Bagawerabu 10

Korneeliw nâwoolul Pedru

Di êsukay yata Sesareya, âynaaw nalako bo aaneyim Korneeliw, aganom annahaanaw ata kaasaaku kata esellooraay kârimmi êteemeer (100) kaaneyim “Italiyaanu.” 2 Âynaaw umu, oo anaw âynemmi Emitay, ban ya âkoli yo, di poop bukanaku peh kammi yanŋool. Ban, ya awul bukan kameeŋe esarahay, ban poop hukoohuk ya alhaw Emitay. 3 Huk haahu, na jaley agam nâkilhuwe, âynaaw umu Emitay di êbaahulool ma ajuk amalaakaw ata yo akaylom ânebejul da ammi, âriiŋul nâwoolool aanool: “Korneeliw!” 4 Be Korneeliw ma âkolim, najiker amalaakaw umu kew, ban narinkool aanool: “Ata Emit, waywoom?” Amalaakaw umu naanool: “Emitay eyabe kalhawaku katayi, di poop esarahay ya uwulem bukanaku, moo êwkenti. 5 Moo, uboñ bukanaku be di êsukay yata Joopi ma nki kûwoolul Simoŋ aaneyim poop Pedru, 6 ammi ma awalemmi di eluupay yata âynaaw aaneyim poop Simoŋ, a eluupay yatawool emmi di hubeereeraahu agoroorumem ubaŋaw.” 7 Ña na amalaakaw a ya kuloom agam nakaye, Korneeliw nâwoolul bugorooraabu batawool egaba di asellooraaw aahu âynemmi Emitay ata di esellooraay yatawool, 8 ma añaaŋeniil peh, ban naboñiil be Joopi.

Emitay di êbaahul Pedru

9 Hata kajom, jaley ma ajuumemmi, Pedru na aŋool di etaahay ma nki alhaw Emitay. Di rewoo'no poop ma kûynaa'uku ka Korneeliw abollom koo di buruŋabu ma kureekellom ban êsukay yata Joopi. 10 Ña Pedru bacaarabu di busohool, na âkin ari. Be nagam koo kacookoorem ma mbi kuri, Emitay di êbaahulool, 11 ña najuk hatiya di emitay ma bâbulom ma miñamu manokoorum di eleesa yâamak ban di mukoki di ubeyaw ubakiiraw, ma mûwaluwewuum be di etaam. 12 Ban di eleesaa'uyu, bânukureŋ peh bata ûkandum ubakiir, di baabu bâhuuloorem, di poop baabu bâyitem boo dô. 13 Ña Pedru najam hurimahu hata anaw aanoom: “Pedru, ulhaalo ma ubuj ma utokoñ!” 14 Be Pedru nâanul: “Ata Emit, mumulet bi iga mo! Mata itokoñorut miñamu ma ûli jûdewwi ûtokoñoriitum!” 15 Be hurima'uhu hata anaw di heenool joon: “Miñamu ma Emitay yemmi mujake, mumulet bi ôonul mûtokoñoriiti.” 16 Ban di gawoo'mo be ñâhaaji. Ban miña'umu di mulaañ be hatiya di emitay.

17 Na Pedru ya anongoorum mata miña'umu ma Emitay êbaahuloom, ña kûynaaku ka Korneeliw abollom koo ma kurinkoorulom ban eluupa'uyu yata Simoŋ ma kûriiŋul di kujunto di êtingaay. 18 Ban di kûwool anaw di eluupa'uyu ma kurinkool mante Simoŋ aaneyim poop Pedru omu ma awalemmi di eluupa'uyu.

19 Be Pedru oo baroŋ ma anongoorem mata miña'umu ma Emitay êbaahuloom, ña Buynum Bunapaabu di beenool: “Jijaa kûynaaku konka êhaaji kapaamem d'aw. 20 Moo, ulhaalo ma uwalo ma jikay ma aatuba umantiir mata înje ibolliim.” 21 Ña Pedru na âwalowul aan kûynaa'uku: “Jijaa, înje oome ja jipaamem d'înje! Kama wa jikaymulom?” 22 Di kulaañenool keenool: “Annahaanaw ata kaasaaku kata esellooraay kârimmi êteemeer aaneyim Korneeliw agawem jak, ban ya âkoli Emitay, ban poop bukanaku kagam jûdewwi ya kulob jak matawool, âbollolim. Oo ma amalaakaw Ata Emit ammi âwoolli ma ukay be yanŋool ma nki ajam hurimahu ha mbi ulobool.” 23 Ña Pedru nagawiil ma kunebej di eluupa'uyu ma kuŋot dô. Kûriiŋ hata kajom, nalhaalo ma kukay. Bukan kaaku poop kata bo Joopi di kureboor d'oo.

Pedru nanebej di eluupay yata Korneeliw

24 Na titijemmi, di kûriiŋ Sesareya. Nownu, Korneeliw oo ma âmebum ban bukanool, be di kupaalool yanŋool ma ya kukob Pedru. 25 Be na ârimmi aan anebej di eluupa'uyu, ña Korneeliw nâkayil ki kupam, âriiŋ nâtiigen ñata ûkandumaw watawool ma âbinkenool. 26 Be Pedru nalhaalenool ma aanool: “Ulhaalo ma ujuum mata înje ajamaataw poop non aw.” 27 Ña Pedru ya alob di Korneeliw be na kunebeem di eluupay, be na ârindom nâtoo'dô êsukay lhay ma kûmeboorum, 28 ña naaniil: “Miwuul jîmire jak kaan ñônñoy ma an agam jûdew kuleeho di tanor di anaw agawutum jûdew, palimo poop ma kukotoor. Be Emitay di êyisom kaan, mumulet bi êenul ajamaat ajakut, be mante asetut. 29 Momakiimom ma jîwoolumulommi, nîkayil bamantiirut. Moo mowme, nîkine îmir miñamu ma jîwoolumulommi.”

30 Ña Korneeliw naanool: “Jaat gawe ban kukaku kubakiir timo maame înje ûde di eluupay ma ya ilhaw Emitay, jaley poop ma âkilhom. Nilhawum ii, âynaaw alhiimom wañaw wagam wajwaj, nâcalhom to ma ajuum ñata ta emmi, 31 ban naanom: ‘Korneeliw, kalhawaku katayi Emitay eyaa'ko, esarahay poop ya uwulem bukanaku, ejuu'yo. 32 Uboñ anaw be Joopi ma nki âwoolul Simoŋ aaneyim poop Pedru; ammi ma awalemmi di eluupay yammi di hubeereeraahu yata âynaaw aaneyim poop Simoŋ agoroorumem ubaŋaw.’ 33 Momakiimom ma îboñummi ma kûwooli. Be nugawe jak ma ukaylom. Moo mowme, ûli oome ute di kûkilaku kata Emitay ma ubandoorum ban ma mbi ujam hurimahu ha Ata Emit awulim bi ûloboli.”

Pedru nanamulen Korneeliw

34 Ña Pedru nalob ma âanul: “Jaat nijuke kaan malhegen Emitay êgaworiit ajamaat aahe di aahe, 35 be yoo ya êkin an peh ata êsukoosuk âkoliyeyom, ban ya aga jak. 36 Miwuul jîmire mata elobay ya Emitay ebollom bukanaku kata Israyel, ma eñaaŋeniil elobay yâsuumaay yata kâsuumaayaku hurim Jesus Kristu, agam Ata Emit ata an poopool. 37 Malhegen miwuul jîmire wahaw wagawim wawaasoorum di etaamay pooyo yata Jûdeya, ma ûcukumul Gâlileeya nata na Joŋ ya añaaŋemmi êsukay mata jâbatisuwaaju. 38 Jîmire poop non ma Emitay êwojuum Jesus ata Nasare, ma egawool aan huc Buynum Bunapaabu, di poop sembaasu. Jijuke non ma ya areesoorum tiŋ peh, ma ya aga bukanaku jak, ban ya abuunen bukanaku ka Esatanaay esoom, hurim ma Emitay yemmi d'oo.

39 “Malhegen miña'ume peh ma Jesus agam di etaamay yata jûdewwi, di poop Jerusaleŋ, ûli ugam bukanaku kajuumom. Be na agam ban, di kuriiŋool di êkrusay ma kubujool. 40 Be di hukahu hûhaajutahu, Emitay di elhaalellool di kuketaaku, ban di egawool ma ajuki. 41 Be ntuwa bukanaku peh kujukoom, be ûli keb jaamom ja Emitay êjotaalim ujukoom ma uri, nujaken dânor na agam nalhaalowulo di kuketaaku. 42 Oo âboñolim ma uñaaŋen êsukay matawool, ma ûyisiil di malhegen kaan oo Emitay egam atalenaaw ata bukanaku karommi, di poop kaaku kakeem. 43 Mata buñaaŋenaabu bata kûboñaku kata Emitay, kulooloom mata Jesus ma kêenul, bukanaku peh kâynenoom kûbajumiñaku katayiil mbi kupasi.”

Bukanaku kagawutum jûdewwi di keen huc Buynum Bunapaabu

44 Be Pedru oo baroŋ ma alobem, Buynum Bunapaabu di bûwalowul ki been huc bukana'uku peh ka ya katallhenoom. 45 Ña bûynenaabu kagam jûdewwi kareboorulom di Pedru, di kujuk non ma Emitay ewuum poop bukanaku kagawutum jûdewwi Buynum Bunapaabu, di kujaahali. 46 Mata na ya kutallheniim di kujamiil ma ya kuloom silob saasu sa kujamutum ma ya kûbinken Emitay. Ña Pedru naaniil: 47 “Bukana'uke Emitay ewuliil poop Buynum Bunapaabu non ma ewulolaabom. Moo, an pîya naaliye alat ma kûbatiisumi mumelamu?” 48 Ña naga bukana'uku ma kûbatiisi di kañaaŋaku kata Jesus Kristu. Ban di kulhaw Pedru ma alako bo di buko ma abaa'bo kunak.