Emitay ya ewaŋ kuñool yo
12
Moo, ulaal peh, di poop bukanaku kammi ute ma kuŋoomenolaam non uwiiñ, uhankaal wahaw peh wagolimbenewolaam, di kûbajumiñaku kahulutum kagenkolaal; ma uteyaal di sembe ma ukaayaal be kayooŋ. 2 Moo, ugawaal kûkilaku katoolaal di Jesus, mata kâynenaku katoolaal d'oo kûcukumulom, d'oo poop kûwuñenummi. Mata, mata mâsuumamu ma ajuum kayooŋ, momakiimom ma âmuntenummi di eketay yata di êkrusay, ma arembeel ñipuñaañu ñata no. Moo, mowme omu ma aleehom kaŋen kûrir di hulhikahu hata Emitay.3 Jinongoor maama oo amuntemmi di bukanaku kâlhapitaaku kâsuumutoom. Moo, aatuba jibeño ma jilaañ kujeeŋanda. 4 Mata di kâkuujaku ka jîkuujem di kûbajumiñaku, an âlaamorut nakeel poopii nâsim. 5 Kama miwuul jîwukene ban maama Emitay elobuum ma êtikenuul non kuñool yo ma yeenuul:
“Añoolom, aatuba urembeel na mbi Ata Emitay aceceni,
aatuba ubeño na mbi awaŋi.
6 Mata Ata Emit ya ececen anaw a oo aboolaatum,
ya ânaguu'poop an peh a oo asoom non añoolool.”
7 Moo, hûlaamahu ha jîlaamem di ho, hata ma mbi jicol. Mata Emitay yoyu ma esohuum non kuñool yo. Kama aŋil bu, a ampawool âwaŋoriitum? 8 Moo, ga jaa non jîcecenoriiti non ma aŋil peh ata Emitay aceceneyim, ña non kama miwuul ntuwa kuŋilaku kata di eluupay, be miwuul kuŋilaku kata tîyaŋ. 9 Mata simpawolaal poop kabajolaam di kumuuma'uke ya kuwaŋolaal, be ya ujamaal di buko. Moo, mata wa ma ooliitaam ujamaal di Ampawolaal ata hatiya ma mbi ooliyaal uroŋaal? 10 Mata simpawolaal kabajumolaam, ya kuwaŋolaal kukaku kinŋet non ma buko kûkimmi; be Emitay ya ececenolaal ma yeenenolool ma mbi ooliyaal ugawaal bukanaku kanapaaku non yoo. 11 Malhegen an peh awaŋim, nownu leetubi sûumoo'no, mata bûyegetabu batawool mbi bûgun. Be anaw umu awaŋim, leetubi piyo, bagawerabu batawool di bucol, nabaj kâsuumaayaku.
Kûcecenaku kameeŋe
12 Moo, jîtiken uŋenaw watawuul wammi ma ûlaamum, di jîtiken poop kûjuulaku katawuul kabajutum sembe. 13 Ma jirees di uruŋaw warem kerebeb, ma aatuba mbi bukanaku kâjankisem, kuhempeleŋo jâjankisaju.
14 Jiga poop kâsuumaay di bukanaku peh, di jipaam poop ma jibaj eroŋay yanapum, mata anaw abajutum eroŋay yanapum, mumulet bi ajuk Ata Emit. 15 Jijaamo ma aatuba mbi an akeel abet kañankiitaku kata Emitay. Di jijaamo poop ma aatuba mbi huhaar hâtaliye hûleepul di tutaru tatawuul, di hûlaamenuul ma husik bukan kameeŋe. 16 Di jijaamo poop ma an akeel ata di miwuul aatuba aga anaw âgawikoorem, be mante ahuusulem wahaw wata Emitay non Êsawu, anommi hiŋahu hatawool hata aŋilaw âtiyaaraw mata wahaw wata huriyahu. 17 Ban jîmire kaan, na agam ban nâkin ma ampawool añaanool ma mbi abaj hûpiiraahu, be añaanutool mata abajut buruŋ, palimo ma apanhom di mukulamu.
18 Malhegen miwuul ntuwa hurimbiliŋahu haalim hugori ha ya hâlum di emuucenay, di bûhututenooraabu, 19 di kârimaku ka ya kârimim, di poop hurimahu ha ya haloom, jîhugum nom bukanaku kata Israyel, kajammi hurima'uhu di kulhaw ma hetuba hulob joon di buko. 20 Mata ma kûkolim hurimahu halobim di kaan: “Palimo encaamay egore hurimbiliŋa'uhu, mbi ebujummi kuwaaliisaku.” 21 Malhegen wahaw wâkoliyenim kujuunom, poopii Moyses nâanul: “Înje nîkoliye, poopii nibobokene poop!”
22 Be miwuul jîhugum hurimbiliŋahu hata Siyoŋ, hata êsukay yata Emitay yaroŋaay, yagam Jerusaleŋ yata hatiya da kumalaakaku katoom sînjunnaasu lhay kemmi. 23 Mata miwuul jêemim di kâmebooraku kata kuŋilaku kâtiyaaraku kata Emitay, ka uñaaŋaw watayiil wemmi ma uŋiicim hatiya, ma jîhug Emitay yagam atalenaaw ata an peh, di bukanaku kata uynumaw wacolum mata ma kunapum. 24 Di jîhug poop Jesus, agam Apankaaw ata yaŋaayay yunkulay, akiim hûsimahu hâhipim haloom mata wahaw wahammi wata hûsimahu hata Abel.
25 Moo, jijaamo ma aatuba jilat katallhen anaw ammi ma alobem. Mata bukanaku kalatum kajam anaw aloom di buko ute di etaamay, buko kumelhutum, benkiteemo ulaal, ulaal balateraal anaw alobulom d'ulaal hatiya di emitay? 26 Mata nownu hurimahu hata Emitay hugagam etaamay ma eboboken, be jaat di yêenul: “Haahe joon ntuwa etaamay keb mbi iga ma eboboken, be, be di hatiya di emitay.” 27 Malhegen eloba'uyu yoo êyisolaam joon di kaan, wahaw wâwwenim, mbi ûyikigeni ma ûbuyi, ma waawu waaliitum ûyikigeni ulako to.