Sâwlu nanebej di buruŋabu bata Jesus
9
Be Sâwlu nanken ma ya anuumoor mata jabujaju jata burebooraabu bata Ata Emit. Huk haahu, na akay ki kûlobul di annahaanaw âmakaaw ata bumaaŋenaabu bata Emitay, 2 ma awulool uytaw wa mbi akay di wo be di eluupay yata kâmebooraku yata jûdewwi kata Damaasku. Ma mbi âriiŋ bo, ajuk ja ânniine, be mante anñaakan kata di Buruŋa'ubu, nasohulool ma akay d'oo be Jerusaleŋ. 3 Be oo di buruŋabu ma areesem be bo Damaasku, na agam nahuute, ña to kaŋ wûb, sambunasu di siyawumulool hatiya di emitay. 4 Ña nalo di etaam, ban najam hurimahu hata anaw haanoom: “Sâwlu, Sâwlu, mata wa ma ûlaamenumem d'înje?”5 Be Sâwlu narinkool aanool: “Kama aw aymoom?” Naanool: “Înje Jesus aamom a ûlaamenem d'oo. 6 Ulhaalo ma ukay be di hânkijahu hata êsukay ba nki kulobi maama mbi uga.”
7 Kupaalool ka kureboorum di gayiil ŋaŋ balobut, ma kujanjammi hurima'uhu be kujukut an. 8 Ña Sâwlu nâlhaalowul di etaam, be na agam ma ajiker abajut ajuk. Ña di kusohool di kaŋen ma kukay d'oo be dô Damaasku. 9 Ña naga ban nalako to bajukut kukaku kûhaaji. Di kuka'uku ariit, asibent poop.
10 Boo Damaasku, âynaaw dôo agam arebooraaw ata Jesus aaneyim Ânaniyas. Huk haahu, Emitay di êbaahulool ma ajuk Ata Emit ma âwoolool aanool: “Ânaniyas!” Oo naanool: “Ata Emit, înje oome!” 11 Ña Ata Emit naanool: “Ugor ma ukay be di eluupay yata âynaaw aaneyim Judas yammi di êluulay yaaneyim Êluulay Yalhebaay. Na mbi ûriiŋ dô, nurinkiil âynaaw ata êsukay yata Taarsu aaneyim Sâwlu. Mata omu dô ma alhawem di Emitay. 12 Be di kalhawa'uku Emitay di êbaahulool ma ajuk âynaaw aaneyim Ânaniyas, anebejulom di eluupa'uyu aga uŋenaw watawool d'oo ma alaañ ajuk.” 13 Be Ânaniyas na alaañenool aanool: “Ata Emit, înje nijame ma bukan kameeŋe kuloom mata ma âynaaw umu âgaykooruloom bukanaku kâynenim Jerusaleŋ. 14 Ban mooma ayabumulom uytaw di uŋenaw di bumaaŋenaabu bata Emitay, ma âkayil be ube Damaasku bi asoh bukanaku peh kâwoolem kañaaŋaku katayi.”
15 Be Ata Emit naanool: “Ukay, mata âynaaw umu oo anaw a ijotum a mbi aga agorooraaw ûmbaam, a mbi aŋar elobay yûmbaam be di bukanaku kagawutum jûdewwi, di kîyyaku, di poop bukanaku kata Israyel; 16 be înje mbi îysool maama mbi âlaam mata kañaaŋaku kûmbaam.”
17 Ña Ânaniyas nakay âriiŋ nanebej di eluupa'uyu, ban naga uŋenaw watawool d'oo ma aanool: “Atiyom Sâwlu, Ata Emit aamom Jesus a ujukulom di buruŋabu aw ma ûkayewuum, abollommi ma ulaañ ujuk ban non huc Buynum Bunapaabu.” 18 Ña to kaŋ cab, miñamu manaamoom non uwelh, di mûlowul di kûkilaku kata Sâwlu, ña nalaañ ajuk. Ban nalhaalo ma âbatisi. 19 Na arim ban, ña eniilay yatawool di elaañ ejuum jak.
Sâwlu nañaaŋen elobay yata Emitay Damaasku
Ban Sâwlu naga kuk Damaasku, ma kulako bo di kurebooraaku kata Jesus. 20 Ban Sâwlu nâcuk ma ya añaaŋen bukanaku di siluupasu sata kâmebooraku kata jûdewwi ma ya aaniil Jesus agam Aŋilaw ata Emitay. 21 Ña bukanaku peh kajamoom, di kujaahali ma ya kêenul: “Kama ntuwa âynaaw ume oo ma ya abuum bukanaku Jerusaleŋ kagam kurebooraaku kata Jesus? Ban ntuwa mo ma âkayumulom be ube bi asoh bukana'uku ki awul yahaanay yata bumaaŋenaabu bata Emitay?”
22 Be Sâwlu elobay ya alobem hukoohuk ya ehaŋ mabaj sembe; ya añaaŋen bukanaku ma âyisiil kaan Jesus oo ma agam Kristu, poopii bukanaku kagam jûdewwi kata dô Damaasku, di gayiil limalim poop. 23 Be nagam piyuwe, jûdewwi kata dô, di kulhan mata jabujaju jatawool. 24 Be Sâwlu nâmir maama kûkimmi kugawool. Ña ya kûlipuwool di sîtingaasu sata êsukay bûjom, busonna ma mbi kusohool kubuj. 25 Be huk haahu hukaru, kurebooraaku katawool, di kugawool di kasaawaku ban di kuwalellool hatiya di hukalahu hata êsukay.
Sâwlu nâriiŋ Jerusaleŋ
26 Ban Sâwlu nakay be Jerusaleŋ âriiŋ, nâkin kulako tanor di kurebooraaku kata Jesus kata bo, be di kûkoliyool, mata kûynent kaan oo poop arebooraaw ata Jesus. 27 Be Barnabe, naŋarool be ta kumakaaku kata Jesus kemmi, âriiŋ nañaaŋeniil non ma Sâwlu ajuum Ata Emit di buruŋabu bata be Damaasku. Ban nañaaŋeniil poop non ma añaaŋelobom bukanaku mata Jesus bâkoliit. 28 Ña Sâwlu nalako bo di buko ma ya areesoor tiŋ peh, ma ya alob bukanaku mata Ata Emit bâkoliit. 29 Ya alob poop di bukanaku kagam jûdewwi kalobem elobay greegu ma ya kuñoosoor, be buko ya kupaam maama mbi kuga ma kubujool. 30 Be na bûynenaabu kujammom, di kukay di Sâwlu be Sesareya, kûriiŋ bo, di kugawool ma akay be Taarsu.
31 Ña nownu, bûynenaabu kammi di bantaabu bata Jûdeya, di bata Gâlileeya, di poop bata Samariya, di kubaa'no kâsuumaayaku. Hurim Buynum Bunapaabu, di kuhaŋ no poop mabaj sembe ma kusoh jak buruŋabu bata Ata Emit. Ña bukanaku kâynemmi Jesus ya kuhaŋ to mameeŋ.
Pedru nabuunen Eneyas
32 Be Pedru ya areesoor tiŋ kaŋ peh. Huk haahu, nakay âjukul bûynenaabu bata Jesus kammi di êsukay yaaneyim Lida. 33 Na ârimbom, najuk âynaaw aaneyim Eneyas agam hubapuwooraahu ma ya akumen keb di elalay be na agam ujaañaw hutok di ûhaaji. 34 Ña Pedru naanool: “Eneyas, Jesus Kristu mbi abuuneni! Ulhaalo ma uboolh elalay yatayi.” Ña to kaŋ cab, Eneyas nalhaalo. 35 Ña bukanaku peh kata Lida, di kata Sarona na kujukoom, ña di kunebej di buruŋabu bata Ata Emit.
Pedru nâlhaalenul añakanaw akeem
36 Di êsukay yata Joopi, arebooraaw ata Jesus nalako bo aaneyim Tabita. Kañaaŋa'uku di baloberabu bata Greegu, ya keeni Dorkas. Añakanaw umu nâsuunsum an, mata ya aanen kûsukateenaku ma ya awuliil esarahay. 37 Di kuka'uku, Tabita nâjuut, na aket. Ña di kukullhen ehuluŋaayay yatawool, ban di kukay di yo ki kutal di êwaanaatay yammi hatiya di etaahay. 38 Kurebooraaku kata Jesus kata bo, di kujam kaan Pedru omu Lida, ban ma bûragiyoorutum di Joopi, ña di kuboñ kûynaaku egaba, ma nki keenool: “Uñankiit ûñaahul cab be Joopi!”
39 Ña Pedru naaniil aawo ma kukay. Na ârintom, di kuŋarool be di êwanata'uyu yammi hatiya di etaahay. Na ârindom, ña yaaraay kagam bûkutuwaataabu ka kupañooriil kukeem, di kuŋoomenool ma ya kukaaw, ban ya kûyisool ûjupaaw, di poop wañ waawu wa Dorkas acookoorum. 40 Ña Pedru naga bukanaku kâlakodom di ewaanaata'uyu ma kûcaalh peh, ban nâtiigen ma alhaw Emitay. Ban nâtiiwo ajooŋoor di ehuluŋaayay, ban naanool: “Tabita ulhaalo!” Ña nâgawul kûkilaku hâat. Na ajuum Pedru, ña nalhaalo ma aleeho. 41 Ña Pedru nasohool di kaŋen ma aanenool alhaalo ma ajuum. Ban nâwoolul bûynenaabu peh bata Jesus, ma ahaŋ majooŋoor di yaaraay kagam bûkutuwaataabu ka kupañooriil kukeem ma âyisiiwool. 42 Ña di mujamo di êsukay peh yata Joopi. Ña bukan kameeŋe di kûynen Ata Emit. 43 Ban Pedru nalako bo piyo, ma awalen di eluupay yata âynaaw aahu agoroorumem ubaŋaw aaneyim Simoŋ.