Aatuba jiga ejuu'di buul
2
Kutiyaay, non ma jîynemmi Ata Emit aamom Jesus Kristu, agam âyyaw ata majaaŋaamu, aatuba jiga bukan ejuu'di buul. 2 Moo, anaw ânebejuu'jaa da jemmi ma jîmeboorum oo ma âjupowulom jak, ban nâgawul sikopasu sata ûuru di kusinkaaku, ban aahu poop nânebejul âsukateenom âjupowulom wañaw wahallenaaw waruusulom, 3 ña di jihaŋ macookoor umu ahammi mâjupo jak, ma jeenool: “Bila ma uleeho ute tahammi majak.” Ban poop di jeen umu âsukateenom: “Aw ujuum utu!” Be mante di jeenool: “Uleeho ute di etaam di ûkandumaw wâtooli.” 4 Kama jiga jaa umu, jigawut ejuu'di buul? Moo, jiga mo jaa, miwuul magawem di batalenabu bajakutaabu di kunongooraku katawuul.5 Moo, kutiyom ka iboolaatum jitallhen. Emitay yoo ejotum kûsukateenaku kata di etaama'uye ma keeli kuga bukanaku kasaanumom di kâynenaku, ma mbi kulako di kâyyaku kata yo ka yemmi mbi ewul bukanaku kâkinyom. 6 Be miwuul ya jirembeliil. Kama ntuwa busaanumuwaabu kûlaamenewuum ma ya kuŋaruul be di ûyyaw wata batalenabu? 7 Kama ntuwa buko kûlobikoorem mata kañaaŋaku kajakaaku ka Emitay ewuluum?
8 Moo, jake ma jiga non ma kûboñaku kata di Kâyyaku, kammi di Baŋiicerabu bâñoyyaabu kuloom kaan: “Ûkin apaali non ma ûkinoorom.” Jiga mo jaa, di jiga jak. 9 Mata jiga jaa ejuu'di buul, di jîmir kaan miwuul magawem di kûbajumiñaku, ban di jitil di kûboñaku kata Emitay mata jigawut non ma kuloom. 10 Mata anaw asoom kûboñaku peh kapiyaaku, ban natil di kanor, ña natile di kûboñaku peh kata Emitay. 11 Mata Emitay yemmi: “Aatuba jikumen di an a jiyaboortum,” yoo poop yemmi: “Aatuba ubuj an!” Moo, palimo jikumenut di an, be nubuj anaw, nutile ban di kûboñaku peh kata Emitay. 12 Moo, mbi ya jilob, ban di jiga poop non bukanaku kugawem ka Emitay mbi ega batalenabu di kûboñaku kata yo kamellhenem an. 13 Mata bukanaku kâñankiitoriitum bukan, Emitay poop eetubi eñankiitiil na mbi egawiil batalenabu. Mata kañankiitaku ya kuhaat batalenabu.
Kâynenaku di bagawerabu
14 Kutiyaay, kama anaw âanul jaa oo anaw âynemmi di Emitay, ban agawut makeel âyisum kâynenaku katawool, soŋo kâynena'uku keeliye kupakenool? 15 Kama atiyuul, be mante âliinuul abajut jaa wah wata bûkoko, be mante wah wata huri huka'uhu, 16 ban an aahu ata di miwuul naanool: “Ukay kâsuumaay! Nki ubaj ma ûlhumbo, nubaj poop uri be kaŋ na mbi upooñ.” Ban awulutool wah wakeel wa mbi wenenool, ña majake bu mentom? 17 Mata anaw âynemmi keb, ban âgaworiit makeel, kâynenaku katawool koku ma kukeem.
18 An aahu naali âanul: “Aw anaw âynemmi, be înje ya iga wahaw wajakaaw.” Moo, ûyisom jaa kâynenaku katayi bagawut wah wakeel, înje nîyisi kâynenaku kûmbaam mata wahaw wajakaaw wa igawem. 19 Inja nûynene kaan Emitay yeemo yanor? Nukooŋe! Be uwollho kaan, kumalaku poop kûynene, poopii ya kuboboken. 20 Aw nûnuutuwe! Kama ûmirut kaan anaw âynemmi, ban âgaworiit wah wakeel wajake, kâynenaku katawool kujakut? 21 Kama ntuwa mata wahaw wa Abrawoŋ agam, wowakiimom ma Emitay yêenummi oo anaw acolum, na aŋaam añoolool Isaki ki abujeen di Altar be bata Emitay? 22 Nujuke, kâynenaku katawool kureboore di wahaw wa agam; mata wahaw wa agam, ugam ma kâynenaku katawool kûrir. 23 Moo, coohene non ma Baŋiicerabu Bâñoyyaabu buloom bêenul: “Abrawoŋ oo âynemmi Emitay, momakiimom ma yêenummi oo anaw acolum, ban di yêenul oo apaal yo.” 24 Jijuke, an ya acol di Emitay mata wahaw wajakaaw wa agawem, be ntuwa mata kâynenaku keb.
25 Moomu poop kaŋ ma añakanaw agam êkusumay aaneyim Rabi agam; naani oo anaw acolum mata wahaw wajakaaw wa agam, ma awalemmi emaasooraay kata Israyel yanŋool kakayum ki kûlasowul etaamay yatayiil, ban nagawiil ma kuyab buruŋ baabu ma kumellh.
26 Moo, non ma anaw mbi abajut huyiih naket, moomu poop kaŋ ma kâynenaku mbi kûyisuti di wahaw wajakaaw wa anaw agawem, kâynena'uku di kuket.