Pawlu koo di Siilas di kûriiŋ Tesaloonika
17
Ban Pawlu koo di Siilas di kuhul ma kukay be di êsukay yata Anphiipolis, di poop yata Apoloniya ma kucunken be Tesaloonika, ba jûdewwi kubaam eluupay yata kâmebooraku. 2 Di kîyyayaku kûhaaji, Pawlu ya akay ki atookii'bo ma anebej di eluupay yatayiil yata kâmebooraku ma ya alob êsukay mata Baŋiicerabu Bâñoyyaabu non ma apiimpiim naga; 3 ya añaaŋeniil ma âyisiil kaan, malhegen Kristu mo ma mbi âlaam ma kubujool, ban mbi âlhaalowul di kuketaaku. Ban poop ya aaniil: “Jesus a iñaaŋenem di miwuul matawool oo agam Kristu.” 4 Ña Pawlu koo di Siilas di kuhaat bukan kaaku kata di êsuka'uyu ma kubom buruŋ. Bukan kameeŋe kagawutum jûdewwi kasoom buruŋabu bata jûdewwi, di poop yaaraay yameeŋe kagam bukanaku kâamak kata di êsuka'uyu di kunebej ma kubom buruŋ di buko.5 Be jûdewwi kaaku kâynentum maama Pawlu añaaŋeniim, di kûsiibuwikoor, ña di kukay ki kûŋarul kûynaaku kaaku kâlhapitaaku kalakuwem tîyaŋ di uruŋaw ma kuga kaasaaku ma kûriiŋ di kuga êsukay gûlhagulh. Ban kaasaa'uku di kukay ki kunebej di eluupay yata Jason di sembe ma kûkin kûŋarul Pawlu koo di Siilas ma kuŋariil ki kuwul êsukay. 6 Be kutookutiil dô, ña di kûsohul Jason, di kûynenaaku kaaku ma kûhuululiil ki kuwul yahaanay yata êsukay. Ban ya kêenul: “Kûynaa'uke kûgulhe ban etaamay peh! Moo jaat kûrillo di êsukay yatoolaal. 7 Be na kûrillom ûde, Jason awaleniim yanŋool. Ban ya kuhuusul maama âyyaw âmakaaw ata Rooma aloom, ma ya kêenul kubaje âyyaw aahu aaneyim Jesus.” 8 Na kuloom umu, ña buyooŋabu bata bukanaku, di poop yahaanay yata êsukay kalakotom, di mulaañiil. 9 Ña di kuga Jason di kûynenaa'uku kuncaam, ban di kuwalheniil ma kukay.
Pawlu koo di Barnabe di kûriiŋ Bereeya
10 Ban na tigam tijone, bûynenaabu kata bo di kuga Pawlu koo di Siilas ma kukay be Bereeya. Na kûrimbom di kukay be di eluupay yata kâmebooraku yata jûdewwi. 11 Be êsukay yata Bereeya kuhaŋ ma ga ûyegetaw watayiil jak kata Tesaloonika. Mata ya kutallhen jak elobay ya Pawlu koo di Siilas ya kulobiim, ban kukaku pooko ya kupisen Baŋiicerabu Bâñoyyaabu ma kulaso mante wahaw wa Pawlu ya alobiim malhegen. 12 Ña bukan kameeŋe kata di êsuka'uyu kagam jûdewwi di kûynen. Kaaku poop kagawutum jûdewwi kagam yaaraay kagam bukanaku kâamak kata di êsuka'uyu, di poop yîinaay yameeŋe di kûynen. 13 Be na jûdewwi kata Tesaloonika kujammi kaan, Pawlu oo ma añaaŋenem elobay yata Emitay di êsukay yata Bereeya, ña di kukay be bo kûriiŋ di kusullen êsukay ma kugawiil gûulhaguulh mata Pawlu. 14 Ña Bûynenaabu bata Jesus kata Bereeya, di kuga Pawlu ma kuyab di buruŋabu bakekelhemmi hulhuwahu ma akay, be Siilas koo di Timootiw di kulako bo. 15 Ña kûynaaku kasisemmi Pawlu, di kukay d'oo be Ateenas. Na kugam ma kûlaañul, Pawlu naaniil ki keen Siilas koo di Timootiw kuga sembe ma kuga cab, ma kukay ki kutookoo'bo.
Pawlu nañaaŋen elobay yata Emitay Ateenas
16 Be na Pawlu ya akoom Siilas koo di Timootiw bo Ateenas, di mulaañool mata ma ajuum ma êsuka'uyu ememmi ûkiin. 17 Ña ya akay be di eluupay yata kâmebooraku kata jûdewwi, di poop bukan kaaku kagawutum jûdewwi kâynemmi di buruŋabu bata jûdewwi, ma ya alob di buko. Ban poop kukaku peh, ya akay be di hânkijahu hata êsukay ma nki ya alob di bukanaku ka mbi atoo'bo. 18 Ña bulhikitenaabu kaaku kata kaasaaku kaaneyim êpikorewus, di poop kata estoykus, di kûkayil ki kulob di Pawlu ma kuga bûñoosoorabu ma ya kêenul: “Kama buloba ume poop âmirutum makeel naane bu?” Kaaku ya kurinkoor ma kêenul: “Ujam noon omu ma alobem mata simit saasu sa ûmirutaam!” Ma kûlobummom, mata ma Pawlu ya añaaŋeniim mata Jesus, di poop mata jalhaalaaju jata di kuketaaku. 19 Ña kûynaa'uku di kukay di Pawlu be tiŋatu ta kulhanem taaneyim Arewoopagu, kûriiŋ di keenool: “Ûli nûkine ûnamulenoli jaat eloba'uyu ya ûli ûmirutum ya ulhikitenem di yo bukanaku. 20 Mata aw malobem d'ûli wahaw wa ûli ûmirutum. Moo nûkine ûnamulenoli wo!” 21 Mata bukanaku peh kata Ateenas, di emaasooraay kâkindom, ya kûkin kulob, di kujam poop wahaw wakitem di ujammi.
22 Ña Pawlu nalhaalo ma alob di êsukay ma aaniil: “Êsukay yata Ateenas, înje nîmire kaan miwuul bukanaku kâynemmi lhînŋa simitasu satawuul. 23 Mata na ya iyuuŋoorum ûde di êsukay yatawuul, nijuk tiŋ tameeŋe ta jiwaasenem simitasu satawuul, be nijuk poop taatu tateepim ban di ŋiici dô: ‘UTE BE BATA EMITAY YÂMIRUTIM.’ Moo, Emita'uyu ya jiwaasenem bâmirut, yooyu kaŋ ya înje emmi ma iñaaŋenem di miwuul mata yo.
24 “Mata yoo ecookoorum etaamay, di wahaw peh wândom, yoo egam Ata Emit ata hatiya di emitay, di poop etaamay, ban êlakuworiit di eluup ya ajamaat acookoore di uŋen. 25 Êkinoriit poop ma an acookoor wah awuu'yo, mata yoo egam ajamaat abaj huyiih ma aroŋ, di poop wah peh. 26 Di anaw anoraw êwwenummi bukanaku kata âmbasuk peh ma kukin di etaamay. Be bala yeen êwuwen bukanaku, di esing ejot tiŋatu ta mbi kukin, di poop kukaku ka mbi kuga to. 27 Emitay ega mo, ma bukanaku peh mbi kupaam yo, mante di kûmir mata yo, mata elet ma êraagiyolaam. 28 Mata yoo êwwenolaam, nuroŋaal, nureesaal. Mata mo ma kaaku kata di miwuul kuŋiicum kêenul: ‘Ulaal poop kuñool yo.’
29 “Moo, ma ugawaam kuñool yo, mumulet bi unongaal kaan Emitay enaamoore di bâkiin, ba an âwoosiye kuŋen acookoorem di miñ mata ûuru, mante mata praata, be mante mata ewaaliis. 30 Mata noo napiyaanu, Emitay yoo ewaabom bukanaku kulako di banamulentabu batayiil, be jaat ebollo ma ajamaat peh ammi tiŋootiŋ awatatenooro mata kûbajumiñaku katawool. 31 Mata yoo ebandoore ban hukahu ha mbi ega batalenabu an poopool di anaw a êjotaalim ban. Be di êyis wahaw uwu êsukay peh, na elhaalellom âynaaw umu di kuketaaku.”
32 Na kujammi ma Pawlu aloom mata jalhaalaaju jata di kuketaaku, bukan kaaku di kûlhuwool, be kaaku di keenool: “Ûli nûkine ma mbi ûlaañul joon bi ûñaaŋenoli mata eloba'uye.” 33 Ban Pawlu nâcaalhul ma akay. 34 Be bukan kaaku di kûynen ma kunebej di buruŋa'ubu. Di bukana'uku kanebeem, aahu naaneyim Diyoniisiw aamom ata di yahaanay yata tiŋa'utu ta kulhanem, di anñaakan aahu aaneyim Damaris, di poop bukan kaaku.