Pawlu koo di Barnabe di kûriiŋ Ikooniw
14
Ña na Pawlu koo di Barnabe kugam koku bo Ikooniw, di kukay ki kunebej di eluupay yata kâmebooraku kata jûdewwi ma kuloo'dô bukanaku elobay yata Emitay, poopii buyooŋabu bata bukanaku kagam jûdewwi, di poop kaaku kagawutum jûdewwi, di kûynen. 2 Be jûdewwi kaaku kâynentum, di kusullen bukan kaaku kagawutum jûdewwi, ma kûnongikoor mata bûynenaabu. 3 Be Pawlu koo di Barnabe, di kulako bo piyo ma ya kuñaaŋen bukanaku mata Ata Emit aamom Jesus, bâkoliit. Ña Emitay di egawii'no ma ya kuga miñamu mata sembaasu sata yo, di poop sîmanjumasu, ma yîs kaan elobay yata Emitay ya kuñaaŋenem di yo bukanaku mata mâsuumamu mata yo, malhegen. 4 Ña bukanaku kata êsuka'uyu, di kûgiitoor ma kuga kaaku kêemiyoor jûdewwi, kaaku di kêemiyoor kumakaaku kata Jesus. 5 Ña jûdewwi, di bukan kaaku kagawutum jûdewwi, di poop yahaanay yatayiil, di kûkin kules kumakaa'uku kata Jesus ma kumabiil kuwaaliisaku. 6 Be na kûmiimom, di kuga buuy ma kukay be di êsukay yata Listra, di poop yata Derbi, sata di bantaabu bata Likawooniya, di poop sîsuk saasu sata bo, 7 ma nki kuñaaŋen bo elobay yata Emitay.Na kûrimmi di sîsukasu sata Listra di Derbi
8 Boo di êsukay yata Listra, âynaaw nalako dô agam hubapuwooraahu bareesut noo kaŋ na abajim. 9 Ña âynaaw umu natallhen ma ya ajam maama Pawlu ya aloom. Be Pawlu najikerool kew, nanamulen kaan anaw umu omu ma âynemmi kaan Emitay yeeliye ebuunenool, 10 ña nalob d'oo lhînŋa ma aanool: “Ulhaalo ma ujuum!” Ña nabelho ma ajuum, ban ya arees.
11 Na buyooŋa'ubu bata bukanaku kujuum miñamu ma Pawlu agam, ña di kulob di elobay yata Likawooniya ma kûŋaaŋulo kêenul: “Simitasu silallo bukanaku ma sîwalowul be ute d'ulaal!” 12 Ña di kuga Barnabe kañaaŋaku kata Jupiter, ma kuga Pawlu kata Merkuuriw mata ma aganom anaw a ya aloom. 13 Ña amaaŋenaaw ata emitay yatayiil yaaneyim Jupiter ya eluupay yata yo yemmi ñata di êtingaay yata êsukay, nakay ki âŋarul kûmuunaaku, di sînkuuhaasu sata bûgaalabu be to, ma mbi kuwaasen Barnabe koo di Pawlu.
14 Be na kumakaa'uku egabaay kata Jesus kujammom di mulaañiil, ña di kuruusul wañaw wa kulhiimom, ban di kutey ki kututo buyooŋa'ubu bata bukanaku ma kûŋaaŋulo keeniil: 15 “Kutiyaay, mata wa ma jîgawumem di ume? Ûli ejamaatay nugam non miwuul. Eloba'uye yata Emitay ya uñaaŋenumem di miwuul, ma mbi jiwalen miña'ume majakutum, ma jisoh buruŋabu bata Emitay yâmakaay yacookoorum hatiya di emitay, di etaamay, di mulhuwamu, di poop miñamu peh mândom. 16 Mata noo napiyaanu, yoo ewaabom ejamaatay peh ma kusoh uruŋaw wa kûkimmi. 17 Be palimo poop ma egam umu, di egawuul ma jîmir mata yo, mo ma êgawumuum jak ma ya ewuluul emitay, di ega poop muriyaayamu mutat na mutatem, ma egawuul jibaj miñamu mata huriyahu, ma uynumaw watawuul ûsuum.”
18 Be palimo ma Barnabe koo di Pawlu kulobiim umu, di kûlaam di buko mata heenaaya'uhu ha kûkimmi kugawiil.
19 Ña jûdewwi kaaku kâcaalhumulom di êsukay yata Antiyokiya, di poop yata Ikooniw, di kusullen buyooŋa'ubu bata bukanaku ma kuŋar kuwaaliisaku kumab Pawlu, ban di kûhuulool ki kubet tîyaŋ mata ma kemmi nakete. 20 Be na kurebooraaku kata Jesus kuŋoomenoom, ña nalhaalo ma anebej di êsuka'uyu. Na tititijemmi hata kajom, ña di kukay koo di Barnabe be Derbi.
Barnabe koo di Pawlu di kûlaañul be Antiyokiya yata Siiriya
21 Na Barnabe koo di Pawlu kuñaaŋemmi elobay yata Emitay di êsukay yata Derbi, bukan kameeŋe kata dô di kuga no kurebooraaku kata Jesus. Ban di kulaañ be di sîsukasu sata Listra, di Ikooniw, di poop Antiyokiya, 22 ma ya kenkunen bûynenaabu, ma ya keeniil kusoh lit buruŋabu bata Emitay. Ban di kunamuleniil kaan, ma Emitay egawem an anebej di kâyyaku kata yo, anaw umu mbi âlaam para. 23 Ban tiŋootiŋ ta bûynenaabu kemmi, di kujot to bukan kaaku ka mbi kuga yahaanay yatayiil; ban di kuga bawoorabu ma kulhaw Emitay ma kugawiil di uŋenaw wata Ata Emit a kûynemmi.
24 Ban di kuyab di êsukay yata Pisiidiya ma kukay be Panphiiliya. 25 Di kukay ki kuñaaŋen elobay yata Emitay di êsukay yata Perji, ban di kukay be Ataaliya. 26 Kûriiŋ di kûjupowum dô di busaanaabu ma kukay be Antiyokiya yata Siiriya, baamom ba kuboñumuliim di kaŋenaku kata Ata Emit be bugoroorabu ba kugalom.