8
Be Sâwlu na âririgen ma kubuum Estevoŋ.Hûlaamahu hata bûynenaabu bata Jesus
Nownu huka'uhu, bûynenaabu bammi Jerusaleŋ êsukay di êlowumiil. Ña bûynenaabu peh bata Jesus, di buwaasoor di bantaabu bata Jûdeya, di poop bata Samariya, ma ŋañuno dô keb kumakaaku kata Jesus. 2 Kûynaaku kaaku kâynemmi Ata Emit, di kukay ki kuŋar Estevoŋ ki kuhok, be di kukaawool noon. 3 Be Sâwlu nâkin no âbuy bûynenaabu peh bata Jesus. Ña ya anebej di siluupasu ma asoh yîinaay, di yaaraay âhuul akullh di ekullhay.
Philiipi nâriiŋ Samariya
4 Ña bûynenaabu bawaasoorum di bâsukabu hurim hûlaama'uhu, ya kuñaaŋen bo elobay yata Emitay. 5 Philiipi nakay be di êsukay yata Samariya âriiŋ ya añaaŋen bo bukanaku mata Kristu. 6 Ña buyooŋabu bata bukanaku di kuga to ûyegetaw watayiil ma ya kujam maama ya alobiim. Na ya kutallhenoom di kujuk poop miñamu mata sembaasu sata Emitay ma ya agam. 7 Mata kumal kameeŋe ka kûjupom bukanaku di kûcaalh ma ya kûruuren lhînŋa; ña bukan kameeŋe kagam kubapuwooraaku, di poop kaaku kagam uyakasaw di kûju. 8 Ña bukanaku peh kata di êsuka'uyu di sûumiil noon.
Awaasenaaw aaneyim Simoŋ
9 Be âynaaw aahu agam awaasenaaw ata dô aaneyim Simoŋ ya âhaanoor ma ya abunten bukanaku kata Samariya ma ya aaniil oo an âamak. 10 Ña bukanaku peh kata dô, cûkumul di balaabu, be kaŋ di yahaanay ya kuga alob di kutallhenool, ma ya kêenul âynaaw umu oo anaw ata sembaasu sata Emitay, yaaneyim Sembaasu Sâmakaasu. 11 Ña bukanaku peh di kûynen Simoŋ, mata piyuwe na ya âhaanoorum ma ya abunteniil. 12 Be na êsukay ejammi non ma Philiipi ya alobiim mata Kâyyaku kata Emitay, di poop mata Jesus Kristu, ña yîinaay, di yaaraay di kûynen ma kûbatisayi. 13 Ña Simoŋ poop nâynen Jesus ma âbatisayi, ban ya asoolhen Philiipi. Be na ya ajuum miñamu mata sembaasu sata Emitay, di poop sîmanjumasu sa Philiipi ya agam, ña nâjanaŋen.
14 Na kumakaaku kata Jesus kalakonom Jerusaleŋ kujammi kaan bukanaku kata Samariya kûynene elobay yata Emitay, ña di kuboñ Pedru koo di Joŋ be bo. 15 Na kûrimmi di kulhaw Emitay ma ewuliil Buynum Bunapaabu; 16 mata noo buko bayaborut bo, ma kûbatiisi keb di kañaaŋaku kata Ata Emit Jesus. 17 Ña Pedru koo di Joŋ di kuga uŋenaw watayiil di buko ma kulhaw Emitay, ña di kuyab Buynum Bunapaabu.
18 Simoŋ najuk ma kumakaaku kata Jesus ya kugam uŋenaw watayiil di bukanaku, di kuyab Buynum Bunapaabu. Ña nawul bancaamabu Pedru koo di Joŋ 19 ma aaniil: “Nîkine jiwulom poop semba'usu, ma mbi ya iga uŋenaw wûmbaam di anaw, nayab Buynum Bunapaabu.”
20 Be Pedru naanool: “Ukay di bancaamabu batayi ma nki unep di hûjimenahu hata Emitay! Mata dôdu ma gawim noon sembaasu sata Emitay ya sinoomumi bancaam. 21 Aw mumulet bi ubomaal di bugoroora'ube, mata bûyegetabu batayi bobu ma busemmi di Emitay. 22 Jake ma uwatatenooro mata hunonga'uhu ma ulhaw Emitay mante di eñankiiti. 23 Mata nijuke kaan bûyegetabu batayi bobu ma bemmi huc wahaw wajakutaaw, ban aw omu ma ukokoorom kûbajumiñaku.” 24 Ña Simoŋ naanool: “Jilhawom Emitay ma wah wetuba ugawoom non ma jiloom.”
25 Ña Pedru koo di Joŋ, di kulobiil mata Jesus, di kuñaaŋen bo poop elobay yata Emitay, ban di kulaañ be Jerusaleŋ. Na kugam koo kalaañem, ña ya kuñaaŋen elobay yâsuumaay di bâsuk bameeŋe bata bo Samariya.
Philiipi koo di âynaaw ata Etiyopiya
26 Huk haahu, amalaakaw ata Ata Emit naan Philiipi: “Ulhaalo ma ukay be karebaku kata ekinkay ba buruŋabu bemmi bâcaalhumulom Jerusaleŋ be Gaasa.”a 27 Ña Philiipi nalhaalo ma akay. Oo ma areesem, najuk âynaaw ata Etiyopiyab agam ewnuku,c agam annahaanaw âamak añakem miñamu mata husaanumahu hata añakanaw agam âyyaw ata bo aaneyim Kandasi. Âynaaw umu oo ma âlaañumewuum Jerusaleŋ jâbinkenaju jata Emitay. 28 Di bûlaaña'ubu oo ma âjupowulom di esareetay yatawool, ya âpiseneneenul kaytaku kata añaaŋenaaw ata elobay yata Emitay aaneyim Isayiyas. 29 Ña Buynum Bunapaabu di been Philiipi: “Ukay ki ûhug esareeta'uyu ma ya usoolhen yo.” 30 Ña Philiipi natey âhug yo, ña najam ma âynaaw umu ya apisemmi kaytaku kata añaaŋenaaw ata elobay yata Emitay aaneyim Isayiyas, narinkool aanool: “Nunamulene maama upisenem di mo?” 31 Âynaaw umu naanool: “Înje bu neelim inamulen, an banamulentom bo?” Ña naan Philiipi aŋool di esareetay ma atookoo'dô.
32 Baŋiicerabu ba âynaaw umu ya apisemmi boo beemom ube:
“Di Kukay d'oo non êgaraniina ya kuŋare be ta kuŋaalesom.
Be non ma êgaraniina âkaaworiitum
na mbi kukent buhalabu bata yo,
moomu poop kaŋ ma apatonom.
33 Di kurembeelool, ban kugawutool batalen.
Mata ma abujim ube di etaam,
ay mbi aali apin êbajoorumay yatawool?”
34 Ña âynaaw umu na arink Philiipi ma aanool: “Uñankiit ma uñaaŋenom! Kama aymoom a añaaŋenaaw ata elobay yata Emitay alobem d'oo? Mante matawool, be mante an aahu.” 35 Ña Philiipi na añaaŋenool ma âcukum tiŋa'utu ta ya apisemmi ma alobool mata Jesus. 36 Na kugam ko kakayem, di kûriiŋ ta mumelamu memmi, ña âynaaw umu naan Philiipi: “Jijaa, mumelamu moome, waywoom wa mbi uga ma etuba îbatiisowi?” 37 Be Philiipi naanool: “Aw ûynen keb Jesus di malhegen.” Ña âynaaw umu naanool: “Nîynene kaan Jesus Kristu oo Aŋilaw ata Emitay.” 38 Ña naga aniiwaaw ma ajuumen esareetay, ban di kûwalowul buko egaba ma kukay be di mumelamu, kûriiŋ Philiipi na âbatisool. 39 Na kugam kûcalho di mumelamu, ña Buynum bata Ata Emit di bujank Philiipi; ña âynaaw umu nki ajukutool joon. Ña najaŋen ma aat di êsuumaay. 40 Be Philiipi na akay âcaalhumul di êsukay yata Asotu. Ban nahulh ma ya areesoor di bâsukabu peh bata bo ma ya añaaŋen elobay yâsuumaay be na ârimmi Sesareya.