dza ba aà mahàmà a Yesuw.
Ta gwaɗar:
«Kamkam,
da ika ahəɗ mə̀r a te.»
18 I dəba ŋa ya,
Yesuw a dza ba aà mede.
A tsəl a slə̀làh yam.
I təv ana à meh a ba ya ka,
wele aaha ndeɗiŋa a dalawa ihər gà sitene ya ka,
a ge kamkam a Yesuw,
dite ka,
mə vəlar vatwa aà mazazama ŋgat te.
19 Ama Yesuw aka vəlar vatwa aà madə̀ɗà aaka tsa.
Ama kəla ka,
a gwaɗar:
«Mbəɗ gər a ma a təv gà mburma yak ivaɗ.
Na kàa daha ka,
ka ɗama a tar dukw ana Əbay Mbulum a ge aɗaba kər a,
dite meme na kà ndzer are tsehe ya.»
20 Wele ata a daba a ma kaɗəŋ.
A daha ka,
a dza ba aà maɗàmà dukw ana Yesuw a ge aɗaba ŋgat a.
A sùwayawa à bazlam ata aà kwite aà kwite ika ahəɗ kwite kurwa ata.
Gà na tə tsaraka bazlam ata ya tsara ka,
a ne aka tar dukw mene aà mburma.
Yesuw a mbəl à gà dəm Yayirus nda mə̀kə̀s duwa ŋgwala tsa
21 I dəba ŋa,
Yesuw a màra a dəba nda slə̀làh yam aka lìdè duluv ŋgiɗ a.
A dara ka,
gà mburma ti yahabaha gər a təv ŋgar hinne,
aà guva duluv ata.
22 Mìsle ŋgiɗ a riŋ ilik i fata mbaŋa,
zləm ŋgar Yayirus.
Ŋgat a ndzawa ka,
i liwiŋ gà bàba ŋa ana i ga mahàmà a Mbulum i kwite ata ya.
A ŋgat a Yesuw ka,
a daha,
a kal aba aka miɗ ŋgar.
23 A hamar hinne.
A gwaɗar:
«Dəm ga duwa a riŋ à mìtiŋa.
I gek kamkam,
dara,
ka tikiŋ aakahər,
ka mbiliŋ dər te.»
24 Yesuw a gwaɗar:
«Haya,
tama.»
Ta mah ba,
tə da.
Gà mburma hinne tə zazam tar.
Ta ŋgiɗits a ŋgat hinne.
25 I liwiŋ gà mburma ata ka,
məkəs duwa a riŋ ilik,
à sèwèr a are hinne.
Məmbəz a zlalawara ihər a.
Aka ge ihər ka,
mive kurwa gəra sula.
26 Aka nəs à limana ŋgar aà yàwuf nda təv gà dàkwtar pampam hinne.
Ta vəlawar yàwuf tekeɗe,
dukw məməta ŋgar ata ka,
a ger a ŋgulum ɓav tsa.
A zeke aaka a seyiŋ ivaɗ.
27 A tsaraka miɓizle Yesuw ana i magər gà mburma ata ya ka,
a daha,
a wudaɗ iba à mburma ya.
A waya malə̀mà aà petek Yesuw nda dəba.
A daha,
a ləm ahər,
28 aɗaba a gwa i gər ŋgar ka:
«Na Yàa ləm aà petek ŋgar asla pəra ka,
i mbiliŋa.»
29 A ləm ahər tsara ka,
məmbəz ŋgar ata a ndala tsara.
Məkəs aaha a ɓazla à ba ŋgar ka,
dukw məməta ŋgar ata aka darra i ba ya.
30 I fata ya tsara ka,
Yesuw a sər,
ndzəɗa ŋgar aka mbəl à mburma.
A mbəɗara aba aà mburma ya,
a gwaɗa a tar:
«Weke na a ləm aà petek gà ya?»
31 Gà ɓəzla mazazama ŋgat ta gwaɗaraha:
«Kə̀ ŋgatar,
gà mburma i təv yak hinne,
ta ŋgiɗits a kər ka,
ki gweɗe a ka,
weke na a ləm aà petek gà ya ana,
meme?»
32 Ama Yesuw a fara ikaba wur ana a ləm ahər i liwiŋ gà mburma ata ya.
33 Məkəs aaha a dza ba aà medzedzere hinne,
a ge magəɗa,
aɗaba a sər dukw ana a ge ba nda ŋgat a.
A daha tsara,
a kal aba aka miɗ Yesuw,
dite a ɗifer à dukw ana a ge aɗaba dukw məməta ŋgar ata ya.
34 I dəba ŋa ya,
Yesuw a gwaɗar:
«Dəm ga,
megìse yak ana kì gis iye nda gəzləŋ a ka,
aka mbəl à kər.
Daba nda zay.
Kàa mbəl i dukw məməta yak a.»
35 I təv ana tar riŋ ta fèfil a nda məkəs ata ya tsara ka,
labara aka ɗera i bəra Yayirus aaha ndeɗiŋa ya.
Tə slərra mburma ya,
tə dara,
ta gwaɗar:
«Dəm yak aaha ka,
aka mət ana,
aàmala na ki yère a ba à mala medzeŋge a mburma aka asa ya?»
36 Ama Yesuw a tsaraka bazlam ata ka,
a gwaɗa a Yayirus:
«Arəv ma da aà kər a tsa,
gis iye nda gəzləŋ yak pəra.»
37 Yesuw a gəs mivile vatwa a wura aà madə̀ɗà aaka tsa.
Say a gà Piyer nda Zakup,
nda gà damər ŋgar Yuhana.
38 Ti ta medeha a bəra Yayirus ka,
Yesuw a ŋgat a gà mburma hinne i fata,
ti deyehe a nda gà tuwa,
ta geye a dər mandə̀zlà gər.
39 A daha,
a pəts a ga.
A gwaɗa a tar:
«Aàmala na makə̀ɗà ba aaha hinne nda gà tuwa ya?
Labara là dze ya?
Dəm aaha ka,
aka mət tsa,
a riŋ ka,
ika mendze are.»
40 Gà mburma aaha tə tsaraka kataya ka,
tə sawla ahər hinne.
I dəba ŋa ya,
Yesuw a də̀gə̀zara iɗəm tar a bəra ya fit.
Ti zeha riŋ i ga ka,
ŋgat,
nda gà tsir dəm,
nda gà məmər dəm aaha,
nda gà ɓəzla mazazama ŋgat a makər ŋa aaha.
I dəba ŋa ya,
ti sìrìk a meɗikwir ana dəm ata iɗəm a.
41 Tə daha,
a gəs dəm ata i ahər a.
A gwaɗar nda ahəm ŋgar:
«Talita kum,» kamala megweɗe ya ka: «Hitse aà mbulum, dəm aaha.» 42 Dəm ata a hitse aà mbulum,
a dza ba aà mede nda sik ŋgar tsara,
aɗaba mive ŋgar kurwa gəra sula.
Gà mburma ana ta ŋgat a dukw mene aà mburma ata ya ka,
a dzadzar à tar hinne.
43 Ama Yesuw a gwaɗa a tar:
«Ka ti tsikwim a wura tsidze,
ndzum dər ɗikɗik.»
I dəba ŋa ya,
a gwaɗa a tar asa:
«Vəlum dukw mezime a dəm aaha.»