KAYTAKU KA
TIYAAGU
AŊIICUM
Tiyaagu nasaapiil
1
Înje Tiyaagu jagam agorooraaw ata Emitay, di Ata Emit aamom Jesus Kristu, înje emmi ma îsaapewuum di miwuul jagam sîbajoorumasu saamom kunŋen di sigaba sata Israyel sammi ma siwaasoorum di etaamay peh.Kâynenaku di hûlaamahu
2 Kutiyaay, na mbi jilo di hûlaam hakeel, di jîririgen. 3 Mata jijuum jaa tir di hûlaamahu ii di jihaat ho mata kâynenaku, mbi jihaŋ mabaj humuntenahu. 4 Moo, jake ma humuntenahu hatawuul huhaŋ mabaj sembe, ma mbi jiga bukanaku kalhegenumaayaku, ka kâynenaku kankum, ka makeel metumbi mumanki. 5 Be ga jaa non an akeel di miwuul majaalhaamu mumankiyool, nalhaw mo Emitay, mata yoo êsunsuum an, ya ewul anoowan wah di bûyeget bâsuume. 6 Be anaw umu mbi alhaw yo di kâynenaku, ma aatuba amantiir, mata anaw alhawem Emitay namantiir, oo agam poop non waajeelaaw wa ehentelaay eñuusem be binoobin ba etekem be. 7 Moo, anaw agam non umu, aatuba âanul Ata Emit mbi awulool wah wakeel wa alhawoom, 8 mata anaw ata kunongooraku kugaba, ya âlandeel di wah peh.
Kûsukateenaku koo di kusaanumaku
9 Anaw agam âynenaaw âsukateenom, na mbi Emitay êcaalhellool di hûsukateenahu, nâririgen. 10 Aahu asaanumom poop, na mbi Emitay egawool di hûsukateenahu, nâririgen. Mata nâmire kaan an âpiyuworiit non bûrumpen bata mahos. 11 Mata na mbi jaley âcaalhul ma arum, di hâah, mahosa'umu di mubolen, ña bûrumpenabu bata mo di bûlowul ma majakaamu mata bo mubawo. Moomu poop kaŋ ma anaw asaanumom abolenem, oo di hulanñoorahu.
Jijuum tir nata hûlaamahu
12 Anaw amuntemmi di hûlaamahu ma âynen Emitay, nabaje hûpiira. Mata na mbi hûlaama'uhu hubawo, mbi ayab ênkuuhaay yata bûgaalabu yata eroŋay ya Ata Emit ammi mbi awul, yaamom eroŋay ya ammi mbi awul bukanaku kâkinyom. 13 Na mbi anaw alo di kabuntenaku, aatuba âanul: “Emitay egawommi ilo di kabuntena'uke.” Mata an aaliit aga yo elo di kabunten di miñ majakut, ban poop yoo êgaworiit an alo di kabunten. 14 Be anoowan ya alo di kabunten mata kânongikooraku kata wahaw wajakutaaw wammi di êsigiray yatawool. 15 Mata na mbi kânongikoora'uku kata wahaw wajakutaaw kuhaatool, di kutahool di kûbajumiñaku, na mbi kûbajumiña'uku poop kukooben, di kuŋallool eketay.
16 Moo, kutiyaay aatuba jibuntenooro. 17 Mata wahaw peh wa ubajaam, di poop waawu peh wajakaaw wa ubajaam, hatiya di emitay ûcaalhumulom, baabu di Ampawolaal aamom akiim Majaaŋaamu âtiinoreriitum, ban poop emuucen elee'doo. 18 Mata di hunongahu hata yo, ebajumolaam di elobay yata yo yalhegenumaayay, ma mbi ooliyaal ugawaal bukanaku kûtiyaaraku di wahaw peh wa êwwemmi.
Mbi ya jiga non ma elobay yata Emitay eloom
19 Kutiyaay, mbi jiwolho wahaw uwe: an peh jake ma ahaken kajam, be aatuba ahaken kalob, aatuba ahaken poop kabirik. 20 Mata hubrikahu hata ajamaataw, hûgaworiit an ma aga jak non ma Emitay êkimmi. 21 Moo, jibet wahaw peh wasemaaw, di waawu peh wajakutaaw, ban di jiwalen ûyegetaw watawuul ma jisoh elobay yagiitenim di sîsigirasu satawuul, yabaam sembe ma epaken sâroorasu satawuul.
22 Moo, jake ma jiga bukanaku kajamem elobay yata Emitay, ban di kuga non ma eloom, mata jiga jaa bukanaku kajamem keb, miwuul mabuntenooruwem. 23 Mata anaw ajamem elobay yata Emitay keb, ban âgaworiit non ma eloom, oo agam poop non anaw aŋaam kajukoorumaku ma ajukooro 24 ma âmir maama aanom, ban na mbi aban, nâwuken maama aanom. 25 Be anaw asoom kûboñaku kata Emitay kagam kulhegenumaayaku, kaamom kamellhenem ajamaat, ma agawut anaw ajamem ban nâwuken, be ya aga non ma kûboña'uku kuloom, anaw umu mbi abaj hûpiiraahu di wahaw peh wa mbi aga.
26 Moo, anaw âanuu'jaa oo omu di buruŋabu bata Emitay, ban asohut butumabu batawool, anaw umu nabuntenooruwe, ban poop buruŋa'ubu ba ammi di bo, asoo'bo ebeebel. 27 Mata buruŋabu bacolum dâ kûbajumiñ kuleem ba Emitay yaamom Ampawolaal êkimmi, beene: oonenaal bukanaku ka kubajayiil kukeem ban, di bûkutuwaataabu kagam yaaraay kammi ma kûlaamum, ban poop nujaamuwaal makuuñaamu mata di etaama'uye.