Usoh butumabu batayi
3
Kutiyaay, aatuba bukan kameeŋe di miwuul kûkin kuga bulhikitenaabu bata bukanaku, mata jîmire kaan ûli jagam bulhikitenaabu bata bukanaku, mbi ugawi batalenabu bahammi mâhaah. 2 Mata ulaal peh ya utilaal di wahaw wameeŋe, be ga jaa non anaw oomu to âtilorutum di elob, anaw umu, anaw a kâynenaku katawool kankum, ban poop naga anaw asohoorom. 3 Mata ûkinaa'jaa ma epilinjay ejam d'ulaal, nugawaal muhaañaayamu di butumabu bata yo, ña nooliyaal uŋaraa'yo be binoobin ba ûkinaam. 4 Moo, jilaso ma ebaarukay, palimo yoo êhahikoore, ban bûhututenooraabu di buñuus yo, be jiweenaju jata yo jagam jinŋet, jojaŋooneneyom ma ekay be ba annahaanaw ata yo âkimmi akay. 5 Moomu poop kaŋ ma hûlelempahu hugam; palimo ma hugam miñ minŋet di eniilay yata ajamaataw, be heeliye huga wah wâamak. Non poop non ma bujal beelim buga bâamak, be kâjaahalaaku kinŋet keeliye kubol bo.6 Moo, ûlelempaw poop non sambunasu; mata di ho majakutaamu mûcalhumewuum. Malhegen hûlelempahu miñamu mammi d'ulaal, be heeliye husik eniilay yata ajamaataw pooyo, ma hukajen hunoonahu pooho hatawool. Hûlelempahu hoo hûjimenahu hata sambunasu sâluwem bâlbal. 7 Ajamaat naaliye anuugen bânukureŋ peh, di basuwaabu, di bânukureŋ baabu bâhuuloorem, di baabu bata di mulhuwamu. Mata bukan kaaku kunuugene ban baabu. 8 Be an aaliit anuugen hûlelemp. Mata hoo miñamu majakutum, ma an aaliitum apaten, ban hohu ma hemmi huc busikabu babujem. 9 Di hûlelempahu nusalumaalem Ata Emit aamom Ampawolaal, di ho poop nulobumaalem kôji bukanaku ka Emitay êwwemmi ma kunaamoor di yo. 10 Moo, kutiyaay, jakut ma mbi butumabu banorabu bulob miñamu majakaamu, di bulob joon maamu majakutaamu. 11 Kama enkoloŋay yanoray, yeeli êbulul mumelamu mâleeliyaamu, di êbulul poop maamu mahiraamu? 12 Kutiyaay, kama buraahaayabu beeliye buwolh kumanguwa? Be mante bûsuumaayabu beeliye buwolh kunandeek? Moomu poop kaŋ ma enkoloŋ yeeliitum êbulul mumelamu mâleeliyaamu, di êbulul poop maamu mahiraamu.
Majaalhaamu malhegenumaayamu
13 Aymoom ata di miwuul ajaalhom, ban nâmiilanken? Jake ma anaw umu, âyis majaalhaamu matawool di wahaw wajakaaw wa agawem di bûyeget bajake, wâcaalhumulom di mâmiilankenamu matawool. 14 Be ga jaa non jâsiibuwikooraju, di masemaamu, di poop jangooŋutenaju joju di sîsigirasu satawuul, aatuba jical ma jisalooro ma jêenul jijaalhuwe. 15 Mata ûdu ntuwa majaalho mâcaalhumulom hatiya di emitay, be majaalhaa'umu mata ejamaatay kammi ube di etaamay, mâcaalhumulom di kumalaku. 16 Mata ta jâsiibuwikooraju, di jangooŋutenaju jemmi, kajamoor kûlakuworiit to, ban poop majakut peh ya mulako to. 17 Be majaalhaamu mâcaalhumulom hatiya di emitay, moo majaalhaamu manapum, ban ya mûŋarul kâsuumaayaku, di muga an a kujamoorem di an peh, di muga an abaj kanamulen, di muga an ahep, di muga an ma ya añankiit bukan, di muga an agawem wah wajake, di muga an âgaworiitum ejuu'di buul, di muga poop an âhooloororiitum. 18 Mata bukanaku kaakum kâsuumaayaku, ya kuga êsukay kubaj kâsuumaay, moo, Emitay poop ya egawiil kuga bukanaku kacolum.