Bukanaku kasaanumom
5
Moo, miwuul jasaanumom, jitallhen! Jikaaw ma jilhooŋooro, mata buhiiraabu mbi bûlowumuul! 2 Mata husaanumahu hatawuul hohu ma hukuuñum, wañaw watawuul bateepaabu buriwo ban. 3 Ûuru, di praata yatawuul, mugeesooraamu mbi busoo'yo, ban mugeesoora'umu mo ma mbi bûyisuul kaan, mo ma mbi sambunasu siri siniilasu satawuul. Ban husaanumahu hatawuul, miwumu ma jîmebuhom di kuka'uke kûbanumaku. 4 Jitallhen ma bancaamabu bata bukanaku ka jibommi ejalay di utondaaw watawuul, ban jincamutiil, ma bûŋaaŋuluwem di mo? Ekaaway yata bukana'uku kajaluum, êriiŋe di ûjaŋayaw wata Ata Emit, Ahammi Sembe Wah Peh. 5 Mata miwuul, miwumu di eroŋay yata mâsuumaamu baabe di etaamay, poopii siniilasu satawuul silaañe ban siga non sata ûncaam wakurim ma mbi ubuji. 6 Miwuul, ya jiwul kûbajumiñ bukanaku kabajutum kûbajumiñ, di jibuj poop bukanaku kâmirutum makeel, mata ma keeliwutum kumellhoor.Jimunten di hûlaamahu
7 Kutiyaay, jimunten be na mbi Ata Emit âriiŋul. Jijiker non ma buwañaabu bumuntenem. Ya kumunten ma kukob esepeyay ya kubeem, ma eyab mumelamu mata emitay mata bûriiŋaabu, di mata kabanaaku ma mbi kujal ejalay yajakum. 8 Miwuul poop mo ma mbi jimunten, ma aatuba jibeño, mata Ata Emit nare kâriiŋul.
9 Kutiyaay, aatuba mbi ya jikeesuwoor, ka mbi Emitay egawuul batalenabu. Mata atalenaaw nare kâriiŋul. 10 Jiwolho maama buñaaŋenaabu bata kûboñaku kata Emitay ya kumuntemmi na ya kuñaaŋemmi mata Ata Emit. Moo, mbi jiga poop non buko, ma jimunten na mbi jipaam di hûlaamahu. 11 Malhegen ya oonaal bukanaku kamuntemmi di hûlaamahu, kubaje hûpiira. Moo, jijame non ma Jo amuntenemmi di hûlaamahu. Jijuke poop maama Ata Emit agawoom di hûbanumahu. Mata Ata Emit, kañankiitaku katawool, di mâsuumamu matawool mâamak.
12 Moo, kutiyaay, aatuba mbi ya jinuur jiya hatiya di emitay, palimo jiya di etaamay, palimo poop jiya di wah wakeel. Moo, mbi ya jêenul keb aawo, nagam aawo, di jêenuu'poop see, nagam see, ma aatuba mbi Emitay elesuul.
13 An aahu ata di miwuul ahiir jaa, nalhaw Emitay. An aahu poop âririgen jaa, nayeeŋ uñaaŋaw ma asal yo. 14 Be an aahu ata di miwuul âjuut jaa, nâwoolul presbiteruyi kata grîsiya ma kulhaw Emitay be batawool, ma kusaasool mûkiramu di kañaaŋaku kata Ata Emit. 15 Mata kalhawaku kata Emitay kalhawim di kâyneneku, mbi kuga anaw umu âju. Ña Ata Emit, nabuunenool, ban poop abaa'jaa kûbajumiñ, di kupasi. 16 Moo, mbi ya jirejoor kûbajumiñaku katawuul, ban di jilhawoor Emitay be batawuul ma ebuunenuul. Mata kalhawaku kata anaw acolum di Emitay, ya kubaj sembe sâamak; ban ya kujuki mata ko.
17 Mata añaaŋenaaw ata kûboñaku kata Emitay aaneyim Êliyas, oo poop ajamaataw non ulaal. Be nalhaw Emitay ma etuba êlubul, elubuloot ujaañaw ûhaaji, di kulheeŋaku hutok di hanor. 18 Ban nalhaw yo joon, ña di êlubul ma muriyaayamu mubaj di etaamay.