Mege metsehe agəra fəla gà tsir ana akahər ata ya
7
1 A pat duwa,
gà *Farisa nda gà asiŋ gà ɓəzla medzeŋge məpala ahəm Mbulum tə dara i Yeruzalem a.
Tə dara ka,
tàa le aà gà Yesuw nda gà ɓəzla mazazama ŋgat.
Ti yahaba gər a təv ŋgar.
2 Tə samata ka,
gà asiŋ gà ɓəzla mazazama Yesuw aaha,
tə zəmawa ɗaf ka,
ze məbara ahər.
Ta gwa:
«Gà ɓəzla mazazama Yesuw ka,
tàa nəs à gəzləŋ tar,
aɗaba tə zəmawa ɗaf ka,
ze məbara ahər,
kamala ana fəla gà tsir tar a tsik a tsa.»
3 Ama gà Yahuda tə zəmawa ɗa ka,
say tàa bara ahər lele dzekwiŋ,
aɗaba tə dəɗ ka,
aka fəla gà tsir tar ana ɗa biybiy a.
Ndeyndey ŋa ka,
gà Farisa.
4 Na bəla tàa màha a ma i kwaskwa ya ka,
say ta bere a ba lele dzekwiŋ,
na dite ti zim a ɗaf a.
Ta ge a gər a gà asiŋ gà fəla gà tsir tar ana ɗa tə zazəɗ dər a ka,
hinne.
Kərga dukw masà yam a,
nda gà dukw yam a,
nda gà tasà tar a,
say ta bere a ka,
lele kamala ana fəla gà tsir tar a tsik a.
5 Gà Farisa nda gà ɓəzla medzeŋge məpala ahəm Mbulum ata ɗa ya,
tə samata mege dukw tar ata ka,
a tsahən aà tar tsa.
Ta gwaɗa a Yesuw:
«Naha ana,
meme na gà ɓəzla mazazama kər aaha ta gəs mege gər a fəla gà tsir mə̀r ana ɗa hwèdwedwe ya tsəna,
aàla?
Na naha,
ti zim a ɗaf ka,
ze məbara ahər a?»
6 Yesuw a tsaraka kataya ka,
a gwaɗa a tar aaka:
«Kurum ka,
gà ɓəzla məbànà mburma nda pàrsa,
kamala ana Ezaya,
mala məmà à bazlam Mbulum a wetse ya kaɗəŋ,
kalkal kamala taŋa ya.
A wetse i wakita Mbulum piŋŋe ka,
Mbulum a gwa:
“Gà mburma aaha tì zèmbeɗe a à iye ka,
tsaf tsaf tsaf nda bazlam ɗekɗek.
Ama i gəzləŋ tar ka,
tàa gəs iye tsa.
7 *Meheme tar ana ta hemiŋ a ya ka,
taf masakəŋa.
Aɗaba ti dzeŋgewa a mburma ka,
məpala ahəm mburma,
tsəka,
biy ga tsa.”»
8 Aɗaba taŋa,
Yesuw a gwaɗa a tar asa:
«Kà miyakum à məpala ahəm Mbulum,
dite ki giswim a bazlam mburma ana ti tsik a ya tsəna?»
9 I dəba bazlam ata ya ka,
Yesuw a gwaɗa a tar asa:
«Kà sərum are mimìyàkà à bazlam Mbulum ka,
hinne,
dite na ki giswim a bazlam gà tsir kurum a tsəna?
10 **Aɗaba Mbulum a tsik nda ahər Musa,
a gwa ka:
“Zàmbaɗa à gà dede yak nda mama yak.”
A gwa asa:
“Wur ana a tsik a dukw ana ŋgwala tsa aà dede ŋgar,
kige tsa aà mama ŋgar a ka,
ta kəɗ wele ata.”
11 *Ama biy kurum ka,
pam.
Kù gwaɗum:
“Na wura aka gwaɗa a dede ŋgar,
kige tsa mama ŋgar ka,
limana gà ana zləmana i gwa,
i zlèk a dər kurum a ka,
i gweɗe a,
kurbaŋ, kamala megweɗe ya ka, i vile a taŋa ka, dukw masakəŋana a Mbulum.” 12 Kurum kù gwaɗum:
“Wur ata ka,
ma dzala gà gər aà məvəla duwa a gà dede ŋgar nda mama ŋgar asa tsa.
Vatwa ŋgar a riŋ aà mazlàkà tar asa tsa.”
13 Kamala taŋa ya,
kurum kà nwim à bazlam Mbulum ka,
dukw masakəŋa,
aɗaba fəla kurum ana ki zezeɗwimibe a dər a ba ya.
Dite kurum riŋ ihər ki sekehwime a dər nda gà bazlam ŋgiɗ pampam kamala taŋa ya asa.»
Gà dukw ana ti nis a à mburma i gəzləŋ a
14 I dəba ŋa ya,
Yesuw a zal a gà mburma ata i fata ya tserdze,
tə daha a təv ŋgar.
Tə daha ka,
a gwaɗa a tar:
«Tsarakum,
dzum zləm a dukw ana i tsik a kurum a ya lele:
15 Aɗaba dukw ana mburma a zim a a hitwis tserdze ya ka,
a sle aà menise a à mburma tsa.
Say dukw ana a dere a i ba mburma ndàra i gəzləŋ ŋgar a ivaɗ,
na a nis a à mburma ya.
16 Tsarakum lele na gər kurum aka ge aà metsereke ya.»
17 I dəba ŋa ya,
Yesuw a hitse i təv gà mburma ata ya,
a da a ma.
Gà ɓəzla mazazama ŋgat aaha tə zazam ŋgat.
Tə daha,
ta wiz aà ŋgat bazlam ata ya asa.
Ta gwaɗar:
«Ɗe a mə̀r à bazlam ata lele te.
Maa tsaraka lele tsa.»
18 Dite a gwaɗa a tar:
«Wànà kurum tekeɗe,
metsehe kurum a riŋ tsa mbaŋa ya?
Kà ze metserekwim a?
Kà sərum tsiye,
dukw ana mburma a zim a ndàra a hitwis a ka,
a sle aà menise a à mburma tsəna,
kà sərum tsiye?
19 Aɗaba dukw ana a zim a ka,
a de a ka,
a gəzləŋ ŋgar tsa.
Ama a de a ka,
ndàra a hitwis,
dite a dere a i ba ŋgar a ndàra a bəɗ a bəra ya.»
A sàs a Yesuw aà megweɗe agəra bazlam ata ka,
dukw mezime tserdze ka,
lele.
20 Yesuw a gwaɗa a tar asa:
«Ama dukw ana a dere a i gəzləŋ mburma ya ivaɗ,
na a nis a à mburma ya.
21 Aɗaba na a dere a i gəzləŋ mburma ya ka,
madzala gà gər ana ti dzele a ŋgwala tsiye.
Taŋa na a peze a za a mburma aà mege mezelme nda təv dukw ana biy metsike tsiye,
nda gà mege akəl,
nda makə̀ɗà mburma,
22 nda mege muva,
nda mege are aka dukw mburma,
nda məpàzà za a mburma,
nda masasa pàrsa,
nda mege aba mandakazləm aka duwa,
nda mene are a mburma,
nda metsìkè dukw ana ìrih ìrih ìrih ŋgwala tsa aà mburma ya tserdze,
nda mege dukw falày ana taf masakəŋa ya.
23 Gà dukw ata fit dze tə dara ka,
i gəzləŋ a.
Gà taŋa na ti nis a à mburma ya.»
Məkəs duwa ŋgat ka, dəm gà Yahuda tsa, a gəs Yesuw
nda gəzləŋ
24 Aləka i dəba ŋa ya,
Yesuw a hitse i fata ya,
a da aka ahəɗ ana bise nda Tirus a.
A daha a fata ka,
a da a ga a bəra wele duwa.
A da a ga ata ka,
a sasar na gà mburma tə sər aà ŋgat a riŋ i fata ya tsa.
Ama a sle a aà makàhà ba ŋgar ɓav tsa,
gà mburma ata tə sər aà ŋgat a riŋ i fata tsara.
25-26 Zàkwayiya ka,
məkəs duwa a riŋ i fata.
Ŋgat ka,
dəm gà kwite ata,
aɗaba tsir ŋgar ka,
gwala tar ilik nda gà Yahuda tsa pəra.
Dəm ŋgar a riŋ,
sitene a gasawa.
Məkəs ata a tsaraka maɗə̀và zləm Yesuw ana a riŋ i fata ya ka,
a da a təv ŋgar.
A daha,
a kal aba aka miɗ ŋgar.
A hamar hinne,
dite ka,
ma dalawa sitene aà dəm ŋgar aaha ya te.
27 Ama Yesuw a gwaɗar:
«Wur ana a vile a dukw mezime a gà ɓəza ya ka,
say a sle a ter a dzekwiŋ,
dite a vile a a gà kəra,
ti zimiŋa.
Tsəka,
aɗaba malàhà à dukw mezime ika gà ɓəza ya a gà kəra ka,
lele tsa.»
28 Ama məkəs aaha a gwaɗar aaka:
«Kaɗəŋ Əbay gà,
na gà ɓəza ti zim a ɗaf mbaŋa ka,
na aka dzawa aà tar a bəɗ a ka,
gà kəra ti dehe a,
ta peliŋa.»
29 Yesuw a tsaraka kataya ka,
a gwaɗar:
«Kaɗəŋ,
pàrsa tsa.
Aɗaba bazlam yak ata kà tsikiŋara ya ka,
kàa gìsiŋ dərraha ahəm aà are.
Ama i zlèk a kər.
Da a ma,
sitene ata aka da ika dəm yak a.»
30 Məkəs ata a mbəɗ gər a ma tsara.
A ta medeha a ma ka,
a leha aà dəm ŋgar ata lele kuɗa.
Sitene ata aka da ikəka ya.
Yesuw a mbəl à mala mandakazləm duwa
31 I dəba ŋa ya,
Yesuw a hitse ika ahəɗ Tirus a asa.
A mah ba,
a da nda kwite Sidun.
A da i fata ya ka,
nda guva duluv Galile.
A da aka ahəɗ kwite kurwa.
32 A ndzeha a fata ka,
gà mburma tə zlaraha wele duwa mandakazləm ŋa.
Ta hamar dər,
dite ka,
ma tike aakahər ŋgar,
mə mbəl à wele ata.
33 Yesuw a daha,
a gəs wele ata i ahər a.
A da dər a zlawak i təv mburma ya.
Ti ndzeha a fata ka,
Yesuw a dzakayar ɓəza ahər a zləm.
A tif tìzle aà kəla ahər,
dite a lə̀mar dər aà arah.
34 I dəba ŋa ya,
Yesuw a fə̀r dər a gəza mbulum,
a mà ba à mesife ŋgìk,
a gwaɗa a wele ata:
«Yafata,» kamala megweɗe ya ka: Zləm yak mà hə̀ndə̀k ba. 35 I dəba bazlam ŋgar ata ya tsara ka,
zləm ŋgar a hə̀ndə̀k ba,
arah ŋgar ibam,
a làmbaɗa ba,
a fàfəl lele kuɗa.
36 Yesuw a gwaɗa a gà mburma ata i fata ya:
«Ka ti tsikwim a wura tsidze.»
Ama tə tsaraka tsa.
Aɗaba Yesuw a gwaɗa a tar,
ka ti tsikwim tsa tekeɗe ka,
ta mba aba aka metsìkè ŋa ivaɗ.
37 Aɗaba dukw ana Yesuw a ge a ka,
dukw mene aà mburma hinne.
Ta gwaɗawa ahər:
«Dukw ana a ge a ya ka,
à lèmbeɗe a lele ndzer.
Ku mege mandakazləm ibam,
à hìndìker a i zləm a,
à fèfil a lele.»