Ugawaal Emitay ma êririgen d'ulaal
13
Moo, jenken ma jîkinoor non batiyaay. 2 Jiwolho kawalen emaasooraay saŋuul. Mata bukan kaaku mo ma kugam di kuwalen saŋiil kumalaakaku bâmirut mo. 3 Di jiwolho bukanaku kammi di sikullhasu, ma jiga non miwumu ma jikullhim poop di manor di buko; kaaku kammi ma kuleseyim di buko, di jiga poop non miwumu ma jileseyim di manor di buko.4 Di jisoh jak ûyabaw watawuul. Elalay yata bukanaku kayaboorum, mumulet bi esemeni di kûbajumiñaku. Mata Emitay mbi eles bukanaku kâgawikoorem ma ya kukay kâmooraaku.
5 Aatuba jîkin ma kangoŋaaku kata bancaamabu kuhaatuul, be jîririgen di wahaw wa jibaam, mata Emitay moo eloom yêenul: “Eetubi iwalhureruu'bo, eetubi ibetureruu'bo poop.” 6 Momakiimom neeliye ilob bâkoliit ma êenul:
“Ata Emit oo aanenaaw ûmbaam,
ajamaataw wa naalim agawom?”
7 Jiwolho yahaanay yatawuul kañaaŋenuum elobay yata Emitay. Jinongoor maama kusoom buruŋabu bata Emitay; moo, jisoollhen kâynenaku katayiil.
8 Mata Jesus Kristu oo anaw anoraw ata huken, di jaat, ii be nanoonan. 9 Aatuba jîkin ma bukanaku kubuntenuul di balhikitenerabu batayiil, ma kûcaalhenuul di buruŋabu ba jemmi di bo. Be haŋ majak ma sîsigirasu satawuul sîlhiŋ di kañankiitaku kata Emitay, ma aatuba jisoollhen mûndeemaanamu mata wahaw wariyeyim, maaliitum muga makeel bukanaku kasoomom.
10 Ulaal nubajaale Altar yaayu ya bumaaŋenaabu bata Emitay kagoroorem di bûngungabu bâñoyyaabu, kuwuluti buruŋ ma kutokoñ wahaw wâwaasenidom. 11 Mata Annahaanaw âmakaaw ata bumaaŋenaabu bata Emitay, ya aŋar hûsimahu hata uncaamaw be tiŋatu tahammi mâñoyyi ma nki awaasen kûbajumiñaku, be uncaama'uwu ya ureemeni tîyaŋ di hankahu. 12 Momakiimom poop ma Jesus âketummi tîyaŋ di hankahu, ma mbi aali aga êsukay kunap di hûsimahu hatawool. 13 Moo, ukaayaal ki ûhugaalool tîyaŋ di hankahu, ma nki ûlaamaal di manor d'oo non ma âlaamum matoolaal. 14 Mata ulaal ubajutaal hukin di etaama'uye ha mbi hulako to be nanoonan, momakiimom ma mbi upaamumaal haahu hâreesewuum. 15 Momakiimom hurim Jesus Kristu, mbi ya usalaal Emitay nanoonan. Ma jasala'uju mbi ya jiga non hûsiika hata di utumaw watoolaal, hâyisum di kaan nûynenaale kañaaŋaku kata yo. 16 Aatuba jîwuken kaga jak, di poop janenooraju, mata wahaw uwu ugawem Emitay ma êririgen.
17 Moo, jijam di yahaanay yatawuul, di jiga poop bukanaku kâsummi kûlob be batayiil, mata kûbeñuworiit kacookooruul, mata buko mbi Emitay erink mata sâaroorasu satawuul. Di jeeneniil poop ma mbi ya keeli kuga bugoroora'ubu di êsuumaay, ma keetubi kuga bo sîsigirasu satayiil ma sîhaahum, mata ga jaa umu, leetubi jakuul makeel. 18 Moo, jenken ma ya jilhaw Emitay be bâtooli, mata ûli nûynene di kaan ûyegetaw wâtooli wowu ma usetum, mata ma ûkimmi uga wah peh jak. 19 Jenken poop ma jilhaw Emitay di kañakat be baabu d'înje, ma mbi eeli ibaj buruŋ ma îlaañul cab be baabu di miwuul.
Hurimahu hûbanumahu
20 Moo, nîkine ma Emitay yakiim kâsuumaayaku, yalhaalellom Ata Emit atoolaal aamom Jesus Kristu di kuketaaku, agam Âtekenaaw âmakaaw ata sîgaraniinaasu, âjuumenummi yaŋaayay ya agam d'ulaal di hûsimahu hatawool, 21 ma mbi eeli egawuul ma jiga bukanaku kanapum be bata wahaw peh wajakaaw, di egawuul poop jeeno non ma yoo êkimmi mata Jesus Kristu, ma kañaaŋaku katawool mbi kusali be nanoonan. Amiin.
22 Moo, kutiyaay, nilhawuul ma jimunten ma jisoh elobay yinŋeta'uye ya iŋiiculuum ma iwaŋulenuul. 23 Mata jîmire di kaan atiyolaal Timootiw nâcallho ban di ekullhay. Moo, âriiŋaaliwuu'jaa, mbi een îkayil bi iyuugenuul nûreboorul d'oo.