Pawlu nâriiŋ Kôrintu
18
Ban Pawlu nâcaalh Ateenas, ma akay be di êsukay yata Kôrintu. 2 Na ârimbom, natoo'bo âynaaw ata di êsukay yata Pontu aaneyim Akila. Âynaaw umu oo bapiyowut na kûcaalhumulom Itaaliya koo di apañoorool Prisila, mata ma Klawdiw aganom âyyaw ammi bukanaku peh kagam jûdewwi kûcaalh Rooma. Ña Pawlu nakay ki kûjukoorul, 3 be ma bugoroorabu batawool bata jacookooraju jata ûngungaw bugam banor di batayiil, ña nakay ki kulako tanor ma kugoroor. 4 Be Pawlu ya aga hîyyaayoohiyyaay hata jûdewwi, nakay be di eluupay yata kâmebooraku katayiil ma ya alob di jûdewwi, di poop kaaku kagawutum jûdewwi, di kaan mante nahaatiil ma agawiil kûynen.5 Be na Siilas, koo di Timootiw kâcaalhumulom Masedoniya kugam kûrimbo, ña Pawlu nawalen peh, ma ajooŋoor di jañaaŋenaju jata elobay yata Emitay, ma ya âyis bukanaku kagam jûdewwi kaan Jesus agam Mesiyas. 6 Be di mulaañiil di Pawlu ma ya kugelool. Ña narab wañaw watawool ban naaniil: “Emitay êjimenuu'ja, ibajut hûbajumiñ. Be maame ña ma ikay be di bukanaku kagawutum jûdewwi.” 7 Na agam nâcaa'to, nakay be di eluupay yata âynaaw asoom jak buruŋabu bata Emitay aaneyim Tiisiw Justu, akimmi ñata di eluupay yata kâmebooraku kata jûdewwi. 8 Krispu aamom annahaanaw ata eluupa'uyu yata kâmebooraku kata jûdewwi, nâynen Ata Emit Jesus, di poop bukanaku peh kata yanŋool. Bukan kameeŋe poop kata dô Kôrintu kajammi elobay yata Emitay, di kûynen ma kûbatisayi.
9 Huk haahu busonnaaru, Ata Emit nâbaahul Pawlu ma aanool: “Aatuba ûkoli, onken ma ulob aatuba upato, 10 mata injumu d'aw, moo an aatuba asoken agawi makeel, mata bukan kameeŋe kata di êsuka'uye kûmbaam.” 11 Ban Pawlu nalako bo kajaañ di kulheeŋaku hutok di hanor, ma ya alhikiteniil elobay yata Emitay.
12 Na Gaaliw aleehom di kâyyaku kata bantaabu bata Akaya, bukanaku kagam jûdewwi di kusohoor ma kûlowum Pawlu ma kusohool ma kukay d'oo be di kâyyaku kata batalenabu. 13 Kûriiŋ di keen âyyaw umu: “Âynaaw ume omu ma âkimmi âtiiw êsukay ma kusoh buruŋabu bata Emitay non ma kûboñaku katoolaal kulatum.”
14 Be na Pawlu ammi ma alob, Gaaliw naan jûdewwi: “Gaween jaa non miñ majakut nagam, be mante hûbajumiñ hâamak nabaam, mânooman mbi itallheneenuul. 15 Be magam eloboolob keb, di mata uñaaŋaw, di poop mata buruŋabu batawuul, muwuul mbi jîmir maama mbi jiga. Moo înje mumulet bi igawuul batalenabu!” 16 Ban nâcaalheniil dô di kâyyaku kata batalenabu. 17 Ña buko peh di kusoh Soostenis aamom annahaanaw ata eluupay yata kâmebooraku katayiil, ma kûnaguloo'to tîyaŋ di kâyyaku kata batalenabu, be Gaaliw abagutiil.
Pawlu nalaañ be Antiyokiya
18 Ban Pawlu nalako bo Kôrintu kuk kayeje. Ban nawaa'to kutiyool kata bo, ma âjupo di busaanaabu ma akay be Siiriya. Di kukay no koo di Prisila, di apañoorool Akila. Be Pawlu mata ma agam miñamu ma aloom kaan mbi aga be bata Emitay, ña na agam ma âjupo Senkreya naweelho. 19 Na kugam kûriiŋe di êsukay yata Ephesu, Prisila koo di Akila di kulako dô. Be Pawlu nakay be di eluupay yata kâmebooraku kata jûdewwi, ki añaaŋeniil elobay yata Emitay. 20 Ña di kulhaw Pawlu ma keenool alako bo haahe, be nalat. 21 Be na agam ma akay, naaniil: “Sûum di Emit, mbi îlaañul huk haahu.” Ban nâjupowum dô Ephesu di busaanaabu ma akay.
22 Na agam nawaluwe Sesareya, ña nahulh be Jerusaleŋ, na ârimbom, nakay ki ajaalhen êgrisiyaay yata bo, ban nahulh be Antiyokiya yata Siiriya. 23 Ban nalako bo maa, nakay ma ayab di bantaabu bata Galaasiya, di Phriisiya, ma ya akay tiŋootiŋ ma ya âtiken bûynenaabu peh bata Jesus.
Apolu nâriiŋ Ephesu
24 Piyowut, âynaaw agam jûdew ata Alesandriya aaneyim Apolu nâriiŋuu'bo Ephesu. Âynaaw umu nâwoosiwoosi balober, ban poop nâmire jak Baŋiicerabu Bâñoyyaabu. 25 Âynaaw umu poop, omu ma alhikitenim jak buruŋabu bata Ata Emit, mata ya alob salh, ban ya alhikiten bukanaku jak mata Jesus. Be jâbatisaju jata Joŋ keb nâmiim. 26 Ña ya alob elobay yata Emitay di eluupay yata kâmebooraku kata jûdewwi bâkoliit. Be na Prisila, koo di apañoorool Akila kujamoom, di kuŋarool be yanŋiil ki kunamulenool jak jak mata buruŋabu bata Emitay.
27 Na Apolu ammi ma akay be di bantaabu bata Akaya, kutiyool kata bo Ephesu, di kûtikenool, ban di kuŋiic kaytaku ma kulhaw kutiyiil kata Akaya ma keeniil mbi kucookoorool. Na ârimbom, naanen noon bukanaku kâynemmi Emitay mata kañankiitaku kata yo. 28 Mata di sembaasu sata yo, ya ahaat jûdewwi ma ya apisen Baŋiicerabu Bâñoyyaabu ma ya âyisiil kaan Jesus agam Mesiyas.