Yuhana 21

Yesuw a pàt aba a gà asiŋ gà ɓəzla mazazama ŋgat təsəla

1 I dəba mendze zaakwa ya asa ka, Yesuw a pàt aba a gà asiŋ gà ɓəzla mazazama ŋgat aà guva duluv Tiberiyas. Araha, i tsik a kurum a bazlam ana a pàt a tar aba ya: 2 A pat duwa, gà asiŋ gà ɓəzla mazazama ŋgat a riŋ mandza ŋa i təv ilik ŋa. Gà mburma ata ka, gà Simun Piyer nda gà Tumas, wele ana ŋgat mawusa ya, nda gà Nataniyel ana a dara i Kana, ika ahəɗ Galile ya, nda gà ɓəza Zebede, dite nda gà ɓəzla mazazama ŋgat ŋgiɗ sula asa. 3 I fata ya ka, Simun Piyer a gwaɗa a tar: «Iye ka, i de a a magàsà kilif.» Ta gwaɗar aaka: «Mər tekeɗe, mìi de a mbaŋa, tàkwa tserdze.» Ta mah ba i fata ya, tə da. Tə daha, tə tsala a slə̀làh yam, tì sìweye a dər ika gər yam ndaavəɗ, nda gà dukw magàsà kilif ŋa aà tar. Ama i huɗ həvəɗ ata ya ka, sìkwèɗ tàa ŋgat kilif ilik tsidze.

4 Aləka mbulum a dəv, are a da aàba ya ka, Yesuw a daha, dzeŋ a hitse aà guva yam ata. Ama gà ɓəzla mazazama ŋgat ka, tàa sər ka, ŋgat tsa. 5 Yesuw a gwaɗa a taraha: «Kàa gasum kilif ŋa ibam a, gà ɓəza gà.» Ta gwaɗar aakara: «Awaŋ, maa gəs ilik tsidze.» 6 A gwaɗa a taraha asa: «A za tikwim ndzàràwà kurum aà guva yam ana ndaka tseke ahər mezime kurum a kwaŋ, ki geswimiŋa.» Ti tike a fata ka, aha ŋana ta waya aà meŋgile dərraha a təv tar a slə̀làh yam a ka, gwediŋ gwediŋ ta mba ahər tsa, aɗaba kilif ana maràhà ŋa iɗəm fèɗìɗe ya. 7 Mala mazazama Yesuw ana mandərkwasla ŋgar hinne ya, a gwaɗa a Piyer: «Naha ka, BATSAH kwa ŋa.»

Piyer a tsaraka kataya tsara ka, a tike akaba petek ŋgar, aɗaba ŋgat ka, mandza ŋa kataya, petek ikəka tsa. I dəba ŋa ya, kàp a yàra ba aka gər yam a, a waya madàra a təv ŋgar a. 8 Gà asiŋ gà ɓəzla mazazama Yesuw ŋgiɗ aaha ti zeha aɗəm a, ta pakara slə̀làh yam ata a təv ana Yesuw iɗəm a, nda gà ndzàràwà aaha madànà ŋa ihər, kilif ata maràhà ŋa iɗəm. Tar ka, tə za ba diriŋ aà guva yam ata ya tsa ibam, a ge a ka, kapakà sik dərməka. 9 Aləka tə tarəra i slə̀làh yam ata ya tsara ka, ta ŋgat a akwa a riŋ məvə̀tà ŋa i liwit, kilif ikəka mandàzà ŋa, nda ɗaf a riŋ i bəɗ. 10 Yesuw a gwaɗa a tar: «Ndzəkumara gà kilif aka kə̀ gasum kinehe ya zaakwa, ka ndazakwa.» 11 Simun Piyer a daha, a tsəl a slə̀làh yam ata. A daha ka, a pə̀lara ihər à ndzàràwà ata nda kilif ŋa iɗəm ìdìp bàba ŋa ɗekɗek a. A ŋgəl dərra ihər a kətsah aà guva yam ata ya zaakwa. Kilif ata iɗəm fit dze ka, dərməka nda dzik ə̀zləm gər a makər. Dite ndzàràwà ŋa aka nəs tsa seyiŋ, ku mege kilif ata aka be aɗəm hinne tekeɗe ya. 12 I dəba ŋa ya, Yesuw a gwaɗa a tar: «Dumara, zəmakwa.» Ama ka, wura ilik ika magər gà ɓəzla mazazama ŋgat ata ya, aka mà aba aà arəv, aka gwaɗar ka, kər ana, weke tsidze. Aɗaba tə sər, ŋgat ka, Batsah tar ŋa. 13 Yesuw a sìrìkeha a təv tar. A daha, a zla ɗaf ata, a sasa ikaba ya, a dzaya a tar. A ndzək kilif aaha, a dzaya a tar aaka asa mbaŋa.

14 Taŋa ka, məpàtà aba məmakər ŋa ana Yesuw a pàtawa aba a gà ɓəzla mazazama ŋgat a, na à gər ana a mbəlara i məməta ya ya.

Gà Yesuw ta fàfəl nda Piyer

15 Tə zəm aba ɗaf ata ya lele ka, Yesuw a gwaɗa a Simun Piyer: «Simun, kəla Yuhana, kà waya iye ana, kinehe, a za dər gà asiŋ gà dukw tserdze ya?» A gwaɗar aaka: «Haya, Batsah ga ŋa, kà sər ka, i waya kər.» Yesuw a gwaɗar: «Na kataya ka, ge gər a gà mburma gà ana ti zezem a iye kamala gà ɓəza gà təmaŋ a lele.» 16 I dəba ŋa ya, a gwaɗa a Simun Piyer masula ŋa asa: «Simun, kəla Yuhana, kà waya iye ana, ndzer a?» A gwaɗar aaka: «Haya Batsah ga ŋa, kà sər ka, i waya kər ndzer.» Yesuw a gwaɗar: «Taŋa ka, kasla ɗa gà mburma gà ana ti zezem a iye, kamala gà təmaŋ a lele.» 17 I dəba ŋa ya asa, a màr dər məmakər ŋa, a gwaɗar: «Simun, kəla Yuhana, wànà kà waya iye ana, ndzer kaɗəŋ a?» Bazlam Yesuw ata a màr dər məmakər ŋa, a gwaɗar: «Wànà kà waya iye yà, kà waya iye yà» ka, a tsəɓ a Piyer hinne. A gwaɗar: «Batsah ga ŋa, kà sər duwa tserdze. Dukw ana i gəzləŋ a tekeɗe ka, kà sər. Kà sər ka, i waya kər ndzer.» Yesuw a gwaɗar: «Ge gər a gà mburma gà ana ti zezem a iye kamala gà təmaŋ a lele. 18 Iye ihər i gweɗek a nda ndzer, pàrsa iɗəm tsa: Akahər ana kər i gèlèɓè mba ya ka, kà dànawa ba ŋgewwè nda dukw dəmkul nda ahər yak, ki debe a a təv ana kà waya aà mede ya. Ama i təv ana kàa ge màndawal a ka, misle ŋgiɗ à gis a ahər yak a mbulum, à dèneyekehe a medène, dite a de a à kər a təv ana gəzləŋ yak a waya aà mede tsiye.» 19 Yesuw a tsik bazlam ata nda təv Piyer kataya ka, a ɗifer à məməta ŋgar ana à mite a, à zlibe a dər à Mbulum a. I dəba ŋa ya ka, Yesuw a gwaɗar: «Zezem iye.»

Gà Yesuw nda mala mazazama ŋgat ana

mandərkwasla ŋgar a

20 Piyer a mbəɗ aba ka, aka ŋgat a mala mazazama Yesuw ŋgiɗ ana mandərkwasla ŋgar, a riŋ a zezem a tar a. Wele ŋa ka, wele ana a sìrìk a təv Yesuw akahər ana ti zim a ɗaf Paska, a gwaɗar ka: «Batsah mə̀r ŋa, weke na a ta ge aà kər a ɗaf ndzer a» ya. 21 Piyer a ŋgatar ka, a gwaɗa a Yesuw: «Dite Batsah gà ŋa, dukùla na a ta ge a ba nda wele aaha ya?» 22 Yesuw a gwaɗar aaka: «Na i gwa kinehe ka, ma ndza aà bəra haa a pat ana Yàa màra ya ana, əla yak tiye? Kər ka, zezem iye pəra kwaŋ.» 23 A mbəɗ ba aà zləm a gà ɓəzla mazazama ŋgat ka, ta gwa: «Mala mazazama Yesuw ata ka, à mite a asa tsa aà biybiy.» Tsaatsa Yesuw a gwaɗa a Piyer ka, kataya tsa. A gwaɗar ka: «Na i gwa kinehe ka, ma ndza aà bəra haa a pat ana Yàa màra ya ana, i yak là tiye?»

24 Tsaatsa mala mazazama Yesuw ata ti tsik ahər kataya ya ka, ŋgat na a ɗif à dukw ana Yesuw a ge tserdze, dite a wetse a wakita aaha ya. Ama kà sərakwa, dukw ana a tsik a ka, ndzer kaɗəŋ.

Mandəvandəv bazlam

25 Yesuw aka ge gà dukw pampam hinne asa. Na mege ta wetse gà dukw ŋgar ana a ge ya fit, a gà wakita ilik ilik tserdze ka, sik sik sik təv a sler a tsa, na i dzala ya.