Emitay êkinkin bukanaku kajamem di yo
4
Kama bûñakoora'ubu, di bacecabu bammi tutaru tatawuul, ûbey bûcaalhumulom? Ntuwa di kânongikooraku kammi ma kûkuujem di ûyegetaw watawuul bûcaalhumulom? 2 Mata miwuul ya jîsiibo wah lhay, be ban jîbajoriit makeel; ya jibuj bukan, di jigooŋuten; ban jîbajoriit makeel; di jiga bûñakoorabu, di jicec, ban jîbajoriit makeel, mata jîlhaworiit wo Emitay. 3 Na mbi jilhaw Emitay, jîbajoriit wah, mata jîlhaworiit yo di ûyeget wajake, mata wahaw wa jilhaweyom, wahaw wa siniilasu satawuul sîkimmi. 4 Miwuul bukanaku kâynentum Emitay! Kama jîmirut kaan, bukanaku kanongoorem keb mata wahaw wata ube di etaamay, kûjamoororiit di Emitay? Malhegen anaw âkimmi anongoor keb mata wahaw wata ube di etaamay, keetubi kujamoor di Emitay. 5 Kama soŋo pîya jeene, Baŋiicerabu Bâñoyyaabu buloo'mo ebeebel di kaan: “Buynumabu ba Emitay egam d'ulaal, ya bûpiir d'ulaal?” 6 Be kañankiitaku ka Emitay eñankiitolaam kuhahuhah. Momakiimom ma Baŋiicerabu Bâñoyyabu bûlobummi kaan: “Emitay êkinoriit bukanaku kagawooruwem, be ya ewul hûpiira bukaaku kâgaworuworiitum.”7 Moo, jijam di Emitay ma jijuum tir be bata diyaabu, ma mbi yeeli eteyuul. 8 Jîhug Emitay, ma mbi yoo poop êhuguul. Jikulhen uŋenaw watawuul miwuul jata kûbajumiñaku; miwuul poop ja ûyegetaw watawuul wemmi ma ûlandeelum, jikulhen sîsigirasu satawuul. 9 Jiga ñânkiiteni, di jikaaw ma jilhooŋooro. Di jiga poop kâsuumaayaku katawuul ma kulaañ kuga ekaaway; êsuumaay yatawuul, di elaañ poop ega ñânkiiteni. 10 Aatuba jigawooro kayooŋ Ata Emit, ma mbi oo agawuul hatiya.
Aatuba an alob kôji be baabu di apaalool
11 Kutiyaay, aatuba an âlobikoor apaalool. Mata anaw âlobikoor jaa atiyool, be mante nawulool kûbajumiñ, nâlobikoore be bata kûboñaku kapiyaaku. Moo, anaw âlobikoorum kûboñaku kata Emitay, anaw umu agawut ban anaw ajamem di ko, be oo atalenaaw ata ko. 12 Mata Emitay yoo diyonyo keb egam kûboñaku kata yo, yoo poop keb egam atallenaaw. Ban yoo keb eelim epaken an, yoo poop eelim ekajen an. Moo, aw aymoom jawulem kutiyi kûbajumiñ?
An aaliit âmir mata kajom
13 Jitallhen, miwuul jaanem: “Mante jaat, mante kajom, mbi ukaayaal be êsukay yuman, ma nki ugawulaa'bo kajaañ kanor ma ulañooraal ma mbi ubajaal bancaamabu huc.” 14 Be ban jîmirut wahaw wa mbi ugawuul kajom. Kama ajamaataw wah wakeel? Mata ajamaataw, aga poop non hakoor hakooretem, be ban heetubi hupiyo di hunep. 15 Momakiimom ma mbi ya jêenum: “Sûum di Emit, uroŋaa'jaa, mbi ugawaal wah uman, nugawaal wah uman.” 16 Be miwuul ya jigawooro mata ma jîynenoorom. Moo, banongeroo'bu bata jâynenoruwaaju, bujakut. 17 Moo, anaw aalim aga jak, ban agawut mo, anaw umu nabaje kûbajumiñ.