Buynum Bunapaabu di bujot Barnabe koo di Sâwlu be bugoroorabu
13
Di grîsiya yata Antiyokiya, buñaaŋenaabu bata kûboñaku kata Emitay, di poop bulhikitenaabu bata elobay yata Emitay, di kulako dô kaamom Barnabe, di Simiyoŋ aaneyim Alheenaaw, di Lusiw ata Sîreeni, di Sâwlu, di poop Manayen aamom a kûkuumenim tanor di Erodis. 2 Di kûriiŋ huk haahu, koo di bawoorabu ma kûbinkenem di Ata Emit, Buynum Bunapaabu di beeniil: “Jîcaalhenom Barnabe koo di Sâwlu, ma kukay ki kuga bugoroorabu ba îwooliim ki kuga.” 3 Ña di kuga bawoorabu joon, ban di kuga uŋenaw watayiil di buko ma kulhaw Emitay, ban di kugawiil ma kukay.Barnabe di Sâwlu di kûriiŋ Sipri
4 Ña Barnabe koo di Sâwlu, ka Buynum Bunapaabu bubommi, di kukay be Selewsiya kûriiŋ dô, di kûjupo ma kûtip be di aŋoomenooruwaaw ata êsukay yata Sipri. 5 Na kûrimmi di êsukay yata Salamina, di kuñaaŋen elobay yata Emitay di siluupasu sata kâmebooraku kata jûdewwi, di poop Joŋ Markus a ya aaneniim bugoroorabu.
6 Ña di kurees dô ii, di kûriiŋ di êsukay yata Paphus. Na kûrindom di kutook dô awaasenaaw agam jûdew aaneyim Bar-Jesus, acalem ma ya aan bukanaku oo añaaŋenaaw ata elobay yata Emitay nagam. 7 Awaasenaaw umu ya alako baabu annahaanaw ata êsuka'uyu aaneyim Serjiw Pawlu, agam anaw ajaalhom noon. Ña annahaanaw umu naboñ ma kûwoolul Barnabe koo di Sâwlu mata ma âkimmi ajam elobay yata Emitay. 8 Be awaasenaaw umu aaneyim poop Elimas (di baloberabu bata greegu), âkint ma annahaanaw umu ata êsukay âynen eloba'uyu. 9 Ña Sâwlu a keenem poop Pawlu, oo ma ammi huc Buynum Bunapaabu, najiker awaasenaaw umu kew, ban naanool: 10 “Añool diyaabu, aw jarem macal noon, ban nûjaakaati, jâkineriitum wah wajake! Ûney mbi uwalh jakajenaju jata buruŋabu balhebaabu bata Ata Emit? 11 Moo, Ata Emit mbi alesi ma mbi ûpuum, ma aatuba ujuk jaley haahe para.” Ña to kaŋ cab nâpuum, ma ya aliliwoor to ma ya apaam anaw a mbi asohool di kaŋen ma akay d'oo.
12 Ña na annahaanaw umu ata êsukay ajuum na wahaw uwu ugam, nâjanaŋen noon mata elobay yata Ata Emit, ña nâynen.
Pawlu koo di Barnabe di kukay be Antiyokiya yata Pisiidiya
13 Ban Pawlu koo di kupaalool, di kûjupowum to Paphus di busaanaabu ma kukay be Perji yata di bantaabu bata Panphiiliya. Be Joŋ Markus na abeti'bo ma alaañ be Jerusaleŋ. 14 Ban Pawlu koo di Barnabe di kûcaa'dô Perji ma kukay be Antiyokiya yata Pisiidiya. Na kûrinbom, di hîyyaayahu hata jûdewwi, di kunebej di eluupay yata kâmebooraku katayiil kûriiŋ di kuleeho. 15 Nagam kubane japisenaju jata kaytaku kata kûboñaku kata Moyses, di wata buñaaŋenaabu bata kûboñaku kata Emitay, yahaanay yata eluupa'uyu di keeniil: “Kutiyaay, nokoor jaa non jibaje hurim jîtikenum êsukay, di jilob!”
16 Ña Pawlu nalhaalo ma âwiitiil kaŋenaku ma kupato, ban naaniil: “Êsukay yata Israyel, di miwuul jagawutum jûdewwi jâkoliyem Emitay, jitallhen. 17 Emitay yata êsukay yata Israyel, yoo ejotum simpawolaal ma egawiil êsukay yâamak na kulakom di humaasoorowutaahu di êsukay yata Ejiptu; baamom ba êcaalhelliim di sembaasu sata yo; 18 ma emunten di buko di ekinkay ujaañaw bukanaku egaba (40); 19 ban di ewaas sîsukasu hutok di sigaba sata etaamay yata Kanaaŋ ma ewuliil so kuŋar, 20 be di kûriiŋen ujaañaw sîteemeer sibakiir, di bukanaku egaba di kunŋen (450). Ban di ewuliil yahaanay yata êsukay ii be nata añaaŋenaaw ata kûboñaku kata Emitay aaneyim Samuwel.
21 “Ban na êsukay elhawum Emitay ma ewuliil âyyaw, di ewuliil Sawul aamom añool Kîs ata di êbajoorumay yata Benjamiŋ, agam âyyaw atayiil ujaañaw bukanaku egaba (40). 22 Be na egam êcaalhene Sawul, di elhaalelliil ây aahu aamom David, ban di elobiil matawool ma yêenul: ‘Nijuke David añool Jese, agam anaw a îkimmi, a mbi aga wahaw peh wa sûumommi.’ 23 Di êbajoorumay yatawool dô da Apakenaaw ata Israyel abajim aamom Jesus, a Emitay eloom kaan mbi êboñul; 24 be bala Jesus aan âkayil, Joŋ Batista bâkayeruu'ban ma añaaŋen êsukay yata Israyel ma aaniil kuwatatenooro, ban di kûbatiisi. 25 Be na Joŋ ahuutum kaban bugoroorabu batawool ya aan êsukay: ‘Înje igawut anaw a jikooben d'oo, be ômakayewuum; înje ijoonut ihelh uneewaw wata sikatabasu satawool.’
26 “Moo kutiyaay jata êbajoorumay yata Abrawoŋ, di miwuul jagawutum jûdewwi jâkoliyem Emitay, jitallhen! Eloba'uye yata japakaju ulaal eboñumulim. 27 Malhegen êsukay yata Jerusaleŋ, di yahaanay yatayiil kunamulent kaan Jesus agam apakenaaw, kunamulent poop elobay yata buñaaŋenaabu bata kûboñaku kata Emitay yapiseneyim kukaku pooko kata kîyyayaku katayiil. Moma kûsohummi Jesus ki kubuj, di kucoohen maama buñaaŋenaabu bata kûboñaku kata Emitay kuloom. 28 Palimo poop ma kujukutum makeel majakut ma agam ma mbi âketum, be di kulhaw Pilaatus ma abujool. 29 Be na kugawoom wahaw peh non ma ŋiicim matawool, ña di kuwalellool di êkrusay ma kuŋarool ki kuhok. 30 Be Emitay di elhaalellool di kuketaaku; 31 ma bukanaku kareboorlom d'oo na kûcaalhumulom Gâlileeya be Jerusaleŋ kujukool kuk kameeŋe, buko kemmi jaat ma kulobem di êsukay yata Israyel kaan kujukool.
32 “Moo ûli, uñaaŋenem di miwuul elobay yâsuumaay ya Emitay yemmi mbi ewul simpawolaal. 33 Moo jaat egawolaal ulaal kuñooliil non ma eloom taate simpawolaal, ma êlhaalenul Jesus di kuketaaku non ma memmi ma muŋiicim matawool di kaytaku kugabutaku kata Uñaaŋaw kaan:
‘Aw, aw ugam añoolom; jaat înje igam ampayi.’
34 Moma Emitay elhaalenumuloom di kuketaaku ma eniilay yatawool eetubi ekuuñ di êluŋay, ma yeenool:
‘Înje gawe ma gawe, mbi iwuli hûpiiraahu ha iloom di ho taate David.’
35 Momakiimom di kaytaku kaaku kata Uñaaŋaw di ŋiici joon kaan:
‘Mumulet bi uwaa'bo ehuluŋaayay yata Anaw Anapaaw ma ekuuñ di êluŋay.’
36 Mata malhegen David na alakom taate, nagagam wahaw wa Emitay êkimmi, ban na akeem, naŋari ki ahoki ta simpawolaal sihokim ma akuuñ dô. 37 Be aahu Emitay elhaalellom di kuketaaku, ehuluŋaayay yatawool ekuuñut di êluŋay. 38 Kutiyaay, jake ma jîmir kaan, mata Jesus nuñaaŋenumem di miwuul mata kañankiitaku kata kûbajumiñaku. 39 Moo, an poopool âynenoom, kûbajumiñaku katawool di kupasi, ka kûboñaku kata Emitay keeliwutum kupas. 40 Be jijaamo ka mbi miñamu ma buñaaŋenaabu bata kûboñaku kata Emitay kuloom musohuul, ma kuloom kêenul:
41 ‘Miwuul jarembeelem elobay yata Emitay, jijaamo!
Mata mbi jihiir ma jiket!
Mata mbi iga burok bâamak maame miwuul baroŋ to,
ba jîmiim kaan palimo an aahu alobuu'mo, jeet kâynen.’ ”
42 Ña na Pawlu koo di Barnabe kugam ma kûcaalhul di eluupa'uyu yata kâmebooraku kata jûdewwi, êsukay di kulhawiil ma mbi kûlaañul di hîyyaay haahu hakotuhom ma nki kulancen eloba'uyu. 43 Ban na kugam kûcalho dô, jûdewwi kameeŋe, di bukan kaaku kagawutum jûdewwi kasoom buruŋabu bata jûdewwi, di kusoolheniil. Ña Pawlu koo di Barnabe ya kulob di buko ma ya kenkuneniil ma kuga uynumaw watayiil di kañankiitaku ka Ata Emit añankiitem an âynenoom.
44 Na hîyyaay haahu hata jûdewwi hûrimmi, soŋo kaŋ bukanaku peh kata êsuka'uyu di kûkayil ki kujam elobay yata Ata Emit. 45 Ña na jûdewwi kujuum buyooŋa'ubu bata bukanaku di kûsiibuwikoor, ña ya kuñoos wahaw wa Pawlu ya aloom, ban ya kugelool. 46 Be Pawlu koo di Barnabe, di kulob bâkoliit ma keeniil: “Elobay yata Emitay, miwuul jagam jûdewwi mbi jijamen'yo para, be magam jîkint yo, jîyise kaan jîkint jibaj eroŋ yâbaworiit. Moo, mbi uwalhuu'bo ma ukay ki uñaaŋen yo bukanaku kagawutum jûdewwi, 47 mata mo ma Ata Emit aloom âanul:
‘Înje mbi igawi ma uga ehikitenumay yata bukanaku kagawutum jûdewwi,
ma mbi uŋar kapakaku be âmbasuk peh.’ ”
48 Na bukanaku kagawutum jûdewwi kujammi ma aloom umu, di sûumiil noon, ña ya kusal Emitay mata elobay yata yo. Ña bukanaku kaŋ peh ka ejotum ma mbi kubaj eroŋ yâbaworiit, di kûynen ma kunebej.
49 Ña elobay yata Ata Emit di ewaasoor kaŋ peh di bantaabu bata bo. 50 Be jûdewwi di kusullen yaaraay yaayu kagam bukanaku kâamak kanebeem di buruŋabu batayiil, di poop yahaanay yata êsukay, ma kûlhus Pawlu koo di Barnabe ma kûcaalheniil di bantaa'ubu. 51 Ña Pawlu koo di Barnabe na kugam ma kûcaalh, di kuhank kaporaku di ûkandumaw watayiil ma ga êmanjumay be batayiil, ban di kukay be Ikooniw. 52 Be bûynenaabu bata Antiyokiya di sûumiil noon ma keen huc Buynum Bunapaabu.