Hulhanahu halhanim Jerusaleŋ
15
Kûynaaku kaaku di kûcaalhumul di bantaabu bata Jûdeya, ma kûriiŋenul be Antiyokiya, kûriiŋ ya kulhikiten bûynenaabu ma keeniil mumulet bi an apak oo bagawuti huhaanaahu hata yîinaay non ma kûboñaku kata Moyses kuloom. 2 Be Pawlu koo di Barnabe di keeniil see, ma kuga bûñoosoorabu bâamak mata eloba'uyu. Ña bûynenaabu bata Antiyokiya di kêenul, jake ma Pawlu koo di Barnabe kureboor di bukan kaaku kata di buko, ma kukay be Jerusaleŋ ma nki kûtabulhenoorul di kumakaaku kata Jesus, di poop yahaanay yata grîsiya mata eloba'uyu.3 Ña grîsiya yata Antiyokiya, di kuboñiil ma kukay be bo. Ña di kuyab di bantaabu bata Phenisiiya, di poop bata Samariya ma kuñaaŋeniil maama bukanaku kagawutum jûdewwi kunebeem di buruŋabu bata Ata Emit. Ña bûynenaabu bata bo peh di kujam mo, di sûumiil noon. 4 Na kugam kûriiŋe Jerusaleŋ, grîsiya yata bo, di kumakaaku kata Jesus, di poop yahaanay yata grîsiya, di kuyaañuwiil. Ña di kuñaaŋeniil maama Emitay egawiim kuga. 5 Be kûynaaku kaaku kata di kaasaaku kata phârisewwi kâynemmi poop, di kûlhaalowul ma kêenul bukanaku kagawutum jûdewwi mbi kugawi huhaanaahu hata yîinaay, ban mbi ya kuga non ma kûboñaku kata Emitay kuloom.
6 Ña kumakaaku kata Jesus, di yahaanay yata grîsiya, di kuleeho ma kutabulhenoor mata eloba'uyu. 7 Na kugam koo katabulhenoorem, di kuga bûñoosoorabu bâamak. Ña Pedru nalhaalo ma alob aaniil: “Kutiyaay miwuul jîmire kaan piyuwe na Emitay ejotommi ute di miwuul, ma bukanaku kagawutum jûdewwi kujam elobay yata yo d'înje ma kûynen. 8 Emitay yoo êmiim êsigir yata an peh, yoo êyisum kaan êkine poop bukanaku kagawutum jûdewwi ma ewuliil Buynum Bunapaabu non ma ewulolaabom. 9 Ban egawutolaal di buko aahe di aahe. Mo ma êpasummi kûbajumiñaku katayiil non ulaal. 10 Moo, mata wa ma jilasowmem di Emitay, ma jiga bûynenaabu miñamu mânaatum, ban palimo poop ulaal di simpawolaal uyetoorutaal di mo? 11 Mata ulaal, ulaal ûynenaam nupakaal hurim kañankiitaku kata Ata Emit Jesus, moomu poop kaŋ ma buko kûynemmi, di kupak.”
12 Ña êsukay peh di epato ma kutallhen maama Barnabe koo di Pawlu ya kuñaaŋeniim maama Emitay ewuliim sembaasu ma kuga sîmanjumasu, di miñamu mata sembaasu sata yo di bukanaku kagawutum jûdewwi. 13 Na kugam kubane, Tiyaagu nalob ma âanul: “Kutiyaay, jitallhen! 14 Simoŋ taate nalobolaam kaan, kâtiyaar di bukanaku kagawutum jûdewwi, Emitay ejotum êsukay ka egam bukanaku kata yo. 15 Moo, coohene jak non ma buñaaŋenaabu bata kûboñaku kata Emitay buŋiicum kaan:
16 ‘Mbi iga ban nîlaañul,
bi ijuumulanken kâyyaku kata David kalom,
mbi icookoorlanken ko ma kujuum.
17 Ma bukan kameeŋe,
di poop bukaaku kagawutum jûdewwi
ka îwoom, mbi kûwool kañaaŋaku kûmbaam.
18 Mo ma Ata Emit aloom, agam ma wahaw peh ûmiri kata kaŋ niŋanu.’
19 “Momakiimom nijuke kaan, jakut ma ûlaamenaal bukanaku kagawutum jûdewwi kammi ma kûnebejewuum di buruŋabu bata Emitay. 20 Be haŋ majak ma uŋiicaayiil kaytaku di kaan, keetubi kutokoñ eluw yata encaam yabuji mata heenaay hagawim di ûkiinaw, di eluw yata encaam yakuucim, keetubi kutokoñ kâsim, keetubi kakay poop kâmoora. 21 Mata kûboñaku kata Emitay kata kaŋ niŋanu, hîyaayoohiyaay hata jûdewwi, ya kupiseni di siluupasu sata kâmebooraku katayiil.”
Kaytaku kaŋiicim be bata bukanaku kagawutum jûdewwi
22 Ña kumakaaku kata Jesus, di yahaanay yata grîsiya, di poop bûynenaabu peh, di kujuk kaan jake ma kujot kûynaaku kaaku kata di buko ma kureboor di Pawlu di Barnabe. Ña di kujot Judas, aaneyim poop Barsabas, di Siilas, kagam bukanaku kâynenaayaku, ma kukay di buko be Antiyokiya, 23 ma kuwuliil kaytaku ki kuwul bûynenaabu bata bo dâ kuŋiicum kaan: “Ûli kumakaaku kata Jesus, di yahaanay yata grîsiya jaamom kutiyuul, ûli ûsaapewuum di miwuul kûtiyoli jagawutum jûdewwi jata Antiyokiya, di jata bantaabu bata Siiriya, di poop bata Siliisiya. 24 Mata nujame kaan bukan kaaku d'ûli ka ubollootum, ukaylom ki kûlaamenuul ma kulobuul wahaw wagawuum gûulhaguulh. 25 Momakiimom nujamoor ma ûboñul kûynaa'uku ma kûreboorul di kûtiyoli ka uboolaatum kaamom Barnabe koo di Pawlu, 26 kawuupoorom mata bugoroorabu bata Jesus Kristu. 27 Moo, Judas koo di Siilas, ko ka ubollom ma mbi jijam di utumaw watayiil maama uŋiiculom di kaytaku. 28 Mata ûli di Buynum Bunapaabu, ujamoorum ma ootunki ugawuul joon hûlaam, be wahaw we jeelim jiga: 29 Aatuba jitokoñ eluw yata encaam yabuji mata heenaay, di yata encaam yakuuci, aatuba jitokoñ kâsim, aatuba jikay poop Kakumen. Jiga jaa non ma ulobuum, di jîmir kaan jigawe jak. Ña jilako kâsuumaay.”
30 Ban kûynaa'uku di kujaŋen ma kukay be Antiyokiya. Na kugam kûriiŋe, di kûmeb bûynenaabu kata bo ma kuwuliil kayta'uku. 31 Na kugam kupisen ko, di kûririgen mata hurimahu ha kutiyiil kuŋiiculiim, ña uynumaw watayiil di ûtik. 32 Judas koo di Siilas, ma kugam buñaaŋenaabu bata kûboñaku kata Emitay, ña di kulobiil wah wameeŋe ma kuhaŋ matîkeniil. 33 Ban di kupiyo bo deh, ña kutiyiil di kuwalhiil ma kulaañ kâsuumaay be Jerusaleŋ. 34 [Be Siilas nâanul alako bo para.] 35 Pawlu koo di Barnabe, di kupiyo bo Antiyokiya ma ya kulhikiten, di kuñaaŋen bo poop êsukay elobay yata Ata Emitay, di poop kûynenaaku kaaku kata bo ka ya kaaneniim.
Pawlu di kuwaasoor koo di Barnabe
36 Ban, nagam kunak, Pawlu naan Barnabe: “Ulaaña ma nki uyuugellaal kutiyolaal kammi di sîsukasu peh ta uñaaŋellaam elobay yata Ata Emit, ma ûmiraal mante koku bo jak.” 37 Ña Barnabe nâkin ma kuŋar Joŋ aaneyim poop Markus. 38 Be Pawlu âkint ma kuŋarool, mata ma abetuliim di êsukay yata Panphiiliya ma areboorut di buko be na kubammi bugoroorabu batayiil. 39 Ña Pawlu koo di Barnabe di kuñoosoor lhînŋa, poopii di kuwaasoor. Ña Barnabe naŋar Markus ma kûtip ma kukay be Sipri. 40 Pawlu poop naŋar Siilas ma kukay. Be bûynenaabu koo balhawereeban Emitay ma esiseniil. 41 Ña Pawlu nakay be di êsukay yata Siiriya, di yata Siliisiya ma ya âtiken sîgrisiyaasu sata bo.