Gà məkəs ana tə zazam Yesuw a
8
1 Aləka i dəba mendze zaakwa ya ka,
Yesuw a daya aà kwite aà kwite,
mege a batsah kwite,
mege a kəla ŋana tekeɗe.
A ləm aaka à bazlam ŋgwal ŋa ana biy *mekwere Mbulum a fit.
A tsikewa a gà mburma.
Gà ɓəzla mazazama ŋgat ana kurwa gəra sula ya,
tə dəɗ aaka mbaŋa.
2 Gà məkəs ana a dalawa à tar gà sitene ya,
dite a mbala à tar i dukw məməta tar a,
tə zazam ŋgat mbaŋa asa.
I liwiŋ gà məkəs ata tə zazam ŋgat a ka,
Mariya ana a dara i Magədala,
Yesuw a dalawa ihər gà sitene təsəla ya iɗəm,
3 nda gà Yuwana məkəs Huza,
mala megemir gà *Hiridus iɗəm mbaŋa,
dite nda gà Suzana,
nda gà asiŋ gà məkəs ŋgiɗ pampam hinne iɗəm asa mbaŋa.
Gà məkəs ata tə zazam ŋgat a ka,
tə zlàkawa gà Yesuw nda limana tar hinne.
Bazlam minew meslìgè daw
4 A pat duwa,
gà mburma hinne tə dayara i gà kwite ŋgiɗ a pampam,
ti yaha ba gər a təv Yesuw.
Dite Yesuw a fàfəl a tar ndaka bazlam minew.
5 A gwaɗa a tar:
«Wele duwa a ndzək hwife daw,
a da dər a dala aà meslige.
I təv ana a riŋ a slige a ya ka,
wur daw ata a dza aka vatwa.
Gà mburma ana ti de a ya ka,
ta ɓala aaka.
I dəba ŋa ya,
gà ɗiyeŋ ibam,
tə daha,
ta pala.
6 Asiŋ ŋa a dza aà sik kuvəl,
a təv ana ahəɗ ikəka hinne tsiye.
A sləl tsara ka,
a kula,
aɗaba yam a se i təv ata ya tsara,
ɗùɗùrwàkùŋŋa biye iɗəm tsa.
7 Wur ŋa i ŋgiɗ pam asa,
a dza aà huɗ adak.
Wur daw ata a sləl ka,
adak aaha a zlala aakahər zlàlaw zlàlaw,
a dza aaka mezite.
8 Ama wur ŋa i ŋgiɗ pam asa,
a dza aka ahəɗ ana ŋgwal ŋa ya.
Ŋgat ka,
a sləl,
a da a bəra,
dite a ge ba hinne.
Wur daw ata ilik ka,
a rah a kəzləm tìs.»
Yesuw a ndəv à mifefile ŋgar ata fit ka,
a gwaɗa a tar asa:
«Dzùmar zləm lele,
na gər kurum aka ge aà metsereke ya.»
Aɗaba la na Yesuw a fàfəl ndaka bazlam minew a
9 Aləka i dəba ŋa ya,
gà ɓəzla mazazama Yesuw tə tsam ahər,
ta gwaɗar:
«Bazlam ata ndeɗiŋa kà tsik ndaka bazlam minew a ka,
maa tsaraka tsa ana,
a sàsak aà megweɗe ana,
meme?»
10 *Yesuw a gwaɗa a tar aaka:
«Kurum ka,
Mbulum aka ɗif a kurum à dukw ana makàhà ŋa i mekwere ŋgar a.
Ama gà misle ŋgiɗ ti dze a zləm ka,
a dukw ana ti tsik a ter a ndaka bazlam minew a pəra.
Dite ku mege ta fir ahər a tekeɗe ka,
ta ŋgeter a tsa,
ku mege tàa dzar zləm lele tekeɗe ka,
ti tsereke a ɓav tsa asa.»
Yesuw a ɗif à bazlam minew meslìgè daw
11 I dəba ŋa ya,
Yesuw a gwaɗa a tar kuɗa:
«Bazlam minew ata a sasar aà megweɗe ka,
na a ne hwife ka,
bazlam Mbulum.
12 Gà misle ŋgiɗ pam,
ti ndzikiɗ ba ka,
wur daw ata a dza aka vatwa ya.
Ti ndzikiɗ ba gà mburma ana ti tsereke a bazlam ata ka,
ama Əbay sitene a dehe a,
a ndzehe a bazlam ata ta gəs a gəzləŋ tar a,
dite ta gəs nda gəzləŋ tar,
ta mbala asa tsa.
13 Gà biy ŋgiɗ pam asa,
ti ndzikiɗ ba wur daw ata a dza aà sik kuvəl a.
Ta gis a bazlam ata a gəzləŋ tar nda gà maŋgayaba tsara.
Ama bazlam ata a ŋge a zlile aà mendze i gəzləŋ tar tsa.
Zàkwayiya,
mesewere are a dere a,
a dzik à ter a tsara ka,
ta miyek a à bazlam ata ta gəs a gəzləŋ tar a.
14 Gà misle ŋgiɗ pam asa,
ti ndzikiɗ ba wur daw ata a dza aà huɗ adak a,
ti tsereke a bazlam Mbulum.
Ama madzala gà gər mesewere are ana ti dzele a pampam,
nda gà limana nda meeweke gər ahəɗ ta ge a madzək a bazlam Mbulum ana i gəzləŋ tar a,
dite megìse tar ata a ge a ndzəɗa asa tsa.
15 Dite gà misle ŋgiɗ pam asa ka,
ti ndzikiɗ ba wur daw ana a dza aka ahəɗ ŋgwal ŋana.
Ti tsereke a bazlam Mbulum,
ta gis a a gəzləŋ tar lele nda maŋgayaba.
Bəla mesewere are aka ndzera ka,
hiywe ta misek a dər tsa,
ta ge a dukw ana a ge a ŋgulum a Mbulum a.»
Bazlam minew lalampa ana i təv dzəgəɗaf ŋa ya
16 Yesuw a gwaɗa a tar asa:
«Wura a riŋ a tike a akwa aà lalampa ka,
dite a kèhe a dər dəɓ aà huɗ tasà,
kige tsa aà huɗ maàslə̀làh tsa.
A tike a ka,
a təv ana dzəgəɗaf ŋa ya ivaɗ,
dite na gà mburma ana ti de a a ga ya ka,
ta ŋget a dər a vatwa dzaydzay lele ya.
17 Aɗaba dukw ana makàhà ŋa kinehe ya ka,
aləka aka miɗ mba ka,
a ta pèt a aba lele.
Dite dukw ana gà mburma tə sər kinehe tsiye ka,
aləka aka miɗ ka,
parakka a sir aàba a lele mbaŋa.»
18 I dəba bazlam ata ya ka,
a gwaɗa a tar asa:
«Gwim metsehe a dukw ana ki tserekwim a ya,
ka ti nwim dər ka,
dukw pàrsa tsa.
Aɗaba wur ana à gis a bazlam gà ana i tsik a ya ka,
Mbulum tekeɗe,
à sikehe a à megìse ŋgar ata,
à zè a taŋa.
Wur ana aka gəs tsiye ka,
Mbulum ibam,
à nikiɗ a à ŋgat mbaŋa asa.»
Gà mama Yesuw nda gà damər ŋgar
19 Gà mama Yesuw nda gà damər ŋgar tə daha,
ta waya mada a təv Yesuw.
Ama ti sle mede tsìm a təv ŋgar tsa,
aɗaba mburma a riŋ i təv ŋgar hinne.
20 Gà mburma ana i fata ya,
ti tsikeha a Yesuw.
Ta gwaɗaraha:
«Gà mama yak nda gà damər yak naha ɗa i bəra,
a sàs a tar aà meŋgeteke.»
21 Ama Yesuw a gwaɗa a gà mburma ana i təv ŋgar i fata ya:
«Gà mama gà nda gà damər gà ka,
gà mburma ana tar riŋ tì dze a zləm a bazlam Mbulum,
dite ta gis ahər a ahəm a.»
Yesuw a kwara akaba gà himbiɗ nda yam
22 A pat duwa,
Yesuw a gwaɗa a gà ɓəzla mazazama ŋgat:
«Tàkwa aka lìdè duluv ŋgiɗ.»
I dəba ŋa ya,
tə daha,
tə tsala a slə̀làh yam,
ta mah ba,
tə da.
23 I təv ana tar riŋ i slə̀làh yam ata,
ti de a dər a ka,
Yesuw a ndze aɗəm are.
Zàmma tsəka,
batsah himbiɗ aka dza ba aà mege ika gər duluv ata.
Yam a dza ba aà mede aka taraha a slə̀làh yam ata,
aka à merèhe aɗəm.
A zeha kwizikw,
na dite à pìts à ter a a huɗ yam a.
24 Gà ɓəzla mazazama ŋgat ata tə daha,
a təv Yesuw.
Ta piɗeke à ŋgat.
Ta gwaɗar:
«Əbay,
Əbay,
ki dzèkwe a a yam.»
Yesuw a hitse aà mbulum.
A kwara akaba gà himbiɗ ata nda yam ana a tsele akaba a ya.
Himbiɗ ata də̀ɓəts a mət aaka,
mege yam aaha tekeɗe,
a tsele akaba a asa tsa.
25 Dite Yesuw a gwaɗa a gà ɓəzla mazazama ŋgat ata:
«Wànà kàa gəsum iye a gəzləŋ kurum tsiye,
na ki gwim a magəɗa kataya ya?»
Ama ka,
ta ŋgat a dukw Yesuw ata a ge kataya ya ka,
a ge aà tar kamala dukw mene aà mburma ya.
Ta ge magəɗa hinne asa nda medzedzere.
Ta gwaɗaba ika magər tar:
«Wele aaha i ŋgar dze ana,
weke,
na a kwere akaba a gà himbiɗ nda yam ka,
ta gis ahər a ahəm a?»
Yesuw a mbəl à mala sitene duwa
26 Ti ndze aka ahəɗ Garasa ika lìdè duluv ŋgiɗ ɗegìrgìr ika miɗ kwite Galile.
27 Aha ŋana Yesuw a tarəra i slə̀làh yam a ka,
wele duwa a riŋ i fata,
a dza ba aà madaha a təv ŋgar.
Wele ata ka,
sitene a gasawa.
A tikewa akaba petek tsa,
dite a hənawa i ga ɓav tsa asa.
A gər ana a dza ahər ba ya,
a hənawa ka,
ika magər gà dive.
28 A ŋgataha a Yesuw tsara ka,
a wideye nda ndzəɗa hinne.
Dite a daha,
a kal à ba aka miɗ ŋgar,
a gwaɗar:
«Əla a ləm akaba à ma ya,
Yesuw,
Kəla Mbulum ana i gər ŋa ya?
Kamkam,
kà sèwèriŋ are tsa te.»
29 A tsiker kataya ka,
aɗaba ana Yesuw aka mbər megweɗeha a sitene ata i ba ŋgar a:
«Dara i ba wele aka ya» ya.
Ama sitene ata ka,
a gasawa ŋgat kəla pat.
Tə dzawuwa ŋgat nda tsitsirɓe i sik a nda ahər a lele tekeɗe ka,
ndìrìtsìtse a ŋgazlahawa dər aba ya.
A sàs a gà sitene ata ka,
say ma ndza i kusak tsakàlàk aà mburma ya.
30 I dəba ŋa ya,
Yesuw a gwaɗar:
«Zləm yak weke?»
Wele ata a gwaɗar aaka:
«Zləm gà ka,
Twìɗèkìkke.»
A tsiker kataya ka,
aɗaba gà sitene ana i ba ŋgar a ka,
hinne.
31 Gà sitene ata ibam,
tə dza ba aà mahàmà a Yesuw asa.
Ta gwaɗar:
«Kamkam,
kù gwaɗa a mə̀r,
dum a təv a diriŋ biy na mìi dzeye a ya tsa te.»
32 Ta pə̀r ikaba ya ka,
tàa ŋgataha a palam gà wèdèlìŋ duwa a riŋ i fata,
ta kiv a tar aà sik kwite.
Gà sitene ata ta gwaɗa a Yesuw:
«Kamkam,
vəl a mə̀r vatwa a ba a gà wèdèlìŋ aaka,
mìi petse aɗəm a te.»
A vəl a tar aɗəm vatwa.
33 Gà sitene ata tə dara i ba wele ata ya tsara,
ta patsa a ba gà wèdèlìŋ ata.
Palam gà wèdèlìŋ ata i fata tserdze ya,
ta wiyeraba aà sik kwite ata ya,
bìrìm tə dzara a yam ika gìgìze ya,
a duluv ata ya,
ta mata aɗəm fit.
34 Gà ɓəzla makəva gà wèdèlìŋ ata,
ta ŋgat a dukw ana a ge ba nda gà wèdèlìŋ aaha ya ka,
swiyèh tə təz.
Tə daha,
ti tsikeye labara ana a ge ba,
ta ŋgatar a,
i huɗ kwite,
nda gà i kə̀sà ana i dala ŋana ya mbaŋa.
35 Gà mburma ata tə tsaraka ka,
tə dayaha aà mesèmete dukw ana a ge ba ya.
Ti ndzeha a təv Yesuw ka,
tàa le aà wele ana a dalawarra i ba gà sitene ya,
ŋgat a riŋ mandza ŋa aà sik Yesuw nda gà petek ikaba lele kuɗa.
Madzala gà gər ŋgar ibam,
lele mbaŋa.
A ge magəɗa a gà mburma ata tə daha ya hinne tsara.
36 Gà mburma ana dukw aaha a ge riŋ ba aà tar ndeɗiŋa ya ka,
tə ɗama a gà mburma ata,
meme na Yesuw a mbəl à mala sitene ata ya.
37 I dəba ŋa ya,
gà mburma ana tserdze ika ahəɗ ata ya,
ta hama a Yesuw,
dite ma da ika ahəɗ tar a te.
Aɗaba ta ger magəɗa ka,
hinne.
I dəba ŋa ya,
Yesuw a tsəl a slə̀làh yam,
à mbiɗere a gər ndàra a dəba ya.
38 Ama wele ata a dalawa ihər gà sitene ya ka,
a hama a Yesuw,
dite ka,
mə vəlar vatwa aà mazazama ŋgat te.
Ama Yesuw a màr aba ahəm a.
A gwaɗar:
39 «Mbəɗ gər a ma,
dite ka tə ɗama dukw ana Mbulum a ge aɗaba kər a,
a gà mburma ana tserdze ya.»
Wele ata a da ba a ma kaɗəŋ,
a daha ka,
a sùwaya à bazlam ata aà ga aà ga i kwite ata.
A ɗamawa dukw ana Yesuw a ge aɗaba ŋgat a,
a gà mburma tserdze.
Yesuw a mbəl à dəm Yayirus, nda məkəs duwa ŋgwala tsa
40 Aləka i təv ana Yesuw a màra a dəba aka lìdè duluv ŋgiɗ a ka,
gà mburma a riŋ i bəɗ i fata hinne,
ta bebe a ŋgat.
A ndzeha a təv tar tsara ka,
tə daha a təv ŋgar nda gà maŋgayaba.
41 Mìsle ŋgiɗ a riŋ ilik i fata mbaŋa,
zləm ŋgar Yayirus.
Ŋgat ka,
batsah gà mburma ana i ga mahàmà a Mbulum i kwite ata ya.
A daha a təv Yesuw.
A ndzeha a təv ŋgar tsara ka,
a kal aba aka miɗ ŋgar.
A hamar hinne.
Dite Yesuw ma da a ma ŋgar te.
42 Aɗaba dəm ŋgar duwa a riŋ ilik bataŋa,
mive kurwa gəra sula,
à mìtiŋa.
Yesuw a tsaraka kataya ka,
ta mah ba,
tə da.
Aka təv ana ti de a ya ka,
gà mburma hinne tə zazam tar.
Ta ŋgiɗits a dər Yesuw hinne.
43 Ama i liwiŋ gà mburma ata ka,
məkəs duwa a riŋ ilik,
a sèwèrewa are hinne,
məmbəz a zlalawara ihər a.
Dukw ata aka ge ihər ka,
mive kurwa gəra sula.
Aka nəs à limana ŋgar a təv gà dàkwtar pampam hinne.
Ama wura ilik aka sle aà məmbə̀là à ŋgat tsidze.
44 A sìrìkeha a təv Yesuw nda dəba.
A daha,
a ləm aà guva petek ŋgar.
A ləm ahər tsara ka,
tsəndzalaŋ məmbəz ŋgar ata a zlalwara ihər a,
a ndala tsara.
45 Yesuw a gwaɗa a tar:
«Weke na a ləm aà iye ya?»
Ku mege weke a gwa:
«Na iye tsa.»
Dite Piyer a gwaɗar:
«Əbay,
kə̀ ŋgat a gà mburma aaha ti lek tits,
ta ŋgiɗits a kər a ka,
dite ki gweɗe a ka,
weke na a ləm aà iye ya ana,
meme?»
46 Ama Yesuw a gwaɗa a tar asa:
«Wura aka ləm aà iye,
aɗaba i sər ka,
ndzəɗa aka dara i ba gà ya,
aka mbəl à mburma.»
47 Aləka məkəs ata a samata ka,
Yesuw aka mbər mesire aà dukw ana a ge ya,
a daha aka miɗ ŋgar nda gà medzedzere slàɓslàɓslàɓ.
A kal aba aka miɗ ŋgar a fata.
A tsik a Yesuw melime ana a ləm ahər a ika miɗ mburma tserdze,
dite meme na a mbəl tsara ya.
48 Yesuw a gwaɗar i dəba bazlam ŋgar ata ya:
«Dəm ga,
megìse yak ana kì gis iye nda gəzləŋ a ka,
aka mbəl à kər.
Daba nda zay.»
49 I təv ana Yesuw a riŋ à fèfil a a məkəs ata mba ya ka,
tàa ɗera à labara i bəra Yayirus aaha ndeɗiŋa ya.
Wur ana a ɗera à labara ya ka,
a gwaɗaha a Yayirus:
«Dəm yak aaha ka,
aka mət ana,
aàmala na ki yère a ba à mala medzeŋge a mburma aka asa ya?»
50 Ama Yesuw a tsaraka bazlam ata ka,
a gwaɗa a Yayirus:
«Arəv ma da aà kər a tsa,
gəs iye nda gəzləŋ yak pəra ka,
dəm yak a mbiliŋa.»
51 Aləka i dəba ŋa ya,
ta mah ba,
tə da.
Ti ndzeha a bəra Yayirus,
ti de a a təv məməta ata a ga ya ka,
Yesuw a gəs mivile vatwa a wura aà mazazama ŋgat tsidze.
A vəl vatwa ka,
say a gà Piyer nda Yuhana,
nda gà Zakup,
dite a gà tsir dəm aaha nda mama ŋgar ɗekɗek.
52 Tə daha a ga ka,
ti leha aà gà mburma riŋ hinne,
ti tiwiŋa nda makə̀ɗà ba hinne.
I dəba ŋa ya,
Yesuw a gwaɗa a tar:
«Ka tuwum tsa,
aka mət tsa,
a riŋ ka,
ika mendze are.»
53 Gà mburma ata tə tsaraka kataya ka,
tə sawla ahər,
aɗaba tə sər ka,
aka mət ndzer.
54 Ama Yesuw a daha,
a gəs dəm ata i ahər a,
a gwaɗar nda magala:
«Hitse aà mbulum,
dəm aaha.»
55 Dəm ata a mbəl,
a hitse tsara kaɗəŋ.
Yesuw a gwaɗa a tar:
«Vəlumar dukw mezime.»
56 Ama dukw ana Yesuw a ge ya ka,
a ge aà gà tsir dəm ata nda mama ŋgar a kamala dukw mene aà mburma ya.
I dəba ŋa ya,
Yesuw a gwaɗa a tar asa:
«Iswe,
ka ti tsikwim dukw ana a ge ba kinehe ya,
a wura kwaŋ,
ndzum dər i gà gər kurum ɗikɗik.»