Yesuw a mbəɗ ba ŋgiɗ pam
17
1 I dəba mehinne ndilik a ka,
Yesuw a ndzək gà Piyer nda gà Zakup,
nda gà Yuhana damər Zakup,
tə da a gər kwite zubul ŋa duwa,
à gər tar.
2 I təv ana tar riŋ i fata ya ka,
Yesuw a mbəɗ ba ŋgiɗ pam i təv are tar i fata.
Yam are ŋgar a wàwuzl are,
kamala pat a.
Petek ŋgar ibam,
a mbəɗ dər herrè tizlzlè.
3 I dəba ŋa ya,
gà ɓəzla mazazama ŋgat aaha makər ŋa ya,
ta fə̀r ikaba ya tsara ka,
tàa ŋgat a gà Musa nda Iliya ana tar riŋ ta fèfil a nda gà Yesuw a.
4 Piyer a ŋgat a tar kataya ka,
a gwaɗa a Yesuw:
«Lele Əbay gà,
na kwa ɗa i faha ya.
Na mege kà waya ka,
i kiriw a kurum a ga makər a faha,
ilik biy yak,
ilik biy Musa,
dite ilik ŋa aaha biy Iliya.»
5 I təv ana a riŋ ihər à fèfil a mba ya ka,
magùdwagùdwa a tarəra aka gər tar a herrè,
tits a le a tar.
Zàmma tsəka,
tə tsarakara iɗəm mifefile i huɗ magùdwagùdwa ata ya,
Mbulum a gwaɗa a tarəra:
«Naha ka,
Kəla gà mandərkwasla gà ana i waya hinne ya.
Maŋgayaba gà fit dze ka,
ika gər ŋgar.
Dzum zləm a dukw ana a tsik a kurum a ya.»
6 Aləka gà ɓəzla mazazama ŋgat aaha tə tsaraka kataya ka,
ta ge magəɗa hinne,
tə dzawa à mazlə̀ɓ ŋa a bəɗ a fata.
7 Ama Yesuw a daha,
a ləm aà tar,
a gwaɗa a tar:
«Hitswim aà mbulum,
ki gwim magəɗa tsa.»
8 I dəba ŋa ya,
tə zla ika are ya,
ta fə̀r ikaba ya ka,
tàa ŋgat a wur a tsa,
say a Yesuw à gər ŋgar ilik.
9 I təv ana tar riŋ ti terre a i gər kwite ata ya ka,
Yesuw a gwaɗa a tar:
«Dukw ana ka ŋgatumar mbakum a ka,
ka ti tsikwim a wura tsidze,
say a pat ana kàa ŋgetwimiŋ,
a iye,
*wur ana a dara i təv Mbulum a,
i mbilere a i məməta ya dzekwiŋ.»
10 I dəba bazlam ŋgar ata ya ka,
gà ɓəzla mazazama ŋgat ta wiz aà ŋgat,
ta gwaɗar:
«Aàla na gà ɓəzla medzeŋge məpala ahəm Mbulum ta gwa ka,
dukw ata a ge a ba kataya ka,
say Iliya à mère a dzekwiŋ a?»
11 A gwaɗa a tar aaka:
«Kaɗəŋ ndzer seyiŋ,
Iliya à mère a dzekwiŋ.
Aɗaba à mère a ka,
à lèmbeɗe a à gà dukw ana ti de a ndaka vatwa Mbulum tsiye tserdze.
12 Ama iye ihər i gweɗe a kurum ŋa:
Iliya ka,
aka mbər medera,
gà mburma tə sər ŋgat tsa.
Ama tàa sèwèrer are hinne,
kamala ana gəzləŋ tar a waya ya.
Ti ti sèwèriŋ a are a iye,
wur ana a dara i təv Mbulum a tekeɗe,
kamala taŋa ya mbaŋa.»
13 Dite i dəba ŋa ya,
gà ɓəzla mazazama ŋgat tə sər,
a tsik a tar taŋa ka,
aà Yuhana metsìlwìɓè à mburma yam.
Yesuw a mbəl à kəla duwa mahuruvuv a gasawa ŋgat
14 Aləka ta mbəɗ gər a təv mayaba gər gà mburma ka,
wele duwa a riŋ a dara a təv Yesuw a.
A daha,
a dza gurmits a bəɗ aka miɗ ŋgar.
15 A gwaɗar:
«Əbay ga,
mbəl à kəla gà duwa naha te,
a ndzek are tsehe ti tsiye?
Aɗaba a riŋ i dukw məməta,
mahuruvuv a gasawa ŋgat,
a sèwèrewer are hinne.
I təv ana dukw ata aka dza ahər ba ya ka,
a dzawuwa à ŋgat a akwa nda yam asa mbaŋa.
16 I zlara a təv gà ɓəzla mazazama kər a,
i gwa,
ta mbiliŋ dər te ka,
ti sle tsa.»
17 Yesuw a gwaɗa a tar akaba tserdze:
«A kurum gà mburma ana kì giswim iye nda gəzləŋ kurum tsa,
dite kurum gà manəsa ŋa asa ya.
Wànà iye dze ana,
i gesl a aà metsike a kurum dze ana,
hilè,
na dite ki giswim a iye ya.
I ndze a dze ana,
hilè ɓav a,
na ika magər kurum a.
A za dumaha,
ka zlwimiŋara kəla ŋa a faha ya kwaŋ.»
18 Gà mburma ata tə daha à kəla ata a təv ŋgar a fata.
A daha,
a kwara akaba sitene ata nda magala hinne,
dite a dara i ba kəla ata ya kuɗa,
a mbəl tsara.
19 I dəba ŋa ya,
gà ɓəzla mazazama ŋgat aaha,
tə dara a təv Yesuw a,
à gər tar.
Tə daha ka,
ta wiz ihər bazlam a,
ta gwaɗar:
«Aàla na mə̀r ka,
mì sle aà madalawa sitene à kəla ata ya ti tsiye?»
20 Yesuw a gwaɗa a tar aaka:
«Aɗaba ana megìse kurum ana kì giswim iye nda gəzləŋ a ka,
a sle tsiye.
Iye ihər i tsik a kurum a nda ndzer ŋa:
Na mege kàa gəsum iye a gəzləŋ kurum kwizikw,
kamala wur meserek a tekeɗe,
ki slwim aà megweɗe a a kwite aaha:
“Hitse i faha ya,
da a faka” ka,
a de a kaɗəŋ,
duwa a riŋ mawura ba ŋa i təv kurum asa tsa.
21 Ama kəla ka,
ki slwim a aà madalawa magwàlà gà sitene aaha kataya tsa,
say ki hemwim a a Mbulum nda mege ndəra,
tsəka,
ki slwim a tsa.»
Yesuw a ɗif à məməta ŋgar ana a ta mbilere a i biye ya,
masula ŋa
22 A pat duwa ka,
gà Yesuw nda gà ɓəzla mazazama ŋgat ti yahaba gər aka ahəɗ Galile.
I təv mayahaba gər tar ata ka,
Yesuw a gwaɗa a tar:
«Iye,
*wur ana a dara i təv Mbulum a ka,
ta gis a iye mba.
Ta vile a iye a ahər a gà mburma,
23 dite ta kiɗ a iye.
Ama i huɗ mehinne makər a ka,
i ta mbilere a i məməta ya asa.»
Aləka i dəba ŋa ya,
gà ɓəzla mazazama ŋgat tə tsaraka kataya ka,
a tsəɓ a tar hinne,
kamala ana ti tiwe a ya.
Mandzə̀kà hadam ga Mbulum batsah ŋana
24 I dəba ŋa ya asa,
gà Yesuw nda gà ɓəzla mazazama ŋgat ti ndze a Kafarnahum ka,
gà ɓəzla mandzə̀kà hadam ga Mbulum batsah ŋana tə dara a təv Piyer a,
ta wiz aà ŋgat bazlam a,
ta gwaɗar:
«Mala meɗè a kurum à duwa ana,
a dze a hadam ana gà mburma tə dzawa i ga Mbulum batsah ŋana ya ti tsiye?»
25 Piyer a gwaɗa a tar aaka:
«A dze a mbaŋa.»
I fata ya tsara ka,
Piyer a da a ga a təv Yesuw.
A daha ka,
Yesuw a lah mifèfiler.
A gwaɗar:
«Kər kà dzala ana,
meme,
Simun?
Wànà gà Əbay tə ndzəkawa hadam,
nda gà bəla gà dùwan,
tə ndzəkawa siŋgwe ana,
aà gà weke ya?
Wànà aà gà gwala tar a ya,
tsəna,
aà gà slele ya ya?»
26 Piyer a gwaɗar:
«Aà gà slele ya.»
Yesuw a gwaɗar aaka:
«Yawwa,
na kataya ka,
gà gwala tar ta vile a tsa.
Dite taŋa Mbulum tekeɗe,
a wiz a siŋgwe aà gà mburma ŋgar tsa mbaŋa.
27 Ama kinehe ka,
dzàma a tar pəra,
tsəka,
à tsìɓ a teriŋa.
Ama ka,
daha,
zla kwèndzere,
kà da dər aà guva duluv,
kà yà a huɗ yam,
dite kilif ana kàa lah megìsera iɗəm a ka,
kà hə̀ndə̀kar ikaba bazlam a,
tsam ka,
ki ŋgeter a iɗəm siŋgwe ya.
Dite ka dara,
kà dzàma a tar mbaŋa.»