Pawlu nâriiŋ Ephesu
19
Nagam Apolu omu Kôrintu, Pawlu nakay be di bantaabu bammi karebaku kata kurimbiliŋaku ma akay be Ephesu, âriiŋ natoo'bo kurebooraaku kaaku kata Jesus, 2 narinkiil aaniil: “Miwuul jiyabe ban pîya Buynum Bunapaabu na jinebeem di buruŋa'ube?” Di keenool: “Iyiy, ûli ujameenorut poop mata Buynum Bunapaabu!” 3 Ña Pawlu narinkiil joon aaniil: “Kama di jâbatis bu, jîbatisumim?” Di keenool: “Ûli di jâbatisaju jata Joŋ nûbatisumim!” 4 Be Pawlu naaniil: “Jâbatisaju jata Joŋ, jiga poop non êmanjum ya yâyisum kaan anaw nawatatenooruwe. Be ban ya aan bukanaku, mbi kûynen anaw ammi ma âkayewuum kujeeŋandawool aamom Jesus.”5 Na kujammi ma alobiim umu, ña di kûbatiisi di kañaaŋaku kata Ata Emit Jesus. 6 Ban Pawlu naga uŋenaw watawool di buko ma alhaw Emitay, ña Buynum Bunapaabu di bûwalowul ki beeniil huc. Ña ya kulob silob saasu sa kujamutum ma ya kulob mata Emitay. 7 Kûynaa'uku peh, keemo kunŋen di egaba.
8 Ban Pawlu nalako bo kulheeŋ kûhaaji ma ya akay di eluupay yata kâmebooraku kata jûdewwi ma ya alob êsukay malhegen bâkoliit, ma ya añaaŋeniil ma âkin agayiil kûynen mata kâyyaku kata Emitay. 9 Be bukan kaaku di kulat kâynen maama ya añaaŋeniim, ña ya kûlobikoor to ta êsukay yemmi mata buruŋabu bata Ata Emit. Ña Pawlu nâbetii'dô ma aŋar bûynenaabu ma kukay be di elekooray yata âynaaw aaneyim Tiranu, ki ya alhikiteniil dô kukaku pooko elobay yata Emitay. 10 Ña ya alhikiteniil elobay yata Emitay be kaŋ nâriŋemmi ujaañaw ugaba, poopii bukanaku peh kata bantaabu bata Aasiya kagam jûdewwi, di poop kaaku kagawutum jûdewwi, di kujam elobay yata Ata Emit.
Kuñool Seeva
11 Emitay di ega no Pawlu ma ya aga miñamu mâamak mata sembaasu sata yo, 12 poopii bukanaku ya kuŋar mumusuwaaramu, di poop kollhakua katawool ki ya kugor bukaniil kâjuutum. Ña bukana'uku di kûju; kaaku poop kumalaku di kûcaalh. 13 Ña kûynaaku kaaku kagam jûdewwi kayuuŋoorem ma ya kûcaalhen kumalaku kâjupom bukanaku, di kûkin kûcaalhen kumalaku kûjupom bukan kaaku di kañaaŋaku kata Jesus, ma ya kêenul: “Jîcaalh di kañaaŋaku kata Jesus aamom a Pawlu añaaŋenem matawool!” 14 Kûynaa'uku ka ya kagam umu keemo hutok di egaba, buko kuñool âynaaw agam jûdew aaneyim Seeva, agam annahaanaw âmakaaw ata bumaaŋenaabu bata Emitay.
15 Be huk haahu, amalaw aahu naaniil: “Înje nîmire jak Jesus, di poop Pawlu! Be miwuul yeymoom?” 16 Ña âynaaw a amalaw umu âjupom, nâlhaalowul ma asohiil ânagul poopii nacokiil. Ña di kutey di eluupa'uyu barindiŋ. 17 Na êsukay kata Ephesu kagam jûdewwi, di poop kaaku kagawutum jûdewwi kujammom, di kûkoli noon; ña êsukay di ehaŋ masal kañaaŋaku kata Ata Emit Jesus. 18 Ña bukan kameeŋe kâynemmi Jesus, di kûkayil ki kurej ta êsukay kemmi wahaw wajakutum wa kugam. 19 Bukan kaaku poop kawaasenem di kûmeb uytaw watayiil wa kuwaasenumem ki kuyaben ta êsukay kemmi. Uytaw uwu di upini, bancaamabu bata wo, di bûriiŋ sînjunnaasu bukanaku egaba di kunŋen (50.000) sata bankelenkeleŋabub bata praata. 20 Ña elobay yata Ata Emit, di ehaŋ malobi di sembe, di ehaŋ poop mawaasoor di êsukay peh.
21 Na wahaw uwu ugam ban, Pawlu nalob mata bûkayabu bata be Jerusaleŋ. Be nâanul mbi ayab di êsukay yata Masedoniya, di yata Akaya ma ahulh be bo. Ban poop nâanul: “Mbi îriiŋ Jerusaleŋ, nihul be Rooma.” 22 Ña Pawlu naboñ kutiyool egabaay kaanenewoom, kaamom Timootiw koo di Erastu, ma kukay be di êsukay yata Masedoniya, ma oo alako bo di bantaa'ubu bata Aasiya, ma apiyo bo jinŋet.
Bûgagaroorabu bagam di êsukay yata Ephesu
23 Nownu di êsukay yata Ephesu, bûgagaroorabu bâamak di buga bo mata buruŋabu bata Ata Emit. 24 Mata ahaañaaw aaneyim Demeetriw, ya aŋar praata ma ahaañ miñamu manaamoom di bâkiinabu batayiil baaraabu baaneyim Diyaana. Be mata ma bugorooraabu batawool kubajem bancaamabu bâamak, 25 ña nâwoolul bugorooraa'ubu, di poop kupaalool ka kugawem bugoroor banor ma aaniil: “Kutiyaay miwuul jîmire kaan bugoroora'ube batoolaal boo bugam ma usaanumuwaal! 26 Moo, miwuul jijuke, ban jijame non ma âynaaw ume a keenem Pawlu ammi ma alobem di êsukay kaan simitasu sahaañeyim sigawut simit silhegenumaay; ma âcukumul Aasiya be kaŋ ube Ephesu, ma âtiiw bukanaku peh ma kûynen maama alobem di mo. 27 Moo, mbi ujaamuwaal ka mbi bugoroorabu batoolaal bukaaño. Di poop maama mbi eluupay yata bâkiinabu batoolaal baamom Diyaana burembeeli, ban poop êriibiinaay yata bo di ebawo. Ba ûmiraam kaan bukanaku kata Aasiya, di âmbasuk peh kûkayewuum ki kusal.”
28 Na êsukay kujammi ma aloom umu, ña di kubirik lhînŋa. Ña di kûŋaaŋulo ma ya kêenul: “Diyaana bagam emitay yâmakaay yata Ephesu!” 29 Ña êsukay peh yata Ephesu di ega gûulhaguulh. Ña di kukay ki kusoh Gaayu koo di Aristarku kata Masedoniya kareboorem di Pawlu ma kûhuuliil be tiŋatu tata hulhanahu. 30 Ña Pawlu nâkin ma akay ki ânebee'dô ma alob di êsukay, be bûynenaabu bata Jesus di kulat. 31 Kûynaaku kaaku poop kagam bukanaku kâamak kagam kupaal Pawlu kata di bantaa'ubu, di kuboñ ma keenool aatuba awuupooro ma atookii'bo.
32 Ña êsukay kâlakodom di hulhana'uhu, di kuga dô gûulhaguulh, ma bukan kaaku ya kûŋaaŋulo ma kulob maamu, kaaku poop di kûŋaaŋulo ma kulob maamu. Mata bukan kameeŋe kûmirut maama kukaymulom. 33 Jûdewwi di kuhar Alesandri ma akay ki ajuum kayooŋ ma alob. Be bukan kaaku di kunamulenool maama mbi alob. Ña nâwiit êsukay kaŋenaku ma âkin alob di buko. 34 Be na kûmiim kaan Alesandri oo jûdew, ña buko kaŋ peh di kûŋaaŋulo di manor siwooraasu sigaba ma kêenul: “Usalaal Diyaana bâmakaabu bata Ephesu.”
35 Ña aŋiicaaw ata di kâyyaku ata dô Ephesu, nahaat êsukay ma agawiil kupato, ban naaniil: “Kutiyaay ulaal jata Ephesu, aymoom âmirutum kaan ulaal êsukay yasoom tir bâkiinabu batoolaal Diyaana, di poop ewaalisay yata bo yalolom hatiya di emitay? 36 An alet a mbi âanul ntuwa malhegen! Moo, jibeb ma aatuba jihaken ma jiga miñ makeel banongoorut. 37 Mata kûynaa'uke ka jiŋallom kûkuutut makeel di bâkiinabu batoolaal, ban poop kugelut bo. 38 Moo ga jaa non Demeetriw, koo di bugorooraabu batawool, kujuke makeel majakut di an akeel, di kukay di kâyyaku kata batalenabu, mata bukanaku kata dô koku to. Ban poop baje kukaku kata na kugawem batalenabu. 39 Be ga ja poop non jîkine jirink wah wakeel, di jikob be nata hukahu hata batalenabu, non ma ugawaalem. 40 Be mbi ujaamuwaal ka mbi hankahu hêenul ûlaal ûkinaam ugawaal bûgagaroorabu di yahaanay yata êsukay, mata ma êsukay egawem di ume gûulhaguulh, ntuwa wah wajake. Ban ootubi ubajaal maama mbi ulobaal êsukay.” 41 Ña na agam nabane, naan êsukay kuwaasoor ma keet.