Pawlu nakay be Jerusaleŋ
21
Ña na ugam nuwaasoore, ban di kulaañ. Ña ûli nûjupo di busaanaabu ma ukay be di êsukay yata Koos; ûriiŋ hata kajom, nuhulh be di êsukay yata Rodis, ban nujaŋen be di yata Paatara. 2 Ûriiŋ nutoo'bo baabu bareesem be di êsukay yata Phenisiiya, ña nûjupo dô ma ukay. 3 Na ugam nuŋandene êsukay yata Sipri, nuwaa'yo kaŋen kumay ma ujaŋen be di bantaabu bata Siiriya, ma ukay ki uya di êsukay yata Tiiru, ta busaanaabu mbi buwalen wahaw wa buŋallom. 4 Di êsuka'uyu nutoo'dô kûynenaaku kaaku kata Jesus, ña nulako tanor di buko be kukaku hutok di kugaba. Be di sembaasu sata Buynum Bunapaabu, di keen Pawlu aatuba aan akay be Jerusaleŋ. 5 Be na hukahu hûrimmi ma ukay, kûynenaa'uku peh, di kupañooriil, di poop kuñooliil, di kûsisenoli; na ûcaam di hankahu ûriiŋ di hubeereeraahu, nûtiigen ma ûlhaw Emitay. 6 Ban nusaapoor to, ban ûli nûjupo di busaanaabu ma ukay, ña buko di kulaañ.7 Na ugam nûcaa'dô Tiiru, nujaŋen be di êsukay yata Petolemayda, ûriiŋ nukay ûsaapul bûynenaabu bata dô, ban nuga dô huk hanor di buko. 8 Ûriiŋ hata kajom, nûjupo ma ukay be di êsukay yata Sesareya, ûriiŋ nukay ki uwalen baabu âynaaw aaneyim Philiipi añaaŋenem elobay yâsuumaay, aamom ata di kûynenaaku hutok di egabaay ka bûynenaabu kata Jesus kujotum Jerusaleŋ. 9 Oo Philiipi nabaje ûjuraw ubakiir kâmirorutum yîine ka ya kañaaŋemmi bukanaku elobay yata Emitay.
10 Na ugatom kuk, âynaaw agam añaaŋenaaw ata elobay yata Emitay aaneyim Agabu, âcaalhumulom di bantaabu bata Jûdeya nâriiŋul; 11 na ârillom ta ommi naŋar hûkokowumahu hata Pawlu ma agenk ûkandumaw di uŋenaw watawool, ban naaniil: “Buynum Bunapaabu beene mo ma nki jûdewwi kugenk ata hûkokowuma'uhe Jerusaleŋ, ban di kuŋarool kuwul bukanaku kagawutum jûdewwi.”
12 Ña na ujammi ma âynaaw umu âlobolim umu, ûli di bûynenaabu bata bo, nuwaasiyenoor Pawlu ma aatuba aan akay be Jerusaleŋ. 13 Be Pawlu nâanoli: “Mata wa ma jikaawmem? Ma jiga bûyegetabu bûmbaam butooñoor? Înje, ta emmi ume, ntuwa jagek keb nikobem di jo, be palimo poop ma iket Jerusaleŋ mata Ata Emit Jesus.”
14 Ña ma uyetorutum d'oo, nuwalhoo'bo ma oonool: “Ata Emit aga non ma âkimmi.”
15 Na ugatom kuka'uku, ban nubandoor ma ukay be Jerusaleŋ. 16 Be kûynenaaku kaaku kata Sesareya di kûsisenoli be bo, kûriiŋ di kûŋaroli ki uwalen di eluupay yata âynaaw ata êsukay yata Sipri aaneyim Munason, aamom ata di bûynenaabu bapiyaabu.
Pawlu nâriiŋ Jerusaleŋ
17 Na ûrimmi Jerusaleŋ, bûynenaabu kata bo di kûkayil ki kûyaañuwoli di kâsuumaayaku. 18 Ûriiŋ hata kajom, nureboor di Pawlu ma ukay be baabu Tiyaagu ma nki kûjukoorul, ûriiŋ nutoo'bo yahaanay peh kata grîsiya. 19 Ña na Pawlu asaapiim, ban nañaaŋeniil peh maama Emitay egawoom ma agoroor di sîsukasu sata bukanaku kagawutum jûdewwi.
20 Na kujammi maama añaaŋeniim, ña buko peh di kusal Emitay. Be ban di keenool: “Âtiyoli Pawlu, aw nûmire kaan bukan kârimmi sînjunnaasu lhay kagam jûdewwi, kunebeje ban di buruŋabu bata Jesus, be koku ma kusoom para lit kûboñaku kata Moyses. 21 Be keene kujame kaan aw ya oon jûdewwi kammi sîsukasu sata bukanaku kagawutum jûdewwi, kubet kûboñaku kata Emitay; nooniil poop keetubi kuga kuñooliil huhaanaahu hata yîinaay; keetubi kusoh poop mûndeemaanamu mata jûdewwi. 22 Moo mbi ugawaal bu? Mata manooman mbi kujam kaan nûrillo ûde. 23 Be jake ma uga maama mbi ulobi. Kûynaaku ebakiir koku ute d'ûli kagam ban miñamu ma kuloom kaan mbi kuga be bata Emitay. 24 Moo, mbi ukay di buko ma nki jîbuyoor di Emitay, ban nuncaam miñamu ma mbi kuncaam ma kuweelho. Uga mo jaa, êsukay peh mbi kûmir kaan maama kujammi matayi ntuwa malhegen, mata ya uga poop non ma kûboñaku kata Emitay kuloom.” 25 Be mata bukanaku kagawutum jûdewwi kanebeem di buruŋabu bata Jesus, ûli nuboñii'ban kaytaku kaloom kaan: “Keetubi kutokoñ eluw yata encaam yabuji mata heenaay, keetubi kutokoñ kâsim, keetubi kutokoñ eluw yata encaam yakuuci, keetubi kukay poop kakumenaku.”
26 Ña na kûrimmi hata kajom, Pawlu nakay di kûynaa'uku ki kûbuyoor di Emitay, ban nakay be di Eluupay yata yo, ma nki âyisiil hukahu ha mbi kâbuyooraku katayiil di yo kubawo, ma mbi anoowan di buko awul opherta.
Jûdewwi di kusoh Pawlu
27 Ban na kukaku hutok di kugaba kata jâbuyooraju di Emitay kurem kabawo, jûdewwi kâcaalhumulom Aasiya di kujuk Pawlu oo di Eluupay yata Emitay, ña di kusullen êsukay peh ma kusohool, 28 ban ya kûŋaaŋulo ma kêenul: “Israyel jênenoli! Âynaaw ume nayuuŋoore ban âmbasuk peh ma yalhikiten bukanaku ma kuhuusul kûboñaku kata Emitay, di poop miñamu malobim mata Eluupay yata Emitay. Ban nâŋarul bukanaku kagawutum jûdewwi ki ânebejen dô ma asik eluupa'uye yata Emitay yanapaay.” 29 Ma kûlobummom, mata ma kujuum âynaaw ata Ephesu aaneyim Troophimu ma ya kureboorum di Pawlu di hânkijahu hata Jerusaleŋ, ña di gawiil noon manooman Pawlu nanebenebeem d'oo di Eluupay yata Emitay.
30 Ña êsukay peh yata Jerusaleŋ di ega gûulhaguulh, ma bukanaku kûteymul ubu kûriiŋul di kusoh dô Pawlu, ban di kûhuulool be tîyaŋ, ban di kubab sîtingaasu. 31 Ban di kûkin ma kubujool, be annahaanaw ata esellooraay najam kaan êsukay yata Jerusaleŋ kookan kûgagaroor. 32 Ña nâmeb cab esellooraay, di yahaanay yatayiil ma kukay be ta êsukay kemmi. Na êsukay kujuum annahaanaw, di esellooraay yatawool, ña di kuwalh jânagulaju jatawool.
33 Na annahaanaw umu ârintom, naan esellooraay kusohool ma kugenkumool kuseelaku kugaba, ban narink êsukay aaniil: “Âynaaw ume an bu? Kama wa nagawe?” 34 Ña buyooŋa'ubu bata bukanaku, bukaaku ya kûŋaaŋulo ma kulob maamu, kaaku di kulob maamu. Ña mata ma êsukay egam gûulhaguulh, ña annahaanaw umu aaliit asoh hârirahu. Ña naan esellooraay kukay di Pawlu be di êkorteelay. 35 Na kugam kûriiŋe di hûŋoolumahu hata eluupay, esellooraay di kuralhool mata ma êsukay ya kuñuusoorum ma kûkin kubujool, 36 ma ya kûŋaaŋulo kêenul: “Jibujool! Jibujool!”
Pawlu nalob di êsukay
37 Na kugam ma kunebejenool di êkuwarteelay, Pawlu nalob di annahaanaw ata esellooraay ma aanool: “Uñankiit nîkine uloba!” Ña annahaanaw umu narinkool aanool: “Kama aw nujame elobay yata greguwi? 38 Kama aw ntuwa âynaaw ata Ejiptu agam taate bûgagaroorabu di yahaanay yatoolaal, ma akay be di ekinkay di bukanaku kabujem bukan, kârimmi sînjunnaasu sibakiir (4.000)?”
39 Be Pawlu nalaañenool aanool: “Înje jûdew abajim di êsukay yata Taarsu yagam êsukay yâamak yata di bantaabu bata Siliisiya! Moo, uñankiit uwalhom bo ma ilob di êsukay.”
40 Ña annahaanaw umu naanool alob. Ña Pawlu nalhaalo ma ajuum di hûŋoolumahu hata eluupay, ban nâwiit kaŋenaku êsukay ma agawiil kupato. Nagam êsukay epatuwe, ña nalob di buko di elobay yata jûdewwi ma aaniil: