Erodis nabuj Tiyaagu, ban nakulh Pedru
12
Ña nownu, Erodis aganom âyyaw, nasoh bûynenaabu baabu ales, 2 ban naboñ ma kûbujum Tiyaagu kajaasiyaaku aamom atii Joŋ. 3 Be na ajuum kaan jûdewwi sûumiil maama agam, ña naboñ joon ki kûsohul Pedru. Nownu di rewoo'no nata kâlundaayaku kata kûmburuwaaku kaakutum phermentu. 4 Na asohoom, ban nakay d'oo ka akullh, ma awulool waasaaw ubakiir wata esellooraay ma kupooyool. Waasaaw uwu, kaasawookaasa esellooraay ebakiir, mata ma âkimmi ma mbi âyisool êsukay na mbi kâlundaaya'uku kata Paaskuwa kubawo. 5 Ña Pedru nalako dô di ekullhay ma ya kupooyool. Be bûynenaabu ya kenken ma ya kulhaw Emitay di sembe matawool.Amalaakaw nâmelhenul Pedru di ekullhay
6 Na tijommi ma mbi titijen Erodis nâyis êsukay Pedru, di busonna'uyu di rewoo'no poop Pedru oo ma aŋotum ta kugenkoom kuseelaku kugaba, ma atuto esellooraay egaba; bupooyaabu baabu koo di êtingaay yata ekullhay ma kupooyem. 7 Ña too kaŋ wûb, amalaakaw ata Ata Emit na âgawu'dô weh, ña ekullhay di ega kaŋ jaŋaŋaŋ. Ban nakay ki agor Pedru di kaheehaku ma atonkool aanool: “Pedru, ulhaalo cab!” Ña kuseelaku di kûlowul di uŋenaw watawool.
8 Ban amalaakaw umu naanool: “Ukok jak hûruukahu, ban nukatabo.” Ña Pedru naga non ma aloboom. Ban naanool joon: “Ugaayoor humantaahu hatayi ma asoolhellom.” 9 Ban amalaakaw umu nâcaalh, ña Pedru nasoolhenool banamulent kaan waha'uwu malhegen, ma gawool non sîyawut. 10 Na kugam kuhulhe apooyaaw âtiyaaraw, di poop agabutaw, di kûriiŋ di êtingaay yata muhaañaayamu ya mbi ûcaalhul, nujooŋoor di buruŋabu bakayum be di hânkijahu hata êsukay, ña êtinga'uyu di êbabulooro. Di kûcaalh ma kulhur êluulay, piyowut amalaakaw umu na anep.
11 Ña Pedru inkit nanamulen taata ammi, ña nâanul: “Mowme nîmire kaan malhegen Ata Emit abollom amalaakaw amellhenom di kaŋenaku kata Erodis, di poop maama jûdewwi kûkimmi kugawom.” 12 Na Pedru agam nanamulene jak, ña nakay be di eluupay yata Mariya aamom iñaaw Joŋ, aaneyim poop Markus, dâ bukanaku lhay kûmeboorum ma ya kulhaw Emitay. 13 Na agam nâriiŋe, nakokongen êtingaay yata tîyaŋ, âjuraw a keenem Rodi agam agorooraaw ata dô nâcaalhul bi atallhen. 14 Namanj hurimahu hata Pedru, be ma âririgemmi âbabulutool ma atey añaaŋeniil kaan Pedru omu tîyaŋ di êtingaay. 15 Di keenool: “Ja aw ûjuut!” Be oo nanken ma ya aaniil malhegen. Ña di kêenul: “Ûdu amalaakaw atawool.” 16 Be Pedru ya anken ma akookongen êtingaay, be na kûbabuuyom di kujukool, ña di kujaahali. 17 Ña Pedru nâwiitiil kaŋenaku ma kupato, ban na añaaŋeniil maama Ata Emit amellhenloom di ekullhay. Ban naaniil: “Mbi jiñaaŋenom Tiyaagu, di poop kutiyolaal kaaku.” Ban nâcaa'to ma akay be tiŋ taatu.
18 Nagam titijene, esellooraay di êguulhoor meeŋ, mata ma kûmirutum maama Pedru agam. 19 Ña Erodis na aboñ ma kupaamulool be kujukutool, ña nâniihuloor bupooyaabu, ban naaniil kubujiil. Ban Erodis nâcaalh di bantaa'ubu bata Jûdeya ma ariiŋen be Sesareya ban nalako bo piyo.
Eketay yata Erodis
20 Ban Erodis nabrik lhînŋa di êsukay yata Tiiru, di yata Sidoŋ. Ña êsukay yata Tiiru di yata Sidoŋ, di kujamoor ma kukay ki kulhawool ma kuga kâsuumaayaku. Be di kûcuukum di Blastu aamom annahaanaw ata di kâyyaku katawool ma aaneniil ma kuga kâsuumaayaku di Erodis, mata di etaamay yatawool kûŋarumewuum huriyahu hatayiil.
21 Na hukahu hûrimmi hapinim, Erodis nâjupowul baanaabu batawool, ban nakay aleeho di kâyyaku ma ya alob di êsukay. 22 Ña êsukay ya kûŋaaŋulo ma ya kêenul: “Âyyaw umu oo Emitay, ntuwa ajamaat!” 23 Ña to kaŋ cab, amalaakaw ata Ata Emit nayawool ma bañalabu butokoñool naket, mata ma kûbinkenoom ma kûbinkent Emitay. 24 Ña elobay yata Ata Emit di ehaŋ to mabaj sembe ma ewaasoor.
25 Be Barnabe koo di Sâwlu, di kûgawul bugoroorabu batayiil Jerusaleŋ ban, na kulallom di kûŋarul Joŋ aaneyim poop Markus.