Pedru nañaaŋen kupaalool mata bukanaku kagawutum jûdewwi
11
Ña kumakaaku kata Jesus, di bûynenaabu batawool kammi Jûdeya di kujam kaan bukanaku kagawutum jûdewwi poop kûynene elobay yata Emitay. 2 Na Pedru agam nalaañe be Jerusaleŋ, jûdewwi kâkinem ma bukanaku kagawutum jûdewwi kugawi êmanjumay yata huhaanaahu hata yîinaay, di kurinkool keenool: 3 “Pedru, aw di eluupay yata anaw agawutim huhaanaahu hata yîinaay nuwalemmi, ban di jiri dânor!”4 Ña Pedru nañaaŋeniil maama kugam ma aaniil: 5 “Na igam înje umu di êsukay yata Joopi ma ilhawem di Emitay, di êbaahulom ma ijuk wahaw waanom non eleesa yâamak, ban di ekoki di ubeyaw ubakiiraw ma ya êwalowumul hatiya di emitay be ñata ta emmi. 6 Ña na îjikeedom, nîjuu'dô uncaamaw, di bânunkureŋabu, di baabu bâhuuloorem, di poop basuwaabu. 7 Ña na ijammi hurimahu hata anaw aanommi: ‘Pedru, ulhaalo ma ubuj ma utokoñ!’ 8 Be neenool: ‘Ata Emit, mumulet bi iga mo, mata itokoñorut miñ ma ûli jûdewwi ûtokoñoriitum!’ 9 Hurima'uhu hata anaw di hûlancenul joon hatiya di emitay ma heenom: ‘Wahaw wa Ata Emit ammi ujake, mumulet bi ôonul ûtokoñoriiti!’ 10 Mo magam kaŋ be ñâhaaji, ban miña'umu di mulaañ be hatiya di emitay.
11 “Ña di rewoo'no poop ma kûynaaku êhaaji ka kubollom Sesareya be baabu d'înje kûrillotom di eluupay ta iwalemmi. 12 Ña Buynum Bunapaabu di beenom aatuba imantiir, ureboor di kûynaa'uku. Ña kutiyolaal buke kaamom hutok di an anor kata Joopi di kusisenom, ûriiŋ nunebej di eluupay yata âynaaw umu abolliim. 13 Ña âynaaw umu nâñaaŋenoli maama ajuum amalaakaw akaylotom yanŋool ma aanool: ‘Uboñ be Joopi ma nki kûwooli Simoŋ, aaneyim poop Pedru, 14 oo mbi alobi elobay ya mbi Ata Emit âpakenumi, di poop bukani peh kammi yanŋi.’
15 “Ña na igam înje malobem d'oo, Buynum Bunapaabu di bûwalowul ki beeniil huc non ma bugawolaam kâtiyaar. 16 Ña niwollho hurimahu ha Ata Emit aloom âanul: ‘Malhegen Joŋ mumelamu nâbatisumi bukanaku, be miwuul mbi jîbatisumi Buynum Bunapaabu.’ 17 Moo, Emitay ewuliil ja Buynum Bunapaabu banorabu non ma ewulolaabom na ûynenaam Ata Emit aamom Jesus, înje an bu a mbi añoos yo?”
18 Ña na kujammi ma aloom umu, ña di kulo poop sohohoh, ban di kusal Emitay ma ya kêenul: “Kama Emitay poop ewule buruŋ ma bukanaku kagawutum jûdewwi kuwatatenooro ma kubaj eroŋ yâbaworiit!”
Bûynenaabu bata Antiyokiya
19 Ban bûynenaabu baabu bata Jesus bawaasoorum hurim hûlaamahu hata na kubuum Estevoŋ, di kutey be Phenisiiya, kaaku be Sipri ii be kaŋ Antiyokiya, ban ya kuñaaŋen elobay yata Emitay keb bukanaku kagam jûdewwi. 20 Kaaku kata di buko kata êsukay yata Sipri, di kata Sîreeni kakayum be Antiyokiya na kûrimmi, ya kuñaaŋen bukanaku kagawutum jûdewwi elobay yâsuumaay yata Ata Emit Jesus. 21 Ña sembaasu sata Ata Emit di seneniil ma bukan kameeŋe kûynen ma kunebej di buruŋabu bata Ata Emit.
22 Ña di mujamo be kaŋ Jerusaleŋ, na bûynenaabu bata bo kujammom, di kuboñ Barnabe ma akay be bo Antiyokiya. 23 Na ârimbom najuk non ma Emitay ewuliim hûpiiraahu, ña di sûumool noon, ban nâtinkeniil ma kujuum tir di buruŋabu bata Ata Emit. 24 Mata ma Barnabe agam anaw âsummi, ban nâynen Emitay, ban poop naan huc Buynum Bunapaabu, ña bukan kameeŋe di kunebej di buruŋabu bata Ata Emit.
25 Ban Barnabe nakay be Taarsu, ma nki âŋarul Sâwlu. 26 Na ajukoom, naŋarool be Antiyokiya ki kulako bo kajaañ. Ña ya kûmeboor di bûynenaabu kata bo, ma ya kulhikiten bukan kameeŋe elobay yata Emitay. Boo Antiyokiya bo ba cûkumulom ma bukanaku kûwool bûynenaabu kañaaŋaku kata kukristoŋaku.
27 Nownu buñaaŋenaabu baabu bata elobay yata Emitay di bûcaalhumul Jerusaleŋ ma kukay be Antiyokiya. 28 Aahu ata di buko a keenem Agabu hurim sembaasu sata Buynum Bunapaabu na alhaalo ma alob ma âyis êsukay aaniil bacaarabu bâamak bôbareesewuum di âmbasuk peh. Malhegen bacaara'ubu di busoh kaŋ êsukay, na Klawdiw agam âyyaw âmakaaw ata Rooma. 29 Ña bûynenaabu bata bo, di kujamoor ma kuga anoowan maama abaam nâŋaru'mo ma kubommo kutiyiil kata Jûdeya. 30 Ban di kuboñ Barnabe koo di Sâwlu ma kukay di wahaw wa kubaam ki kuwul yahaanay yata grîsiya yata Jûdeya.