KAYTAKU KA
TIYAAGU
AŊIICUM
Hûcukumahu hata kayta'uke
Ga non Tiyaagu atii Jesus oo ma aŋiicum êliibra'uye (Mat 13:55). Moo, bûtiyaar âynenenent Jesus (Joŋ 7:5), be na Jesus alhaalhowulom di kuketaaku najukool (1 Kôr 15:7). Ña nakay ki kubom di kurebooraaku kata Jesus bala Pentekosti ega (Bag 1:14). Ban naga annahaanaw ata di êgrisiyaay yata Jerusaleŋ (Bag 12:17; 15:13; 21:18; Gal 1:19; 2:9, 12). Non ma demmi ma ŋiicim di sîliibrasu saasu di kaan yahaanay kata jûdewwi kubujoom Jerusaleŋ. Moo, kaytaku katawool koku ma kemmi huc wahaw wa ooliyaam usohaal di sîsigirasu satoolaal. Wahaw wa aŋiicum wata mata kâynenaku, di poop mata bugoroorabu (Tig 2:14-26), ntuwa oo alatum wahaw wa Pawlu aloom mata kâynenaku di kaan nooliyaale ubajaal kapakaku ulaal bâynenaale keb di Jesus, be ntuwa mata wahaw wa ugawaam. Moo, Tiyaagu nâkine âyis di kaan ubajaa'jaa kâynenaku di Jesus, jake ma kujuki di wahaw wa ugawaalem. Non ma Joŋ Batista aloom ma âanul: “Bagawerabu batawuul bûyise di kaan malhegen jiwatatenooruwe.” Moo, kâynenaku di bugoroorabu, ga poop non urebaw ugabaaw wata bancaamabu.