Bagawerabu 16

Pawlu nakay di Timootiw

Ban Pawlu nâriiŋ Derbi di poop Listra. Be boo di êsukay yata Listra, arebooraaw ata Jesus nalako bo aaneyim Timootiw aamom añool añakanaw agam poop âynenaaw ata Jesus agam jûdew, be ampawool agawut jûdew. 2 Di êsuka'uyu yata Listra, di poop yata Ikooniw, bukanaku peh kagam bûynenaabu kata bo, ya kulob jak mata Timootiw. 3 Ña Pawlu nalob mata bûkayabu bata d'oo ma kureboor. Be na ammi akay d'oo, nagawool huhaanaahu hata yîinaay, mata bukanaku peh kata di bantaa'ubu kûmire kaan ampaw Timootiw ntuwa jûdew. 4 Ban di êsukoosuk ba kûrimmi, di kuñaaŋen kutiyiil kata di buruŋabu ma kusoh hurimahu ha kumakaaku kata Jesus, di yahaanay yata grîsiya yata Jerusaleŋ kujamoorlom. 5 Ña sîgrisiyaasu peh, kâynenaku katayiil di kûtik, ban poop hukoohuk bukanaku kâynemmi Jesus ya kuhaŋ to.

Emitay di êbaahul Pawlu mata bûkayabu bata be Masedoniya

6 Ban ma Buynum Bunapaabu bûkintum ma Pawlu koo di Siilas kukay ki kulob elobay yata Emitay di bantaabu bata Aasiya, ña di kuyab di bantaabu bata Phriisiya di Galaasiya ma kukay. 7 Na kuhuutum etaamay yata Mîisiya, di kûkin ma kukay be di bantaabu bata Bitiiniya, be Buynumabu bata Jesus di bulat ma kukay be bo. 8 Ña di kuyab di êsukay yata Mîisiya ma kukay be Trowadi. 9 Huk haahu busonnaaru koo dô di êsuka'uyu, Emitay di êbaahul Pawlu ma ajuk âynaaw ata Masedoniya akaylom ki ajuum ta ammi ma alhawool aanool: “Ûkayil be Masedoniya ma nki ôonenoli.” 10 Na Emitay êbaahuloom umu, ña nugoroor ma ukay be bo, mata ma anamulemmi kaan Emitay êwoololim ma ukay be bo ma nki uñaaŋeniil elobay yâsuumaay.

Liidiya nanebej di buruŋabu bata Jesus

11 Ña nûjupowum dô di busaanaabu di êsukay yata Trowadi ma ucunken be Samotraasiya. Hata kajom, nujaŋen be di huyaahu hata Neyapolis. 12 Ban nukay be di êsukay yata Philipus yagam êsukay yâmakaay yata di bantaabu bata Masedoniya, yagam êsukay yammi di uŋenaw wata Rooma, baamom ba ulakom ma uga bo kunak.

13 Di hukahu hata hîyyaayahu hata jûdewwi, nûcaalh dô di hankahu ma ukay be ñata di kaalaku, di kaan mante nujuk tiŋ tata kalhawaku kata Emitay. Na ûrimbom, nuleeho ma ya ulob di yaaraay kâmeboortom. 14 Anñaakan aahu aleehotom aaneyim Liidiya ata êsukay yata Tiyatiira, anoomem sileesaasu sâyemaasu saseeraasu, ata di buruŋabu bata jûdewwi ya âtallhenoli. Na ya âtallhenolim, Ata Emit nâbaahul buynumabu batawool ma anamulen miñamu ma Pawlu ya alobiim. 15 Na añakanaw umu, di bukanaku kata yanŋool kûbatiisim, naga ban nâlhawoli ma âanoli: “Nokoor ja noon jîynene kaan înje anaw âynemmi Ata Emit, di jîkayil ki jiwalen yanŋom.” Ña nâhaatoli ma ukay.

Pawlu koo di Siilas, di kukullhi

16 Huk haahu, ûli ma ukaayem be tiŋatu tata kalhawaku kata Emitay, âjuraw agam amiikeelaw a amalaw âjupom ma agawool ya awaasen, nâkayil bi upam. Âjuraw umu di heenaaya'uhu, ya aga bukanaku kakiloom ma ya kubaj bancaamabu noon. 17 Ña nâsoolhenoli ma ya âŋaaŋulo âanul: “Kûynaa'uke bugorooraabu bata Emitay Yahammi Wahaw Peh, kañaaŋenewuum mata buruŋabu bata japakaju.” 18 Âjuraw umu ya âgawoli mo kuk kameeŋe, poopii Pawlu di mulaañool. Ña nâtiiwo ma ajooŋoor d'oo, ban naan amalaw âjupuwoom: “Amalawe, di kañaaŋaku kata Jesus Kristu, ûcaalh di âjuraw umu!” Ña to kaŋ cab, amalaw umu nâcaalh.

19 Na bukanaku kakiloom kûmiim kaan keetunki kubaj joon bancaam di keenaayaku katawool, ña di kusoh Pawlu koo di Siilas ma kûhuuliil be di hânkijahu hata êsukay ta kâyyaku kemmi. 20 Kûriiŋ di keen yahaanay: “Kûynaa'uke buko jûdewwi, be koku ûde ma kugawem di êsukay gûulhaguulh, 21 ma ya kulhikiten bukanaku bagawerabu ba ulaal jata Rooma ûkintaam, mata ûgaworiitaa'bo.” 22 Ña buyooŋabu bata bukanaku di kûlhaalowul ma kûlowum Pawlu koo di Siilas. Ña yahaanay di kûcaalheniil wañaw, ban di kuga bukanaku ma kuwuutiil.

23 Ña di kuwuutiil lhînŋa, ban di kuŋariil ki kukullh. Ban di keen akullhaaw akullhiil jak ma keetubi kumellh. 24 Mata ma kuloboom umu, ña naŋariil ki akullh di ekullhay yata dâada, ban naga ûkandumaw watayiil di egenkay yata utaaguwaaw.

25 Na hukahu hugam huhuute kare, Pawlu koo di Siilas koo ma kulhawem di Emitay, ban ya kuyeeŋ ma kusal yo. Bukan kaaku kâkullhidom ya kutallheniil. 26 Ña to kaŋ wûb, etaamay di egogoroor kaŋ lhînŋa, poopii ekullhay di egogoroor kaŋ pooyo. Ña sîtingaasu peh di sîbabulo, baseelabu poop ba kûgenkummi bukanaku kûkulhidom di butij. 27 Na akullhaaw atonkom, najuk sîtingaasu sata ekullhay ma sîbabulom, ña nanong âanul mante bukanaku kâkullhidom kumelhe ban. Ña nâlhiimulul kajaasiyaaku ma âanul abujooro. 28 Be Pawlu nâŋaaŋulo lhînŋa ma aanool: “Aatuba ugawooro makeel, mata ûli ume ute pôopoli!” 29 Ña akullhaaw umu nâlhawul elampaay, ban nanebej di ekullhay cab oo ma abobokenem, âriiŋ nâtiigen ñata di ûkandumaw wata Pawlu koo di Siilas. 30 Ban nâcaalhul di buko âriiŋ naaniil: “Kutiyaay, wa neelim iga ma ipak?” 31 Be di keenool: “Ûynen ja Ata Emit Jesus, mbi upak, di poop bukanaku kammi yanŋi.” 32 Ña di kuñaaŋenool elobay yata Emitay, di poop bukanaku peh kammi yanŋool. 33 Ña nownu kaŋ hukaru, âynaaw umu nacookooriil ma akullheniil kucokaaku. Ban di kûbatisool, di poop bukanaku kammi yanŋool. 34 Ban akullhaaw umu naŋariil be yanŋool, âriiŋ nawuliil kuri. Ña akullhaaw umu, di bukanaku kata yanŋool, di sûumiil noon mata ma kûynemmi ban Emitay.

35 Hata kajom, yahaanay yata romanuyi di kûboñul bukanaku ki keen âynaaw umu akullhem bukanaku awalhen Pawlu koo di Siilas. 36 Ña akullhaaw umu naan Pawlu koo di Siilas: “Yahaanay yata êsukay keene iwalhenuul. Moo, jîcaalh ma jikay kâsuumaay.” 37 Be Pawlu naaniil: “Ûli di Siilas jagam bukanaku kata Rooma, di kûsoholi kûnagul di mameeŋaamu, ban di kûkullholi bâgawutoli batalen. Ban nkit kûkine kûwalhenoli an bâmirut? Mumulet bi kuga mo! Buko kumuumiil yahaanay, mbi kûkayil bi kûwalhenoli.”

38 Ña bukana'uku di kukay ki kuloo'mo yahaana'uyu. Be na kûmiim kaan Pawlu koo di Siilas buko bukanaku kata Rooma, ña di kûkoli. 39 Ña di kukay ki keeniil kuñankiitiil, ban di kûcaalheliil di ekullhay ma keeniil kûcaalh dô di êsuka'uyu ma kukay. 40 Ña Pawlu koo di Siilas, di kûcaalh dô ma kukay be di eluupay yata Liidiya. Na kûrimmi di kûtoo'do kutiyiil, ña di kûtikeniil ban di kukay.