Pawlu nakay joon be Masedoniya di Akaya
20
Ban na bûgagaroora'ubu bugam bubawe, Pawlu nâwoolul bûynenaabu ma alob di buko ma âtikeniil, ban nakay be di bantaabu bata Masedoniya. 2 Ña ya areesoor di sîsukasu sata bo ma ya alob di bûynenaabu ma ya âtikeniil be na ârimmi Akaya, 3 ba agam ban nalako kulheeŋaku kûhaaji. Be na agam ma âtip di busaanaabu ma ahulh be Siiriya, ña nâmir kaan bukanaku kagam jûdewwi koku ma kuyuuboorem d'oo. Ña nâlaañumu'to ma ayab buruŋabu bata Masedoniya. 4 Be Sopatru ata Bereeya, aamom añool Pira, di Aristarku, di Segundu, kaamom kata Tesaloonika, di Gaayu ata Derbi, di Timootiw, di Tikiku, di poop Troophimu kawoom Aasiya, di kusisenool. 5 Be buko di kûyaboli kayooŋ, kûriiŋ di kûkoboli Trowadi. 6 Na kâlundaayaku kata kûmburuwaaku kaakutum phermentu kugam kubawe, nkit nûjupo di busaanaabu di êsukay yata Philipus ma ukay be Trowadi. Be nuga kukaku hutok, nutookii'bo. Be ban nulako bo ma uga bo kukaku hutok di kugaba.Ewtiku nâlowul di eyinumay
7 Na hukahu hûtiyaarahu hata hîyyaayahu hata jûdewwi hûrimmi, hukaru nûmeboor ma ûgiitoor hûmburuwaahu. Be mata ma Pawlu âkimmi ma mbi ahulh hata kajom, ña naloo'no kaŋ di êsukay, poopii hukahu di hure. 8 Dîŋa'udu da ûmeboorum, di etaahay êhaajutay, ban sihikitenumasu soo dôo lhay. 9 Ajaajuwaw aahu aaneyim Ewtiku, naleeho no di eyinumay. Be mata ma Pawlu aloom piyo, kaŋotaku di kusohool, ña nâŋalub. Mo ma âŋalubum poopii, nâlowumu'dô hatiya di etaaha'uyu êhaajutay be di etaam. Be na kugam ma kulhaalenool, oo ma akeem. 10 Ña Pawlu nâwalowul âriiŋ nâñup ma alhomool, ban naaniil: “Sâkoli, omu ma arommi!” 11 Ban Pawlu nalaañ aŋool be dô, âriiŋ natij hûmburuwaahu ma atokoñ, ban nalaañ alob joon piyo poopii jaley natitijen; ban nakay. 12 Be di kuga ban di kukay di ampa umu di baroŋerabu be yanŋool. Ña bukanaku peh di sûumiil noon.
Pawlu nâcaalhum Trowadi ma akay be Miletu
13 Ban nûjupowum to di busaanaabu ma ukay be Asoos ba nki Pawlu âjupowum. Mata ma âanolim mbi âyabul buruŋabu butiyaabu be bo. 14 Be na agam nârillo dô, nuyabool di busaanaabu ma ujaŋen be di êsukay yata Mitileni. 15 Ña nuyab di busaanaabu ma ukay, hata kajom nuhulh ñata Kiyos, ban titijen nûriiŋ Samus. Ban hata kajom, nûriiŋ Miletu. 16 Be mata ma Pawlu âkimmi ma kâlundaayaku kata Pentekosti mbi kutookool Jerusaleŋ, ña mo ma âkaytummi be Ephesu ma aatuba mbi apiyo di bantaa'ubu bata Aasiya.
Pawlu nâwoolul yahaanay yata grîsiya yata Ephesu
17 Ban Pawlu oo baroŋ Miletu, naboñ ma kûwoolul yahaanay yata grîsiya yata Ephesu. 18 Na kugam kûrillo, naaniil: “Miwuul jîmire jak non ma igam ute di miwuul kata kaŋ na îrillom kâtiyaar ube di bantaabu bata Aasiya. 19 Jijuke non ma ya igoroorum mata Ata Emit bagawoorowut noon an, di mukulamu mûmbaam dilo, di poop hûlaamahu ha bukanaku kagam jûdewwi kugawommi. 20 Jîmire kaan îñoorutuul hurim hakeel haalim heenenuul, be nilhikitelhikitenuum elobay yata Emitay di mameeŋaamu, di poop siluupasu satawuul, 21 ma ya îyis bukanaku kagam jûdewwi, di poop kaaku kagawutum jûdewwi kaan jake ma kuwatatenooro mata kûbajumiñaku katayiil ma kusoh di Emitay ma kûynen Jesus Kristu.
22 “Moo, ma ikay be Jerusaleŋ, ma iga non ma Buynum Bunapaabu bûyisommi. Be îmirut miñamu ma nki mugawom bo. 23 Be miñamu ma bûyisommi, di êsukoosuk hûlaamahu, di poop sikullhasu, semmi ma sikobem d'înje. 24 Be înje, inongoorut mata sîŋindaasu sûmbaam, be miñamu ma îkimmi mahammi majak, ma îwuñen bugoroorabu ba Ata Emit Jesus awulommi bata jañaaŋenaju jata elobay yâsuumaay yata Emitay yâncaamoriitim.
25 “Malhegen, ute nulakuwaam ma ya iñaaŋenuul mata kâyyaku kata Emitay, be jeetinki jijuk buulabu bûmbaam joon. 26 Moo, ma ilobuul jak kaan an akeel di miwuul anep jaa kajom, hûbajumiñ hulee'to d'înje; 27 mata bajut miñ ma inamulentuum ma Emitay êkimmi. 28 Moo, jiga ûyegetaw watawuul jak, ban di jisoh poop jak hûtekenahu ha Buynum Bunapaabu buwuluum jisoh, mata ma jigam yahaanay yata grîsiya ya Emitay, ya ênoomummi di hûsimahu hata Añool yo. 29 Be înje nîmire kaan na mbi iga nikaaye, bukan kaaku mbi kûnebejul ma kuga non siŋiiriŋ kaatumbi kuñankiit hûtekenahu hata Emitay. 30 Kaaku poop kata di miwuul, mbi kûlhaalowul ma ya kulob miñamu magawutum malhegen, ma kuga bukaaku kulaañ batayiil. 31 Be jake ma jijaamuwoor, mata jîmire kaan ute nulakuwaam ujaañaw ûhaaji, ma ya iga anoowan nilhikitenool, ntuwa tutulay, ntuwa busonna, di mukulamu mûmbaam dilo.
32 “Moo jaat, ma iwalenuul di kaŋenaku kata Emitay, di poop elobay yata yo yâyisolaam mata kapakaku ka uncaamutaam. Mata yoo yeekum sembaasu sa mbi êgawumuul jijuum jak di buruŋabu bata yo, di poop saasu sa mbi egawumuul jiyab miñamu majakaamu ma emmi mbi ewul bukanaku kata yo. 33 Jîmire kaan, înje îsiibowut ute miñ mata an. Îsiibowut bancaam bata an, palimo poop wañ wata an. 34 Be miwuul jîmire jak kaan, uŋenaw uwe wûmbaam wa igoroorumem ûgawolim uri di kupaalom ka ya ureboorum. 35 Miña'ume, iga mo ma îyisuul kaan mo majakum ma an peh agoroor ma aali abaj miñ ma mbi âanenum kûsukateenaku. Mata jake ma uwolhuwaal kaan Ata Emit Jesus moo naloom âanul: ‘Jawul an wah, jibaje hûpiira huhaŋ an bawuleri wah.’ ”